মথি 4
4
আস্যাং যীশুগো আপ্রইমা খ্যাফু ক্রুজাখ্রাং
(মার্ক ১:১২,১৩; লূক ৪:১-১৩)
1য়াংনক সেংস্যাংস ওয়িইঞেংচা যীশুগো সিলিই প্রাং আঃরাদুঃ য়ুউ লাঃখারি, যাফুলিছুগি মকংনেঃচা যীশুগো লঃফা প্রারো আপ্রইমা খ্যানৈংঅং। 2য়াংদেমা যীশু ঞি-রাক লিঃছিঃ সাদাং সুংব্রিনক যীশুচা আঃচা ম্যুয়েলিইরি। 3য়াংখা মকংনেঃচা যীশুগো লাঃরো প্রলিইরি, “নাংরা থাওরা ফোরা ঈ সাঃ ফ্রইতিছুগি, দিঃ ক্যকরোগু ভংমুক ফ্রইলাঃলি প্র।” 4যীশু আফ্রিমা প্রলিরি, “সেংস্যাংস কেইং চাউমা রুইরো হিকরি,
“লুঃউচা ভংমুক সাসাক চাঃলো মাহ্রাংনৈং,
য়িগিলি থাওরা ফোরা ঈ চাঃগানা আলুংচা হ্রাংনৈংরি।”
5য়াংখা মকংনেঃচা যীশুগো সেংস্যাংস ম্রুঃ যিরুশালেংদুঃ য়ুউ লাঃখারি অর ওয়িইপাসা ক্যং আথাকমা রেঃচিইরো যীশুগো প্রলিইরি, 6নাংরা থাওরা ফোরা ঈ সাঃ ফ্রইতিছুগি, অকতু ছাং আক্রংগা সেংস্যাংস কেইং চাউমা রুইরো হিকরি,
থাওরা ফোরাচা কুঃ তেমেংদরোগো নাক আক্রংলিলাগো য়ুউরো আঃনা পিইফু; খুংলো অকতো সাকলি, আচা আক্রংলিছুগি কেইংমা রুইলো হিকরি,
য়াংসুউরো নাককো আলাকনা তিফু
যাফুলিছুগি ক্যকমা নাক আখ্রিইচা আঃনা মাঃরারাঅং।
7যীশুচা মেইং নেঃকো প্রলিইরি, ‘অর দিঃ চাঃগালি রুইরো হিকরি,
নাং নাকমা থাওরা ফোরাগো মিচেংগি
8য়াংখা মেইংনেঃচা প্রেংরো যীশুগো কংগং আম্রাক তং তদংদুঃ য়ুউ লাঃখারি অর লঃগামা হিকচা মাংনেইংনা য়াংসুউরোমা লঃগা খেংসাগু প্রারো প্রলিরি, 9“নাংরা কাবামা ওয়েরো ঙাগো হ্রিইখুঃরো আস্যাং ম্হেতিছুগি, দিঃ আলুংচা ঙা নাককো পিইফু।”
10য়াংখা যীশু য়াংসুউগো প্রলিইরি, দিঃগা প্যক, মেইংনেঃ। সেংস্যাংস কেইং চাউমা রুইরো হিকরি,
নাং নাকমা আস্যাং থাওরা ফোরাগো রুসিইমি,
ফোরাগোরা সাসাক রুসিই থাঃ।
11য়াংখা মকংনেঃচা য়াংসুউগো বৈরো লাঃখারি, অর গংখাং নেঃসারোচা লাঃরো যীশুগো কিইওয়া প্রুককেলিরি।
আস্যাং যীশু অলুক চাঃরি
(মার্ক ১:১৪,১৫; লূক ৪:১৪,১৫)
12-13নক্কা যীশু ক্রালিইরি যোহন থংমা ক্যাচাগু। য়াংখা যীশুচা গালীলদুঃ লাঃখারি অর নাসরত রুওয়াগু বৈরো সবূলূননা নপ্তালি নিংরে ম্রঃনা কফরনাহূম ম্রুদুঃ লাঃরো নিংলিরি। 14দিঃচারো ফ্রইরি আক্রংগা রিসিই যিশাইয় প্রলিইরি চাঃগাচা আব্রিচুং ফ্রইঅং:
15সবূলূননা নপ্তালি নিংরে, ম্রঃদুঃ,
যর্দন খ্যং তাব্রাক্কা অর যিহূদী মুহু গালীলমা
16যা লুঃউরো আমঃমা হিকগেতি,
য়াংসুউরো আলাং রংগ্রিঃগু ম্রাংরামি।
যাসুরো আম্যা মঃমঃ প্রিঃমা নিংগেতি,
য়াংসুউরোবামা রংধচা ক্যঞাফু।
17য়াং আখিংকাবাং যীশুচা দিঃ চাঃগা প্ররো তাঃরা হঃলিরিচাগা, “অর আপ্রই মলুক কেকিফি, আক্রংগা গংখাংফুং নেংঙেংদচা আঃপামা রকব্যা।”
তিবি য়ুউলিইরি
(মার্ক ১:১৬-২০; লূক ৫:১-১১)
18যীশুচা গালীল ম্রঃনাগা লাঃরিখা শিমোন, যাসুউগো পিতর খঃরি অর য়াংসুউ ঞিং আন্দ্রিয়গো ম্রাংলিইরি। য়াংসুউরোচা ম্রঃমা পৈই ঙাংগেতি আক্রংগা য়াংসুউরো পুঃয়েসি হিকলিরি। 19যীশু য়াংসুউরোগু প্রলিরি, “ঙা নক্কা লঃ, ঙা নাংরোগু লুঃউগু লেংপ্রাসা পৈইসি প্যাংফু।” 20খ্যাং খ্যাং য়াংসুউরো পৈকো বৈরো যীশু নক্কা লৈকেরি।
21য়াংচাগা হ্রিইদুঃ লাঃরো যীশুচা যাকোবনা যোহন নাঃমিনা অর ঞিং হ্নয়ককো ম্রাংলিরি। য়াংসুউরোচা সিবদিয় সাঃ। য়াংসুউরো ফাখাং সিবদিয়না লংমা থৈংরো য়াংসুউরো কুওয়েং আছাং ফ্রিঃগেতি। যীশুচা য়াং ঞিংকো হ্নয়ককোলি খঃলৈতি। 22খ্যাং খ্যাং য়াংসুউরো কোঃ লংনা ফাখাংগু বৈরো যীশুনা লাঃখাগেতি।
লুঃউম্যারো কেইংমাগেলিইরি
(লূক ৬:১৭-১৯)
23গালীল প্রিনি আলুং আঃরামা পেঃরো যিহূদীরো আখ্রা আখ্রা রিফুংজাংমা লাঃরো যীশুচা সুয়েংসাং পিইলিইরি। দিঃচাব্যা মুহুক যীশুচা অরলি গংখাং নেংঙেংদ আকং সাদাংগু ক্যঞাফু কিজু লুঃউরোমা অালুং রঃগাগো আকং প্যাংলিরি। 24হিকচা আলুং সিরিয়া প্রিমা যীশু চাঃগাচা ক্যঞালিরি। যা লুঃউরো যে যে রঃগানা কংগং ওয়িদানা রাঃগেলিরি, যাসুরোগু মকং নেঃ কৈলিইরি অর যাসুউরো তুংনালা কাইংথা আসিই হিকলিইরি, লুঃউরোচা য়াংসুউরোগু যীশুবাদুঃ য়ুউ লাঃগেতি। যীশুচা য়াংসুউরো আলুংসুউগু আকং প্যাংলিরি। 25গালীল, দিকাপলি, যিরুশালেং, যিহূদীয়া অর যর্দন খ্যং অরতাব্রাক্কা আম্যা লুঃউম্যারো যীশু নক্কা নক্কা লৈকেতি।
Àwon tá yàn lọ́wọ́lọ́wọ́ báyìí:
মথি 4: BBSRMZ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
