LUKA 20
20
1Ha tangwa limwe shimbu machilongesa atu mu tembele, nikwambujola sango lipema, asasendote akwa lutwe ni akwa kusonyeka hamwe ni makulwana ejile kuli iye. 2Ambile ngwo, Twambulwile; chiyulo chika wakulinga nacho yino yuma, hanji iya yoze wakuhele chiyulo chino? 3Iye waakumbulwile ngwenyi, Ni yami nawa mungunuhula chuma, ngwambulwilenu: 4upapachiso wa Yoano shina wakatukile mwilu, nyi? Shina kuli atu? 5O anyongene hakachi ko ngwo, Kachi mutwamba ngwetu, Mwilu; iye mamba ngwenyi, Mba kuchi te kunwamufulielele? 6Alioze kachi mutwamba ngwetu, Kuli atu; atu eswe kumatwasa mawe; mumu kanakunuka ngwo, Yoano iye profeta. 7O akumbulwile ngwo, Kutwanyingikine kuze wakatukile. 8Yesu wambile kuli ayo ngwenyi, Ni yami nawa, chishi kunwambulwila chiyulo chize nakulinga nacho yino yuma.
9Iye waputukile kutela chishima chino kuli atu ngwenyi, Umwe mutu watumbile munda wa uva, waukunjikile kuli njimi, wakatukile akaye mu wenyi ku chifuchi chikwo, mukutwama shimbu linene. 10Ni ha mwaka wa kuhela, watumine ndungo kuli njimi, akamwehe yimwe ya ku mihuko ya munda; alioze njimi amulambile, amukatwishile mokomoko. 11Cheka nawa watumine ndungo mukwo; iye nawa yamulamba, yamusaula, yamukatwisa mokomoko. 12Cheka nawa watumine wamuchitatu; neye nawa amulemekene, amumbilile haze. 13Mwenya munda wambile ngwenyi, Kuchi mungulinga? Ngwami, Mungutuma mwanami, ngunamuzange chikolo; hanji makamulemesa. 14Alioze muze njimi amumwene, anyongene hakachi ko, ngwo, Yono mwe swana, tumushihenu, hanga chihinga chikapwe nichetu. 15O amumbilile haze lia munda, nikumushiha. Kuchi kashika mwenya munda makaalinga? 16Kumakeza akonwone waze njimi, makahana munda kuli akwo. O muze achivwile ambile ngwo, Kanda chikapwa kama nilimwe tangwa. 17Alioze watalile meso kuli ayo, ngwenyi, Chino chinasonewa chika? Ngwo,
Liwe lize alitunyine tungi,
lienalio kuliapwa liwe lia helu lia mbango.
18Mweswawo malimbuka ha liwe lino, kumakamakuka; alioze hali mweswawo mulikaholokela, mulikamufwenya tuyifwenyufwenyu.
19Asasendote akwa lutwe ni akwa kusonyeka afupile ha ola yize yene kumukwata; o evwile woma wa atu, mumu anyingikine ngwo, Watele chishima chino cha kutuhisa. 20O amulayilile, atumine ngendeshi, waze aliongele kupwa akwa ululi, hanga akamulimbe ni kuhanjika chenyi, hanga akahase kumukunjika ku chiyulo ni poko ya nguvulu. 21O amuhulile, ngwo, Longeshi, tunanyingika yena wakwamba, wakulongesa ni ululi, kushi katonde kuli atu, alioze wakulongesa jila ya Zambi nikulita ni umwenemwene. 22Ngwetu, Muchilita ni shimbi hali yetu shina kuhana lijimu kuli Sesare, nyi? Shina ka? 23Alioze wamwene kalimbalimba ko, wambile kuli ayo ngwenyi, Kuchi te nunangweseka? 24Ngulwezenu lumbongo. Chizulie ni chisoneko chaya chiliko? O ambile ngwo, Cha Sesare. 25Iye wambile kuli ayo ngwenyi, Mba hanenu kuli Sesare yuma ya Sesare, ni kuli Zambi yuma ya Zambi. 26O kahashile kumuhangulula ha liji kumeso ja atu; o akomokene ha kumbululo lienyi, aholele kulungunga kwo.
27Mba amwe a kuli A-Satuseu ejile kuli iye, waze akwamba ngwo, Uhindukilo wakuhi niumwe. 28O amuhulile ngwo, Longeshi, Mose wasonekene ngwenyi, Kachi yayo ya umwe mafwa, kali ni pwo, iye keshi mwana, mwanakwo akambate mwe pwo, akasangule ana kuli yayo. 29Kwapwile asongo-ni-atu shimbiali: ni mutangu wambachile pwo, wafwile keshi mwana; 30ni wamuchiali; 31ni wamuchitatu wamumbachilile; chizechene e shimbiali nawa kahichikile ana, afwile. 32Kulutwe lia chize pwo nawa wafwile. 33Ha uhindukilo pwo liaya makapwa? Mumu e shimbiali apwile nenyi ngwe mukwo-pwo.
34Yesu wambile kuli ayo ngwenyi, Akwa mwaka uno, kakumbata, kakuhangisa malo: 35alioze waze maamona kutela azuke chihanda ha mwaka uze muwizaho ni uhindukilo hakachi ka afu, chipwe keshi kumbata chipwe keshi kuhangisa malo: 36mumu chipwe kahashile kufwa nawa: mumu kanalite ni angelo; kanapu ana ja Zambi, se ana ja uhindukilo. 37Alioze se afu mahinduka, chipwe Mose wasolwele mu chihanda cha kutwala ku chiputa, muze kanavuluka Mwene ngwenyi, Zambi ya Apalahama, ni Zambi ya Izake, ni Zambi ya Yakomba. 38Achi, iye hi Zambi ya afu ko, alioze ya a mwono; mumu eswe katwama ni mwono kuli iye. 39Amwe a kuli akwa kusonyeka akumbulwile ngwo, Longeshi, hiwamba kanawa. 40O kahamukine nawa kumuhula nichimwe.
41Iye wambile kuli ayo ngwenyi, Ngwe kuchi akwamba ngwo, Kristu iye mwana David? 42Mumu David iye mwene kanambe mu mukanda wa Masamu ngwenyi,
Mwene wambile kuli Mwene wami ngwenyi,
Twama ku kwoko liami lia chindume,
43ndo mungusa akwa kole je chitwamo cha yiliato ye.
44David kashika kanamuvuluka ngwenyi, Mwene; ngwe kuchi mapwa mwanenyi?
45Shimbu atu eswe machipanjika, wambile kuli tumbaji twenyi ngwenyi, 46Keyelenu akwa kusonyeka, waze akufwila kwendangana ni mahina asuku a mukambo, akuzanga kwameneka mu yitanda, ni yitwamo ya kulutwe mu masunangonga, ni mihela ya kulutwe ku yiteleka; 47waze akuwumbula mazuwo ja twamishi ja mapwo, ni ha ulembekese kakulemba yipinji yisuku: wano kumakatambula uhiso wahiana.
Àwon tá yàn lọ́wọ́lọ́wọ́ báyìí:
LUKA 20: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.
