1Mos. 44
44
Pulokat simalilimai
1Lepa nenda parentaakenangan si Josep siuteake lalepnia, “Guruake kam gandum ka goni sangamberi sirimanua nenda, igit siooi raambit, samba guruake kam bulagatra senendra kabagat goninda, kauddut gandum nenda. 2Guruake leu kam pulokat perakku kabagat goni bagidra sisule, pasamba bulagat pasilului gandumnia.” Pagugulet nenda masigalaiake parenta nenda. 3Kele aimapato, maseggei peile, pasara si Josep pasamba sasarainania, lepa tuitui sia pasamba kalideira. 4Ta'pei mareunan sia ka laggai nenda, kuanangan si Josep katubut siuteake lalepnia, “Olaake kam nukukrukam sirimanua nenda. Ke'anuailingan kam sia, kuakatubudra, ‘Angoi nulumunake kam putopinan pasamba pukakatai? 5Angoi anunangku kam pulokat perak tuanku? Pulokat nenda pakeietnia mulo' samba sibailiu pakeiet masitawa. Anugalaiakam pukakatai sabeu!’ ”
6Kele aisege pagugulet nenda kabutut sasarainan Josep, poiliatnangannia apa siparentaakene Josep. 7Alegirangan pagugulet nenda, “Apa pinaatut Tuan? Musuppa le kai, ta akugalaiake kai kasedda! 8Ekeu leu nuagai, bulagat sinesemai kabagat gonimai ka uddut gandum nenda, akutoiliakean kai Tuan. Oto, ta'mateu kunangkaou kai perak ele mas ka lalep gubernur! 9Tuan, ke pulokat nenda tusese kasei sipasiala katalagamai, eddangannia tuukum matei, samba kai ibailiu pakoinien Tuanku.”
10Kuanangan pagugulet nenda, “Kauan, tapoi sarat sirimanua sipasiala pulokat nenda geti ibailiu pakoinienku; sabagei momoi mutuitui.” 11Lepa gorosotnakerangan samba bukarangan goninda simaola senendra. 12Pagugulet Josep nenda masigaba ka goni nenda simakolou, barania ka goni sikebbukat teret ka goni sisule, samba pulokat nenda tuse'se' kabagat goni Benjamin. 13Bulat mareureu le bagadda sakebbunia, pat pabiritrangan leppeira. Akkatnakerangan minca goninda kauddut kalideira samba toili sia ka laggai.
14Kateteret aisege si Jehuda samba sasarainania ka lalep Josep, aipeile si Josep sedda, samba purapporangan kamatania. 15Iageti kuanangan si Josep, “Apa sigalaimui nenda? Ta'panuagai kam, sirimanua kele aku nene momoi kuagai galaitubumui sikatai pasamba agai masitawa?”
16Aleginangan si Jehuda, “Apa le momoi kukua kai, tuanku, kipa iooi kukelaake samba kuparoipokai tubumai? Aipoiliatnan Taikamanua selemai. Kineneiget sangamberimai ibailiu pagugulet Tuan, samba ta'sarat sirimanua kaipa aituse'se pulokat nenda.”
17Kuanangan si Josep, “Taa! Takuoba kugalai kasedda! Sarat sirimanua kaipa aitusese pulokat nenda le ibailiu pakoinienku. Sabagei momoi tuobaake toili ka ukkuimui.”
Jehuda masiropake si Benjamin
18Lepa ei si Jehuda masilegeri si Josep samba kuanangan, “Bojoi, Tuanku, obaake ipanibo minca paguguletnu nene pasamba Tuanku. Bui nupugolu katubut paguguletnu nene, aipoi tuanku kele rimata Misir le. 19Apanounouan Tuanku katubumai nene, ‘Aipei leu pa' ukkui samba sarainamui bagei?’ 20Alegimaian, ‘Ukkuimai amabajaan samba aipei le togania sibautubu, sipututu mata kateteret amabajaannia; kebbunia amateian, sia sipusasara ina saranangan le amulegei, lulut nenda ukkui bulat manuntu bagania katubunia.’ 21Si Tuanku masikoiniake kai masiambitnia sene, bule ioi nuitconia, 22lepa alegimaian, toga nenda ta'momoi ikaddiuake ukkuinia; ke'ikaddiuake ukkuinia, ukkui nene matei. 23Lepa geti kuanangan Tuanku, ‘Ta'momoi nuailiake kam aku minca ke'ta'nuambit kam bagimui nenda.’
24Kele akutoili kai ka ukkuimai, segeakemaian kamatania tiboiet Tuanku nenda. 25Lepa geti koiniakenangan kai ukkuimai moi minca sene masisaki komen. 26Alegimaian, ‘Kuei kai sedda ta'momoi, aipoi ta'momoi kuailiake kai gubernur ke'ta'itutkai bagimai sisule nene. Ioi geti kuei kai sedda ke moi nia pasamba mai.’ 27Lepa geti kuanangan ukkuimai, ‘Nuagai kam, si Rahel, sinanalepku togania rua le. 28Toga siboiki aikaddiuakean aku. Aikomannia tarimeu simasakbak, samba teret kineiget ta'an akuitconia minca. 29Ke nuala kam toga sisule nene kaku, samba bara sibabara katubunia, pureureugat baga sigalaimui katubukku masikau aku geti matei, kalulut aku nene amabajaan.’ ”
30“Kalulut nenda, Tuanku,” ngangan Jehuda kai Josep, “Ke'toili aku ka ukkuimai, bagimai nenda ta'anai, matei le geti ukkuimai. 31Engania aile katubut toga nenda, samba ia leu amakopean bajania bailiu pureureugat bagania sibaraakenanmai katubunia masikaunia matei. 32Sara pei, aku palelekngan katubut ukkuiku, aku ibailiu sili toga nenda. Akukuangan katubunia, ke'takuambit toga nenda minca katubunia, aku le masibairat ukum ka sanganantat puririmanua. 33Oto, kutiddou, Tuanku, obaake le kukuddu sene ibailiu pakoinien Tuanku masisiliake bagimai nene; eddangan itoili pasamba sakebbunia. 34Kipa iooi kutoili ka ukkuimai ke'tatoili toga nenda? Ta'momoi kuomake masiitco oringen siorak ukkuimai nenda.”
Àwon tá yàn lọ́wọ́lọ́wọ́ báyìí:
1Mos. 44: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015