Mataayo 1
1
Ɨshikholo sha Yeesu ʉKilisiti
(Luuka 3:23-38)
1Ɨga mataawa gɨ shikholo sha Yeesu ʉKilisiti#1:1 ɄKilisiti hwa huje ʉmuntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉyo ahafumile mu shikholo ɨsha mwɨnɨ ʉDaudi#1:1 ʉDaudi Bhaazya izwi Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. na mu shikholo ɨsha Abulahaamu.
2ɄAbulahaamu ahamʼpaapa ʉIsaaka,
ʉIsaaka ahamʼpaapa ʉYaakobo,
ʉYaakobo ahamʼpaapa ʉYuuda na bhanakwabho bhaakwe.
3ɄYuuda ahamʼpaapa ʉPeelesi nʉ Zeela, ɨbho ʉnyina waabho ahali yʉ Tamaali.
ɄPeelesi ahamʼpaapa ʉHezelooni,
ʉHezelooni ahamʼpaapa ʉAalamu,
4ʉAalamu ahamʼpaapa ʉAminaadabu,
ʉAminaadabu ahamʼpaapa ʉNaashoni,
ʉNaashoni ahamʼpaapa ʉSalimooni,
5ʉSalimooni ahamʼpaapa ʉBoohasi hwa Laahabu,
ʉBoohasi ahamʼpaapa ʉOobedi hwa Luti,
ʉOobedi ahamʼpaapa ʉYeese,
6ʉYeese ahamʼpaapa ʉmwɨnɨ ʉDaudi.
ɄDaudi ahamʼpaapa ʉSolomooni hwa nʼshɨ ʉyo ahali nʼshɨ wa Uliya,#1:6 nʼshɨ wa Uliya Itaawa lyakwe bhahagaga Batisheeba. Bhaazya 2 Samweli 12:24-25.
7ʉSolomooni ahamʼpaapa ʉLehobowamu,
ʉLehobowamu ahamʼpaapa ʉAbiya,
ʉAbiya ahamʼpaapa ʉAasa,
8ʉAasa ahamʼpaapa ʉYehoshafati,
ʉYehoshafati ahamʼpaapa ʉYoolamu,
ʉYoolamu ahamʼpaapa ʉUziya,
9ʉUziya ahamʼpaapa ʉYoosamu,
ʉYoosamu ahamʼpaapa ʉAhazi,
ʉAhazi ahamʼpaapa ʉHezekiya,
10ʉHezekiya ahamʼpaapa ʉManaase,
ʉManaase ahamʼpaapa ʉAamoni,
ʉAamoni ahamʼpaapa ʉYoosiya,
11ʉYoosiya ahamʼpaapa ʉYekoniya na bhadoodo bhaakwe. Pamandɨ aBhaizilaeeli bhahasamiziwa hu nsi ɨyɨ Baabeli.
12Nantele, hu habhaazyo lwa bhali nabho huula,
ʉYekoniya ahamʼpaapa ʉSheyatiyeeli,
ʉSheyatiyeeli ahamʼpaapa ʉZelubaabeli,
13ʉZelubaabeli ahamʼpaapa ʉAbihuudi,
ʉAbihuudi ahamʼpaapa ʉEliyakimu,
ʉEliyakimu ahamʼpaapa ʉAazoli,
14ʉAazoli ahamʼpaapa ʉSaadoki,
ʉSaadoki ahamʼpaapa ʉAakimu,
ʉAakimu ahamʼpaapa ʉEliyudi,
15ʉEliyudi ahamʼpaapa ʉEliyaazali,
ʉEliyaazali ahamʼpaapa ʉMaatani,
ʉMaatani ahamʼpaapa ʉYaakobo.
16ɄYaakobo ahamʼpaapa ʉYoosefu ʉnʼnume wa Maliya.
ɄMaliya yʉʉyo, ya yʉʉyo ahamʼpaapa ʉYeesu, ʉyo bhahunʼkwizya Mʼfyʉli.#1:16 Mʼfyʉli Mu njango ɨyɨ Shiyunaani ɨsimbwilwe huje, Kilisiti, mu njango ɨyɨ Shiebulaniya bhayiga, Meesiya. ABhayahuudi bhahaliyangaga itaawa lya Meesiya huje, muntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi.
17Ɨshi, afume hwa Abulahaamu afishe hu habhaazyo aha mwɨnɨ ʉDaudi, hwahali nɨ mpaapo ishʉmi na zinɨ. Nantele, afume hwa mwɨnɨ ʉDaudi afishe hu habhaazyo ɨho aBhaizilaeeli lwa bhahasamiziiwe hu nsi ɨyɨ Baabeli, hwahali nɨ mpaapo ɨzyɨnjɨ ishʉmi na zinɨ. Nantele, afume hu habhaazyo ɨho lwa bhahasamiziiwe hu nsi ɨyɨ Baabeli, afishe hu habhaazyo aha‑apaapwe hwa Mʼfyʉli, hwahali nɨ mpaapo ɨzyɨnjɨ ishʉmi na zinɨ.
Apaapwe hwa Yeesu ʉKilisiti
(Luuka 2:1-7)
18Apaapwe hwa Yeesu ʉKilisiti hwahali ɨshi. Ʉnyina waakwe ʉyo itaawa lyakwe yʉ Maliya, ahali azinjiliilwe nʉ Yoosefu. Leelo lwa bhasɨɨle ahwegane, ʉmwene ʉMaliya ahaloleha huje ali nʉ lwanda. Ʉlwanda ʉlwu ahalwajile hwi‑idala ɨlya Mʼpepo ʉMʼfinjile.#1:18 Mʼpepo ʉMʼfinjile Bhaazya izwi Mʼpepo ʉMʼfinjile hu Ngalulanyo ɨyɨ Mazwi aMajenu hu malishilo wɨ shitaabu ɨshi. 19ɄYoosefu ʉyo ahali nʼgolosu, leelo saga ahanzaga huje anʼsʉʉsye ʉMaliya. Ɨpo ahasɨɨbha hunʼneshe hu mfiso.#1:19 ahasɨɨbha hunʼneshe hu mfiso Alɨngaane na miiho ga Bhayahuudi, nkashele ʉnʼsahaala anʼzinjiiye ʉnʼnɨndu, bhahabhaziwaaga huje bhegɨɨne. Leelo ahabhaazyo aha‑agʉlɨlane hahali hɨ mwaha gweka. Ahabhaazyo honti ɨho saga bhahanziwaaga akhale peeka afishe ɨpo bhahabhalaga ahwegane. Ɨshi hunʼneshe ya‑ahazinjiliilwe hwahalɨngaanaga na hunʼneshe ya‑ahali ayegwilwe. 20Lwa wasɨɨbha ɨzyo, ʉnʼtumi#1:20 ʉnʼtumi Bhaazya izwi Bhantumi hu Ngalulanyo ɨyɨ Mazwi aMajenu hu malishilo wɨ shitaabu ɨshi. wa Mwɨnɨ ahamʼmwɨnzɨla mu nzozi, ahamʼmʉʉzya ahaga, “Wee Yoosefu, wʉ‑ʉli wɨ shikholo ɨsha mwɨnɨ ʉDaudi, ʉgandi ahwogope humʼmweje ʉMaliya hu nongwa ya‑aje ali nʉ lwanda. Ʉlwanda ʉlwo alwajile hwi‑ikhone lya Mʼpepo ʉMʼfinjile. 21Ahayipaapa ʉmwana ʉwɨ shilume, nawe wahayihumʼpeela itaawa huje yʉ Yeesu, pɨpo ahayihubhafyʉla abhantu bhaakwe mu mbiibhi zyabho.”#1:21 Itaawa lya Yeesu hwa huje, ʉMwɨnɨ wa‑afyʉla awe ʉNgʉlʉbhɨ wa‑afyʉla.
22Ɨga gonti gahabhombɨɨshe ɨsho huje izwi liila lya lyahayangwilwe nʉ nʼkuwi wa Mwɨnɨ ʉNgʉlʉbhɨ libhombeshe huje, 23“Enya! Ʉnʼnɨndu ʉnʼduvya ahayibha nʉ lwanda. Nantele, ahayipaapa ʉmwana ʉwɨ shilume! Ɨpo bhahayihumʼpeela ʉmwana ʉyo itaawa ɨlya Emanueli.”#Bhaazya Yesaaya 7:14. Ɨshi, itaawa ɨlyo hwa huje, “ɄNgʉlʉbhɨ peeka naatɨ.”
24ɄYoosefu lwa wadaamuha, ahabhomba nanshi shiila ʉnʼtumi wa Mwɨnɨ sha‑ahamʼmʉzɨɨzye, ahamʼmwega ʉMaliya abhe nʼshɨ waakwe. 25Leelo saga bhahalɨnjɨle akhomaane afishe ʉMaliya lwa wapaapa ʉmwana ʉwɨ shilume. Ɨpo ʉYoosefu ahamʼpeela ʉmwana ʉyo itaawa huje yʉ Yeesu.
Àwon tá yàn lọ́wọ́lọ́wọ́ báyìí:
Mataayo 1: SBK
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022, Wycliffe Bible Translators, Inc. All rights reserved.
