Intaliko 50
50
1Ngapano Jozefu apona pankolelo pakwe Yisi amulosya, amufyompa. 2Jozefu akomelezya awawomvi wakwe wa sing’anga ukuti wapake ichala chakwe yisi umulembo ukuti atawola. Wasing ’anga awapaka e Israeli nu mulembo; 3wawombanga amanda amakumi yani ukulingana na manda yano yakalondwa ku michitile ya mwata woo. Awina Ijeputi awamulosya amanda amakumi munenulambali.
4Ayala manda yakumulosya yasila, Jozefu avwanga na wachiwanza chakwe Fero ati, Nazina, nenelani e Fero muti, 5E tata wandafizye ati, Nati ndafwa: mu nkungwe yane-nye yino nayimbizile munsi ya Kenani, amuno mwize mukanzike. Achaleka nkulambilizya ukuti inje kweneko, nkazike tata; ngapano njize mbwele. 6Fero azumila ati, Yanga ukazike ’so, ndivino walesile ulapa. 7Achaleka Jozefu aya mukuzika yisi; na wawomvi wakwe Fero wonsi awapita nawe, na wasongo wa chiwanza chakwe, na wasongo wonsi awa munsi ya Ijeputi, 8na wa chiwanza chakwe Jozefu-nye wonsi, awanyina na wachiwanza chakwe yisi, akusyala awana watichi watupu, ni vikwato na wachemi wa munsi ya Gosheni. 9Asenda na magareta-nye na wakakwelela wakwe wakavwalo, lyalinji a liwumba kulu nkaninye. 10Awala vino wafika ku lwano lwakwe Atadi ku mbalama kwe Yordani, awalosya ni chilanda chikulu kutaluvile; alosya yisi amanda munenulambali. 11Awala aweni-nsi ya Kenani walola ukulosya pa Atadi, awati, Ukulosya koo a kukulu ku wina Ijeputi. Achaleka awita amasyo-nye yayo awati Abelmizraimu; a ku mbalama kwe Yordani. 12Avino awanakwe awachita ndimuno wasile wawakomelezezya; 13amuno awanakwe wamutwazile ku nsi ya Kenani, awaya awamuzika mu ninga ya mu chalo cha Makipela, kwe Mamre kapela, yino Abrahamu wakazile kwe Efroni umu Hiti ni chalo, ukuti yawe amalalo. 14Awala pano wazika yisi, Jozefu anyochela ku Ijeputi na wanyina na wonsi wano wapisile nawe kukuzika yisi.
Jozefu alayilizya awanyina
15Awala awanyina Jozefu walola kuno yisi wafwa, awati, Nche pamwi Jozefu wandi atupate alandulile ku viwipe vino twamuchisile. 16Achaleka awatuma intumi kwe Jozefu awati, Eso watukomelezizye ye atani afwe ati, 17nazina, mwize munene Jozefu muti, Tetela awanyonko kukuluvya kwawo nu luwembu lwawo amuno wakuchisile uwuwi. Kanonzi tukuti, Twazina tutetele ukuluvya kwa wazya wakwe Leza wakwe eso. Jozefu alila pano wamunena wonyewoo. 18Na wanyina-nye awaya awamufukamila, awavwanga awati, Lola swe wazya wako. 19Ukuwa Jozefu awanena ati, Mutatina, amuno wuzye nene ne Leza? 20Molimonye mwemwe mwantwazile ku wuwipe, ukuwa kwe Leza chalinji a chizima, ukuti chize chileke awantu wavule wapusuke, ndivino wali ilelo. 21Achaleka mutize muwatina nandi ndawalela mwemwe apaliponga na wana winu. Awasininchizya awowonye awasansamusya.
Imfwa yakwe Jozefu
22Achaleka Jozefu ayikala mu Ijeputi, weliwe ni wuvi lyakwe yisi; Jozefu mu wulanzi wakwe wamazile imyaka umwanda wonga ni myaka ikumi (110). 23Jozefu alola ku wana wakwe Efulemu awizikuluchizwi; na ku wana wakwe Makiri umwanakwe Manase wano wakwatizilwe pa makokola yakwe Jozefu. 24Jozefu anena awanyina ati, Nati ndafwa; ukuwa e Leza wandi awawasyungula, asuke ayize awafumye munsi yoo awatwale kunsi yino walafile kwe Abrahamu, kwe Ayizeki, na kwe Jekapu. 25Ngapano Jozefu aleka awa Israeli awalapa, awanena ati, Leza wandi awawasyungula mwize musende na mafupa yane yafume moo. 26Achaleka Jozefu afwa, pano ali ni myaka umwanda wonga, ni myaka ikumi (110); awamupaka umulembo ukuti atawola, awamuwika mu mbokosi, kokonye ku Ijeputi.
Àwon tá yàn lọ́wọ́lọ́wọ́ báyìí:
Intaliko 50: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.