يوحنا 8

1وَلَكِن عِيْسَى يُوْڒِي غَار وذْرَار ن زِّيتُوْن. 2أَك صْبَاح زِيش يذْوڒ-د عَاوذ غَار ثمْزِيذَا ثَمقّْرَانْت ن أَيث-إِسْرَائِيل. ؤُسِين-د غَارس ڒْغَاشِي مَارَّا، ئِقِّيم يسڒْمَاذ-يثن. 3منْبَعْد يمْسڒْمَاذن ن شَّرِيعَا ؤُڒَا ذ يفَرِّيسِيْين ؤُوِين-اَس-د يجّن ن ثمْغَارْث ؤُفِين-ت ثْخدّع اَرْيَاز نّس، سْبدّن-تث زَّاثْسن. 4نَّان-اَس إِ عِيْسَى: "آ لْمُعَلِّم، ثَمْغَارْث-أَ ؤُفِين-ت ثْخدّع اَرْيَاز نّس. 5يوصَّا-ٱنغ مُوْسَى ذِي شَّرِيعَا ينَّا-ٱنغ قَا اَمشْنَاو ثَانِيتَا اَت نرْجم س وزْرُو. ئِي شك، مِين غَا ثِينِيذ؟" 6نَّان-اَس نِثْنِي مَانَايَا تْجَرَّابن-ث حمَا اَث تَاهْمن.

ئِكَّر عِيْسَى يهْوَا غَار ثْمُوْرْث يبْذَا يتَارِي ذݣ وشَاڒ س وفُوْس نّس. 7وَامِي نِثْنِي قِّيمن اَمنِّي تْسقْسَان-ث، ئِبدّ ينَّا-ٱسن: "ونِّي يدْجَان زَّايْوم عمَّارْص وَار يعْصِي اَت يُوْوث س وزْرُو نتَّا ذ اَمزْوَارُو." 8ڒْخدّْنِي يهْوَا عَاوذ غَار ثْمُوْرْث يتَارِي ذݣ وشَاڒ. 9وَامِي سْڒِين إِ وَاوَاڒ-أَ بْذَان ؤُݣُّوْرن ئِج-يج، ئِوسُّوْرَا ذ يمزْوُوْرَا. ئِقِّيم عِيْسَى وَاحْذس نتَّا ذ ثمْغَارْث نِّي ثْبدّ زَّاثس. 10ئِبدّ عِيْسَى ينَّا-ٱس: "آ ثَمْغَارْث، مَانِي دْجَان؟ مَا وَار خَام يحْكِيم حَدّ؟"

11ثنَّا-ٱس نتَّاث: "وَاه، آ سِيذِي."

ينَّا-ٱس عِيْسَى: "ؤُڒَا ذ نش وَار خَام حكّْمغ شَا. رُوْح، زِي سَّا اَڒ ثْسَاونْت وَار تَاذَاف شَا ذِي ڒْمُعْصِيْيث."

سِيذِيثْنغ عِيْسَى نتَّا ذ نُّوْر ن دُّنشْت

12ئِسِّيوڒ غَارْسن عَاوذ عِيْسَى ينَّا-ٱسن: "نش ذ نُّوْر ن دُّنشْت. ونِّي ذَايِي غَا يذْفَارن عمَّارْص اَذ يُوْيُوْر ذِي ثَادْجسْت، أَغَارس يِيڒِي نُّوْر ن ثُوْذَارْث."

13نَّان-اَس يفَرِّيسيْين: "شك ثْشهّْذذ خ يِيخف نّش، شْهَاذث نّش وَار ثدْجِي شَا ذ صَّح."

14ئِنْدق-د عِيْسَى ينَّا-ٱسن: "لَّا، وَاخَّا نش شهّْذغ خ يِيخف ينُو، شْهَاذث ينُو نِيشَان مِينْزِي نش سّْنغ مَانِيس إِي د ؤُسِيغ ذ مَانِي غَا رَاحغ. وَلَكِن كنِّيو وَار ثسِّينم شَا مَانِيس د ؤُسِيغ نِغ مَانِي غَا رَاحغ. 15كنِّيو تْحَاسَابم يجّن س ڒَعْقڒ وَاهَا، نش وَار تْحِيسِيبغ ؤُڒَا ذ يجّن. 16أُو نش مڒَا حَاسْبغ، لْحِسَاب ينُو نِيشَان ڒَاحقَّاش وَار تْحِيسِيبغ شَا وَاحْذِي، نتْحَاسَاب نش ذ بَابَا إِي ذَايِي د يسّكّن. 17ثُوْرَا ذِي شَّرِيعَا نْوم س يِيخف نّس بلِّي شْهَاذث ن ثْنَاين ن ڒشْهُوْذ نِيشَان. 18نش شهّْذغ خ يِيخف ينُو، أُو عَاوذ بَابَا إِي ذَايِي د يسّكّن يشهّذ خَافِي."

19نَّان-اَس: "مَانِي يدْجَا بَابَاش؟"

ينَّا-ٱسن عِيْسَى: "كنِّيو وَار ذَايِي ثسِّينم شَا، وَار ثسِّينم ؤُڒَا ذ بَابَا. مَعْلِيك ذَايِي ثسّْنم اَذ تيڒِي ثسّْنم ؤُڒَا ذ بَابَا." 20ينَّا اَوَاڒ-أَ ذِي ثمْزِيذَا ثَمقّْرَانْت نْسن مَانِي جمّْعن صَّدَقَا، ئِسڒْمَاذ ذِنِّي. وَار ث يطِّيف ؤُڒَا ذ يجّن مِينْزِي ڒْوقْث نّس عَاذ وَار د تُوْوِيض.

سِيذِيثْنغ عِيْسَى نتَّا زݣ وجنَّا

21ينَّا-ٱسن عَاوذ عِيْسَى: "نش اَذ ؤُيُوْرغ كنِّيو اَخَافِي ثرْزُوْم، ذِي ڒْمُعْصِيّث نْوم اَذ تمّْثم. مَانِي غَا رَاحغ نش، وَار ثْزمَّرم شَا اَذ د تَاسم ذِنِّي."

22نَّان يسْرَائِيلِيْين نِّي: "نتَّا ينَّا قَا مَانِي غَا رَاحغ نش، وَار ثْزمَّرم شَا اَذ د تَاسم ذِنِّي. مَا ٱذ ينغ يخف نّس نِغ؟"

23ينَّا-ٱسن عِيْسَى: "كنِّيو زݣ وَادَّاي يعْنِي زِي ثْمُوْرْث، نش زݣ وجنَّا. كنِّيو زِي دُّنشْت-أَ، نش وَار دْجِيغ شَا زِي دُّنشْت-أَ. 24نِّيغ-اَوم اَذ تمّْثم ذِي ڒْمُعْصِيَاث نْوم. أَذ تمّْثم ذِي ڒْمُعْصِيَاث نْوم يعْنِي مڒَا كنِّيو وَار ثُوْمِينم شَا بلِّي ذ نش إِݣ يدْجَان."

25نَّان-اَس: "مِين ثعْنِيذ؟"

ينَّا-ٱسن عِيْسَى: "نش ذ ونِّي مِيخف ذَاوم سَّاوَاڒغ زݣ ومزْوَارُو. 26غَارِي اَطَّاس ن وَاوَاڒن زمَّرغ اَذَاوم ثن ينِيغ، زَّايْسن إِي غَا حكْمغ خَاوم. ونِّي ذَايِي د يسّكّن نتَّا ذَايس لْحَقِيقَا. مِين سْڒِيغ زَّايس قَّارغ-ث إِ دُّنشْت." 27وَار فْهِيمن شَا بلِّي نتَّا يسَّاوَاڒ-اَسن خ بَابَاس.

28خ مَانَايَا ينَّا-ٱسن عِيْسَى: "أَخمِي غَا ثسْبدّم مِّيس ن بْنَاذم ذݣ وجنَّا، أَذ تسّْنم بلِّي ذ نش إِݣ يدْجَان. وَار تݣّغ شَا زِي غَاري؛ لَّا، نش سَّاوَاڒغ خ مَامّش ذَايِي يسڒْمَاذ بَابَا. 29ونِّي ذَايِي د يسّكّن اَقَاث اَكِذِي وَار ذَايِي يجِّي بُو وَاحْذِي مِينْزِي نش خدّْمغ ڒبْدَا مِين ذَاس يتعْجِيبن." 30وَامِي ينَّا نتَّا مَانَايَا، ؤُمْنن زَّايس اَطَّاس ن يِوْذَان.

سِيذِيثْنغ عِيْسَى يمْغَر خ سِيذْنَا بْرَاهِيم

31ينَّا-ٱسن عِيْسَى إِ يسْرَائِيلِيْن يِنِّي زَّايس يُوْمْنن: "مڒَا ثقِّيمم ذݣ وَاوَاڒ ينُو، أَذ تِيڒِيم ذ صَّح ذ يمحْضَارن ينُو. 32أَذ تسّْنم لْحَقِيقَا، أُو لْحَقِيقَا اَذَاوم د تضْڒق اَذ تِيڒِيم حُرّ."

33نَّان-اَس: "نشِّين زِي دُّوْرِّيث ن بْرَاهِيم، عمَّارْص وَار ندْجِي ذ يسمْغَان إِ حَدّ. مَايمِّي ذَانغ ثنِّيذ اَذ تْوَاضڒْقم اَذ تِيڒِيم حُرّ؟"

34ينَّا-ٱسن عِيْسَى: "أَقَا تسْڒَام ڒْحَقّ: مَارَّا ونِّي يتݣّن ڒْمُعْصِيّث نتَّا ذ يسْمغ، بَاب نّس ذ ڒْمُعْصِيّث. 35ئِسْمغ وَار غَارس بُو ومْشَان اَݣ لْعَئِيلَا ن ثدَّارْث إِ ڒبْدَا، وَلَكِن ممِّيثْسن وَاه غَارس اَمْشَان نّس إِ ڒبدَا. 36مڒَا يضْڒق-اَوم مِّيس يُوْشَا-ٱوم لْحُرِّيَا، أَغَارْوم ثِيڒِي ذ صَّح لْحُرِّيَا. 37نش سّْنغ قَا كنِّيو ذ دُّوْرِّيث ن بْرَاهِيم. إِنَّمَا، كنِّيو ثْرزُّوْم اَذَايِي ثنْغم مِينْزِي اَوَاڒ ينُو وَار ث ثقْبِيڒم شَا. 38نش سَّاوَاڒغ س مِين ࢲْرِيغ غَار بَابَا. ڒَا ذ كنِّيو تݣّم س مِين ثسْڒِيم زِي بَابَاثْوم."

39أَرِّين خَاس نَّان-اَس: "بَابَاثْنغ ذ بْرَاهِيم."

ينَّا-ٱسن عِيْسَى: "لَّا، مَعْلِيك كنِّيو ذ دُّوْرِّث ن بْرَاهِيم، إِڒِي قَا ثْخذْمم ڒخْذَايم نّس. 40خْزَر، نش ذ يجّن ن بْنَاذم سِّيوْڒغ اَكِذْوم س لْحَقِيقَا زِي مِين سْڒِيغ زِي أَربِّـي. ڒخُّو كنِّيو ثْرزُّوْم اَذَايِي ثنْغم، مَايمِّي؟ بْرَاهِيم عمَّارْص مَا يݣَّا اَمُّو. 41لَّا، كنِّيو ثْخذْمم ڒخْذَايم ن بَابَاثْوم."

نَّان-اَس: "نشِّين وَار د نخْڒِيق شَا زِي لْفَسَاد. غَارْنغ يجّن ن بَابَاثْنغ نتَّا ذ أَربِّـي."

42ينَّا-ٱسن عِيْسَى: "لَّا، مَعْلِيك بَابَاثْوم ذ أَربِّـي، أَتَاف تحِبِّيم-اَيِي مِينْزِي نش فّْغغ-د زِي أَربِّـي ؤُسِيغ-د. وَار د ؤُسِيغ شَا زݣ يِيخف ينُو؛ لَّا، ذ بَابَا إِي ذَايِي د يسّكّن. 43مَايمِّي وَار ثفْهِيمم شَا إِ مِين ذَاوم قَّارغ؟ ڒَاحقَّاش وَار ثْزمَّرم شَا اَذ تْقبْڒم اَوَاڒ ينُو. 44بَابَاثْوم ذ إِبْڒِيس، ثْرزُّوْم اَذ تذْفَارم مِين يخس نتَّا. زݣ ومزْوَارُو نتَّا ينقّْ يوْذَان. وَار غَارس شَا لْعَلَاقَا اَك لْحَقِيقَا مِينْزِي نتَّا وَار ذَايس بُو لْحَقِيقَا. مڒْمِي مَا يسْخرَّق، أَتَاف يسَّاوَاڒ زِي مِين ذَايس مِينْزِي نتَّا ذ بُو-يخرِّيقن، ذ بَابَاثْسن ن يخرِّيقن. 45نش قَّارغ ڒْحَقّ س مَانَاينِّي كنِّيو وَار ذَايِي تِيمْنم شَا. 46مِين يعْنَا ونِّي يزمَّرن زَّايْوم اَذَايِي يطّف ڒْمُعْصِيّث؟ مڒَا قَّارغ ڒْحَقّ، مَايمِّي وَار ذَايِي تِيمْنم شَا؟ 47ونِّي يدْجَان ن أَربِّـي اَتَاف نتَّا يتسْڒَا إِ وَاوَاڒن ن أَربِّـي. كنِّيو وَار تسْڒِيم شَا مِينْزِي كنِّيو وَار ثدْجِيم شَا ن أَربِّـي."

48نَّان-اَس يسْرَائِيلِيْين نِّي: "غَارْنغ ڒْحَقّ نِغ لَّا مڒَا ننَّا شك زِي سَمَارْيَا، ذَايك جْنُوْن؟"

49ينَّا-ٱسن عِيْسَى: "نش وَار ذَايِي بُو جْنُوْن تْوقَّارغ بَابَا، كنِّيو تْحݣَّارم-اَيِي. 50نش وَار رزُّوْغ شَا لْعَظَمَا إِ يِيخف ينُو. ذِنِّي ونِّي ذَايِي ت يرزُّون أُو نتَّا ذ ونِّي يحكّْمن. 51أَقَا تسْڒَام ڒْحَقّ: ونِّي يتݣّن اَرَّاي إِ وَاوَاڒ ينُو اَتَاف وَار يْتْوِيڒِي ڒْموْث عمَّارْص."

52نَّان-اَس يسْرَائِيلِيْين: "رخُّو نسّن بلِّي شك ذَايك جْنُوْن. سِيذْنَا بْرَاهِيم ذ لْأَنْبِيَا مَارَّا مُّوْثن. شك ثقَّارذ مڒَا شَان يِجّن اَذ يݣّ اَرَّاي إِ وَاوَاڒ ينُو عمَّارْص اَذ يقَّاس ڒْموْث. 53مَا شك كْتَار زِي جدِّيثْنغ بْرَاهِيم ذ لْأَنْبِيَا نِّي يمُّوْثن؟ مِين ثْحسّْبذ يخف نّش؟"

54ينَّا-ٱسن عِيْسَى: "نش مڒَا سمْغَارغ يخف ينُو، أَتَاف لْعَظَمَا ينُو وَار ثدْجِي ذ وَالُو. ذ بَابَا إِي ذَايِي يسمْغَارن، ذ ونِّي إِي ثقَّارم قَا ذ أَربِّـي نّغ. 55كنِّيو وَار ث ثسِّينم شَا، نش سّْنغ-ث. مڒَا نِّيغ ؤُڒَا ذ نش وَار ث سِّينغ شَا، أَذ يڒِيغ اَم كنِّيو ذ بُو-يخرِّيقن. وَلَكِن نش سّْنغ-ث، تݣّغ اَرَّاي إِ وَاوَاڒ نّس. 56جدِّيثْوم بْرَاهِيم يفَرح اَطَّاس عْلَاحْسَاب خْمِي غَا يࢲر نْهَار ينُو، وَامِي ث يࢲْرَا يفَرح."

57نَّان-اَس يسْرَائِيلِيْين نِّي: "عَاذ وَار غَارك بُو خمْسِين يسݣّْوُوْسَا، مَامّش ثݣِّيذ ثࢲْرِيذ بْرَاهِيم نِّي؟"

58ئِنْدق-د عِيْسَى ينَّا-ٱسن: "أَقَا تسْڒَام ڒْحَقّ: قْبڒ مَا ٱذ يِيڒِي بْرَاهِيم، نش دْجِيغ."

59كَّرن يسْرَائِيلِيْين نِّي يْسِين يزْرَا حمَا اَث رجْمن، وَلَكِن عِيْسَى ينسْڒث يفّغ زِي ثمْزِيذَا ثَمقّْرَانْت.

Àwon tá yàn lọ́wọ́lọ́wọ́ báyìí:

يوحنا 8: ريف

Ìsàmì-sí

Pín

Daako