UPUTUKILO 4
4
1Mba lunga walimwene ni mukwo-pwo Eva. Iye yaka ufumba, yasema Kene. Yamba ngwenyi, Natambula mwana-lunga kuli Yehova. 2Kulutwe yasema nawa mwanakwo Abele. Abele mukwa kufunga mapanga, alioze Kene mukwa kulima. 3Muze miaka hiyacha, Kene yatwala mulambu kuli Yehova wa mihuko ya ha mavu. 4Abele neye yatwala tupula-jimo a mu chendo chenyi hamuwika ni maii jo. Yehova yalemesa Abele ni mulambu wenyi. 5Alioze Kene ni mulambu wenyi kamulemeseneko. Kashika Kene yevwa ufwatulo, yanyakana ku meso. 6Mba Yehova yamba kuli Kene ngwenyi, Ufwatulo waka? Kuchi te unanyakana ku meso? 7Nyi mulinga kanawa kechi kukutambula nyi? Alioze nyi kwalingile kanawa shili kuyinautama ku chikolo. Kuli yena anase mbunge yenyi mba yena mukamuyula.
8Kene yahanjika ni mwanakwo Abele. Mba muze apwile mu munda Kene yakatukila mwanakwo Abele, yamushiha. 9Yehova yamba kuli Kene ngwenyi, Mwanakwenu Abele kulihi ali? Iye yakumbulula ngwenyi, Chanyingikine. Te yami nguli kafunga ka mwanakwetu, nyi? 10Yehova yamba ngwenyi, Yika walinga? Liji lia manyinga a mwanakwenu linatete hashi kuli yami. 11Kashika haliapwila yena unashingiwa ku mavu aze hanapakula kanwa lio kutambula manyinga a mwanakwenu ku kwoko lie. 12Chize ku tangwa lia musono muze mulima ha mavu kechi kukwaha tachi jo. Kumukapwa mukwa kuchina kanda chendanganyi hano hashi. 13Kene yamba kuli Yehova ngwenyi, Lamba liami liahiana naye, chichi kuhasa kulimbata. 14Musono hiwanguhumina hashi, chipwe kumeso je mungukaswama. Mungupwa mukwa kuchina kanda chendanganyi hano hashi mba mweswawo manguwana mangushiha. 15Alioze Yehova yamukumbulula ngwenyi, Kashika mweswe mashiha Kene mamufwetesacho yisuho shimbiali. Mba Yehova yasa chinyingi hali Kene kuchina umwe ha kumuwana mamushiha. 16Kene yakatuka kumeso ja Yehova, yatwama mu chifuchi cha Nole, ku sali lia chivumbuko lia Endene.
17Kene yalimona ni mukwo-pwo, yaka ufumba, yasema Enoke. Kene yatunga limbo, yaliluka jina lia mwanenyi Enoke. 18Enoke yasema Ira, mba Ira yasema Mahujele; Mahujele yasema Matujela; Matujela yasema Lameke. 19Lameke yambata mapwo aali, jina lia umwe Ata, jina lia mukwo Zila. 20Ata yasema Yavala, iye kalamba ka waze eswe akutwama mu mbalaka, akwa kupita yimuna. 21Jina lia mwanakwo Yuvala, iye kalamba ka waze eswe akwimba kalialia ni ndembo. 22Zila neye yasema Tupalikene mukwa kufula yitwa yeswe ya mukosa ni utale. Ndumbwenyi iye Namahe.
23Mba Lameke yamba kuli mapwo jenyi ngwenyi,
Enu Ata ni Zila ivwenu liji liami:
enu mapwo ja Lameke panjikenu kuhanjika chami.
Hinashiha mutu mumu hangulemeka.
Hinashiha mukweze ha kunguwonda.
24Nyi makala Kene yisuho shimbiali, chamwenemwene Lameke mamukala makumi shimbiali
a yisuho ni yisuho shimbiali.
25Mba Alama yalimona nawa ni mukwo-pwo yasema mwana wa lunga, yamuluka jina ngwenyi, Sete. Mumu yamba ngwenyi, Zambi hangusela munyachi ukwo kusalakana Abele, mumu Kene yamushiha. 26Ni Sete nawa yasema mwana wa lunga, yamuluka jina ngwenyi, Enoshe. Ha matangwa aze atu aputukile kusanyika ha jina lia Yehova.
Àwon tá yàn lọ́wọ́lọ́wọ́ báyìí:
UPUTUKILO 4: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.