Mapookyony 17
17
Kyaasa kya Irinwa
1Kyeeri Abramu ekee nndu wa myaaka makumi kyeenda na kyeenda, Nndumi Iruva kasheya Abramu kammbia, “Yeny ni Iruva Muni finya shoose; salala mbee yakwa kuve nsongovisi. 2Neeny nshivikaa kyaasa kyakwa na yewe, na yeny nshekufumbutaa nnu deny.” 3Abramu kafirya ndi kisangu kyikapaana si. Iruva kammbia, 4“Yeny shammbika kyaasa kyakwa na yewe, neewe kushevaa nde wa ngyufyari shiingyi! 5Nta irina lyafo nkushevaangwaa-se Abramu-fo, kyaindi ulaalu irina lyafo ni Abrahamu, mashika shankuvika kuve nde wa masanga meengyi. 6Nshekwaallwaa kutire ufyari uniini nnu, na Wamangyi vasheparikaa kwafo yewe!
7“Kyaasa kyakwa na yewe shikivangisaa, na ufyari lwafo lwa numa na vana vawo, kive kyaasa kya llung'anu, sheelyi mmbo shikee Iruva wafo na wa ufyari lwafo lwa numa. 8Neeny nshekuningaa yewe na ufyari lwafo uruka elu kukee-fo ulaalu, uruka loose lwa Kanaani, luve ushilyi lwany llung'anu, neeny nshevaa Iruva waawo”.
9Iruva kavia Abrahamu, “Neewe lyo kutire kyaasa kyakwa, yewe na ufyari lwafo na vana vawo. 10Ekyi nkyo kyaasa kyakwa kushekitiraa, yewe na yeny, na ufyari lwafo, wo nndu nndumi kwany mmbo asherinwaa. 11Mmbo musherinwaa, murumbwe ishong'u lya kimaama na kindo ekyo mmbo kishevaa wende lwa kyaasa kyakwa neeni. 12Mwana wa kyuumi wa mikonu nyanya kwany narinwa wo nndu nndumi efo ngyufyariny tany, yeto awonikkye kwany, neeto akee muure na fesa tafo na yeto moose akee muny nalakee wa ufyari lwafo. 13Mwana mmbee kyeny kwafo, neeto akee muure na fesa kuti narinwa, na kyaasa kyakwa kishekaa mwiliny wany, kive kyaasa kya llung'anu. 14Na nndu nndumi nalakee nrini, nndu yeto mmbo ashelakaniswaa na vandu vengyi; mmbo afisha kyaasa kyakwa.”
15Iruva kavia Abrahamu, “Nawe Sarai nka wafo nkushekimmbaangaa Sarai-fo, mashika irina lyakwe lyishevaa Sara. 16Neeny nshembikkyaa mbora, na lyingyi nshekuningaa mwana wakwe, yee, nshembikkyaa mbora, nawe ashevaa maye wa masanga, na vamangyi va ngyufyari vasheukaa kwakwe!”
17Naasa Abrahamu kawa si kifulufulu kaseka efo nriminy, kaamba, “A ndesa, kwa nndu wa myaaka iyana awonikaa-fo mwana? Nawe Sara akee wa myaaka makumi kyeenda ashiraa mwana?” 18Abrahamu kavia Iruva, “Kulakooye Ishmaeli mmbwe kwemwirikyaa!”
19Iruva kaamba, “Nshi indo-fo, lyo Sara nka wafo ashekwiiryaa mwana wa womi, na irina lyakwe kushemmbangaa Isaki. Neeny yoo kwakwa nshekaarisya-u kyaasa kyakwe kive kyaasa kya llung'anu kimaruma kya ufyari lwakwe lwa numa yakwe. 20Na kya Ishmaeli, shamkwirannya, shammuvikya mbora shimfumbute neengereke nnu deny. Asheiraa vamangyi ikumi na vavii, nawe nshembikaa nave ufyari uniini nnu. 21Kyeendi lyo kyaasa kyakwa mmbo nshekikaarisyaa yoo kwa Isaki da, yeto Sara ashekwiiryaa kyeeri sheekyi mwaka ushaa.”
22Iruva kamanda irera nawe, kasaama ooka kwa Abrahamu. 23Abrahamu kaipoo Ishmaeli na yewo woose vewonikye kwakwe na yewo vekee woore na fesa woose, womi woose va mmba ya Abrahamu kavarina nkonu ulya mweni, shaasa Iruva alemmbia. 24Nawe Abrahamu etiri myaaka makumi kyeenda nakyeenda kyeeri erino. 25Na mwana yeto wakwe Ishmaeli etiri myaaka ikumi na iraru kyeeri erino. 26Nkonu yeto mweni Abrahamu karino ando amwi na mwana wakwe Ishmaeli. 27Na vandu woose va mmba yakwe, vawonikye kyeny kwakwe, na yewo woore na fesa uka wokony, vakarino ando amwi nawe.
Àwon tá yàn lọ́wọ́lọ́wọ́ báyìí:
Mapookyony 17: MAS2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Holy Bible in Kimashami © Bible Society of Tanzania, 2016.