MATIUS 24
24
Ar Yesus nen Tuhan Ai Palek danggulogo wurabigin yirige wene
(Mrk. 13:1-2; Luk. 21:5-6)
1Ar Yesus, Ar Allah Ai Palek ma nen wulki nanggige, ir Ar mutok lagwi mende yemenogo, ar oba wagu lagugwarik, ininggi tiktik Allah Ai Palek enogo oba nggwe lakbirugwa. 2Ekugwama, Ar Yesus nen wene yoraga dogolir, “Etoma obogar nena kinil kogop? Kinilu togon o, nggir oba duk-duk, tak mbalek etoma, omanggiar ogwe, oba duk-duk erek dogogin mondok dek o. Etoma inobok ar danggulogo lagabigin lakbigin o.”
Anggin panggin, yiduk maduk, irinabugun yirige wene.
(Mrk. 13:3-13; Luk. 21:7-19)
3Yoralok ar Yesus enogo, ado Zaitun paga lagagerek, korek werekma, Ar mutok lagwi mende yemenogo, wene inadik inom yu wadok nen, oba lagugwarik yogu dogolir, “Nir wene etarigin yegen mende etoma, menda nen obogar etarigin? Nen Ninombae Kar warurak inom, o irep paga etarurak yegen mende inom, etari wagikdek kigik, nena-nena ndak etarir ligin mende, yoneran o,” yiluk yorugwa?
4Ar Yesus nen yoraga dogolir, “Kir nuker binagagunem, tuam pik pak mondok dogono o. 5Nenaluk, ir akuni inendaga, An nendaga mende talogo ‘An Raja Endaga Nggok Ndilinakwa mende arar o!’ yiluk yugu dogolir, akuni pakalok nukerinabugun o. 6Kir nen, ye wim nde wim mbalek mende, agum ane yega kalok, inane yugun yemenaga kinaruk kolugun o, ogwe kinobade arugup o. Nenaluk, wene etoma obogar etarurak ake denek mende mban arar o. Ogwe, etoma irep paga yiluk, dek ar o. 7Ir ap inalebunu ambi nen, ir ap inalebunu amberak inom wim akwi, Negara ambi nen, negara amberak inom wim abugun o. O kuri dombok etoma, nogado nggok ar wulka, lugur nggok mende eka, erigin o. 8Ogwe etoma obogar wene edoma, kwe elege il bagalek kener wari taga ndak-ndak arar o.
9 #
Mat. 10:22
Kir An mutnarek lagwi mende eti paga, o ya nda agar taga yoma, ir obogar nen ina'ir kungginakwi dogolir, kir pakbinagaluk anggin panggin ekinakwi, kinebe min kinakwi erugun o. 10O eta paga, akuni ebebar andarugwa mende, mi erogo mbo biluk, akuni nggedalogo bar nugwi, na'ir ka'ir nggok aga erigin o. 11Ap nabi-nabi ebebar dek mende pakalok kenam atuk, akuni pakalok nugurinabugun o. 12Ye maduk nde maduk erir lagu dogolir, akuni nakba-kaba eru mende dek arigin o. 13#Mat. 10:22Etoma etarir waga kigik ogwe, akuni ta nen nomo yiluk pago dogogin enogo perak, idi erogo ndilkodagin o. 14Nen, wene Pano Wene Ar Allah apma baurak mende ernogo, ir akuni o kuri dombok etoma, ir inaruk koluak nen yiluk, yorar lagwi kalok, o eta paga perak, o irep paga eti kenam arigin o.”
Ye maduk nde maduk erugun yirige wene
(Mrk. 13:14-23; Luk. 21:20-24)
15 #
Dan. 9:27, 11:31, 12:11 “Ar nabi Daniel, o maduk oba dek panoma etoma menatuk dogolir yirige yio, ‘Ye maduk nde maduk anggin werek mende erugun yemenaga, kinil dagun o.’ (Wene yi, nenaluk yirige eti: kir pik pak dikburak o). 16O eta paga, ir akuni, o Yudea nen kode ado paga nggwe laurak maga o. 17#Luk. 17:31Ir akuni, o wadengge paga welagwi mende, uma inamendek kodau paga, wura wagunem o. 18Ir akuni yabumo welagwi mende, iniyok paga iniyom koda lagunem o. 19Ir kumi elege inabuda mende o, nen elege inidak kuninakwi mende o, wene agode werek mende, o eta paga inoba arigin o. 20Wene etoma obogar, o miyo waga paga inom, o Sabat tamban ekwi paga inom, erir waga kau, kir nen tamban pik pak yino o! 21#Dan. 12:1; Why. 7:14Nen, o eta amor-amor, wene anggin panggin, o yoma elalogo bir waga dogolir etatukdek mende ar, etarir waga kugun o. Nen wene etoma yabongga ambi etarigin mondok dek ar o. 22Ar Allah nen, o panggo bi warigin dek kalok, akuni ambi nen mbo kode wundugun mondok dek o. Ogwe, ir akuni Ar mutok lagwi mende inake nen, ar Allah nen, o yunggu bi warigin o.
23O eta paga, ap ambi nen yokeraga dogolir, ‘Lakani, Raja Ndilinakwa mende enogo yoma eloma obogar werek o!’ yiluk yugwi kalok, ‘kinakla ebebar mondok andagup o.’ 24Nenaluk, akuni ndilinakwa inenggal mende o, nabi-nabi inenggal mende o, inebe pakalok ar kenam arugun o. Tuguluk ir nen, akuni Allah akburi ane waganggwi mende nugurinabu paga, elalin erukbuk mende pakalok erugun o. 25Etiar ma, auwan etarir wagikdek kigik, alebagik kinilu erogo, An yorkeragi o.
26 #
Luk. 17:23-24
Ir akuni nen, ‘Ar ebe todi anggup paga ye dekma nde dekma etoma kago o, kinil bika lani!’ yiluk yokiragwi kalok, etoma mondok lagup o. Tuguluk ir nen, ‘Ar ebe kamar kimago yoma werek o, bika unggini!’ yiluk yugwi kalok, mondok ebebar andagup ar o. 27Nenaluk, Akuni Inakbur warigin ernogo, bigalabok akbinak o timur nggwe nen, eketek akbinak o barat nggwe lektaga ndak-ndak, eka dogolir waga kugun o.
28 #
Luk. 17:37
Warek pidi mende werek ma kalok, tewe pidi nongga mende korok denggerek arar dogitaga mende o.”
Akuni inakbur warigin yirige wene
(Mrk. 13:24-27; Luk. 21:25-28)
29 #
Yes. 13:10, 34:4; Yeh. 32:7; Yl. 2:10,31, 3:15; Why. 6:12-13 Ye wene nde wene, anggin panggin erir warigin mende etoma eka kigik, dogoluk dek ar: mo il amum aga, tur akbinak dek aga erigin o. Nen dadi kuragal nggilu-nggilu mbogor paga nen, wura waga paga, ir mbogor akla inobatne werek welagwi mende, nuk puk etarugun o. 30#Dan. 7:13; Za. 12:10-14; Why. 1:7Eti eka dogoluk, Akuni Inakbur waritaga o, yiluk mbogor paga etoma ambi eka kugun o. Eti eka paga, o ya nda agar paga yoma, inobok ar de yugun o. Nen Akuni Inakbur ernogo, obanggi obangge erek, Ebe obatne inom, agagona akla waga kugun o. 31Tuguluk piknggon nggok mende ambi eka kigik, Akuni Inakbur enogo nen, ir malaikat-malaikat Ar mende yemenogo, ir akuni Ar Allah akburi ane waganggwi mende, o agar paga yoma idil unggur empat kudi paga nen inom, mbogor irep penak nen irep penak kudi, obogar wonggal inabugun o.
O ara oba lirogo yoragage wene
(Mrk. 13:28-31; Luk. 21:29-33)
32Ar o ara erir taga mende ambi emeduok o. Ar o eti, enggalokbak oba nggerengga aga, nen oba liok togon etaga lagatek, anggup wulabir waga kalok, yogo o kibi muk dagi waga o, yiluk kir kinilu dogir tagwi o. 33Eti kwak ma, wene obogar yigi mende etoma, etarir waga kinil kalok, yogo o obok korok arar panggo yi waga o, yiluk kinilu atno o. 34Kir kinilu togo dogu o! Ye wene nde wene etoma, akuni yogondak iniluk agarik mende yi obogar, kanggikdek kigik ar etarir warigin o. 35Mbogor inom, agar inom, obogar dek arigin ogwe, An Nane eti perak, mondok aitok arar dogogin o.
O hari yi paga jam yi paga warigin ninunggukdek yirige wene
(Mrk. 13:32-37; Luk. 17:26-30,34-36)
36O hari nggi paga warigin, jam nggi paga warigin eti akuni obogar ninunggukdek o. Nen Ir malaikat mbogor paga mende eti, inunggukdek ar o, nen Ar Allah Akbur eti ogwe unggukdek ar o. Nen ilu mondok kwak eti, Ninombae adigar o. 37#Kej. 6:5-8Nen Ar Akuni inakbur enogo waga paga eta, o elokte ap Nuh ekige etanogo talek arigin o. 38I tabu nggok utuk wagikdek kigik, akuni nen inagi inarom ninggik, kwe yikbigik wokbigik ekulagugwa o. Ir enogo ekwi mban dagik, ar Nuh enogo kapal akla unggirige o. 39#Kej. 7:6-24I tabu enogo utuk, ir akuni yemenogo tebelinabik nen yiluk, yeger kigi nanggige, yogo etanogo nen perak, nena etari taga yiluk eti, inilu agage o. Etiar ma, Akuni Inakbur enogo waga paga, etegerogon ar etarigin o. 40O eta paga, ap mbere yabumo yabu ekunem, ar ambi kwak wagangga, ar ambi kwak togok bega erigin o. 41Ir kumi inebe mberegandum ndamulkunem, ar ambi kwak wagangga, ar ambi kwak togok bega, erigin o. 42Kir mende Tuhan eti menda warigin yiluk, kir kinunggukde eti paga ma, tuam pipak waku dogoni o. 43#Luk. 12:39-40Kinaklah yi eberni nda! Ar ap ambi uma, ap imodonggar ambi nen, uma kukbaga jam yi paga imodo tu kurigin eti ilu atukmo, ar ap eti, uma tu kukunem yiluk, nogo yigin dek, iluk mondok tuam waka dogogin o. 44Eti ndak-ndak, kir ogwe tuam pikpak waku dogoni o. Nenaluk, Akuni Inakbur enogo warigin eti, kir kinakla yi paga warigin o yiluk, eberek dekma arar warigin o.
Yedoman ineyabu maduk pano mende wene
(Luk. 12:41-48)
45Ar Yesus nen ambi inom ar yega dogolir, “Yedoman akla nggagalek, yogetek ndak-ndak dik eri taga mende ta kwak? Ar eti kwak perak, ar ap ai werek enogo nen, ir yedoman ambetak ir mende kepala biktaga mende o. Nenaluk, ar nen inagarom o netagama etanogo ndak-ndak mondok ar, wogoraga dogowak nen yiluk. 46Ar yedoman enogo yabu ekanem, ar ap ai werek enogo watuk, iliti adeknggen nggok togon oba biktaga mende o. 47Kir kinakla ebebar andani o. Ar ai werek enogo nen, amindik amendek obogar, ar ap yedoman enogo nen ndegelka dogowak nen yiluk, wogorigin o. 48Nen ar yedoman enogo obabur maduk mendek kalok, akla nen yega dogolir, 49‘Ar ai werek yi ibar warigin dek ma yiluk, akla andalok,’ ir yedoman ambetak ndugi inaka, akuni mabuk ekwa mende uma ba unggiluk, i nunggwi, erom nunggwi eka dogogin o. 50Etanogo eka nem, ar ai werek ernogo, jam eberek dekma tubuk togon arar warigin o. 51Ar ai werek enogo watuk nen, ar yedoman enogo ndugi ndamuk pamuk warogo, akuni maduk ekwa mende inoba arar mbo wuldigin o. Nen ir yemenogo, anggon panggon eku dogolir, de yugu dogogun o.”
Àwon tá yàn lọ́wọ́lọ́wọ́ báyìí:
MATIUS 24: WLW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
