Intaliko 43
43
Awanyina awanyochela ku Ijeputi
1Impindi-nye yoyo ichinkumbili chakulisizye munsi. 2Walanga pano walya amalezi yano wafumile nayo ku Ijeputi yasila yisi awanena ati, Yanji swinya, mukatukalile ichakulya chitichi. 3Ukuwa Yuda atolelela yisi ati, Umuntu weyo watuso chezile wati, Mutalilola impumi yane, suka ndi mwiza-mwiza nu muzuna winu. 4Suka ndi watuzumilizya ukupita nu muzuna witu, peni twandi tupite tukakukalile ichakulya. 5Ukuwa ndi wakana tutandi tupite, amuno umuntu watunenile ati, Mutanga mwize mulole impumi yane suka ndi mwiza-mwiza nu muzuna winu. 6Israeli awanena ati, Ngachani chino mwachisile wonyewoo pa kunena umuntu weyo amuti tuli nu muzuna witu? Awamutolelela awati, Umuntu weyo watukolowozizye nu muchenjelo ivya luko lwitu lonsi, watuwuzizye wati, Wuzye eso amupuma? Wuzye muli nu munyonko winji? 7Achaleka chino twamutolelezile chalingine na mawuzyo; ukuwa tutamanyile ndi wanga atunene kuno wanga ati, Mukalete umuzuna winu. 8Apano Yuda anena e yisi e Israeli ati, Leka tupite nu mulumendo, leka tukatuke tuwapita, alyakuti tuwe nu wumi nanti kufwa, sweswe namwe, na wana witu awatichi. 9Nkupanichisya kuno nandi musunge, mwi kasa lyane amuno ulimupochelela. Ukuwa ndi ntizile namunyosya kwe wewe, ndiwa nu mulandu wa manda yonsi. 10Ukuwa ndi achino kutalinji ukuzinguluka ngali kanonzi twanyochela ni mpindi ziwili.
11Apano yisi e Israeli ati, Ndi avino chingawa wonyewoo, sendani ivikomwa vimwi ivya munsi yoo muwike mu myuwa yinu mumutwalile, a vyawila, uwusule wutichi, uwuchi wutichi, ni vyakulematichila, ni vyifungo nunchile, ni nsumbu zya mungungu, ni zyambula. 12Sendani indalama impindi ziwili; musende ni ndalama zino wawisile mu myuwa yinu; amuno nche waluvizye. 13Sendani nu munyonko, mukatuke muwapita, munyochele ku muntu-nye weyo swinya, 14ndi Leza wa maka yonsi awafwile inkumbu ku muntu weyo, alyakuti ayize ataye umunyonko winji nu Benjemani. Amuno ndi nafwilwa awana chiwe awowonye. 15Achaleka awasenda indalama zyozyo izyapakutalichila ni mpya-nye, apaliponga nu Benjemani, awakatuka ukuya ku Ijeputi, awafika kwe Jozefu.
16Ala Jozefu walola Benjemani, anena kayamwite wakwe ati, Watwale mu ng’anda, ukome ni chikwato utewete amuno awantu waa wandi walye nani impindi ya musanya. 17Umuntu achitila ndimuno Jozefu wamukomelezizye, awatwala mu ng’anda. 18Awantu awawa ni ntete amuno wayile ku ng’anda yakwe Jozefu, awati nche amuno a ndalama, zino zyawisilwe mu myuwa yitu pa mpindi yakutalika, achaleka watuleta koo, alyakuti tuzanwe nu mulandu, atuleme tuwe swe wazya apoke ni ndokwe zitu. 19Achaleka awaya kwe kayamwite wakwe Jozefu awavwanga nawe pa mulyango, 20awati, Oko we tatakulu, twizile pakutalika kukukala ichakulya; 21lela twalanga pano twafika pando, twiyula imyuwa yitu, atuzana mu muwa wakwe wila muntu muli ndalama mwenemo, indalama zitu zyonsi zyalinjipo; achaleka twizile nazyo, 22swinya twizile ni ndalama zinji izyakukala ichakulya, tutamanyile wino wawisile indalama mu myuwa yitu. 23Awatolelela ati, Tekani imyezo munda, mutize muwatina; nche e Leza winu e Leza wakwe-so awino wawisile insawo mu myuwa yinu; nenji napochelezile indalama zinu. Ngapano awafumizya Simeoni aya kwe woliwo. 24Walile pano umuntu watwala awantu mu ng’anda yakwe Jozefu, awapa aminzi, awasamba ku matamba yawo, nu kupa indokwe ichakulya, 25awafumya ivyawila vyakwe Jozefu ukuti ayize apochelele pa mpindi ya musanya, amuno wivwile kuno wandi walye ichakulya kweneko.
26Ala pano Jozefu wawela ku kaya, awamutwalila ivyawila vino wasenzile, awafika awafukama pe weliwe. 27Nga awawuzichisya muno wawezile, ati, Wuzye eso ali chete, umukalamba ndimuno mwanenezile? 28Awatolelela awati, Umuzya wako etata ali chete, achili amupuma. Awinama awamuchindika. 29Ayinula aminso yakwe alola Benjemani uwang’anda yonga awanena ati, Wuzye wee awili muzuna wino mwatakanga? Ngapano ati, Mwanane e Leza awe ni nkumbu nawe! 30Achaleka Jozefu afuma zuwa-zuwa amuno walondanga ukulila. Ayinjila mu ng’anda yakulala awalila mwenemo. 31Apano asamba ku minso nga afuma; ayilema umwezo ati, Letani ichakulya. 32Awamutendechela wenga, na wanyina wonga, na wa Ijeputi wano walyanga nawo wonga, amuno awa Ijeputi watalyanga apaliponga na wa Heberi, walinji a muzilo wawa Ijeputi. 33Awikala pankolelo pakwe weliwe, ekatote ukulingana ninkwatwa yakwe; mpaka nuwakupelelechezyanye ukulingana nuwutichi wakwe; awala walolechesyania awazunguka. 34Ivyakulya vyafumanga kwi pampa lyakwe Jozefu, ukuwa uwukulu wa chakulya chakwe Benjemani chalusizye icha wanyina impindi zisano. Awang’wa awasechela apaliponga nu Jozefu.
Àwon tá yàn lọ́wọ́lọ́wọ́ báyìí:
Intaliko 43: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.