Intaliko 49
49
Jekapu atumwa ivyawanakwe
1Ngapano Jekapu ayita awanakwe awanena ati, Wunganani apaliponga alyakuti mbanene chino chiliwaponela mu manda yano yakwiza.
2Wunganani mwivwe, mwe wanakwe Jekapu,
muteyelezye kwakwe Israeli eso.
3Rubeni we katote wane,
we maka yane, swinya we vikomwa vyakutalichila ivya maka yane,
ulusizye wanji ku chilumba na ku maka.
4Uli ndivino aminzi mavunduke, utanga uwe we songo,
amuno wakwezile pa chitala chakwe’so;
uchikombezya—ulala pa chitala chane panchese!
5E Simeoni nu Levi awanyina;
impanga zyawo a vyanzo vya wusiwolo.
6We mwezo wane utize uwaya mu
mawungwe yakupanzyania kwawo,
we muzimu wane utize uwayisanzya mwi wumba lyawo;
Amuno ku wusiwolo wakakoma awantu,
swinya mu wusiwolo wawo wakaputula umukole wa chikasa cha ng’ombe.
7Ukuvitwa kwawo kutipwe amuno
akwa wukali,
nu kuvitwa kwawo akwa wusiwolo!
Ndiwapawunkania mwakwe Jekapu,
imbasampanie mwakwe Israeli.
8Yuda, awanyonko waliwakuwanzya,
ikasa lyako liliwa pa nsingo ya walwani wako;
awana wakwe’so waliwafukama pakwe wewe.
9Yuda a mwana wa chimbwi;
akufuma kukuvwima, ayamukupuza
Ayinama pansi alambalala ngati a chimbwi,
ngati a chimbwi chanachi; nga weweni angachiziwula?
10Insonzo ya chumo chachifumu italifuma kwakwe Yuda,
nanti a nsonzo yakwe kapanzya mu mbali ya manama yakwe,
Asuke umwenecho ayize yize
wino awantu walimutontela.
11Alinyepelela indokwe ku muti wavikomwa,
nu mwana wa ndokwe kwakwe vino wakasuta ipala,
Apwizye imyinjilo yakwe mwipala zima.
12Aminso yakwe yaliwenza kwi pala,
nayo mino yakwe yaliswepa kwi ziwa.
13Zebuloni aliyikala pa chituntu chakwe sumbi,
aliwa a lilambwa pano amawato makulu yakufumizyanga iviya ku chituntu;
nu mu mpaka wakwe aliwa pa Sidoni.
14Isakari a ndokwe mbome,
ikapunguluchila pakasi pa vipimpo vya ng’onzi;
15Alola kuno apakupuza pazipa,
swinya ni nsi a nzima;
Achaleka ayinamika ichiweya chakwe ukuti anyamule ichiya,
awawomba umulimo wukalambane uwakupatichizwa.
16Dani aliwapanzya awantu wakwe,
a mwiko wumwi wakwe Israeli.
17E Dani aliwa a nzoka ya munzila,
e chipili wa mumbali ya nzila,
Wino akulumanga ivitende vyakwe wakavwalo,
alyakuti wino akwezile penepo apone chimfundansizi.
18Oko Mfumu, nkulindilila ikomolwa lyako.
19Gadi alisambuchilwa na wachipiluka,
lelo weliwe aliwakonka pansizi aliwasambuchila woliwo-nye.
20Asheri, ichakulya chakwe chiliwa a chichindame,
swinya alileta ivya kuyilosya ivya chifumu-fumu.
21Nafutali we mpombo mwanachi musapulwa
wino akakwata awana wazima.
22Jozefu a lusamba luno lukakoma ivikomwa;
a lusamba luno lukukomanga mu kantopwezi;
insamba zyakwe lolilo zyatawilila ku luwumba.
23Wakavwinta wa mivwi awamulwisya ichiwipe-wipe,
awamulasa ni mivwi, awamupungania ichilume.
24Naponye amakasa yakwe amasikatale nanti kusyembuka,
alyakuti awombele ivyanzo vyakwe nu luwilo.
Apochelela amaka ku wa-MakaWenga wakwe Jekapu,
mwi zina lya Muchemi, e Mfuzi wakwe Israeli,
25kwakwe Leza wakwe ’so wino wandi akwavwe,
e Leza Umukalasya wino wandi akupepe.
Akupepe ni mvula,
akupepe nutuntopwezi tuno tukumiminuka pansi-pansi,
apepe namawele namawula.
26Apepe nivizawalo namaluwa,
apepe nimyamba yako iyamuyayaya,
akupe ivyawila vyamyamba yape;
vyonsinye vyoo viwe pamutwe wakwe Jozefu,
na pa mpumi yakwe wino wapawuzilwe ku wanyina.
27E Benjemani a mpumpi nsusupe,
yino ikazowola ivivwimwa umutondotondo,
amanguzi iyankania ivisampwa.
28Waa wonsi a myiko ikumi na yiwili iyakwe Israeli; vyonyevyoo avino yisi wavwanzile kwe woliwo pano wawapepanga apepa wenga-wenga ukulingana nu kupepwa kwakwe.
Jekapu afwa azikwa
29Ngapano Jekapu awasunda awanena ati, Nkuya ku wantu wane; mwize munzike pano watata walala mu ninga yino ili mu chalo chakwe Efroni umu Hiti. 30Mu ninga yino ili mu chalo cha Makipela, kwe Mamre kapela, munsi ya Kenani, yino Abrahamu wakazile kwe Efroni umu Hiti ichalo ukuti yawe amalalo. 31Akuno wazika Abrahamu nu Sera umuchi; kokonye akuno awazika Ayizeki nu Rebeka umuchi; akuno nani nazika Leya, 32ichalo ni ning yino ili mwenemo vyakazilwe ku wa Hiti, 33Ala pano Jekapu wamala ukukomelezya awanakwe, alambalika amatamba yakwe pa chitala ataya umwezo afwa, aya ku wantu wakwe.
Àwon tá yàn lọ́wọ́lọ́wọ́ báyìí:
Intaliko 49: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.