Matyo 7
7
Kə̂ ghaa nə saʼanə wù
(Luk 6.37-38, 41-42)
1Yeso n dza tə ghə nə̀, “Kə̂ ghaa nə saʼanə wù, sey nə̀, kə̂ Zə̀ kə nə saʼa soʼonə ghaa. 2N təŋkey, jìi zey wə̀ saʼanə nuu tii, à loʼ soʼo sey Zə̀ kə î saʼanə wɔ. Laŋ wey wə neynə ni saʼ wù nuu tii, à loʼ soʼo laŋ u tii wə Zə̀ kə i neynə ni saʼ wɔ tii. 3À loʼ kee wə laalənə sala fə fəkaʼ fey n sə̂ i waazu, loʼ sey nə̀ wə kee khə bàŋ kə fəkaʼ n sə̂ zə ə? 4Wə zəghənu ni dza tə̀ waazu nə̀, ‘N waazə, bə tə̀ n shiələ nuu sala fə fəkaʼ fey fə loʼnə n sə̂ zə, loʼ sey nə̀ bàŋ kə fəkaʼ kə loʼ n sə̂ zə ə?’ 5Nəb ityim tə̀ a loʼ wɔ, buʼ shiələ nuu kɔʼ dzə bàŋ kə fəkaʼ key n sə̂ zə, tə wɔ ni tɔʼ koʼ təluʼu ni shiələ nuu sala fə fəkaʼ fey n sə̂ i waazu.”
6“Kə̂ ghaa nə neynə fə u Kəzə̀ wə, ghaa fuu ndow tə̀ ghə̂ ghən ghə loʼnə tə a loʼ təbvə, n təŋkey, ghə loʼ ni kəm khə̂mə bə iwû, ghə ŋaŋi ghaa tə̀ bvə tə nə ŋaŋinə wù. Kə̂ ghaa nə̂ ney soʼonə fə u ghaa u dzuŋu wə, ghaa dzəŋə ndow n kow ghə̂ ghey ghə loʼnə tə̀ à loʼ ufelibu, n təŋkey, ghə loʼ ni ney nyuʼ maʼa nə kətsaʼ tə a loʼ kəfelibu.”
Bəb fə̂ key wə ləghənə tə̀ Zə̀ kə nə igɔŋŋə
(Luk 11.9-13)
7Yeso n dza tə̀ ghə nə̀, “I bəbə na fə̂ key ghaa ləghənə n wɔ Zə̀ kə, Zə̀ kə i fuu bə tə̀ ghaa. I kəŋə tsu na, ghaa i koʼ. Buʼ na bàʼ kə, Zə̀ kə i chi tsu tə̀ ghaa. 8N təŋkey wù wey tə bəbnə fə kə, Zə̀ kə i fuunu tə wi. Wù wey tə kəŋənə, tə î koʼonu. Zə̀ kə î chiənu baʼ kə tə̀ wù wey tə buʼnə baʼ kə. 9À loʼ wù ghaa u ghaa wə tə i fuunə waa wi n tay zə, loʼ sey nə̀ waa wi mə nɔɔ wi n baa kə ə? 10Nkee abə tə nɔɔnə wi n tsəghə zə, tə î fədlə fuunə wi n zuu ə? 11Abə ghaa loʼnə ni fuu fə̂ u dzuŋu wə tə̀ waa a ghaa ghə, loʼ sey nə̀ ghaa bəbənu, Bày ghaa idəŋ î sə̀ boʼo fuu ngee fə̂ u dzuŋu wə tə̀ ghə̂ ghey ghə nɔɔnə tə̀ wi ə? 12Sey ghaa i ghəŋŋə ndòw ghəə ghə tə̀ ghə̂ ghə nghee tə̀ ghaa ləghənə nə̀ ghə i ghəŋŋə bə soʼo tə̀ ghaa. À wən loʼ ndzoʼo doʼo zey laŋ kə Mushi nsə Tûm tə Kəzə̀ tə diinə.”
Tsəghə na n fuʼ u mbàa u təbə wə
(Luk 13.24)
13Yeso n dza kpiʼi ndow tə̀ ghə nə̀, “Tsəghə na n fuʼ u mbàa u təbə wə ni ndow n fɔɔ u Kəzə̀, n təŋkey, fuʼ u mbàa wey u downə, jìi tii dow dzɔbə soʼonu, u ney ndòw wù n luʼu kə uchɔd. Ndəmə aghə̂ a loʼnu ghə neynə ndzoʼo jìi i tii zə. 14Fuʼ u mbàa wey u ney ndòw wù n luʼu key tə i keelinə muu zə itsali zə, u təbənu, jìi fə tii fə a fwɔli loʼ soʼonə, à fu tii tsəghə kə sə̂ fə aghə̂.”
A koʼo keeli fəkaʼ n tam u wi
(Luk 6.43-44)
15Yeso n dza tə̀ ghə nə̀, “Ney na ghə̂mə zə n tûm tə Kəzə̀ tə tsɔŋɔ tə. Ghə buulə bəghə n səə ghaa tə̀ a loʼ tənjì, loʼ sey nə̀ n fə̀ŋ tə ghə, ghə bəbə faalə tə a loʼ ubəghə. 16Ghaa i koʼo keeli ghə n ghəə a ghə à ghəŋŋə ghə. Wù way ni kɔy təlami nə ukaakaa nkee tə kɔy mmbuŋŋə n kaʼ fə təmgbii. 17Kaʼ fə dzuŋu fə mə̂ə bə kə tam u dzuŋu wə. Kaʼ fə bəbə fə mə̂ə bə kə tam u bəbə wə. 18Kaʼ fə dzuŋu fə way ni mə̂ dzə tam u bəbə wə. Kaʼ fə bəbə fə u way soʼo ni mə̂ tam u dzuŋu wə. 19Abə kaʼ fə mə̂ə way tam u dzuŋu wə, ghə n fùŋ maʼa tsu, kpəghə ndòw nə uvəllə. 20Sey, ghaa î koʼo keeli kə ghə n tam u ghə.”
Ghə̂ ghey Yeso â khə way ghə
(Luk 13.25-27)
21Yeso n nam dza ndow tə̀ ghə nə̀, “À way dzə aghə̂ adzəm ghə ngɔɔmənə mə nə̀, ‘Mûkəbii, Mûkəbii’, ghə î nyiənə n fɔɔ u Kəzə̀. À may kə wù wey tə ghəŋŋənə ghəə ghey a kpiilənə tə̀ Bày wuŋ wən tə loʼnə idəŋ. 22Ndəmə aghə̂ ghə i dza tə̀ mə n tsuʼ fey Zə̀ kə i saʼanə mbi tii nə̀, ‘Mûkəbii, Mûkəbii, n dza ghey â naʼlə tûm Kəzə̀ n zəd zə ə? A n dzùm shi avəətsəə n kôw ghə̂ ghə n zəd zə, fwaʼ ndəmə ghəə a faalə ghə n zəd zə.’ 23Mə i fəd dza ndow tə̀ ghə nə̀, ‘Nuu na n səə mə, ghaa loʼ ghə̂ a bəbə ghə, n khə koʼ tsə way ghaa.’”
Wù bɔm u təndaw u tɔbə wə
24Yeso n dza tə̀ ghə nə̀, “Wù wey tə zownə ghɔɔmə zuŋ zən, ghəŋŋə ndòw ghəə ghey n dzanə, loʼ tə̀ à loʼ wù tɔbə wey tə â dza i bəghə ndaw, tə n səd tsu dzə tsə̂ kə tii kə nə atay. 25Ghôw zə n tsu n ndaw tii, dzuu tə n luu tsən bə ndaw tii, zəŋ n tən ndaw tii, ndaw tii n ka tsəm beeli, n təŋkey, ghə â səd tsə̂ kə tii kə nə atay. 26Wù wey tə zownə ghɔɔmə zuŋ zə, ghəŋŋə way ghəə ghey n dzanə, loʼ tə̀ à loʼ wù laʼlə wey tə â bəghənə ndaw wi nə kəsəsay. 27Ghow zə n tsu bə, dzuu tə n luu bə tsən bə ndaw tii, zəŋ n tən ndaw tii, zə n maŋ beeli, dəm kə tii kə n tsu sa jàʼ!”
28Ambə Yeso ghɔɔmə may tsunə ghəə ghən, dzuu zə n ngii zum nɔɔ kə aghə̂ key kə â loʼnə fu bòʼ jìi zey tə â diinə ghəə ghə tii. 29Tə â dii ghə n ghəə ghə tə̀ à loʼ wù wey tə khənə daʼa kə ni ghəŋə ghəə a tii ghə, â way dzə tə à loʼ ghə̂ a dii a kəlaŋ ghə.
Àwon tá yàn lọ́wọ́lọ́wọ́ báyìí:
Matyo 7: WEH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 CABTAL
