Lúkas 23
23
Bíg kɛla Yésus ɔ́sū ví Piláto
(Mat 27.2, 11-14; Mlk 15.1-5)
1Váŋ nɛ́ ɓot bísɛ bí tɛ́lɓéé elɔŋ á li kɛla lí Yésus ɔ́sū ví Piláto. 2Bú ɓōtlé nyɛ li sɔ́mánɛ la li laga nɛ́: «Ɓaá kɔ́p nyɔ́ mut ag kóm lísandá á ékombo yáhá. Ag céŋɛ ɓot nɛ́ bíh sáálág ɓé káísa táas a ŋga ɓāt, la li katɓan nɛ́ a lɛ Nyɔ́-a-Pɔ́hlɛ, ɔ ɓɛ́ ki káísa.» 3La Piláto ɔ bíhī Yésus nɛ́: «Wa nɛ́ ɔ lɛ Káísa nyí Elōg-Yúda é?» Yésus ɔ pélē nyɛ nɛ́: «Ákaa wa pɔ́t!» 4Piláto ɔ lága ɓakanʼyɛ ɓatíi-nsúlé la jéŋé limut nɛ́: «Mah sɔm ɓé ma nyɔ́ mut njɔm tɔ ya nyí ɛ kɔɔ́ la ekɔ́ghɛ.» 5Ndí ɓɔ́ bú víhyɛ́ ja li laga nɛ́: «Ag tíi ɓot bí Yúdēa bísɛ kúmba la esukúlu yɛ́ɛ́, li ɓotle á Galiléa li pám nɛ́-tɛ́ɛ la vá.»
Bíg kɛ́la Yésus ɔ́sū ví Élóde
6Ɛnɛ́ Piláto a ámblé náŋ, ɔ ɓāt kí nɛ́ nyɔ́ŋ mut a lɛ mut a Galiléa. 7Ɛnɛ́ a sɔ́ŋtánɛ́ nɛ́ Yésus a lɛ á sí likanʼyɛ jé lí Élóde, la ki nɛ́ nyɔ́ŋ a sóŋhán li ɓɛ́ á Yélūsalɛm nyúŋ alɔ́, ɔ óm nyɛ á yóg yɛ́ɛ̄. 8Ɛnɛ́ Élóde a ɛ́nɛ́ɛ́ Yésus, ɔ kɔ̄n mivag ŋgandag, átɔm nɛ́ náŋ a lɛ yɔŋ éceg nɛ́ a ŋgí somo nyɛ́ li ɛ́n, ányúū yé ɛ́sɛ a ŋgí ámble bíg pɔ́t likɔlɓan la nyɔ́ŋ, la lipitá nɛ ag ɛ́n nyɛ́ ag ɓɔŋ minɛ́ŋ. 9Elóde ɔ bíhī Yésus mam ŋgandag, ndí nyɛ́ āh pele ɓé nyɛ́ tɔ jam. 10Ɓakanʼyɛ ɓatíi-nsúlé la ɓayí-mbéndá bí mɓɛ́ váŋ, bú lēgtánɛ́ Yésus la ŋguu sɔ́mɔn. 11Elóde la ɓatát nyɛ́, átē á ŋgandag ŋyaŋ, bú ɓōtlé li ɔl lí Yésus. La Elóde ɔ jáhɛ́ nyɛ elɔ́ŋgɔ mbɔ́tí, ɔ tímānɛ̄ nyɛ á yóg Piláto. 12Múŋ á víŋ ɔlɔ́, Elóde la Piláto bú yáan míwāndá, ɓɔ́ ɓot ɓáh dúgu ɓé lí diŋan.
Yésus ag kuh ekɔ́ghɛ yé nyɛmb
13Piláto ɔ kɔ̄tánɛ́ ɓakanʼyɛ ɓatíi-nsúlé, ɓakanʼyɛ ékombo la lilóm lísɛ, 14ɔ lága ɓɔ nɛ́: «Maná sɔ́la ma nyɔ́ mut ákaa m̀ɓógtɛ lilóm á nzen ɛ tɛ́ɛ́. Ndí ma, ma kááhɛ́ nyɛ́ ɔ́sū váná, māh kɔt ma nyɛ́ ɔ́vuha tɔ vá ví kɔɔ́ la ekɔ́ghɛ á sɔ́mɔn yáná ɛ́sɛ. 15Tɔ Elóde ki, ákaa āh sɔm ɓé nyɛ njɔm, jɔ́ nɛ́ a tímānɛ̄ ɓɛ́hɛ nyɛ́. La náŋ, āh ɓɔŋ ɓé jam tɔ já li kɔɔ́ nyɛ́ lí ólhánɛ. 16Ányúū náŋ, mag ɓomhanɛ nyɛ́ mi mwáhɛ́ nyɛ́ a kɛ́nɛ́g.» [ 17]#23.17 Á ŋgand nyí Páska sig, Piláto a ŋgí nyɛɛ li pámɛ lí mut a miɓog wa. Yé epah yé kálati ɛ́ sē ɓé á ŋgandag Bíciilé. Ɛ́n Matéus 27.15, Málkus 15.6.
(Mat 27.15-26; Mlk 15.6-15)
18Váŋ nɛ́ ɓot bísɛ ɓá tɛ́ɛ́ mílōn nɛ: «Ól nyɔ́ mut, pámɛ́ ɓɛ́hɛ Balábas.» 19Balábas a níŋgléé á míɓog ányúū mpuŋgú á loolóó á tísɔn la ki nɛ́ a ólóó mut. 20Kasig Piláto a ɓɛ́ɛ́la eɔ́ŋɔ yé li mwahɛ lí Yésus, ɔ kwɛ́lɛ̄ pɛ ɓɔ́ nlemlem á jam. 21Ndí ɓot bú lón ja nɛ́: «Tomó nyɛ́ á mbásá, tomó nyɛ́ á mbásá!» 22Piláto, a ŋgele yá yáhɛ́ ɛ́ŋháa ɔ bíhī ɓɔ́ nɛ́: «Wɔɔ́wɔ́ɔ aɓé hɔ́ nyɔ́ mut a ɓɔ̄ŋ é? Ma, māh sɔm ma nyɛ́ njɔm ɛ ŋga ólhánɛ nyɛ́. Jɔ́ nɛ́, mag ɓomhanɛ nyɛ́, mi mwáhɛ́ nyɛ́ a kɛ́nɛ́g.» 23Ndí limut lú váŋgɛ ja la milón nɛ́ Yésus a tōmlɛ́ɛ á mbásá. Kasig milón máɓá mí ŋgí ɓét bí lí ɓét, 24Piláto ɔ nyɔ̄ŋ bísúghɛ́nɛ́ nɛ ag yáhɛ nsom wáɓá. 25Váŋ nɛ́ a pámɛ Balábas, mut ɓɔ́ bí ŋgí ɓat nyɛ́, nyɔ́ a ɓɛ́ɛ́ á m̀ɓog ányúū mpuŋgú la eólan. Á yéé ŋga légɓe Yésus, ɔ tí ɓɔ nyɛ́ nɛ́ bí ɓɔŋ la nyɛ́ ákaa nsom wáɓá.
Bíg tomo Yésus á mbásá
(Mat 27.32; Mlk 15.21)
26Eceg bí ŋgí kɛ́la Yésus, bú ɓómán la Símɔn, mut a Siléna nyɔ́ a ŋgí sɔ́le á ǹdíí. Bú kágyɛ́ nyɛ li ɓɛgɛ lí mbásá ámbúh Yésus. 27Edila limut yé ndog Yésus ɛ́ ŋgí óŋ nyɛ́. Múŋ á yéŋ elɔŋ, ɓondígá bí ɓɛ́ɛ́ átē ɓá bí ŋgí lee la li síítan ányúū yɛ́ɛ̄. 28Yésus ɔ yáan ɔ légɓé ɓɔ, a byɛ́la ɓɔ́ nɛ́: «Á ŋgɔn yí Yélūsalɛm, miníh lelég ɓé ányúū yáma, ndí lelán ja ányúū yaná ɓɛ́nɛ-mɛ̄n la ányúū ɓɔɔ́n ɓáná. 29Átɔm nɛ́ alɔ́ ág kɛ li sɔ́ nyú ɓot bí ɓɛ́ bí laga nɛ́: Misɔ́tá la bikom bí ɓondígá la ɓá bí lɛ́ ŋgí li byál tɔ li nyáŋɛ. 30Múŋ á yéŋ eceg, bíg kɛ li laga lí ákolá ácɛ̄ŋ nɛ: Miní ɓɛ́hán ɓɛ́hɛ á nyúū, bí lagá ki ŋgondo nɛ́: Bútyánɛ ɓɛ́hɛ. 31Ánsī nɛ, kí ɓá ɓɔ̄ŋ péná eéé ná, ebuu-la-ŋgele yáŋvéé la ŋkum é?» 32Bí ŋgí kɛla ɓot bíɓáa ɓatám, ɓá bí ɓɛ́ɛ́ mítɔnɓa, á li ól lí ɓɔ elɔŋ la Yésus.
Mitomlɛ mí Yésus á mbásá
(Mat 27.33-44; Mlk 15.22-32)
33Ɛnɛ́ bí pámáá á nyɔ́ voóm bí ŋga yáŋa «Evóghó m̀mú», bú tōmó Yésus á mbásá elɔŋ la míŋ mitɔnɓa míɓáa, nyɔ́ wa á m̀ɓɛ́nlómɛ, nyɔ́ŋɔ́ ki á m̀ɓɛ́ŋgáa wɛɛ́. 34Váŋ nɛ́ Yésus a lága nɛ: «Etāa, laakɛ́ ɓɔ́ ányúū nɛ bí ŋgá yí ɓé yé bí ŋga ɓɔ̄ŋ.» Á kaa sónja ɛ́ ŋgí somo li kaan lí mbɔ́tí yɛ́ɛ́, yú lɛ̄ŋgɛ́ mbam. 35Ɓot bí ɓɛ́ɛ́ váŋ bú tíg bíg légɓe. Ɓakanʼyɛ, ɓɔ́ bí ŋgí ɔl la li laga nɛ́: «A lɛ ǹsuŋ ɓot ɓatám, kíyáɓɛ́nɛ a lɛ Nyɔ́-a-Pɔ́hlɛ, nyɔ́ Ɔlolómɛ̄ a tɛ́ɛ́yɛ, a súŋ hɔ́ nyɛ́-mɛ̄n!» 36Sónja yɔ́g ɛ́ ŋgí ɔl nyɛ́. Yú sīŋglé nyɛ ɓɛɓɛ á lí tíi lí nyɛ eɓámhá-wáany, 37la li lága nɛ: «kíyáɓɛ́nɛ ɔ lɛ káísa nyí Elōg-Yúda, sūŋ hɔ́ wā-mɛ̄n!» 38Ɛ́ ɓɛ́ɛ́ nciíg á lóō lí mbásá yɛ́ɛ̄ nɛ: «Káísa nyí Elōg-Yúda nyí.»
39Ntɔnɓa wá á ɓá bíɓáa bí tōmléé á mbásá, wɔ́g wú ɓōtlé lí óŋo lí Yésus wú lága nɛ: «Ɓaá wa ɓé nɛ ɔ lɛ Nyɔ́-a-Pɔ́hlɛ é? Sūŋ hɔ́ wā-mɛ̄n ɔ súŋ ki ɓɛ́hɛ!» 40Ndí nyúŋú ntɔnɓa ntám wú lagá nyú ɔ́sū nɛ: «Ɔ ŋgɔ́ kɔn ɓé Ɔ́lolómɛ̄ woŋ é? Wa nyɔ́ ɔ lɛ li kuh lí nlemlem á ékɔ́ghɛ. 41Ányúū yāhá, náŋ a tɛ́ɛ. Bi lɛ li kuh lí nsála á miɓɔŋɔg máhá, ndí nyɛ́, āh ɓɔŋ ɓé jam liɓé tɔ já.» 42La nyɛ́ ɔ lāgá nɛ: «Á Yésus, ɔ ɔ́ŋlag ma eceg ɔ ŋgɔ kɛ́ li sɔ́ kaa káísa.» 43Váŋ nɛ́ Yésus a tímānɛ̄ nyɛ nɛ́: «La mbálɛ, mag laga wa nɛ́, nyí lɛn, ɔg kɛ li ɓɛ́ élɔŋ la ma á paladīs.»
Nyɛmb nyí Yésus
(Mat 27.45-56; Mlk 15.33-41)
44Náŋ a ɓɛ́ɛ́ mam mí kɔsi, eceg livito lí bútyɛ́ɛ ŋkɔŋ-á-sí ásɛ li pám á ŋgɛ́ŋ ɛ́ŋháa ɛ́ ŋgōgó. 45Vaŋgá vú dím. Váŋ nɛ́ líɓato licɛ́ŋ jé lí ɓɛ́ɛ́ lí ŋgí céŋ ndugá-púán lá wáhyé á m̀mím. 46La Yésus ɔ tɛ́ɛ́ nlón á lóō lóō, a byɛ́ nɛ́: «Etāa, mag tímanɛ m̀búl wáma á mɔ mɔ́ɔ.» Ɛnɛ́ a manhɛ́ɛ li pɔ́t náŋ, ɔ páte. 47Ɛnɛ́ ŋ̀kanʼyɛ nlɔŋ á eɓógo sónja a ɛ́n yéé yá loo, ɔ ɓégɛ́ Ɔlolómɛ̄, la li laga nɛ́: «La mbálɛ, nyɔ́ mut a mɓɛ́ kɔɔ a tɛ́ɛ sim.» 48Ɓot bísɛ ɓá bí ɓɛ́ɛ́ bí kómānɛ váŋ á li légɓe ákaa Yésus a ŋgí tomlɛ á mbásá, ɛnɛ́ ɓá ɛ́n yé yá loo, bú tímān á mímbóg máɓá bíg síítan la evínɛ-m̀mím. 49Bileman bí Yésus bísɛ la ɓondígá bí ŋgí óŋ nyɛ́ á mbúh li ɓotle á Galiléa, bí ɓɛ́ɛ́ bí tɛ́ɛ́ puh enɛŋɛ́ bíg légɓe yéé ɛ ŋga lōo.
Mije mí Yésus
(Mat 27.57-61; 28.1-9; Mlk 15.42–16.8)
50Váŋ nɛ́ mut wa nɛ́ Yósɛp a sɔ́ɔ́, a ɓɛ́ɛ́ ɛ́mbōn yé ɔ́ku-vicɛ́ŋ-ví-ɓákāāhɛ, elɔ́ŋgɔ mut yé tɛ́ɛ́ sim. 51Ah tíée ɓé cíŋ yɛ́ɛ̄ á dimb jáɓá tɔ á miɓɔŋɔg máɓá. A ɓɛ́ɛ́ mut a Alimatéa, tísɔn nyí Elōg-Yúda. A ŋgí laaŋke Likanʼyɛ lí Ɔ́lolómɛ̄. 52Nyɔ́ŋ mut ɔ kɛ á mbóg Piláto á li ɓat lí nyɛ m̀bim á Yésus. 53La nyɛ́ ɔ súhɛ wɔ á mbásá, ɔ vúlké wɔ á mbɔ́ŋ, ɔ nāntɛ́ɛ wɔ á sɔŋ ɛ ɓogɓɛ́ɛ á ŋgɔg, ápah bí ɓɛ́ɛ́ ŋgí li vá lí m̀bim tɔ wá. 54Náŋ a ɓɛ́ɛ́ ɔlɔ́ ví m̀ɓoŋhanɛ́ a etɔ nɛ́ likɛ́ɛ́ ag ɓɛ́ ɔlɔ́ ví évɛɛɓan. 55Ɓondígá bí ɓɛ́ɛ́ elɔŋ la Yésus li ɓotle á Galiléa, bú óŋ Yósɛp á mbúh. Bú légɓé sɔŋ, bú ɛ́n ákaa ɓá nāntɛ́ɛ m̀bim wɛ́ɛ́. 56Ámbúh náŋ, bú tímān á mímbóg máɓá, bú ɓoŋhán míŋgɔ́gɔ la mibíndɛ. Á ɔlɔ́ ví évɛɛɓan ví Elōg-Yúda, bú vɛ́ɛɓan li oŋle la mbéndá.
Àwon tá yàn lọ́wọ́lọ́wọ́ báyìí:
Lúkas 23: NTB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023, CABTAL
