मत्ती 16
16
याःमाछाककीइ चुःन्डुल लाङ्क्योक
(मर्कुस ८:११-१३; लुका १२:५४-५६)
1चीङ फारीसीक्या ओःले सदुकीक्या येशुसाःला ओःङ्सी ओःले खुङला जाँज लेःङ्जेला नाःम्खालीङलाःम्ले चुःन्डुल चीग तेङ्तेर लाःती लाःङ्सी। 2इःनाङ येशुइ खुङक्याला लेःन लोदी लाःसी, “कुःङ्से काःल्मीःजीक ख्याक्याइ लाःकुए, ‘ङार्तो ङीःमा स्यार्केन दुबा लाःती लाःकुए, चीलेलाःना नाम्सार्गा माःर्मु एः।’ 3ओःले ङामुरा ख्योक्याइ लाःकुए, ‘नाम्सार्गा माःर्मु ओःले नाक्जुक दु, तीःरीङ नी नाम क्याःप्केन दु’ लाःकुए। एःन्डुले ख्याक्याइ नाम्सार्गा तादी ङीःमा काःन्डुबा ओःङेन दुबा सेखुउए लाःना, ताःसे ची काःल्देरा एःपा ओः तामक्याइ लेःन चीले मासेक्योक? 4दाङ तीःरीङगीइ दी मीःक्या काःजे माःताक्पा ओःले सेमल्हुक मीलुगेन्दी एः! ख्याक्याइ ङाःला चुःन्डुल लाःङ्गुए, इःनाङ कोन्ज्योइ लेःङ्गो तेर्केन्दी योनाला काःल्क्योक चुःन्डुल बाहेक राःङ्सा चुःन्डुल ख्योक्याइ ताजे मेःज्योर्केन एः।” ओः तीङ्ला येशुइ खुङक्याला पोःर्ती ओःलाःम्ले काःल्सी।
फारीसी रा सदुकीक्याइ खमीर
(मर्कुस ८:१४-२१)
5येशु ओःले खुङगीइ योबाक्या छोइ फार्केनला लेप्कासुना खुङगीइ लोनेनक्याइ खुरा ख्योङ्जे टेःम्बा चेःतु। 6येशुइ खुङक्याला लाःसी, “फारीसीक्या ओःले सदुकीक्याइ खमीरलाःम्ले च्यागाताःक्पु पेःदी तेः।” 7योबाक्याइ चीगकीइ राःङ्सा ङीमु ताम लाःकाला स्युःसी, “उःइ खुरा माःख्योङ्गारा खुङगीइ एःन्डु लाःक्योक इःङ्स्वाँ।” 8राःङगीइ योबाक्याइ एःन्डुले ताम लाःक्योक छोर्मीःजीक येशुइ खुङक्याला लाःसी, “ख्योक्याइ खुरा माःख्योङ लाःती चीले चीगकीइ राःङ्सा ङीमु ताम लाःकुबा? खोइ ख्योक्याइ सेमल्हुक लुक्योक? 9ख्योक्याइ ताःरुङ सेदी म्याःपा? हजार ङा मीःला ङाथाल खुरा च्यादी साःजे तेर्कासुना ल्हाक्योक पुःजुपक्या ख्योक्याइ पती काःजे तुःदी एःके? ची ओःखो टेःम्बा चेःपा? 10ओःले तीःनथाल खुरा हजार सीः मीःक्याला साःजे तेर्कासुना ल्हाक्योक पुःजुपक्या पती काःजे तुःबा? ची ओःखो टेःम्बा चेःपा? 11ङाःइ ख्योक्याला खुराइ बारेला लाःक्योक मीःङे लाःती ख्योक्या चीले मेसेबा? इःनाङ फारीसीक्या ओःले सदुकीक्याइ खमीरलाःम्ले थेजुप पेःदो लाःती लाःक्योक इःङे।” 12ओःले का योबाक्याइ सेसी, खुङगीइ खुरा फोर्च्युगेन खमीरलाःम्ले थर्ती तेः लाःक्योक मीःङेनदुबा इःनाङ खुङगीइ नी फारीसीक्या ओःले सदुकीक्याइ लोप्केन शीक्षालाःम्ले का थार्ती तेः लाःक्योक दुबा।
येशु सु इःम्बा?
(मर्कुस ८:२७-३०; लुका ९:१८-२१)
13येशु कैसरीया फीलीप्पीइ छेत्रला ओःङ्मीःजीक, खुङगीइ राःङगीइ योबाक्याला टीःसी, “मीःक्याइ ङाः मीःइ पुःला सु इःङे लाःती लाःकुदुबा?” 14योबाक्याइ लाःसी, “लाःलेइ ख्याला बप्तीस्मा तेर्केन युहन्ना इःङे लाःकुदु, काःजेइदी एलीया इःङे लाःकुदु, ओःले काःजेइदी यर्मीया इःन्स्वाँ की कोन्ज्योइ लेःङ्गो तेर्केन्दी काःन्दीङ इःङ्स्वाँ लाःकुदु।”
15येशुइ लाःसी, “ओःले ख्योक्याइदी ङाःला सु इःङे लाःकुबा ले?” 16सीमोन पत्रुसकीइ लाःसी, “ख्या सोम्बो कोन्ज्योइ पुः, थार्च्युगेन ख्रीष्ट इःङे।” 17येशुइ खुङला लाःसी, “ए योनाइ पुः सीमोन, ख्योइ काःजे मोलाम ज्योर्ती एः! दी ताम ख्योइ मीःलाःम्ले कोःदी लाःक्योक मीःङे, दीखो नी नाःम्खालीङला तेःकेन ङाःइ आबा कोन्ज्योइ ख्योला तेर्क्योक इःङे। 18ताः ङाः ख्योला लाःके, ख्यो पत्रुस#१६:१८ पत्रुस पत्रुस लाःक्योकदी च्यार्का तोः इःङे। इःङे। ङाः ङाःइ कोःम्सा दी च्यार्का तोःखाला जोगे, ओःले ङ्याल्वाइ ल्हेइ दीखोला क्याःल्जे मीःखुगेन एः। 19नाःम्खालीङगीइ क्याःल्खापकीइ दीमीकक्या ङाः ख्योइ लाःक्पाला तेर्के। ख्योइ दी साजाम्बुलीङला ची ताःम्बा, ओःखो नाःम्खालीङलाङ ताःम्ङेन एः, ओःले ख्योइ दी साजाम्बुलीङला ची ताङ्बा ओःखो नाःम्खालीङलाङ ताङेन एः।” 20ओः तीङ्ला खुङगीइ योबाक्याला खुङ थार्च्युगेन ख्रीष्ट इःङे लाःती सुलाङ माःलाःप लाःती चोक्पो आज्ञा तेर्सी।
येशुइ राःङ सीगेन बारेला लाःक्योक
(मर्कुस ८:३१-३३; लुका ९:२२)
21ओःमीःजीक तीङ्ला येशुइ राःङगीइ खुर्कोन तुःक्पुइ बारेला राःङगीइ योबाक्याला थेकारा लाःकाला स्युःसी। खुङगीइ लाःसी, “ङाः यरुशलेमला डोराकोःउए ओःले छेस्यो मीःक्यालाःम्ले, छेस्यो पुजाहारीक्या ओःले छ्येइ ठीमगीइ लोबेनक्यालाःम्ले माःङ्बुरा तुःक्पु ज्योर्केन एः। ओःले ङाःला सेकेन एः, इःनाङ ङीःमा सुम तीङ्ला ङाः सीक्योकलाःम्ले सोम्बो लोःगेन एः।”
22पत्रुसकीइ खुङला छ्योचीगले खेर्ती केताङ्गाला स्युःसी, “कोन्ज्योइ एःन्डु माःबेज्युक, प्रभु! ख्याला ओःन्डुबा नाःमाङ माःयोःङ्ज्युक।” 23इःनाङ येशु पत्रुसछ्योले लोःदी लाःसी, “ए शैतान, ङाःइ तोःङ्लाःम्ले सुङ! ख्यो ङाःइ लागी बाधा इःङे, चीलेलाःना ख्योइ कोन्ज्योइ च्योःङ्रा ठीवा मेसालए, इःनाङ मीःइ च्योःङ्रा ठीवा साल्गुए।”
योबाइ खुर्कोन तुःक्पु
(मर्कुस ८:३४–९:१; लुका ९:२३-२७)
24ओःले येशुइ राःङगीइ योबाक्याला लाःसी, “सुङ ङाःइ योबा ओःङेन सेम पेःउए लाःना, खुङगीइ राःङलारा टेःम्बा साल्ज्युक, ओःले राःङगीइ क्रुस खुर्ती#१६:२४ क्रुस खुर्ती क्रुस खुर्चे लाःक्योकदी येशुइ लागी तुःक्पु खुर्चे ओःले सीकोःनाङ सीजे तयार डोगेन्दी इःङे। ङाःइ तीङ्ला ओःङ्ज्युक। 25चीलेलाःना काःखोइ राःङगीइ मीःली सेन्च्युजे छोल्गुबा, ओःखोइ नाःमाङ मीसीगेन मीःजी सीच्युगेन एः, इःनाङ काःखोइ राःङगीइ मीःली ङाःइ लागी सीच्युबा, ओःखोइ नाःमाङ मीसीगेन मीःजी ज्योर्केन एः। 26मीःइ थाम्जेर जाम्बुलीङरा राःङगीइ लाःक्पाला लेःङ्नाङ राःङगीइ नाःमाङ मीसीगेन मीःजीदी सीच्युसी लाःना, खुङला ची क्युःक्सो काःल्बा ले? चीलेलाःना खुङगीइ सीच्युक्योक नाःमाङ मीसीगेन मीःजी फीर्च्या लोदी ख्योङ्जेला राःङ्सा चीङ ताम एःपा ले? 27चीलेलाःना ङाः मीःइ पुः ङाःइ आबाइ महीमाला ङाःइ स्वर्गदुतक्या ङीमु ओःङेन एः, ओःले ओः तेःकासु ङाःइ थाम्जेर मीःक्याला खुङक्या राःङ राःङगीइ पेःक्योक लेःगा अनुसार तेर्केन एः। 28तेःन्दामरा ङाः ख्योक्याला लाःके, दीला एःक्योक मेःन्दा काःजेइ ङाः मीःइ पुःला ङाःइ क्याःल्खापला ओःङ्क्योक माःथोङ्थुप खुङक्या मीसीगेन एः।”
Àwon tá yàn lọ́wọ́lọ́wọ́ báyìí:
मत्ती 16: SYW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 (Active), Wycliffe Bible Translators, Inc. All rights reserved.
