1Mos. 31
31
Si Jakob mutuitui masikaddiuake si Laban
1Ai arep si Jakob rakua tatogat Laban kise, “Ai alaan si Jakob sangamberi bibilet pukaioat ukkuita. Sangamberi pukaioatnia sibara ka bibilet pukaioat ukkuita.” 2Itconangan leu et si Jakob, si Laban taan amatitiboatnai kele siburu katubunia. 3Lepa kuanangan si Tuhan kai Jakob, “Toiliakean ekeu ka laggai ukkuinu samba kasasaraianam. Kupaalei le ekeu.”
4Lepa nenda koiniakenangan sirimanua si Jakob masipaagai kai Rahel samba kai Lea bule paaili pasamba nia ka susu, ka kudduat mungkuat kambing samba biribirinia. 5Lepa kuanangan si Jakob katubudra, “Aku itco ukkuimui taan aparerenia kele simareirei katubukku; tapoi Taikamanua panindogiet ukkuiku masipaalei aku. 6Karuamui anuagaian leu kam, amugalaian aku ka ukkuimui karon tubuku. 7Kenanen bai kasedda ai pajongan aku samba silinangan upaku pat aili pulungaminca. Tapoi Taikamanua ta'aiobakenia igalai katai katubuku. 8Kateteret aikua ukkuimui, “Kambing simagutti ibailiu geti upam,” iageti sangamberi mungkuat kambing samba biribiri bara togania simagutti. Kateteret ikua, ‘Kambing simagurik le ibailiu upam,’ Iageti sangamberi mungkuat nenda bara togania simagurik. 9Kise te' aiala Taikamanua mungkuat tarimeu ukkuimui lepa akenangannia katubuku.
10Kateteret gogoi rapakarai tarimeu nenda, pangamutkungan aku itco sangamberi kambing sikeu, simasurat, simagutti samba simagurik aikakarai kambing samba biribiri sinanalep. 11Samba Taikamanua siputubu malaika patibo pasamba aku kapangamutet, Kuanangan, ‘Jakob!’ Aku leu masialegi, ‘Oi Tuhan’. 12Kuanangan minca malaika nenda, ‘Itco, sangamberi kambing sikeu sipakakarai nenda masurat, magutti samba magurik. Akupali le kugalai nenda kekeu, kalulut Akuitcoan sangamberi sigalaiakenen Laban nenda katubum. 13Aku te' Taikamanua amasipakoinong tubu katubum ka Babilonia. Sedda anupanguruatnakean sara bukku patoggaiat pasamba masiuruake tula zaitun ka uddutnia. Sedda leu musuppa ekeu katubukKu. Oto kineiget petarek tubum samba toiliake ekeu ka laggai putu'tukat matam.’ ”
14Lepa aleginangan si Lea samba si Rahel, “Ta'anai rubeiat pukayoat ukkuimai ikepmakenenmai. 15Kai nene ikuangan le sitoi. Aisakiakean kai samba apa sisilonia ka addeat nene ai sapruakean leu et. 16Sangamberi pukayoat sialat Taikamanua ka ukkuimai seripokatnia kai sibakkatnia samba tatogamai. Galaiake le apa siparentaakenen Taikamanua katubum.”
17Lepa patareknangan tubunia si Jakob itoili ka ukkuinia ka laggai Kanaan. Isakaiake le sangamberi sinanalep samba tatogania ka uddut unta, 18samba igirit sangamberi mungkuat kambing samba biribirinia samba sangamberi apa sibakkatietnia ka Mesopotamia. 19Kateteret nenda si Laban ainia ka susu masisapu bulut biribirinia, samba keteteret nenda te' ainangkou si Rahel tularat sijago keluarga ukkuinia. 20Si Jakob masipataju si Laban, ta'aipaagai katuituiatnia. 21Alanangan sangamberi pukaiyoatnia samba tutituinia simaola. Talipokinangan bagat oinan Efrat lepa ailiakenangan kupkumen leleu Gilead.
Si Laban masikukru si Jakob
22Pasat telu ngagogoi againangannia si Laban katutuitui Jakob. 23Lepa ruruakenangan sirimanuania si Laban, pasamba sia rakukukru si Jakob pitunga gogoi ujunia teret ailiakerania ka kupkumen leleu Gilead. 24Sinoibo oi Taikamanua kai Laban kabagat pangamutetnia, samba kuanangan, “Pasikeli, bui' nusibo nupakuaiji si Jakob pasamba sangatako tiboiet.” 25Kateteret nenda airioakean sapounia si Jakob ka sara tinambu. Lepa geti ka tinambu bagei ka kupkumen nenda leu si Laban samba sirimanuania masirioake sapounia.
26Lepa nenda kuanangan si Laban kai Jakob, “Angoi nupataju aku samba nuambit tatogaku, kelean le situukum? 27Angoi nupataju aku samba nutuitui simengmeng, ta'anutiddou? Kenutiddou, bulat kuobake ekeu nutuitui ka angkat baga sialei urai, rebana samba kecapi! 28Aipei bagei ta'anuake kaku oggak masisigguk tatoga samba sapunuteteuku sibailiu tupasara. Bulat ta'aisese sigalainu! 29Maron le aku masigalai katai katubum, tapoi kasoibo silelepa Taikamanua panindogiet ukkuinu masiparepdep aku bule bui' kubesiki ekeu. 30Kuagai, anuei nenda kalulut kopet obanu toili. Tapoi Angoi le anunangku tularat sijago keluargaku?”
31Lepa aleginangan si Jakob, “Akutuitui simengmengakenen kalulut loto babara ta'nuobaake tatogam. 32Pagalaiat tularat nenda, ke'bai nusese sara sirimanua sene sipasinangkounia, tuukum matei geti nia. Lelekake, apa ai bibiletnu sene. Ke' ai, alanungannia. Samba sarainanta moi raitconia.” Si Jakob ta'iagai, si Rahel sipasinangkou tularat nenda.
33Lepa ei si Laban ka sapou Jakob samba masilelekngake. Lepa nenda ei nia ka sapou Lea samba ka sapou karua pagugulet sinanalep nenda, tapoi tularat nenda ta'ai se'se'. Kalepakatnia gurunia ka sapou Rahel. 34Kineneiget si Rahel amasiala' tularat nenda samba guruakenangannia ka “pelana” unta, beri nia kasia mukuddu ka uddut “pelana” nenda. Si Laban masilelekngake sangamberi sapou Rahel, tapoi ta'amoi ai se'se' tularat nenda. 35Lepa kuanangan si Rahel ka ukkuinia, “Bui nupugolu ukkui, ta'momoi kupurio masisilo ekeu, aipoi amoi le laggoku.” Si Laban masigaba simalelek, tapoi ta'aise'se' tularat nenda.
36Iageti pugolunangan si Jakob, kuanangan kai Laban, “Apa pukakatai sigalaiakenenku?” Apa selekku pat kukrunungan aku? 37Kineiget, anulelekngakean sangamberi bibiletku, aponia ai anuse'se bibilet bakkatnu? Belaake le bibilet nenda samba galakngake sene, bule sasarainangku samba sasarainam moi raitconia samba masiteuake kasei katalagatta simaroipo'. 38Rua pulungaruru akukuddu ka tubum. Mungkuat biribiri samba kambingnu atueddenan aimakakra, samba beri pei sangamuneng kukom kambing simanteu sibara ka tarimeunu. 39Tarimeu simamatei silabakat tarimeu simasakbak ta'akuambitnia katubum, tapoi aku le amasisilinia. Sinangkou sirimanua, kateteret sinago ele sinoibo sarat nubesiake le bule kusilinia. 40Mareirei imaoloi tubuku kateteret sinago samba kumalopot kateteret sinoibo. Mareirei ta' ioi kuperep. 41Kase'te aku kateteret mugalai katubum ujunia muine ruapulungarura. Pulu epatngarura ujunia aku pugalai addeat masibesiake karua tatogam nenda – samba enem ngarura minca addeat masibesiake mungkuat kambing samba biribiri nenda. Samba ujut nenda leu et ai ailingan pulungamincaan nusili upaku. 42Ke'bai ta' ijago aku Taikamanuan ukkuiku, iate Taikamanua panidogiet Abraham samba Ishak, Iageti anukoiniakean aku mutuitui sita'abbinen. Tapoi Taikamanua aipuletseian besit tubuku samba galajet sigalaiakenenku, samba ka soibo silelepa Aiakean sipinaatuNia.”
Palelengan Jakob samba si Laban
43Iageti si Laban masialegi si Jakob, “Karua tainanalep nenda togaku; togadra iate bakkatku, samba mungkuat biribiri nenda aku leu et sibakkatnia. Bulat sibulatnia sangamberi siitcoku sene aku le sibakkatnia. Tapoi ta'momoi kugalai aponia pa' masiometnake sapunuteteuku. 44Kalulut nenda konan tagalai palelengan samba masipalakke pabukku-bukku sibailiu toggaiat palelengan nenda.”
45Lepa geti alanangan si Jakob sara bukku samba rioakenangannia ibailiu bukku repdemen. 46Lepa koiniakenangan sarainania masiruruake bukku samba masigalai panambui. Lepa nenda pukomrangan simakere kabebet sinambui bukku nenda. 47Si Laban masioniake bukku panambui nenda Jegar-Sahaduta, tapoi si Josep masioniakenia Galed. 48Kuanangan si Laban kai Jakob, “Bukku panambui nen ibailiu geti repdementa ruatta.” Iate lulunia kudduat nene tuoniake Galed. 49Kuanangan leu et si Laban, “Bule si Tuhan masipasikeli sita ujutta murimanua siparereunan.” Kalulut nenda kudduat nenda tuoniake leu Mizpa. 50Kuanangan minca si Laban, “Ke'bai nugalai sikatai ka tatogaku, ele masitalimouake tainanalep bagei, kenanen bai ta'anai siagainia, repdep le, Taikamanua ibailiu sipamoilian katalagatta. 51Nene te sangamberi bukku sitabbuiku, samba nene bukku repdemen. 52Bukku panambui nene, ele bukku repdemen nenda mesiparepdep sita, aku ta'momoi masisabau bukku panambui nene addeat masisaggangi ekeu, samba ta'momoi nusabau bukku panambui nene samba bukku repdemen nene addeat masisaggangi aku. 53Taikamanua panindogiet Abraham samba ipanindogi ukkuiku si Nahor ibailiu geti sipasiukum katalagatta.” Lepa pusuppanangan si Jakob ka Taikamanua panindogiet Ishak, ukkuinia, addeat masisunake palelengannia. 54Sakinangan si Jakob sangamuneng tarimeu samba panguruatnakenangannia ka uddut leleu nenda. Lepa sogainangan sasarainania mukom simakere. Lepat ailepa mukom, pugogoirangan ka leleu nenda. 55Pato simaseggei, sigguknangan sapunuteteunia samba tatogania samba leu sukatnakenangan sia, lepa toilinia kakudduatnia.
Àwon tá yàn lọ́wọ́lọ́wọ́ báyìí:
1Mos. 31: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015