LUKA 19
19
1Iye wanjilile nikupalika ndusu mu Yeriku. 2Kumanyi, kwapwile lunga, jina lienyi, Zakeu, iye mukwa lutwe hakachi ka akwa kufwetesa lijimu, te pichi. 3Wafupile kumona Yesu chize apwa; alioze kahashile mumu ha mbunga, mumu wapwile mwihi. 4Iye wazombokele kulutwe, wanyinyine ku musuwa hanga akamumone, mumu te mapalika mu tapalo lize. 5Muze Yesu aheteleko, watalile kwilu, wamumwene, wambile kuli iye ngwenyi, Zakeu, Upupwise, usunuke; mumu musono changutamba kutwama ku zuwo lie. 6Iye walipupwishile, wasunukine, wamutambwile ni kuwaha. 7Muze achimwene, o eswe anyenyetene, ngwo, Haya nikutula ku zuwo lia lunga yoze wapwa chivulumunyi. 8Alioze Zakeu wamanyine, wambile kuli Mwene ngwenyi, Mwene, chihanda cha hakachi cha yikumba yami ngunahane kuli yiswale; nyi kachi natambwile chimwe kuli mutu umwe ni chisanyino, kachi ngunahilwisa kuli iye yisuho yiwana. 9Yesu wambile kuli iye ngwenyi, Musono ulamwino hiweza ku zuwo lino, mumu iye nawa mwana Apalahama. 10Mumu mwe Mwana Mutu wejile mukufupa ni kulamwina yoze hanatoko.
11Alioze shimbu machipanjika ku yino yuma, wawezele kutela chishima, mumu apwile hakamwihi ni Yerusaleme, mumu ashinginyekene ngwo, Wanangana wa Zambi himuusoloka. 12Kashika wambile ngwenyi, Umwe mutu mulemu wayile ku chifuchi kusuku mukutambula wanangana, akahiluke. 13Iye watambikile kumi lia ndungo jenyi, waahele kumilia mbongo, wambile kuli ayo ngwenyi, Sepenu najo ndo mungwiza. 14Alioze enya chifuchi chenyi amuvwilile kole, atumine tunganda kunyima yenyi, ngwo, Kutusolo yono kutuyula. 15Mba muze te hahiluka, se hatambula wanangana, wambile atambike ndungo aze aahele mbongo, hanga anyingike chize mweswe watembwile ha kusepa. 16Mutangu wejile kumeso jenyi, ngwenyi, Mwene, lumbongo we hanafumbula kumi lia mbongo jikwo. 17Wambile kuli iye ngwenyi, Hiunalingi kanawa, yena ndungo mupema; mumu wapwa wamwenemwene ni chikepekepe, pwako ni chiyulo cha kumi lia membo. 18Wamuchiali wejile, ngwenyi, Mwene, lumbongo we hanafumbula mbongo jitano. 19Wambile kuli iye nawa ngwenyi, Pwako yena nawa helu lia membo atano. 20Mukwo wejile, ngwenyi, Mwene, tala, yono lumbongo we mwenawo nafungile wa kutulikila mu chitambala. 21Mumu nevwile woma wa yena, mumu uli mutu mukalu: wakwanda chize kwatumbikile, wakucha chize kwakuwile. 22Yamba kuli iye ngwenyi, Mu kanwa lia yena mwene mungukupatwila, ndungo mupi. Yena wanyingikine ngwe nguli mutu mukalu, nikwanda chize chatumbikile, nikucha chize chakuwile. 23Kuchi te kevwe kwahanyine mbongo jami kuli akwa kusumbakenya mbongo, ha kwiza chami kachi hinajitambula ni mbwezo. 24Iye wambile kuli waze amanyineko ngwenyi, Chizenu kuli iye lumbongo, numuhane kuli yoze uli ni kumi lia mbongo. 25O ambile kuli iye ngwo, Mwene, kumi lia mbongo kali najo. 26Mumu ngunambe kuli yenu ngwami, Mweswe ukwete kumakamwaha, alioze yoze keshi nacho, chipwe chize ali nacho kumakamuchizacho. 27Alioze wano akwa kole jami, waze kazangile yami ngwayule, anehenu kuno, nwashihe kumeso jami.
28Muze te hamba yino yuma, watetekelele, nikukanduka ku Yerusaleme. 29Shimbu machikundama ku Mbetefweje ni Mbetaniya, ha mulundu uze jina liawo, wa Olevwe, watumine aali a kuli tumbaji, 30ngwenyi, Yénu kwenu, nukanjile mu chihunda chize chalitalangana ni yenu; muze mwene shimbu mununjila, munukawana mwana-chimbulu wa kukasa, hali iye niumwe kanda achitwamaho nilimwe tangwa: nukamujitule, nukamunehe kuno. 31Nyi kachi umwe manuhula ngwo, Kuchi te nunamujitula? Ambenu ngwenu, Mwene kanamufupu. 32Mba waze aatumine, ayile, awanyine chizechene ngwe ambile kuli ayo. 33Shimbu machijitula mwana-chimbulu, akako ambile kuli ayo ngwo, Kuchi te nunajitula mwana-chimbulu? 34O ambile ngwo, Mwene kanamufupu. 35O amunehene kuli Yesu; asele mahina jo hali mwana-chimbulu, atwamishine Yesu hali iye. 36Shimbu machiya, alile mahina jo mu jila. 37Shimbu machikundama ku kupalumuka cha mulundu wa Olevwe, chizavu cheswe cha tumbaji twenyi aputukile kuwahilila nikuhalisa Zambi ni liji linene ha yipupu yize yeswe amwene; 38ngwo, Kawaha Mwanangana yoze meza mu jina lia Mwene: sambukila mwilu, ni uhenya mwilu mwahiana. 39Mba amwe a kuli A-Fwariseu a ku mbunga ambile kuli iye ngwo, Longeshi, kanjisa tumbaji twe. 40Iye waakumbulwile ngwenyi, Ngunanwambulwila ngwami, Kachi wano mahola, kachi mawe makololoka.
41Muze akundamine, watalile limbo, walilililile, 42ngwenyi, Kachi wanyingikine chipwe yena, chipwe chikepe ha lino tangwa lie, yuma ya sambukila ye! Alioze haliapwila yinaswame ku meso je. 43Mumu matangwa kumakeza hali yena, muze akwa kole je makakutambika mulumba wa mavu ha kukujingilika, makakuseleka, makakukwata ha malumbu eswe. 44Kumakakupuzula hashi, ni ana je muli yena, kechi kahichika muli yena liwe limuwika ha liwe likwo; mumu te kwanyingikine mwaka we upema.
45Iye wanjilile mu tembele, waputukile kutuhwisa akwa kulanda. 46Ngwenyi, Chinasonewa ngwo, Zuwo liami kumulikapwa zuwo lia kulembela: alioze yenu hinunalipwisa chivwenge cha mihuza.
47Iye wapwile nikulongesa tangwa ha tangwa mu tembele, ni asasendote akwa lutwe ni akwa kusonyeka ni akwa lutwe ja atu afupile kumwonwona. 48Alioze kawanyine chize mahasa kulinga; mumu atu eswe amupanjikile ni mbunge yeswe.
Àwon tá yàn lọ́wọ́lọ́wọ́ báyìí:
LUKA 19: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.
