Intaliko 45
45
Jozefu ayiwumbula kuwanyina
1Apano Jozefu apotwa ukulema umwezo wakwe pankolelo pakwe wane wimilile pe weliwe; alila ati, Lekani wonsi wafume pakwe nene. Achaleka kutasyazile nanti wumwi pano wayimanyisyanga ku wanyina. 2Alila ichikalazi na wina Ijeputi awivwa, na wa mu ng’anda yakwe Fero nawonye awivwa. 3Apano Jozefu anena awanyina ati, Anenenye ne Jozefu, wuzye tata ali nu wumi? Ukuwa awanyina watatela wamutolelele amuno walinji ni ntete paminso yakwe.
4Apano Jozefu anena awanyina ati, Palamilani. Awala wapalamila Jozefu awanena ati, Ne Jozefu, umunyonko wino mwakazizye ku wa Ijeputi. 5Achaleka kanonzi mutize muwe na malanda, mutize mufwilimane, muno mwankazizye konye-koo; amuno Leza wantumile pankolelo pakwe mwemwe kukusunga uwumi winu. 6Amuno ichinkumbili chapona munsi imyaka yiwili, swinya kwasyala imyaka yisano yino kutaliwa ukulima nanti a kusinza. 7Leza wantuma pankolelo pakwe mwemwe kukuwasunjila ichakulya munsi, nu kuwasunga mwemwe alyakuti muwe nu wumi. 8Achaleka musi a mwemwe mwe wantu mwalesile njiza koo, ukuwa we Leza; waleka nawa ne yisi wakwe Fero, swinya eyisikulu wakwe wonsi wano wali mu ng’anda yakwe nu kuwa ne kapanzya wansi yonsi iya Ijeputi. 9Pitisyani muye kwe tata mukamunene muti, E Jozefu umwanako akuti Leza wampa uwukapanzya wansi yonsi iya Ijeputi; zanga kwe nene, nanti kuzinguluka; 10uliya ukikalange munsi ya Gosheni, uliwa papipi nani, wewe na wanako, na wana wa wanako, ivitekwa vinu ni ng’ombe zinu, na vyonsi vino muli navyo. 11Kulyanye akuno ndiwawalela, amuno kuchili kuli imyaka yisano iya chinkumbili yino ikwiza, alyakuti mwemwe na vyonsi vino muli navyo mutize muwlunkuwa. 12Kanonzi aminso yinu yayipanichisizya, na minso ya mwanawitu e Benjemani yapanichisya, kuno anenenye nkuwanena nu mulomo wane. 13Mule mukanene tata nivya wukulu wane mu Ijeputi, na vyonsi vino mwalola. Pitisyani mukalete tata koo. 14Apano awila umunyina e Benjemani mu nsingo awalila; nawe Benjemani awalila. 15Afyompa awanyina wonsi awalila; nga pansizi awanyina awamuvwanzya.
16Ayala mazwi yivwikwa kwi sane kwe Fero ukuti, Awanyina Jozefu wizile, achisechelesya Fero na wawomvi wakwe nkaninye. 17Achaleka Fero anena Jozefu ati, Nena awanyonko uti, Chitani choo mulonge iviya vinu pa vinyamana munyochele kunsi ya Kenani; 18mukasende ’so ni viya vya mu ng’anda zinu vyonsi, mwize koo, ndiyiza mbape insi nzima nkani mu Ijeputi, muliwalya ivizima ivya munsi. 19Swinya wakomelezye uti, Chitani choo; wasende amagareta ya munsi ya mu Ijeputi ayakusendela awana watichi na wawakwinu, mukalete nuso ayize koo. 20Mutapechela pa vya nsawo zinu, amuno insi yonsi inzima iya mu Ijeputi a yinu.
21Awanakwe Israeli wachisile wowonye; Jozefu awapa amagareta ndimuno Fero wakomelezizye, awapa ni chakulya cha pa musinzo. 22Wawapile wonsi ivizwalo vizima; ukuwa wapile Benjemani indalama imyanda yitatu (300) ni vizwalo visano. 23Kwe yisi watumile vyoo: indokwe njonsi ikumi zino walonzile penepo ivintu vizima ivya mu Ijeputi, ni ndokwe njanachi zino walonzile penepo amalezi, ichakulya ni mpawo yakwe yonsi iya pa musinzo wakwe. 24Achaleka awanyina awapita, awala pano wakulayana awanena ati, Mutize muwapokota mu nzila. 25Achaleka awafuma munsi ya Ijeputi awaya munsi ya Kenani kwe yisi e Jekapu. 26Awaya awamunena awati, Jozefu achili a mupuma, we kapanzya munsi yonsi iya Ijeputi. Umwezo wakwe awunyuluka, amuno atawasuwizile. 27Ukuwa awala wamunena amazwi yonsi ayakwe Jozefu, yano wawanenile, napano walola amagalera yano Jozefu wamutumizile kukumusendela, umwezo wakwe yisi e Jekapu awikala munda; 28nga Israeli ati, Nasuwila, e Jozefu umwanane achili a mupuma, nandi mpite nkamulole pano ntani imfwe.
Àwon tá yàn lọ́wọ́lọ́wọ́ báyìí:
Intaliko 45: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.