1Mos. 30
30
1Tapoi si Rahel ta'pei leu abara togania. Lulut nenda bailiu matu'tu bagania katubut kebbunia, iageti kuanangan kai Jakob, “Akean kaku toga, ke'taa, matei te geti aku.”
2Pugolonangan si Jakob kai Rahel samba kuanangan, “Aku nene ta' Taikamanua. Nia le masigalai ta' anupusule'.”
3Kuanangan si Rahel, “Aikoi paguguletku si Bilha, perepman pasamba nia bule ipusule. Kabagat nene oinangan ibaili aku ina ka sia.” 4Lepa kaunangan si Bilha ka simanteunia, samba pereminangan pagugulet nenda. 5Bara suruket Bilha, lepa tutuakenangan sara toga simanteu. 6Kuanangan si Rahel, “Aiakean Taikamanua kaku puroipoat. Aiarepingan panindogatku samba iake sara toga simanteu kaku.” Lepa oniakenangan toga nenda si Dan. 7Pusulenangan minca si Bilha samba tu'tuakenangan sara toga simanteu. 8Kuanangan si Rahel, “Amateian tubuku masitakai kebbuku, samba aku mamanang,” kalulut nenda oniakenangannia toga nenda Naftali. 9Kele aiagainia si Lea, taan momoi ibara togania minca, kaunangan paguguletnia, iate si Zilpa kai Jakob ibailiu sinanalepnia. 10Si Zilpa masitutuake matat sara toga simanteu kai Jakob. 11Kuanangan si Lea, “Mauntukngan aku,” iageti oniakenangan toga nenda si Gad. 12Si Zilpa masitutuake matat sara toga simanteu minca, 13samba kuanangan si Lea, “Bulat maangka le bagaku! Kineiget sangamberi tainanalep masikua aku simangka baga.” Kalulut nenda oniakenangannia toga nenda si Asyer.
14Kateteret pasimoneiat gandum, ei si Ruben ka su'su' samba sesenangan sedda sangamata siureman addeat laggek, lepa ambitnangannia kai Lea, inania. Kuanangan si Rahel kai Lea, “Ake pei kaku goisosiureman laggek sineset togam nenda.”
15Aleginangan si Lea, “Ta'pei pa' asege bagam nuala si manteuku? Kineiget nusibo leu masiala siureman laggek sineset togaku.”
Kuanangan si Rahel, “Ke' noba nuake siureman laggek togam nenda kaku, momoi nuperep pasamba si Jakob soibo nene.” 16Kateteret aitoili si Jakob ka lalep barania kasu'su' kasoibokat nenda, silonangannia si Lea samba kuanangan, “Perep pasamba aku soibo nene kalulut akululuian pasamba uremen laggek sibara ka togaku.” Iageti perep si Jakob pasamba si Lea ka soibo nenda. 17Taikamanua masiarepi panindogat Lea, samba pusuruketnangan lepa tutuakenangan matat togania si kalima. 18Kuanangan si Lea, “Aiakean Taikamanua kaku upah aipoi akukauan si Zilpa katubut simanteuku,” kalulut nenda oniakenangan togania nenda Iskandar. 19Pusulenangan si Lea minca samba tu'tuakenangan matat togania si kaenem. 20Kuanangan si Lea, “Aiakean Taikamanua kaku panguruat bulat simakope lainge. Kineiget simanteuku masisuru'aku, aipoi akututuakean matat tatoga enem tai manteu,” kalulut nenda oniakenangan togania nenda si Zebulon. 21Pasat nenda tu'tuakenangan matat sara togania sinanalep si Lea oniakenangannia si Dina.
22Lepa repdepnangan Taikamanua kai Rahel, Taikamanua masiarepi panindogatnia samba momoi itu'tuake matat tatoga. 23Iageti bara suruket Rahel samba tu'tuakenangan matat toga sara simanteu. Kuanangan si Rahel, “Aipepeakean Taikamanua katuloloiatku. 24Bule si Tuhan masiake katubuku sara tatoga simanteu minca.” Kalulut nenda oniakenangan togania nenda si Josep.
Paukkle si Jakob samba si Laban
25Lepat aitutuake matat Josep si Rahel, kuangangan si Jakob kai Laban, “Obaake le kutoili ka laggaiku. 26Eddangan kuei kuambit karua sinanalepku samba leu tatogaku, sibailiu upaku ujukku mugalai katubum. Nuagai leu besit tubuku mugalai katubum.” 27Kuanganan si Laban katubunia, “Arep boiki, abara patuptuman kaku, Si Tuhan aipanukaningan aku kalulut ekeu.” 28Kuangan le, “Upam luluijetku, iageti akekungannia.” 29Aleginangan si Jakob, “Ekeu le iagainia, kipa akupugalai katubum, samba tarimeunu aituppaian iginia ka pasikelatku. 30Ta'pei amoi aku, pukaioatnu ta'pei maigi, tapoi kineiget amakayongan ekeu. Si Tuhan aipanukani ekeu kalulut aku. Kineiget teterenangan kupugalai ka lalepku sarakku.”
31Kuanangan si Laban, “Oto apa le kuake katubum?”
Aleginangan si Jakob, “Taan leu nuaake apa pa'. Mariuriu le kupasikeli terimeunu, sarat ke'nuobo bai panindogatku nene: 32Obaake aku ka gogoi nene muenung ka talagat mungkuat kambing samba biribirim, samba masiala senen togat biribiri si mapusu'. Samba leu senen kambing silainge si magurik ele simagutti. Nenda le upah siobat bagakku. 33Ka sara gogoi makoinongnangan geti puroipoatku. Ke'bai moi ekeu masileleleake upahku, samba maiitco ai kambing sitaimagutti ele simagurik, ele biribiri sitaimapusu, nuagai te geti tarimeu nenda akunangkouan.”
34Aleginangan si Laban, “Kauan! Tagalaiake geti apa sitiddounu nenda!” 35Tapoi kagogoi nenda pasaraakenangan si Laban sangamberi kambing simanteu simasurat tubu ele simagurik samba sangamberi kambing sinanalep simagurik, simagutti, ele sibara lolit simabulau; ipasaraake leu sangamberi biribiri simapusu. Lepa geti koiniakenangan sangamberi tatogania masipasikeli tarimeu nenda, 36iageti tuitui sia pasamba tarimeu nenda masiareuake si Jakob, reunannia telungagogoi puenunganan.
Legei kambing biribirit Laban ijago le si Jakob.
37Lepa geti alanangan si Jakob ran simalimun sibara ka loina hawar, loinat badam samba loinat berangan samba masisisit sangarubeiat kulitnia pat bailiu magurik. 38Galakngakenangan ran nenda ka matat mungkuat kambing nenda, ka kudduat lo'nia, kalulut tarimeu nenda ioba pakarai ai sia mulo'lo'. 39Ke'bai pakarai kambing nenda ka ipot ran nenda, togania masurat ele magurik ele magutti.
40Lepa geti alanangan biribiri si Jakob iageti mataiakenangannia ka ipot kambing si masurat tubu samba si mapusu'. Kise te enunggan ioi ibakkati mungkuat tarimeunia sarania samba masipasaraakenia ka mungkuat tarimeu Laban.
41Ke'bai tarimeu simagege ai pakakarai, galakngakenangan si Jakob ran sisisinia nenda ka ipora, ka kudduat pulokatnia. 42Tapoi ke moi kambing simasaggo tubu, ta igagalakake sangamberi ran nenda kabagania. Oto tarimeu simasaggo tubu nenda bakkatnia iate si Laban samba simaron tubu iate bakkat Jakob. 43Kabagat nene Si Jakob ibailiu simakayo. Maigi mungkuat kambing, biribiri, unta, keliddei samba sapaguguletnia.
Àwon tá yàn lọ́wọ́lọ́wọ́ báyìí:
1Mos. 30: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015