Matiye 3
3
Dan ka' Zaŋ-Baptistə
(Mak 1.1-8; Luk 3.1-18; Zaŋ 1.19-28)
1Kəri rum, Zaŋ-Baptistə mbə du igop nya Zude ɓay təŋ kə ka' dana. 2Mum ini: «I faŋ vunduk ri, zə jwə mə wafray nə mbə həre'e!»
3Zaŋ nə swə məni bə ka' dan mə ɗe kə Esaya in dan wa rum kəri məni mum ini:
«Wor swə wə ka' dan du igopo:
I gila' vari zə Bârî,
i gi vari rum səreŋ ne numu!»
4Zaŋ ge mbraw mə ci kə sâ njoŋnjoŋ ɓay mum ɓok fir kə zew ɗike. Mum ti cumo' kə mur ɗim mə gopo. 5Ndəna', sôwâ so Jeruzalem kə nya Zude daŋ' ɓay nya mə həre' kə ze Zurdeŋ mbə kuni hay' rumu. 6Handay in dan kwa bro' nday, ɓay Zaŋ gi baptem ne nday wə ze Zurdeŋ.
7Kəri məni Zaŋ we sôwâ məsin wə du kul sôwâ Zuwif mə ɗe kə Farisiyen kə sôwâ məsin wə du kul sôwâ Zuwif mə ɗe kə Sadusiyen juk mbə hay' rum kədan handay ve baptem, mum la' ne ndaya: «Hi zə zep kay'i! Sa nə ta' ne ni i hi gak siɗ wə kor bak Ifray məni wə də mbə nə su? 8I gi kwa məni wə ta' i hi faŋ vunduk ri si, 9ɓay i ɗik wə vunduk ri i Abraham nə ba mbri ramba mi. Zə na in mi ne: Ifray gak ra' gway' məni kuni ɓay nday gi faŋ daw Abraham! 10Ɓay bə tum gu tle ceɗ kədan mum tum gu kə ndi wə zu tlor rumu. Gu daŋ' məni cu vra' vra' mə ɓay mi, sôwâ də tum njay də ku. 11Mə na, na gi baptem ne ni kə mbi kədan ta' i hi faŋ vunduk ri si, ama swə məni wə də mbə kəki rin, mum də gi baptem mi ne kə Simbeɗ mə Kəleŋ ɓay kə ku. Mum pâ nan kə mbra' si. Na cu nde i goɓ kədan na ulay' zew tərak um mi. 12Mum kə kwa sa' u wə ɓa rum kədan mum sa' rəfê də rəka ɓay ar u. Mum də ra' u njay də zəna um, ama mum də ye' rəfê rum kə ku məni cu mar i kpe mi.»
Zaŋ gi baptem ne kə Zezu
(Mak 1.9-11; Luk 3.21-22; Zaŋ 1.29-34)
13Kəri rum, Zezu car wə nya Galile mbə wə ze Zurdeŋ. Mum mbə hay' Zaŋ kədan mum ve baptem ɓa rumu. 14Zaŋ cu mun mi, ɓay mum la' ne numu: «Na wə wa' kədan ha gi baptem man ne, ɓay ha faŋ mbə ve ɓa rin su?» 15Ama Zezu ɗam vun rumu: «A ve dan rum ndə na' kə mə mgbaŋ ni na. Zə kə vari mə ni nə namba də nyen mbi sin daŋ' məni Ifray wə wa'a.»
Zə rum, Zaŋ ve dan rumu. 16Kəri məni Zezu fe baptem, mum pâ mbə mbi. Kəkor sar, wafray ar vun, ɓay mum we Simbeɗ Ifray dam mbə wa rum ce' ndə kuruku. 17Ɓay wor car mbə wafray ini: «Məni nə Vay man məni na ba. Na wə tuk kəɗam kə rumu#Tzk 22.2; Nye 2.7; Esa 42.1; Mat 12.18; Mak 1.11; Luk 9.35.»
Àwon tá yàn lọ́wọ́lọ́wọ́ báyìí:
Matiye 3: KMN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Le Nouveau Testament et Psaumes en Peve © Alliance Biblique du Tchad, 2014.
