মথি 8
8
আনুংগে সানাসি তয়ক কংলিরি
(মার্ক ১:৪০-৪৫; লূক ৫:১২-১৬)
1যীশু যাখা তংগা সাকলেতি য়াংখা লুঃউম্যারোচা যীশু নক্কা নক্কা লৈকেলিইরি। 2য়াং আখিংমা আনুংগে সানাসি তয়ক যীশুগো হ্রিইখুলো প্রলিইরি, “আস্যাং, কোবাংমা ছেংদা হিকগি, ঙাগো আকং প্যাংনৈংরি।”
3যীশুচা য়াংসুউগু আলাকনা ম্হেংরো প্রলিরি, “ঙা য়াংচারা লুঃরি, নাং সেংস্যাংস ফ্রঃ।” খ্যাং খ্যাং আনুংগে লুঃউচা আকং ফ্রইলিইরি। 4যীশু য়াংসুউগু প্রলিইরি, “ক্রি, দিঃ চাঃগাগু তয়ককোলি মপ্রগি, প্রফুঞ্যংছুগি ফুংগ্রিইমা লাঃলো প্রাঃলঃ, অর মোশি যা আঃনা পিইরো হিকরিলি-য়াংচাঞ্যং হ্লুলৈই। য়জংছুগি লুঃউরোবামা সাকসি ফ্রইফুচাগা, নাং কংব্যা।”
চৈবু ক্যুয়েং তয়ক কেইংমালিইরি
(লূক ৭:১-১০)
5নক্কা যীশুচা কফরনাহূম ম্রুদুঃ ওয়ংলিইরি। য়াংখা রোমীয়মা চৈবু তয়ক যীশুবাদুঃ লাঃরো আতংবেং থাঃরো প্রলিইরি, 6“আস্যাং, ঙামা ক্যুয়েংচা ওয়িইরামা ক্যারো হিকরি। য়াংসুউ কাইংথা সিইরো কংগং ওয়িদানা খেংরো হিকরি।”
7যীশু য়াংসুউগু প্রলিইরি, “ঙা লাঃরো য়াংসুউগু কেইংমাজিফুয়াং।”
8য়াং চৈবুচা যীশুগো প্রলিইরি, “আস্যাং, কোবাং ঙা ইংদুঃ ওয়ংলৈঅং, ঙামা ইংচা থঃমেতেং। খুনাংনারা প্রফি, য়জং প্রগিবাং ঙামা ক্যুয়েংচা কংলিইমিব্যা। 9ঙা দিঃ চাঃগাগু সিকরি, যাফুলিছুগি ঙালি লুঃউ চাঃগানা অলুক লুকরারি অর ঙামা সুরুয়িইরোলি ঙা চাঃগানা লুকতি। ঙা তয়ককো ‘লাঃলি’ প্রগি য়াংসুউ লাঃরি, অরতয়ককো ‘লাঃ’ প্রগি য়াংসুউ লাঃরি। ঙামা ক্যুয়েংগু ‘দিঃচা লুক’ প্রগি য়াংচা লুকতি।”
10যীশুচা দিঃ চাঃগাগু ক্রারো এংঅলিইরি অর যাসুউরো যীশু নক্কা নক্কা লৈকেতি য়াংসুউরো প্রগেলিইরি, “ঙা নাংরোগু আম্হেং প্ররি, ইস্রায়েলীরোমা দিঃ পুয়েং আক্যুংগ্রিই তয়কমালি ঙা মাম্রাংসিই। 11ঙা নাংরোগু প্ররিচাগা, আহ্রিইফাক-আনকফাক্কা লুঃউম্যারো লাঃমি অর অব্রাহাম, ইসহাক অর যাকোবনা গংখাং ফুংমা চাঃফু থৈংগেমি। 12ছুগি যাসুউরো গংখাং ফুংদুঃ তাকফু চাঃগা, য়াংসুউরোগু মঃমৈই আঃরাদুঃ ঙাং বৈফু। য়াংদেমা লুঃউরোচা ঙুঃগেমি অর ওয়িদানা খেংরো সুওয়ানা সুওয়ানা ক্রুইকেমি।”
13নক্কা যীশু য়াং চৈবুগু প্রলিইরি, “কোবাং লাঃলি। কোবাং যা পুয়েং ক্যুংরিলি, য়াং পুয়েং ফ্রইলিই।” প্ররি খ্যাং খ্যাং য়াংসুউ ক্যুয়েংচা কেইংমালিইরি।
অরলি লুঃউম্যারো কেইংমাগেলিইরি
(মার্ক ১:২৯-৩৪; লূক ৪:৩৮-৪১)
14য়াং নক যীশু পিতর ইংমা লাঃরো ম্রাংলিইরি, পিতর য়কখামাচা আনিং মকংলো ওয়িইরো হিকলিইরি। 15যীশুচা য়াংসুউ আলাককো ম্হেংলিইরি অর য়াংসুউ আনিং মকংচা কংলিইরি। য়াংখা পিতর য়কখামা থাঃরো যীশু আচাঃ-আসক য়াংলিইরি।
16নিং ওয়ংখা লুঃউরোচা মকং নেঃ কৈংচা লুঃউম্যারোগু যীশুবাদুঃ য়ুউ লাঃগেলিইরি। যীশুচা খুঃনাং চাঃগানা য়াং সানাসিরোগু আকং প্যাংলিরি অর যাসুউরো আনিং মকং হিকলিইরি য়াংসুউরো আলুংসুউ কেইংমাগেলিইরি। 17দিঃচারো ফ্রইরি আক্রংগা রিসিক যিশাইয় যা প্রলিইরি, য়াং চাঃগাচা আব্রিচুং ফ্রইঅং:
য়াংসুউচা ঙুরোমা চিই ঞেচাগু তদৈং প্যাংলিইরি,
অর ঙারোমা রঃগাগু কংজিলিইরি।
18যীশুচা কুঃ নেংবুনেংবা লুঃউ আম্যাগ্রিই ম্রাংরো, তিবিরোগু ম্রঃ তাফাক কেইংদুঃ লাঃফু আঃনা পিইলিইরি। 19য়াংখা কেইং ছারা তয়ক লাঃরো যীশুগো প্রলিইরি, “ছারা, কোবাং যাদুঃ লাঃফুলি, ঙালি কোবাংনা আতু য়াংদুঃ লাঃফু।”
20যীশু য়াংসুউগু প্রলিইরি, “মু খুয়িইমা তুওয়ং হিকরি অর ঙ্হাকমা আঃস হিকরি, ছুগি মনুসুওয়া সাঃমা আগং খ্যাফুচা তেরেমালি মিহিক।”
21তিবি আতুওয়ংমা অর তয়ক লাঃরো যীশুগো প্রলিইরি, “ছারা, হ্রিইগা ঙামা ফাখাংগু সাংগ্রুজং লাঃফু পিই।”
22যীশু য়াংসুউগো প্রলিইরি, “আসিইরো য়াংসুউরোমা আসিইরোগু সাংগ্রুলিইমি, ছুগি নাং ঙা নক্কা লাঃ।”
লিই-মদৈংগু তেংজিচা
(মার্ক ৪:৩৫-৪১; লূক ৮:২২-২৫)
23নক্কা যীশুচা লং তলংমা তাকলিরি অর য়াংসুউ তিবিরোচা যীশুনা আতু লাঃখাগেতি। 24ব্রুং প্যাংরো ম্রঃমা কংগং আগ্রি লিই-মদৈং থাঃলিরি, য়াংখা লংমা লাঃরো রিই লৈংচা আকলিইরি। যীশুচা ওয়িই হিকলিইরি। 25য়াংখা তিবিরোচা যীশুবাদুঃ লাঃরো, যীশুগো নুঃউরো প্রগেলিইরি, “আস্যাং, কিঃছি; ঙুরোগা সিইফুব্যা!”
26য়াংখা যীশু য়াংসুউরোগো প্রলিইরি, “আক্যুং মিহিকরো, যাফু নাংরো ক্রককেতিলি?”
য়াং নক যীশু থাঃরো লিইনা মুদৈংগু হকলিরি। য়াংখা আলুংচা তেং লাঃখারি। 27য়াংচাগো ম্রাংরো তিবিরোচা এংঅরো প্রগেলিইরি, “দিঃ লুঃউচা যা পুয়েং লুঃউলি, লিইনা ম্রঃলি দিঃ লুঃউ চাঃগাগো নাথংরি!”
মকং নেঃ কৈংসারো কেইংমাগেলিইরি
(মার্ক ৫:১-২০; লূক ৮:২৬-৩৯)
28নক্কা যীশু ম্রঃ কেইং কুউরো গাদারীয়রো নিংরাদুঃ লাঃখারি। য়াংখা মকং নেঃ কৈং হিকচা লুঃউ ন্হইয়ক, সাংখ্যুয়েংগা থুওয়করো যীশুবাদুঃ লাঃলিইরি। 29য়াংসুউরো কংগং ক্রকফুয়ি হিকলিরি, তয়কলি য়াং লেংগা লাঃফু মনৈং। য়াংসুউরো অঃরো প্রগেলিইরি, “অ থাওরা ফোরা ঈ সাঃ, কোবাংনা ঙারো যা অলুলিঃ? আখিং মফ্র হ্রিইগা কোবাং ঙারোগো ওয়িদানা পিইফু লাঃচা লঃ?”
30য়াংসুউরোগা তেকে আওয়িইমা ওয়াক তুরুয়িই ক্যং হিকলিরি। 31মকং নেঃরোচা যীশুগো আতংবেং থাঃগেলিইরি, “কোবাংরা ঙারোগু খামাখা রুওয়ে খ্যাংরিছুগি, থুঃউ ওয়াক আরুয়িইদুঃ রুওয়ে।”
32যীশু য়াংসুউরোগু প্রলিইরি, “য়জংছুগি লাঃলি।” য়াংখা মকং নেঃচা থুওয়করো ওয়াকরোদুঃ লাঃখাগেতি। য়জংছুখা য়াং ওয়ক আরুয়িইচা তং শ্যকরো ব্রিঃখাগেতি অর ম্রঃমা ক্যারো সিইগেরি।
33যাসুউরো ওয়াক ক্যং হিকলিইরি, য়াংখা য়াংসুউরো ব্রিঃ লাঃরো রুওয়ামা ফ্রলাঃগো প্রগেলিরি। য়াংসুউরো আম্যা থুঃউ মকং নেঃ কৈংরো হিকসা আক্রংরোগো প্রগেলিইরি। 34য়াংখা রুওয়াগা আলুংসুউ থুওয়ক লাঃরো যীশুনা আতুয়িই খেংফু লাঃগেলিইরি। যীশুনা আতুয়িই খেংব্রিইনক, যীশুগো আতংবেং থাঃগেলিচাগা ঙারো নিংরেগা লাঃলি।
Àwon tá yàn lọ́wọ́lọ́wọ́ báyìí:
মথি 8: BBSRMZ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
