Intaliko 37
37
1E Jekapu ayikala munsi yino yisi wikalanga mwenemo, munsi ya Kenani. 2Na lyoo a lilandwe lyakwe Jekapu.
Jozefu nawanyina
Jozefu walinji ni myaka ikumi na munenu lambali swinya wachemanga ivikwato ndivino awanyina. Walinji a mulumendo apaliponga na wana wakwe Biliha nu Zilipa, wa muka yisi. Lelo wayile alongola kwe yisi amazwi mawipe ni vya wanyina. 3Israeli wakunzile Jozefu ukulusye awanakwe wanji wonsi, amuno walinji a mwana wa mu wukote wakwe, wamusumizile ilaya lya makasa matali. 4Awala wanyina walola kuno yisi wamukundisizye ukulusye woliwo, awamupata, nanti kuwa ni nkumbu kwe weliwe.
5Jozefu walosile ichilota, ala pano wanena awakulu wakwe awamupata awalusya. 6Wawanenile ati, Yivwani ichilota chino ndosile; 7Lolani, twatela tukunyepa imyanzi ya nkumba mu chalo, nalola umwanzi wane wakatuka wimilila; imyanzi yinu yawungana yaliwilizya umwanzi wane, yafukamila umwanzi wane. 8Awanyina awamunena awati, Wuzye nachawuzimanye wewe a we muntu ulitupanzya sweswe? Pamwi uliwa we mfumu yitu? Achaleka muno a vilota na mazwi yakwe awamupata awalutilizya. 9Anyoka alota ichilota chinji, anena awanyina ati, Si-yivwani, ndosile ichilota chinji, ndosile ilanzi, umwezi ni ntanda ikumi na longa vyamfukamila. 10Ala pano wanena yisi, yisi amukalipila, amunena ati, Nga achilota-chi chino ulosile? Wuzye nene nu nyoko na wanyonko tulikuponela pansi tukufukamile? 11Achaleka awanyina awawa nu wuzuwa kwe weliwe, ukuwa yisi asunga amazwi yonsi mu mwezo.
Jozefu akazwa ku Ijeputi
12Achaleka awanyina awaya mukuchema ivikwato vyakwe yisi kupipi nu Shekemu. 13Israeli anena Jozefu ati, Awanyonko wakuchemela ivikwato ku Shekemu, Ale, nkasi nkutume kuno wali. Nawe amwitawa ati, Eta. 14Ngapane amunena ati, Pitanga ukalole awanyonko ndi wali chete ni vikwato, uyize unene. Nga Jozefu afuma mu mupata wakwe Hebroni ayiza kwe Shekemu. 15Umuntu wumwi amuzana akulungana mu mpanga, amuwuzya ati, Nga ukuvwamba chani? 16Nawe ati, Nkuvwamba awana-witu. Nazina, nga akwinye kuno wakuchemelanga ivikwato? 17Umuntu weyo amunena ati, Wapita, amuno nivwile wakuti, Tuye ku Dotani. Nga Jozefu akonka awanyina, aya awazana ku Dotani. 18Awamulola apatali pano atani afike kwe woliwo, ala pano atani afike awamupanjila ukumukoma. 19Achaleka awanenana awati, Kalota weyo wiza. 20Kanonzi zanji tumukome, tumusumbile mu chizinji chimwi, tuliya tukavwange tuti, Ivinyamana vyalonde vyamuluma, nga twize tulole chino ivilota vyakwe vilimuchitila. 21Ukuwa ala Rubeni wivwa wowonye, amutula ukufuma ku makasa yawo ati, Tutize tulovye uwumi wakwe. 22Rubeni awanena ati, Mutazwisya uwazi wakwe, musumbilani mu chizinji choo, konyekoo mu mavunje, ukuwa mutize mumulemelele. Walondanga ukumufyusya ku makasa yawo alyakuti amutwale kwe yisi. 23Walanga pano Jozefu wafika pa wanyina awamuzula ilaya, lyolyonge ilya makasa matali lino wazwite; 24awamusenda awaya awamusumbila mu chizinji. Mu chizinji mutalinji chimwi, mutalinji nanti a minzi.
25Awikala pansi awawalya, awala winula minso yawo, awalola awalonsi awina Ishumaeli wakuya ukufuma ku Giliadi, ni ngamila zyawo wasenzile uwusule, amafuta ya mulembo, nu wubani, pano wayanga ku Ijeputi. 26Ngapano Yuda anena awanyina ati, Nga chingatuwosya chani, ndi twakoma umwana-witu twafisa uwazi wakwe? 27Fwandi zanji muleke tumukazye ku wina-Ishumaeli, mutaleka amakasa yitu yamulemelele, amuno a mwana-witu, swe waliwonga. Awanyina awazumila. 28Achaleka pano awalonsi wa ku Midiani wiza, awanyina awaya awafumya Jozefu mu chizinji, awamukazya ku walonsi awina-Ishumaeli indalama amakumi yawili; awasenda Jozefu awaya nawe ku Ijeputi.
29Walile pano Rubeni wanyochela ku chizinji aya azana Jozefu nawumwi mwenemo, alepula ivizwalo vyakwe 30aya ku wanyina afika ati, Umulumendo nawumwi; nga nene nandi inje kwi? 31Awala wasenda ilaya lyakwe Jozefu, awakoma imbuzi, awavumvya ilaya mu wazi. 32Awatwala ilaya litali ilya makasa matali kwe yisi, awati, Twalombola ilaya lyoo; ulole ndi alilaya lya mwanako pamwi pole. 33Alimanyichisya ati, A lilaya lya mwanane; a champanga chamulya; nanti kuvwilika Jozefu wanyonkolwa tunyama-tunyama. 34Ngapano Jekapu anyonkolania amalaya yakwe azwala amasanko mu mutembeleko wakwe, awalosya umwanakwe ku manda mavule. 35Awanakwe wonsi awalumendo na wakazyana awakatuka kukumusansamusya; ukuwa akana ukusansamuka ati, Nandi inje ku Sheoli ku mwanane nkamulosyange. Achaleka yisi awamulosya. 36Lelo e Jozefu awina-Midiani wamukazizye ku Ijeputi kwe Potifara e musika wakwe Fero, esongo wa vita.
Àwon tá yàn lọ́wọ́lọ́wọ́ báyìí:
Intaliko 37: WWN82
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chinamwanga Bible © United Bible Societies, 1981.