1Mos. 37
37
Si Josep samba sasarainania
1Si Jakob mukuddu ka laggai Kanaan, ka kudduat ukkuinia, 2nene te enungan paninikat Jakob:
Kateteret si Josep, togat Jakob ai nia pulu pitungaruru, pasikelinangan mungkuat kambing samba biribiri pasamba sakebbunia, iate tatogat Bilha samba Zilpa, sinanalep Jakob kabe'be. Isegeake ka ukkuinia pukakatai sigalaiakenenda sakebbunia. 3Si Jakob menuntu le' bagania kai Josep bele pei kasangamberi togania sabagei, aipoi ai putu'tu matat Josep kateteret amabajaan ukkuinia. Kasara gogoi galainangan sara juba bulat simalainge addeat kai Josep. 4Kele araitco sakebbu Josep, ukkuira menuntu' pei le' bagania kai Josep bele pei katubudra, malaganangan bagadra kai Josep, pat taiobarangan patibo' simakolou pasambania.
5Ka sara soibo pangamutnangan si Josep. Kele aipoiliat pangamutetnia nenda ka sakebbunia, makopenangan ramalaga baga katubunia. 6Nene te sikuat Jakop katubudra, “Sibo arep pangamutetku. 7Amangamutnaku, sangamberitta ai sita ka kamone masiapra sigetaiat loinan gandum, iageti gandumku murio simaroipo. Lepa geti loinat gandummui masigoilik loinat gandumku, lepa murapo katubunia.”
8Lepa kuarangan sasarainania katubunia, “Nupaatu ibabailiu ekeu geti rimata samba simagege kakai?” Kalulut nenda makopenangan rapulagaki baga si Josep kalulut pangamutet samba tiboietnia.
9Lepa geti pangamutnangan minca si Josep, samba kuanangan ka sakebbunia, “Amangamutnaku minca, akuitco sulu, laggo samba pulusara panyanyat murapo katubuku.”
10Pangamutet nenda ipoiliat leu ka ukkuinia, tekaakenangan ukkuinia, kuanangan, “Pangamutet apa nenda? Nupaatu aku, inam samba sasarainam moi geti manindou murapo katubum?” 11#Pugap. 7:9 Sangamberi sakebbu Josep musisibaga katubunia, tapoi ukkuinia riuriu le ipaatu pangamutet nenda.
Si Josep tusakiake samba tuambit ka Misir
12Ka sara gogoi ei sasarainan Josep ka Sikhem masijago terimeu ukkuira. 13Kuanangan si Jakob katubut Josep, “Kenan ka Sikhem, kakudduatra sasarainam rapasijago tarimeuta.”
Aleginangan si Josep, “Oo, ukkui.”
14Kuanangan ukkuinia, “Kenan nuitco sakebbunu samba mungkuat kambing biribiri, lepa toili ekeu nusegeakenia katubuku.” Lepa si Israel masikoiniake si Josep iei barania ka peleu Hebron pat ailinia ka laggai Sikhem. 15Kele aigejengi su'su' nenda si Josep ailirangan sara sirimanua simanteu samba rerenangan si Josep, “aponia nugagaba?” 16Aleginangan si Josep, “Sakebbuku. Ai rajajago mungkuat kambing biribiri, taleu nuagai kaipa kudduadra?” 17Kuanangan sirimanua nenda, “Amuituituian sia sene. Kalulut memei sia ka Dotan.” Lepa ei si Josep masiailiake sakebbuni samba ailinangan sia ka Dotan.
18Ai pei le si Josep ka sareunann araitcoannia sakebbunia. Samba, kepei sege si Josep katubudra, apakerean baga masimateiakenia. 19Lepa patiborangan kapasasambadra, “Itco, amoian sipangangamut nenda. 20Kineneiget, kauan tamateiakenia samba taribbaiake tubunia kabagat uggungan simagarak. Ai le takuania, aisakbak le nia tarimeu simasakbak. Aileu taitcoakenia muaaili leu pa pangamutetnia nenda.” 21Kele airepnangannia si Ruben pinaatudra nenda, gabanangan enungan bule ibelaake si Josep ka pinaatudra sikatai nenda. Kalulut nenda kuanangan si Ruben, “Bui' numateiakekamnia!” 22“Tapoi taribbaiake le kamnia ka bagat uggungan ka simatangeu nene, tapoi bui tabesikinia.” Ikua kele nene si Ruben kalulut ai pinatuania masibelaake si Josep ka pinatudra sikatai samba masikoniake si Josep toili ka lalep ka ukkuira. 23Kateteret ai sege si Josep ka sakebbunia, golokrangan leppei katubut Josep simalainge nenda. 24Lepa giritdrangannia samba ribbaiakerangannia ka bagat uggungan simagarak nenda. 25Kateteret ai sia mukokom, sinulut itcorangan mungkuat sipusisila tai Ismael bara ka Gilead ka Misir. Sangamberi untadra bairanennia simoite, rama samba pusinginan. 26Lepa kuanangan si Jehuda ka sasarainania, “Aponia uktukta ke tamateiake kam bagitta samba tapakele pasimamatei nenda? 27Maeru peile tasakiakenia tai Ismael nenda. Ta'ta' bebesikinia. Kenanen kipa pa' ia leune bagitta.” Oto raoba leu masisilo sikuat sarainanda si Jehuda nenda. 28#Pugap. 7:9 Kele aratusabau tai Ismael sipasaki, akkatnakerangan si Josep sakebbunia ka bagat uggungan nenda lepa sakiakerangannia katubutda tai Ismael nenda sakinia iate rua pulunga perak. Iageti sipasasaki nenda masiambit si Josep ka Misir. 29Kele aiei si Ruben ka uggungan nenda samba itconangan Josep sedda ta'an anainia ka uggungan nenda, lepa geti biritnakenangan leppeinia kalulut reureubagania. 30Lepa toilinia ka sasarainania samba kuanangan, “Taan anai toga nenda kabagat uggungan, kipakugagalai?” 31Lepa alarangan leppei Josep sakebbunia samba jajarangan sangamuneng kambing lepa sopsopmakerangan leppei nenda ka logau kambing nenda. 32Lepa geti koiniakerangan rataroake leppei simakope lainge nenda ka ukkuira pasamba segeakerengan leu kise, “Aku sesekai leppei nene. Taleu leppei togam?” 33Kele ailelekngake leppei nenda si Israel kuanangannia, “Nene leppei togakku! Bulatnia ai sabbakngannia tarimeu simasakbak.” 34Lepa biritnakenangan leppeinia si Israel lepa leppeiakenangan leppei toggaiat pureureugat baga sama pereureunangan baga sipugogogi burunia kalulut isoibi togania! 35Kenanen rapusuibi bagania tatogania, taimanteu samba tainanalep tapoi ta' ioba rapusuibi bagania. Kuanangannia, “Ta'! eddangan kupureureu baga pat matei aku kusoibi togakku.” Kise te si Israel isoibi, togania si Josep. 36Kateteret nenda, tai Ismael arasakiakean si Josep ka Misir, katubut Potifar, sara sirimanua sipugagalai ka uma purimataat Parao, utet saladdut sipasijajago rimata.
Àwon tá yàn lọ́wọ́lọ́wọ́ báyìí:
1Mos. 37: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015