Intaliko 47
47
1Achaleka Jozefu aya anena Fero ati, E Tata na wana witu ni vikwato vyawo na vyonsi vino wali navyo wiza wafuma kunsi ya Kenani; kanonzi wali munsi ya Gosheni. 2Asenda wantu wasano pa wanyina awimika pe Fero. 3Fero awawuzya ati, Nga imilimo yinu a milimo chi? Awamunena awati, Awazya wako a wachemi, ndivino watata walinji. 4Awanena Fero awati, Twiza munsi-nye yoo twalewela awowo amuno ku wazya wako kusi umulemvwe wa vikwato vyawo, muno ichinkumbili chakulisya munsi ya Kenani; achaleka tukukulambilizya ukuti uleke awazya wako wikale munsi ya Gosheni. 5Apano Fero anena Jozefu ati, eso na wanyonko wiza kwe wewe. 6Insi ya Ijeputi ayako, leka eso na wanyonko wi kale munsi yino a nzima nkani, uleke wikale munsi ya Gosheni; swinya ndi umanyile wamwi pakwe woliwo wano awantu wachenjele, leka wawe awasongo pa vikwato vyane.
7Nga Jozefu atwala e yisi e Jekapu pankolelo pakwe Fero. Nga Jekapu afukamila Fero. 8Nga Fero awuzya Jekapu ati, Wuzye imyaka ya wulanzi wako ili yinga? 9Jekapu atolelela Fero amunena ati, Imyaka yakulewela kwane ili imyaka umwanda wonga na makumi yatatu (130) swinya a mitichi, amawipe amanda ya myaka ya wulanzi wane—swinya yatafisile ku manda myaka ya wulanzi wakwe watata manda ya kulewela kwawo. 10Jekapu afukamila Fero, nga apita. 11Jozefu apa yisi na wanyina yakwikala mu Ijeputi, insi nzima nkani ya Ramesesi, ndivino Fero zizye. 12Swinya Jozefu awapa wanyina ni wuvi lyakew yisi ivyakulya ndimuno impendwa ya kuvula kwawo yawezile.
E Jozefu pampindi ya chinkumbili
13Ichinkumbili achipona munsi yonsi chalinji a chinkumbili chikulu nkani achaleka insi ya Ijeputi ni nsi ya azitozoka muno a chinkumbili. 14Nga Jozefu awunganika indalama zino zyazanilwe munsi ya munsi ya Kenani, ku wakazile. Jozefu atwala inda zyozyo mu ng’anda yakwe Fero. 15Azila indalama zyonsi zyasila munsi ya Ijeputi na munsi ya Kenani, awina Ijepjti wonsi away a kwe Jozefu awati Tupe ivyakulya; nga amuno chani chino tungakufwila paminso yako? Amuno indalama zitu zyasila. 16Nawe Jozefu ati, Letanji ivikwato vinu ndi ndalama zyasila, apano nandi ndawapa ivyakulya. 17Achaleka awatwala ivikwato vyawo kwe Jozefu; nawe Jozefu awawapa ivyakulya awakawunkania na wakavwalo, ni ng’onzi, ni ng’ombe, ni ndokwe; awawapa ivyakulya akukawunkania ni vikwato vyawo vyonsi umwaka-nye wowo. 18Awula umwakanye wowo wasila, awaya kwe weliwe umwaka wuno wakonka, awaya awamunena awati, Tusinakulonda ukufisa kwe tatakulu kuno indalama zitu zyasila zyonsi pyu, ni vikwato a vyakwe tatakulu; pasi chimwi chino chasyala pankolelo pakwe tatakulu suka ndi a miwili yitu ni nsi yitu. 19Nga chino sweswe ni nsi yitu tungafwila paminso yako achani? Tukale sweswe ni nsi yitu ni chakulya, sweswe ni nsi yitu tuwe swe wazya kwe Fero; utupe imbeyu alyakuti tutafwa, alyakuti insi itawa amatowolo.
20Achaleka Jozefu akalila Fero insi yonsi iya Ijeputi; muno wonsi awa ku Ijeputi wakazizye ivyalo vyawo muno ichinkumbili chakulisizye kwe woliwo. Insi iwa ayakwe Fero; 21achita awantu uwuzya ukufumilila kuno insi ya Ijeputi yatalichila nu kuyafika kuno yapelela. 22Insi yakwe wasimapepo ntupu ayino yasyazile nanti kukalwa; amuno wasimapepo walinji namuno walelelwanga nu Fero, awikalila kwe chino Fero wawapanga; achaleka watakazizye insi yawo. 23Ngapano Jozefu anena wantu ati, Lolani, ilelo-nye nawakala mwemwe ni nsi yinu-nye mwawa mwe nsawo yakwe Fero. Aleni sendani imbeyu yoo mukatande munsi. 24Impindi ya masika mwandi muwapa Fero ichipya chonga ichakwe visano, ivipya vini ivyakwe visano a vinu mwe wenecho, ku mbeyu zya mu vyalo na ku kulya kwinu ni wuvi linu na wana winu. 25Awati, Watutula; wasalipa tatakulu, twawa swe wazya wakwe Fero. 26Achaleka Jozefu aleka aliwa a lisundo munsi ya Ijeputi, ukufika ni lelo ukuti e Fero apochelele icha vipya visano ukuwa insi yakwe wasimapepo yeni, italinji ansi yakwe Fero.
Ukukomelezya kwakwe Jekapu
27Amuno awa Israeli wikalizile munsi ya Ijeputi, munsi ya Gosheni, awalonka insawo kweneko, awawa awakwasi awanyama kutaluvile. 28Jekapu wisile munsi ya Ijeputi imyaka ikumi na munenulambali. Achaleka amanda ya wulanzi wakwe yalinji imyaka umwanda wonga ni myaka amakumi yani, na munenulambali (147).
29Ila impindi yapalamila iya kufwa, kwakwe Israeli, ayita umwanakwe e Jozefu, amunena ati, Nkukulambilizya ukuti uwike ikasa lyako mu lupamba lwane ulayilizye nu kusimichila kukunchindika. Utize uyize unzike mu Ijeputi, 30uyize uleke nkalale na watata, uyize umfumye mu Ijeputi ukanzike ku malalo yawo. Nawe atolelela ati, Ndichitila ndimuno watachila. 31Nga amunena ati, Lapa pe nene, alapa pakwe weliwe. Apano Israeli alambalika umutwe wakwe pa chitala chakwe.
Àwon tá yàn lọ́wọ́lọ́wọ́ báyìí:
Intaliko 47: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.