Luk 3
3
Ɛka Jɔn nwura alib
1Nfɔntim antol Tibɛrɔs ajɔl ntakpa ntol a Rom na nya liko na ngara yifɔ Pɔntus Payilet yɔ ajɔlɔ mbabɛ a Judiya, Hɛrɔd ntol a Galili, na mɔnyɛn ɔwɛ Filip yɔ atɔb ajɔl ɛtɔna ntol a Ituriya na Trakonit, na Lysanya ntol a Abilɛnɛ. 2na ngara yi fɔ atakpa anɛ ba anyina arɛ Anas na Kefas, ajɔl balemanjɔm Ɔsɔwɔ, Ɔsɔwɔ abong atɔg Jɔn mɔn a Sakariya ngɔ na Ɛkpelele. 3Jɔn atum ajɛn bijiba bi ɛrenɔ ɛlagɛ Aya Jɔdan, abonga alom Ɔsɔwɔ, arɛ anɛ agbɔ ndɔn na abeɔfɛm abɔ, awuri alib, Ɔsɔwɔ atum akarɛ abɔ. 4Mɔng ayɛlɛ na nwɛr a Isaya nyɛn amir Ɔsɔwɔ:
“Lilom li nɛ ɛkɔna ngɔ na ɛkpelele,
‘Tore mba ɔkarɛ Tata,
wɔ ɔlem mba atɔr ɔkarɛ.
5Rore adɛmɛ kpakpa,
rɛnɛ atakpa na asusuga biwɔng,
agɔdɛ aba atɔr,
aba akpɔ kpɔk ajɔl sɛl.
6Kpakpa anɛ ala yɛn ɔnyangɛ bi Ɔsɔwɔ.’ ”
7Jɔn atɔg lirɔng anɛ ba abalɔ alib nwuri arɛ, “Wun abɔn ɛgbɔda! Wun ɔkɛrɛ arɛ ɔmamal ɔrɛm ɛyama litem ji Ɔsɔwɔ ji ɛla ba ɛ? 8Ba bɛl likpen li ɛla teb arɛ wun ɔgba gbɔ ndɔn na abeɔfɛm. Wun ɔdɛ bong ɔtɔg ɛlina arɛ wun ɔkpe Ɛbram mɔng nsɔjina. Mɛ ntɔga wun ndɛ Ɔsɔwɔ amal alem atal yafa ajɔl abɔn ba Ɛbram. 9Lifog ɛla gbɛg nub ɔte ayiayi na arug, lifog ɛnɔng na nub ote ayiayi yi adɔgɔnɔ kab ateng akab ala gbɛg arɔ akag na ngon.”
10Anɛ ba fɔ abib Jɔn, “Wur ɛla lem nan?”
11Jɔn afanga abɔ, “Nɛ yɔ akpenɔ ɛlimi bibal, karɛ nɛ yɔ adɛnɔ bɛl, nɛ yɔ akpenɔ nsɔl lili abanga na nɛ yɔ adɛnɔ bɛl.”
12Bafora ataksi abal arɛ aba wuri alib abib bɛ “Nteteba, wur ɛla lem nan?”
13Atɔg abɔ arɛ, “Ɔtɔb teg ɔkɔ ɔseng mɔng akɔga.”
14Ɔsɔja ɛbibɛ, “Wur ɛla lem nan?”
Jɔn afanga abɔ, “Ɔtɔb tabɛ nɛ akpuga na ɛbe mba, ɔtɔb lagɛ anɛ nfɛm mbɔlmbɔl, ji akpega wa ɛbenga wa.”
15Anɛ ajɔl seg Krayis, akɛrɛ na ntem abɔ afi Jɔn arenɔ Krayis. 16Jɔn afanga abɔ kpakpa, “Mɛ nkɔga alib nyanga nwuri wun. Nɛ yɔ akpenɔ ɛkɔ aseng am ayɔbak, mɛ ndiram yɔ mal nfungi aligi na akpagata ayɛ. Ala wun wuri alib na Mbara Ɛtugi na ngon. 17Ɛkoriya ɛfɛba nsɔl ɛyɔbɛ nɔ ɔbɔ, ji alagɔ afɛb akpaga ayege. Akɔ amug atore na ɛbonge afengɛ asɔ akpaga na libar ngon li ɛdɛg lim.” 18Jɔn akag abɔ ɛkora biji na ɛgbem alom, abong alom Ɔsɔwɔ atɔg abɔ.
19Na ji Jɔn atobɔ ntol a Hɛrɔd ɛgan ateb akɔl Hɛrɔdiya, nkal a mɔnyɛn, na ɛgbem abeɔfɛm ya alɔ lem. 20Hɛrɔd alem ɛbe naji akagɔ Jɔn na ngbakɔbɔ.
Ɛwura alib ji Jisɔs
Matiyu 1.1-17
21Na ji anɛ awuri alib, Jisɔs atɔb awuri. Na ji ajɔl kag ɔrɔ libo ɛribi. 22Mbara Ɛtugi abudi abole wɛ na biji mɔng ɛmɛb. Lilom ɛjog na libonta: “Wɔ mɔn ɔma, yɔ ɔkɔra mam nkpe ɛyɛbalitem na na.”
Ɛlub ji Jisɔs
Matiyu 1.1-17
23Na ji Jisɔs alɔ rir nya litil na woba, abɔm litom ɛlɛ. Anɛ anyinyi arɛ Jisɔs mɔn a Josɛf yɔ arenɔ mɔn a Hɛli. 24Hɛli mɔn a Matat, Matat mɔn a Lɛfi, Lɛfi mɔn a Mɛliki, Mɛliki mɔn a Janayi, Janayi mɔn a Josɛf, 25Josɛf mɔn a Matatayas, Matatayas mɔn a Amɔs, Amɔs mɔn a Nahum, Nahum mɔn a Ɛsili, Ɛsili mɔn a Nagayi, 26Nagayi mɔn a Mati, Mati mɔn a Matatayas, Matatayas mɔn a Sɛmeyi, Sɛmeyi mɔn a Jɔsek, Jɔsek mɔn a Joda, 27Joda mɔn a Jowana, Jowana mɔn a Resa, Resa mɔn a Serubabɛ, Serbabɛ mɔn a Selitiyɛ, Selitiyɛ mɔn a Nɛri, Nɛri 28mɔn a Mɛliki, Mɛliki mɔn a Adi, Adi mɔn a Kosam, Kosam mɔn a Ɛlimadam, Ɛlimadam mɔn a Ɛr. 29Ɛr mɔn a Josuwa, Josuwa mɔn a Ɛliyɛsa, Ɛliyɛsa mɔn a Jorim, Jorim mɔn a Matat, Matat mɔn a Lɛfi, 30Lɛfi mɔn a Simiyɔn, Simiyɔn mɔn a Juda, Juda mɔn a Josɛf, Josɛf mɔn a Jonam, Jonam mɔn a Ɛliyakim, 31Ɛliyakim mɔn a Mɛlɛya, Mɛlɛya mɔn a Mɛna, Mɛna mɔn a Matata, Matata mɔn a Natan, Natan mɔn a Defid, 32Defid mɔn a Jɛsɛ, Jɛsɛ mɔn a Ɔbɛd, Ɔbɛd mɔn a Bowas, Bowas mɔn a Salimɔn, Salimɔ mɔn a Nasɔn, 33Nasɔn mɔn a Aminadab, Aminadab mɔn a Adimin, Adimin mɔn a Arni, Arni mɔn a Hɛsirɔn, Hɛsirɔn mɔn a Pɛrɛs, Pɛrɛs mɔn a Juda, 34Juda mɔn a Jɛkɔb, Jɛkɔb mɔn a Asak, Asak mɔn a Ɛbram, Ɛbram mɔn a Tɛra, Tɛra mɔn a Nahɔ, 35Nahɔ mɔn a Sɛrug, Sɛrug mɔn a Rɛyu, Rɛyu mɔn a Pɛlɛg, Pɛlɛg mɔn a Ɛba, Ɛba mɔn a Sɛla, 36Sɛla mɔn a Kenan, Kenan mɔn a Afasat, Afasat mɔn a Sɛm, Sɛm mɔn a Nowa, Nowa mɔn a Lamɛk, 37Lamɛk mɔn a Mɛtusɛla, Mɛtusɛla mɔn a Ɛnɔk, Ɛnɔk mɔn a Jarɛd, Jarɛd mɔn a Mahalalɛ, Mahalalɛ mɔn a Kenan, 38Kenan mɔn a Ɛnɔs, Ɛnɔs mɔn a Sɛt, Sɛt mɔn a Adam, Adam mɔn a Ɔsɔwɔ.
Àwon tá yàn lọ́wọ́lọ́wọ́ báyìí:
Luk 3: ABM
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2022 Luke Initiative for Scripture Translation
