JENESI 9
9
1 Oku tabuaki‘i e he Otua a Noa. 4 Koe fakatabu‘i ae kai toto moe fakabo. 8 Koe fuakava ae Otua, 13 kuo fakailoga‘i aki ae umata. 18 Oku fakakakai e Noa a mama ni. 20 Oku to ae goue vaine, 21 kuo kona ia bea manukia e hono foha, 25 oku ne fakamalaia‘i a Kenani, 26 oku tabuaki‘i a Semi, 27 oku lotua a Jefeti, 29 bea bekia ia.
1BEA nae tabuaki‘i e he Otua a Noa mo hono gaahi foha, bea ne behe kiate kinautolu, Mou tubu, mo fakatokolahi, bea fakakakai a mamani. 2Bea e i he faga manu kotoabe o mamani ae manavahe moe ilifia kiate kimoutolu, bea i he faga manu buna kotoabe oe atā, mo ia kotoabe oku gau‘e i he fonua, bea ki he gaahi ika kotoabe oe tahi; kuo tuku kotoabe ki ho mou nima. 3Koe mea moui kotoabe oku gau‘e, ko hoo mou meakai ia; io, o hage koe akau mata kuou foaki ae gaahi mea kotoabe kiate kimoutolu. 4Ka koe kakano oku i ai ae moui, aia ko hono toto, e ikai te mou kai ia. 5He koe mooni, teu eke‘i ae toto a hoo mou moui; teu eke‘i ia i he nima oe faga manu kotoabe; bea mei he nima oe tagata; teu eke‘i ae moui ae tagata mei he nima oe kaiga oe tagata kotoabe. 6Koia oku liligi ae toto oe tagata, e liligi hono toto e he tagata: he nae gaohi ae tagata i he tatau oe Otua. 7Bea ko kimoutolu, ke mou tubu, bea fakatokolahi mo fanafanau lahi i he fonua, bea tubu ke toko lahi i ai.
8Bea nae folofola ae Otua kia Noa, bea ki hono gaahi foha, o behe, 9Vakai, ko au, oku ou fokotuu eku fuakava kiate kimoutolu, mo ho mou hako e tubu fakaholo; 10Bea ki he gaahi mea moui kotoabe oku iate kimoutolu, ae faga manu buna, moe faga manu lalata, moe faga manu vao kotoabe oe fonua oku iate kimoutolu; aia kotoabe oku alu atu mei he vaka, bea moe faga manu vao kotoabe e i he fonua. 11Bea teu fokotuu eku fuakava mo kimoutolu; bea e ikai toe motuhi ae kakano kotoabe e he gaahi vai o ha lomaki; bea e ikai toe ai ha lomaki ke fakaauha a mamani. 12Bea nae behe e he Otua, Ko eni ae fakailoga oe fuakava kuou fai mo kimoutolu moe gaahi mea moui kotoabe oku iate kimoutolu, ki he gaahi toutagata taetuku: 13Oku ou ai eku umata i he ao, bea e fakailoga aki ia ae fuakava iate au mo mamani. 14Bea e Behe, o kau ka omi ae ao ki he fonua, e ha mai ae umata i he ao: 15Bea teu manatu ki he eku fuakava, aia kuou fai mo kimoutolu moe gaahi mea moui kotoabe oe kakano kotoabe; bea e ikai toe hoko ae gaahi vai, koe lomaki ke fakaauha ae kakano kotoabe. 16Bea e i he ao ae umata; bea teu vakai ki ai, koeuhi keu manatu ki he fuakava taegata ae Otua moe gaahi mea moui kotoabe oe kakano kotoabe, aia oku i mamani. 17Bea nae folofola e he Otua kia Noa, Koeni ae fakailoga oe fuakava, aia kuou fokotuu iate au moe kakano kotoabe oku i mamani.
18Bea koe gaahi foha o Noa, aia nae alu atu mei he vaka, ko Semi, mo Hami, mo Jefeti: bea ko Hami koe tamai a Kenani. 19Koeni ae foha e toko tolu o Noa: bea nae fakakakai a mama ni kotoabe iate kinautolu. 20Bea nae kamata a Noa ke tauhi goue, bea ne to ae goue vaine: 21Bea inu eia i he uaine, bea kona ai: bea nae telefua ia i hono fale fehikitaki. 22Bea nae mamata a Hami, koe tamai a Kenani, ki he telefua o ene tamai, bea tala eia ki hono ogo tokoua itua. 23Bea nae too a Semi mo Jefeti ae kofu, bea na ai ia ki ho na uma, bea naa na fakaholomui, bea ufiufi ae telefua oe na tamai, bea nae haga kimui ho na mata, bea nae ikai mamata ekinaua ki he telefua oe na tamai. 24Bea nae a a Noa mei he ene uaine, bea ilo eia aia nae fai kiate ia e hono foha kimui. 25Bea behe eia, Ke malaia a Kenani; e hoko ia koe tamaioeiki oe kau tamaioeiki ki hono kaiga. 26Bea behe eia, Ke monuia a Jihova koe Otua o Semi; bea e hoko a Kenani ko ene tamaioeiki. 27E fakalahi e he Otua a Jefeti, bea e nofo ia i he gaahi fale fehikitaki o Semi; bea e hoko a Kenani ko ene tamaioeiki.
28Bea nae moui a Noa hili ae lomaki i he ta‘u e tolugeau ma nimagofulu. 29Bea nae hivageau ma nimagofulu ta‘u ae gaahi aho kotoabe o Noa: bea bekia ia.
Àwon tá yàn lọ́wọ́lọ́wọ́ báyìí:
JENESI 9: TWB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀