MATIUS 8
8
Yesus nen ap ambi agakdo paga u inobade kaurak mendek kunik mo pano ekbirige wene
(Mrk. 1:40-45; Luk. 5:12-16)
1Ar Yesus kur taga nen wura wagagemo, akuni pakalok Ar mutok lagugwa. 2Ap ambi agakdo paga, u inobade kaurak mendek kunik enogo, eta paga arar wagage. #8:2: Agakdo paga u inobade kaurak mendek kunik ma: u eti, ebe akuni inoba kunik mendek enogo Tuhan Ai Palekma tamban eri unggurak maga o, yiluk agama Yahudi mende paga wene mbalek etegerogon welagage o. (kamus kinil kani). Waga lagagerek, Ar Yesus ilka paga endop yungguk yiluk men yorige, “Ae Nombae o, Kar ndak kalok, an noba u dek erogo banin o, Nombae,” yiluk yorige.
3Ar Yesus nen ap enogo inggi paktega dogolir men yorige, “An u dek ekbagu wadok o!” Yoga kigik etanogo ar u oba enogo arar dek agage. 4#Im. 14:1-32Ar Yesus nen men yorige, “Kinakla eberek togon o! Akuni obogar yorau maga o. Kar ap Imam inoba lan o, ir nen koba pano aga a, dek a, yiluk yokiruwak nen o. Eti yoga lagagerek, an noba ebebar obok dek aga o, yiluk Musa nen inoba dek agwi kalok ekudogu yirige mendek diru mbalek ndak-ndak, Ninombae ake sapi ak warogo akuni inil keyawak nen ake eri lan o!” yiluk yorige.
Yesus nen ap Roma mende tentara inewe eyabu ekwa mende oba u dek ekige wene
(Luk. 7:1-10)
5Ar Yesus o Kapernaum unggwi lagagerek werekma, ap tentara inewe Roma mende eti Ar oba wagagerek, yamakau paga nggino yorige. 6Ma nggino yoga dogolir, “Ae Nombae. An neyabu ekwa mende, u warek uma werek o. Ar inggi iyok abodok yu ndak dek atuk nen uma kener waka windik werek o.”
7Yorigemo Ar Yesus nen yoga dogolir, “An lalok u oba eti dek erogo biligin o,” yiluk yorige.
8Ar Tentara inewe enogo nen yoga dogolir, “Dek o, Nombae. Ae Nombae, an numa Kar wokaburak noba ndak dek o. Ma Nombae Kar Kane ya nen ar yin o, nen Kar Kane ya nen yumo, an neyabu ekwa eti oba arar pano ari ligin o. 9Nenaluk, An ogwe newe nggok kwak ane yeganem, tebe yiluk erir taga mendek o. Nen an mendek tentara nabukmu kogona paga mendek, nane yega kalok, ir ogwe tebe yiluk erir taga mendek o. An nen tentara ambi kar lan o yiluk yorumo, ‘Ar ligin ar o!’ Nen, ‘Kar eme!’ yiluk yorumo, ar nen warigin ar o. Nen an neyabu ekwa eti, ‘Yi erin!’ yiluk yorumo, ar nen erurak ar o,” yiluk yorige.
10Yorigemo, Ar Yesus nen ap tentara inewe enogo ane yorige aruk kolalka lagagerek, we, au yiluk, bi wakige. Bi waka dogolir, akuni Ar mutok lagugwa mendek yeme nogo yoraga dogolir, “Ap yi nobade a, ir akuni Israel mendek nen, ap yi iliti ebebar andalok panggolke yi ndak-ndak, ambi An nil mondok daktagodek o! 11#Luk. 13:29Wene yi ebebar o! Ir akuni pakalok o timur nggwe nen o, barat nggwe nen o, ar Abraham inom, ar Isak inom, ar Yakub inom, Ar Allah nen Mbogor Agar Ngger erogo bumo etoma, inakla adeknggen paga ari warugun o. 12#Mat. 22:13, 25:30; Luk. 13:28Nen ir akuni Ar Allah akburi etaru ake yiluk denogo barige mende kwak, inebe tekman o amum mo mbo wuldagin o. Nen ir etoma anggon panggon eku dogolir, de pakalok yugu dogogun o.” 13Ar Yesus nen ap tentara inewe enogo yoga dogolir, “Kar ebebar etarigin yiluk andagen enogo etarigin ma kuma lan o.”
Etanogo yoga kigik ar, yabu ekwa ernogo, o eta paga ar, oba u enogo arar dek agage o.
Yesus nen akuni pakalok u dek ekbarige wene
(Mrk. 1:29-34; Luk. 4:38-41)
14Ar Yesus Petrus uma lagage mende, kwe ar Petrus akowan oba u ndi-ndi warek noge yitagama il ka lagage. 15Ar Yesus inggi kwe enogo inggi paktega kigik, oba u ndi-ndi waka lagage enogo arar dek agage. Nen dek atuk ar kwe enogo nen ir inebe wogonaka nen dado palinaka ekige.
16O arar keyanggwi agigemo, Ar Yesus oba akuni kugi inobabur maduk mendek kunik yemenogo woginarek lagugwa. Ar Yesus nen, Ar ane bugudagar yega kigik, kugi maduk mendek yemenogo mugogo wulinaka kigik, inoba u arar dek erogo barige. 17#Yes. 53:4Ar Yesus nen elalin erir wagage eti ake paga, Ar Nabi Yesaya nen elalogo yega dogolir, “Nir ninoba anggon panggon ekwi mendek Ar nen nggorogo wagangga, ye u nde u ninoba kunik mende Ar nen dek erogo binanengga, erir warigin o,” yiluk yirige enogo, Ar Yesus nen arar erir waritaga o.
Akuni Yesus mutek lau yirige wene
(Luk. 9:57-62)
18Etegerogon eka kalok, Ir akuni inebe pakalok Ar Yesus eragalilu wonggalek welagugwa. Nen Ar Yesus akuni yemenogo il daga lagagerek, Ar aworomi yoraga dogolir, i danau alibagan nggwe unda luwok o, yiluk yorarige. 19Yanogo yoralok werekma, ap guru agama ambi oba wagagerek men yorige, “Ae Nombae Guru o, an Kar nggoma nggwe ligin eti, nimbirak mondok lagu dogorak yiluk wagi o!” yiluk yorige.
20Ar Yesus nen wene onggo yoga dogolir, “Yangge kelo mende ai palek werek, nen tewe ongga tewe eti inai palek werek ar o, ogwe Ar Akuni Inakbur eti, we ambor walo yiluk kwalamo ogwe, akdikmu mondok dek arar o,” yiluk yorige.
21Yoga kalok, Ar Awor ambi nen yoga dogolir, “Ae Ambo, an umangge ndak lalok, nombae warek agar ndak bi lak nen yiluk, nggino yokigi o,” yiluk yorige.
22Ogwe Ar Yesus nen wene onggo yoga dogolir, “An mutnarek eme o, ir akuni warek mendek kalok, ir akuni warek mendek nen ar agar bawak nen o, yiluk yorige.”
Yesus nen wiya kakde abodok dek ekige wene.
(Mrk. 4:35-41; Luk. 8:22-25)
23Yoga lagagerek, Ar Yesus arar perahu paga dengge yirigemo, Ar awurumi mutok perahu akla dengge yirugwa. 24Wiya kakde obarne pakalok mendek etanogo ar, ngganen dek waga dogolir, to perahu enogo i tarin nen pulabek kigi nanggige, to abel medalek denggalek ekige. Eta paga Ar Yesus noge yega lagage. 25Ar noge yeganem, awurumi wagu lagugwarik iluk kugu dogolir, “Abeak! Nir muk i lektagwi, yamarninan!” yiluk yorugwa.
26Yorugwama Ar Yesus nen yoraga dogolir “Nenaluk kir kinobade kertagwi? Kir kiniliti An noba ebebar andagwi eti bugudagar kinagi!” yiluk yoralok, Ar Yesus menaga lagagerek, kabodok dek arin, yiluk wiya o, i danau o yorarige. Yega kigik, i danau enogo mondok abodok dek arar etagage.
27Ar Yesus awurumi yemetnogo nen, “Ap yi nenggerogon mende a, wiya inom, i inom, Ar Ane yoraga kigik inabodok mondok dek agiya yoma!” yiluk bi wakugwa.
Ar Yesus nen ap mbere kugi maduk mendek inakla werekma wuldarige wene
(Mrk. 5:1-20; Luk. 8:26-39)
28Tuguluk Ar Yesus i Danau alibagan nggwe, o Gadara etoma arar unda lagage. Unda lagagerek mo, ap inebe mbere kugi maduk mende inakla werekma, Ar oba wagugwa. Ap inebe mbere eti inakla agaga pakalok paga, akuni tuan eti paga mondok wagu dogoluk dek. 29Ir inebe o kwiyonla akuni warek bartagama etoma nen, inane naik nggwak agan wundi wagu dogolir, “Ar Allah Akbur, Kar nir nenggerogon erninabigin a? Kar nen nir anggon panggon erninaburak o auwan kigik, yogondak erninabik nen yiluk wagan a?” yiluk yorugwa.
30Korok eta nogo ar, wam pakalok nggonak ner nugwi ma, 31ir kugwi inobabur maduk mendek, yemenogo nen, Ar Yesus yogu dogolir, “Kar nen nir murogo wulbinanik nen yiluk kalok, nir mugogo wam etoma inakla lakbinanin o yiluk yorugwa.”
32Yorugwama Ar Yesus nen, “Lani!” yiluk yoragage. Yoragagemo, ir kugwi maduk mendek yemetnogo ap mbere enogo inakla nen wulkugwa, wulkugwarik wam yemenogo inakla unggirugwa. Nen wam yemetnogo kode lu mbik-mbir agan, o nggarma yede-yede nggar wuku dogolir, danau ima etoma i kumuduk narugwa.
33Ir akuni wam inaruwam welagugwa mendek yemenogo kode o kota unggwi lagugwarik, nen akuni kota yemetnogo wene etagage mendek yemenogo obogar mbililogo yorarugwa. Yoragu dogolir, ap mbere kugi maduk inilitimo welagugwa mendek wulinakige yemenogo inom mbililogo yorarugwa. 34Akuni o kota yemenogo nen obogar Ar Yesus inom abuk ari lagugwarik, Ar Yesus inil kalok, nen nggino nggano togon yokogo o, lak. Kar nir ninuma yoma dambe binaniluk lan o, yiluk yorugwa.
Àwon tá yàn lọ́wọ́lọ́wọ́ báyìí:
MATIUS 8: WLW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
