Zâŋ 2
2
Gel nyá wûny a Kanaa
1Nâm sére a falké, kú nyá wûny a ɓil pû a Kanaa ka tísiri a Galilê. Mâa a Zezú e a gelké, 2dáy kú ɗí Zezú rá̧ gunbɛʼɛri sé kɔ́. 3Gelka vôn ɔ́y, mâa a Zezú sa hí̧ nɛ́: «Njukuri tí ka vôn mbaa.» 4Zezú fere a sa: «Mâa, ɓá mɔ̌ pé e tɔ́ʼɔ mí hɛ̧ ka mi e niŋáké lé? Sɛl a sêe niŋ péna a mǐ pa̧n ka̧ nyá ɓáy.» 5Dáy Mâa a Zezú sa hí̧ njukupénari̧ ɓá: «Í niŋ hɛ̧ too a ké e vbí wǎyri.» 6Kɛrɛ zêe erú, ka Juyífri ɓá mbii kɔ̧rú̧ ɓay a mɔny mûn ɓá báŋké ka sáŋna a kuriri vbíy. Hɔ̧́na a kɛrɛké mbêw too, ma mbí litɛrɛ mbii gbaŋa ísɔ́t. 7Zezú sa hí̧ njukupénari̧: «Í ɗú mbii mbá kɛrɛ nɔ́rí̧ too.» Kú ɗú mbii mbárú too. 8Dáy Zezú sa hí̧ kuriri ɓá: «Ŋgɛŋnɛ́, í ɗú mbii nɔ́ kpay sé hí̧ gáŋnjuku mára̧» Dáy kú niŋ ɓá báŋké nɔ́ a ké sa hí̧ kuriri. 9Gelka gáŋnjuku mára̧ ráy gé léy, mbiiké refére tɛ̧́ vôn, ké zi tu gel a sí̧ vônké tɛ̧́ karú yá, dáy njukupénari̧ ka ɗú mbiiké, kuriri kú tu. Ké ɗí njuku nyá wûny, 10a sa hí̧ nɛ́ ɓá: «Njuku too tí wal vôn a béláké rá̧ a rewal vôn a belyáké a fal ka njukuri mí távôn dáy; dáy a mɔ̌, mɔ pɔŋ vôn a béláké ka̧ ŋgɛŋnɛ́.» 11Nǎŋnɔ́ pé ɓá titíla hɛ̧sáʼama a Zezú ka niŋ a ɓil pû a Kanaa ka tísiri a Galilê, ké tɔ́ʼɔ hɔ̧́na a mɛ̌ dáy gunbɛʼɛri láɓulaw hí̧ nɛ́. 12Falké, ké tá sé Kapɛrnahûm kuu mâa a mɛ̌, nyîn nɛ́rí̧ rá̧ gunbɛʼɛri, a gé kawrú nâm kpay.
Zezú ní njuku zé sɔ́ʼɔri a ɓil vûn a Gáŋvbôn
(Mat 21:12-13; Mrk 11:15-17; Luk 19:45-46)
13Nâm Pâk a Juyífri gí ɗɛ́ŋ, dáy Zezú sé Zerúzalɛ̂m. 14Ké gé ziŋ njukuri kaw a ɓil vûn a Gáŋvbôn kaw zé ndayri, mbóléri rá̧ bûmri̧. Ké ziŋ njuku ku̧ma lariri a kaw ka nzáʼa tay a kuriri kɔ́. 15Dáy, Zezú gé mbí sɛl a ka ɓá báŋa ndêe, ka ní njuku zé sɔ́ʼɔri tɛ̧́ a ɓil vûn a Gáŋvbôn, ka ndayri, rá̧ mbólé a kuriri. Ké fere mínya a njuku ku̧ma lariri kɔ̧ tísiri a sɔʼɔrɔ tayri lé kɔ̧ tísiri too, 16a sa hí̧ njuku zé bûmri̧: «Í fá̧ hɛ̧ nɛ́rí̧ tá a gelé too! Í zi ná mbí vûn a Bâa a mǐ, ɓá vûn zé sɔʼɔ!» 17Gunbɛʼɛri kɛrɛ hɛ̧ ka ɗé ka̧n ɓil Mbété a Gáŋvbôn ɓá: «Gáŋvbôn, zína ɓay a vûn a mɔ̌, rɛ́ŋ a law ní ɓá báŋa hɔrɛ.» 18Dáy Juyífri vbí nɛ́: «Hɛ̧sáʼama hí̧, mɔ́ e niŋáké ɓay a ké tɔ́ʼɔ rú ɓá mɔ́ erú ka ŋgboro niŋ hɛ̧ nǎŋnɔ́ lé?» 19Zezú fere a sa hí̧ kuriri: «Í gbɛʼɛrɛ vûn a Gáŋvbôn nɛ́, nâm sáy a falké, mi e rembó ka̧n gelké» 20Dáy kú sa hí̧ nɛ́: «Rú mbó vûn mbimbɔ̂m bonɛŋ a zêe, lé mɔ̌, mɔ́ e gbɛʼɛrɛ ka rembó nâm sáy yáŋ?» 21Vûn ka Zezú saɓayké ɓá mûn nɛ́. 22Ɓaykénɔ́ dáy, sêe ka Zezú toma a hûl, gunbɛʼɛri kɛrɛ ɓay a ké sáy, dáy a láɓulaw sé tûl hɛ̧ ka ɗé ka̧n ɓil Mbété a Gáŋvbôn rá̧ ɓay ka Zezú sáy.
Zezú tu law a njuku ɓá táŋáké
23A Zezú e ka Zerúzalɛ̂m, ka sêe Pâk a Juyífri, njukuri ɓá ŋgɛ̧́náké kó hɛ̧sáʼama a ké niŋ, a láɓulaw hí̧ nɛ́. 24Dáy Zezú zi zibɔʼɔké yá, ɓayhí̧lé ké tu law a kuriri ɓá táŋáké. 25Njuku ma saɓay a njuku a há̧na hí̧ nɛ́ nyá, ɓayhí̧lé ké tu ka mûn nɛ́, hɛ̧ too ka e a ɓil law a njukuy.
Àwon tá yàn lọ́wọ́lọ́wọ́ báyìí:
Zâŋ 2: pnz
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 CABTAL
