Matìyò 6
6
A kwu ani fày àghù yə̀ ghu laʼà kê nəniy
1Ghà nîy tsə iyɛmì, kəə ghà nə̀ zəŋə dzə̂ ayiə yə a də nəniy tsitsi anə sə k-a-zə̀ nə̀ aghê si toʼo koʼo bə dzìy nə̀ ghà də aghê àdzoŋə̀ yìy. Abu ghà zəŋə nəniy aghii, ghà ki də kə̀ kəli nəway namə kə kə ŋwô bə̂ nəniy awò təli ghii wə ù də nəniy an-a-vələ. 2Abu ghà kwuni nìy kə nəniy fyiə kiy nyə̀ yə̀ â wù wə̀ ù làʼà nəniy, kə̀ dê dzə̀ uwe wiy anə yiə yə ŋwam tə ghù tìy zəŋə a ndaw tə udzəŋə, à liy yiy zəŋə sòʼò anə tə dzə̀lə ani kəli məŋkwiʼi awò àghè. Mə ndzəmə̀ dzìy bə̀ ŋwò â ghà nə̀ ghu mə kəli namə kə ghu kiy kə̀dzə̀m. 3Abu wò kwuni fây nəniy wù wə̀ ù làʼa, kə̀ zəŋə dzə̀ nə̀ wù wə̀ ù dòʼò nìày tsə a sə̀ə̀ wò nə̀ ù tòʼò kəli tsə ayiə yə wò zəŋi. 4Abu wò zəŋi nəniy ghi, à ghî də̌ nə̀ wò dè dzə̀ wày uwe wiy. Təli yiə̀ wə̀ ù kòʼò nəniy ayiə yə wò zəŋə an-a-nù, ù kî nyə̀ wò nə̀ namə kiy.
Yesù ə tyi dè àyiə kwùmə̀ yə̀ nə ayiə gwuŋə yiy
(Lukâs 11.2-4)
5Abu wò gwùŋə̀ nəniy, kə gwuŋì dzə̀ yəə à də̀ ŋwam tə aghù! Ghu liə ani zee anə ndaw tə udzəŋə nə̀ anə kè tə tədzə̀lə ghu gwùŋə̀, nə̀ aghee àdzə̀m si koʼo bə ghu. Mə ndzəmə̀ dzìy bə̀ â ghà nə̀ ndzòʼò àghě ghè yə̀ mə kəli təŋ namə kə ghu kiy kə̀dzə̀m. 6Abu wò dziy gwuŋì, wò ə tsìy nyi yə̀ anə foŋə̀ ndaw yiə̀ nə̀ noŋə̀ wò, fè bə̀ kə̀bàʼ, gwùŋì yə̀ â təli yiə̀ an-a-nù. Təli yiə̀ kwu ŋwô fyiə kə wò zəŋə nəniy an-a-nù, à də̌ we ù kì nyìə̀ wô nə̀ namə kiy.
7Abu wò gwùŋə̀ nəniy, kə̀ ŋge dzày kwùnì dzə̀ iyiə ìmoʼo yiy anə ndə̀mə̀ sòŋə anə ayiə yə aghû yə̀ ghu də kwu way Zə̀kìy zəŋə, aŋwòə ghu mòʼò kə nə̀ abu ghu dzây kwunì tsə nəniy ayiə yiy anə ndə̀mə̀ nsòŋə, Zə̀kǐy zuw, dyaŋi nyə̀ bə̀ fyiə kə ghu ŋwaa nəniy. 8Kəə wò nə̀ zəŋə dzə̂ yəə à də̀ ghu, aŋwòə təli yiə̀ mə kəli na zìy fyiə kə wò liə nəniy ani ŋwa yə̀ â we. 9Abu ghà gwuŋə̀, ghǎ dzìy tsə nə̀,
“A təli ghələ an-a-vələ,
ghè gwuŋə̀ nə̀ aghê nyiə̀ mə̀ŋkwiʼi anə izəd yiə̀.
10Ghè gwuŋə̀ sòʼò nə̀ wò bû saʼ muə̀ tə aghè àdzə̀m.
Zəŋi tsə nə̀ aghê si zəŋə yəə ayiə yə wò tsə̀m tsə nəniy nə̀ a doʼò fə̀ an-a-mbvə̀dintsə ighəd yiə i də nəniy ate an-a-vələ.
11Kə̀lə â wò, nyìə bə̀ ghəd nə̀ ùfànyiə wə u kpe doʼò nəniy â ghə̀d ani nyi zii.#6.11 Moo nyə̀ ghəd nə̀ ùfànyiə u tswutswu wiy
12Nǐyzə̀ àyiə ghələ àbɛbə yiy,
anə yiə yə ghè nîyzə̀ə̀ nəniy ayiə àbɛbə yə aghê zəŋə nəniy nə̀ ghə̀d.
13Kə̀ bɛmə dzə̀ nə̀ ghè zəŋi ibɛb abu imwâmkòʼ yìy bû nəniy,
i kwunə bii fyiə ŋwo bə̂ kə ghəd abu Satàn mwàmə̀koʼò ghəd nə̀ ghè zəŋi ibɛb.”#6.13 Ùŋwàʼà ù liy wiy kwe fəli tsə nə̀, Kədaʼa nə̀ ŋkwiʼi miy də â wò anə sòŋə indzə̀m.
14Abu wò nìyzə̀ ŋwò yə̂ ìbɛb yə aghê liy yiy zəŋi bə̂ azoŋə̀ wò, Təli yiə̀ wə̀ ù də nəniy an-a-vələ, kî nìyzə̀ sòʼò àyiə àbɛbə yiə̀ yə̀ wò zəŋə nəniy. 15Abu wò də kə̀ kwuni nîyzə̂ àyiə àbɛbə yə aghê liy zəŋə nəniy azoŋə̀ wò, Təli yiə̀ kì nìyzə̀ sòʼò wày ayiə yiə̀ àbɛbə yiy.
Yesù ə tyi dè àyiə kwùmə̀ yə̀ nə̀ ìdzwə ìbamə yiy
16Abu ghà bamə nəniy idzwə yiy kəə ghǎ nì kwè nia fyiə tswi bə̂ dzə̂ utwumusə wiy anə yiə yə ŋwam tə aghù tìy zəŋə nəniy. Ghu ghî zəŋə nə̀ aghê dzə̀m si koʼo kyilə bəə nə̀ ghu bamə àdzwə. Mə ndzəmə̀ dzìy bə̀ ŋwò â ghà nə̀, abu ghu zəŋi nəniy ghi, ghu mə ghî kəli təŋ namə kə ghu kiy. 17Abu ghà dziy bam idzwə, sǔw tsə nə ntwùmə̀sə miy ghǎ kyili kə nə̀ mbvumiy, sə̀àʼì dzwàb kə sòʼò kə̀tuw. 18Tə̀ kəə aghê nə̀ kyilə nə̀ ghà bamə ìdzwə. À kì kyilə tsə kə Təli ghi wə ù də an-a-vələ, aghê də kòʼò wày, à də̌ we ù kìy niamə gha.
Zəŋi tsə nə̀ ikwum ghi yiy si də an-a-vələ
(Lukâs 12.33,34)
19Kəə ghà nə̀ zəŋə dzə̂ nə̀ ghà ki niy ufyiə ghii wiy ghà nûw na fə an-a-mbvə̀dintsə, anə lòʼò kə ususoʼo wiy də ani fwu ŋwò kə, moo u də nəniy ani dzè, moo aghê tsoŋə yiy də ani bwàlì nyi yə̀ ghu tsoŋ ŋwô kə. 20Ghà kwuni zəŋi tsə nə̀ ufyiə wə̀ ghà kwu nəniy, u si də an-a-vələ anə lòʼò kə ususoʼo wiy də wày ani fwu ŋwò, moo u də wày ani dzè, moo loʼo kə aghê tsoŋə də wày ani bwàlì tsìy nyi tsoŋ ŋwò kə. 21Fòŋ ə̀ wù taw də̀ kə a lòʼo kə ufyiə u we ùsoŋə̀ wìy də nəniy ate.
Asə yiy də yəə à də̀ kaʼì tə uwè
(Lukâs 11.34-36)
22“Asə yiy də yəə à də̀ təkaʼì anə uwè, aŋwòə a fî wù ani kòʼ tə̀loʼo. I ghî dè tsə nə̀ abu asə yiə̀ yìy dzwabə̀ nəniy, loʼo tiy ki zwe anə uwè niə̀ ùdzə̀m. 23Abu asə yiə̀ də kwuni wày dzwab, wò wày soʼo ani kòʼ dzwàb dzə̀ tə̀loʼo, à ghî də̂ nə̀ ləm kiy də anə uwè niə̀. Abu asə yiə̀ yə̀ a də yəə à də̀ təkaʼì anə uwè niə̀ a də koʼò wày loʼo tiy, à ghî də̌ nə̀ wò ba mùə̀ an-a-ləm.”
Wò wày ani dòʼò dzə wù kəfàʼ â àghè bè
(Lukâs 16.13)
24“Wù lìy wày dzə ani dòʼò wè kə̀fàʼ awò nə̀ mwe ufàʼ àbè, ù də̀ ani liə yəə ù lìy, bà ù lìy wə̀, moo ù ki bvamə faʼa awò ù lìy kwunə kòʼò kè ù lìy wə̀. Wò wày dzə ani fwùlì Kə̀zə̀, wò ki fwulə soʼo ùkhiy wiy nyi mòʼ.”
25“À yù də̀ ighe mə dzîy bə̂ nəniy â ghà nə̀ ghà kə fyimi dzə̀ ìwee nəli yiy kwùmə̀ yə̀ nə̀ fyiə kə ghà kî nyiə moo kə̀ ku ghà kî muə, moo fyimə ìwee nəli nə̀ ghà kî sì dzə̀ŋə̀ kìə̀ anə iwè yəə à də̀ təndzwu. Imuə̀ ghii yiy we tsìy fyi ŋwô ufânyiə wiy ə, uwe wiy tsìy fyi soʼò nəniy ndzwu tiy ə? 26Ghà kòʼ tsə ŋwùni mə ìn zəə tsîy nəniy idoŋ, ìn ze dzə̀ wày ufyiə wiy, kpìy sòʼò wày ufyiə wiy nia anə mənta. À namə̀ yèmə̀ kə təli ghi wə ù də nəniy anə Kəvələ azòŋə̀ ŋwùni mə̀ ghà mə̀, Ghǎ kə̀ tsìy fyi nəway ŋwùni mə̀ ghà mə̀ ə̀? 27Wù lìy də̀ ŋwô anə uzə ghii ù kwe fwuli tsə ntsuk fə̀ liy fiy anə imùə̀ i we, bòʼ nə̀ ù ŋge fyimə tsə̀ ùwee ə̀?”#6.27 Moo kwe fəli tsə idâb yə̀ ù kwu nəniy
28À də kìə̀ ghà fyimə nəniy iwe nəli yiy anə iyiə i təndzwu ə? Ghà kôʼ kə yəə uzuu wiy niɛmə nəniy ate. U faʼà dzə̀ wày fyiə kə̀ liy kiy, moo zwùbə̀ tə̀ndzwu ani dzə̀ŋì. 29Mə kwuni dzìy bə̀ â ghà nə̀ Solomùn kə də̌ wù ù kumə̀ wìy, yəə ù kə boʼò kumə kə ghii, ù kə kə̀ dzəŋì kôʼ dzə̂ nəway ndzwu tiy tə kə mwâ dzwabə̀ yəə à də̀ ubwolə uzǔ wə. 30À də Kəzə̀ kə zəŋə nə̀ uzu wə̀ si mwaa dzwabə. Uzuu wə ŋgà koʼò tsə zii, abù tsutsu, ghu pìə̀ màʼà kə anə intsə nə̀ u mə zwum. Zə̀kiy kî yèmə̀ tsìy fyiə ŋwò azoŋə̀ ghà, ù kaw nyə̀ ghà nə̀ ndzwu tiy. Ghà kwu nyòŋə fə ibɛmə.
31Ghà kə fyimi dzə̀ iwe nəli yiy nə̀ “Ghè sî nə nyi yə̂ kìə? Ghè sî nə̀ mu yə̂ kìə? Moo ghè sî nə dzəŋì kìə̀?” 32À yù də̌ ndzòʼò ùfyiə wə aghû yə̀ ghu də kamə bɛmə Zə̀kìy, ghu nyəŋə tsə̂ adzəmə̀ ùghe wiy. Təli ghi wə ù də nəniy anə kəvələ, ù kwu ŋwô nə̀ ghà laʼà ùfyiə wə ùdzə̀m. 33Iyiə isə sə yə ghà kwuni kwu ani zəŋi à də̀ ani kaw kəli fyi kə dzə̀ yəə Zə̀kìy saʼa nəniy ate nə̀ ayiə yə̀ Zə̀kìy liə nəniy nə̀ ghà si faʼa, ù kî nyə̀ mà bə̀ ghà nə̀ ùfyiə ù liy wə ùdzə̀m. 34À yu də ighe mə dziy nə̀ ghà kə isə yiy na dzə̀ anə ayiə tsutsu yiy, ghà na tsə kə ìsə anə ayiə zii yiy aŋwòə tsutsu kwu sòʼò ani bù nə̀ ayiə we yiy.
Àwon tá yàn lọ́wọ́lọ́wọ́ báyìí:
Matìyò 6: isu
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© CABTAL 2023
