Luki 8
8
Cébèle pe da ni syée ni máari ní Zyezu ní lè
1Gee bee kàdoʔo ma a Zyezu kári n sa ni nyaari kěyi myɛ ni, n kèkpoloyi fàra kèpiigèle na, ni Kolocɔlɔɔ fǎngi syɛɛnjóocànra nyuu yaà. Wi pìitamabèle kɛɛ ní siin maa pye ní wi ní 2#Mat 27:55-56; Mar 15:40-41; Luk 23:49 n fàra cébèle pèle na, bele ni wi da màdebēle nɛnɛ n yirige lè ní wɔ́ɔ̀ be yáami láʔa be na. Pe i wàa yiri Marii, Magidala ye wów, wee ni wi da màdebèle kɔrɔsiin nɛnɛ n yirige lè, 3ní i wee yiri Zyani, Herodi lɔ́ri kàrigafɔlɔ pe yiri lè Kuza, wee bee cɔ́ɔ, n fàra Suzani na ní cébèle pèle saʔa ní, pe maa ni Zyezu ní wi pìitamabèle màko nyɔɔgi ní be lɔ́ri ní.
Yaliiwáaw kàseele
(Mat 13:1-9; Mar 4:1-9)
4Syɛɛnnɛʔɛmɛ maa ni yìrigí kěyi myɛ ma ni syée Zyezu ma. Lǎli ni bi piyɛɛ gbóʔoro wi na lè, a wi kàseelaa wáa be ma níì jo:
5«Yaliiwáaɔ maa kári sa wi yaliiri wáa. Amɛɛ wi di wáa lè, a tàa too kólogi nyɔ́ɔ na, a be i di tánʔana, a féjɛɛngèle baa di jɔ́ɔ. 6A tàa too fálaga na. Lǎli ni di fìin lè, a di waʔa, níì cán nyinmɛ da pye yaà í. 7A tàa too wúuro tɛ́ʔɛ ni. A wúuri pínɛ ni leegi ní di ní fwɔɔ n baa di cò. 8A dee too tácànra tɛ́ʔɛ ni. A toro fìin, ní baa san n taa di feleye dabata-da.» Syɛ́ɛnri bee joolo kadoʔo ma a wi yákpoli wáa níì jo: «Líiweeloʔolo ga pye wee na lè, wi líiyi cáan waa lúro.»
Zyezu n kàseegèle nyúngo tɛ̀ɛn
(Mat 13:10-17; Mar 4:10-12)
9A wi pìitamabèle wi yíbe kàseeli bee kɔ́rɔ na. 10#Eza 6:9-10 A wi be pye: «Ki n kaan yele ma yele í Kolocɔlɔɔ fǎngi kalaragēle cán. Kàjáa ki ga yére wozanbèle na, ki i nyuu poro ma kàseegéle ni.
‹Koro ga pye paa gi wéle,
pe si a kɔ́ gi nyaa í.
Pe wɔ́ɔ ra gi lúro,
pe si a kɔ́ gi kɔ́rɔw cán í.›
Zyezu n yaliiwáaw kàseele kɔ́rɔ tɛ̀ɛn
(Mat 13:18-23; Mar 4:13-20)
11«Ye kàseeli kɔ́rɔ wéle wee: Yaliiri be wáa lè, toro di nyɛ Kolocɔlɔɔ syɛ́ɛnri. 12Kólogi nyɔ́ɔ wóro di nyɛ bele be syɛ́ɛnri lóʔo lè, á Dàzɔɔnw fala n pan n baa di yirige pe fúnyi ni koro ga pye pe a kɔ́ tága si syɔɔ í. 13Fálagi tɛ́ʔɛ wóro di nyɛ bele be syɛ́ɛnri lóʔo lè níì di cò ní fundaanra ní, ti si ga nìnre wáa be ni í, a be làlaa cɛɛri kwɔ́ɔ tágali ni. Lǎlee ni kagbanya ga too be na lè, pe n lúru kàdoʔo ma. 14Dee si di too lè wúuri tɛ́ʔɛ ni, koro gi nyɛ bele be syɛ́ɛnri lóʔo lè, ní i syée yɛʔɛ̀ ma. Koro kàdoʔo ma dulunyanw naa kasɔngugēle, ní wi lɔ́ri, ní wi nyáanagbɛw kèlē n baa be sígi n yérige, pe yasanri a lɛɛ í. 15Dee si di too lè tácǎnri tɛ́ʔɛ ni, koro gi nyɛ bele be syɛ́ɛnri lóʔo lè níì di cò ní funviire, ní zɔ̀njàɔn ní, ní i sangi ní kpàracogo ní.
Fètinni kàseele
(Mar 4:21-25)
16 #
Mat 5:15; Luk 11:33 «Syɔɔn faala o fètinnɛ nii ni tɔ́ngi sóo láara ni í, koro ga jáa yasinɛgɛ láara ni í. Kàjáa wi i li taari fètindaʔali na koro ga pye bele be jǐn lè kpáagi ni, poro í da nyaagi li gbɛ̀ɛ́nmi na. 17#Mat 10:26; Luk 12:2 Níì cán yarigaa faala o yaà gee syɔɔn làriga lè ki ba kòro sìn-yiri ni kàfugo na í, keelaa faala wɔ́ɔ o yaà lee syɔɔn a làriga lè, li ba kòro sìnján ni í, wàlá sìnnyaa í. 18#Mat 25:29; Luk 19:26 Koro na yaa yele lóʔoganmi kɔ̀rɔsíi. Níì cán syɔ́ɔnwee faala wi taa lè, pe a ní wi kaan. Wee si wi fɔ̀n lè, àlí gee wi sɔ̀ngí lè ki i nyɛ woro ma, pe a gee bee syɔɔ wi ma.»
Zyezu nɔ́ɔw ní wi cɔnɔbèle kéele
(Mat 12:46-50; Mar 3:31-35)
19A Zyezu nɔ́ɔw ní wi cɔnɔbèle pan wi ma, pe fanʔa si ga taa n nan wi na í syɛ́ɛnmi nɛʔɛnɛ báriga ni. 20A be wi pye: «Mɔ nɔ́ɔw ní mɔ cɔnɔbèle i yaà kàfugi na woyérebéle ní, pe i caa bi mɔ nyaa.» 21A wi si be yari: «Bele be Kolocɔlɔɔ syɛ́ɛnri lúro lè ní i gi kpéʔele àmɛɛ gi joo lè, poro be nyɛ mii nɔ́ɔw ní mii cɔnɔbèle.»
Zyezu n káfalakpɔʔɔ yérige
(Mat 8:23-27; Mar 4:35-41)
22Cangaa Zyezu maa jée kɔ́rɔwaa ni ní wi pìitamabèle ní. A wi be pye: «Ye tíi wo jeli lòkpɔɔgi jelige na.» A be fala ni syée. 23Amɛɛ be syée lè a Zyezu i ŋúnɔ. A káfalakpɔʔɔ yìri lòkpɔɔgi ǹjoʔo ni, a lǒgi i jǐn kɔ́rɔw ni n kɔ́ ni caa bi wi nyìn, a be kɔ́ naà wáa lǒgi ni. 24A be Zyezu yìrige níì jo: «Kàfɔw, Kàfɔw, wolo a wáa!» A wi yìri níì fúlo káfalagi ní lǒgi kùnguruyo na, a di yére tábi. 25A wi be pye: «Sán yele tágali nyɛ?» A be i fɛ̀ɛgí, ní i káama, ní i gi nyuu peyɛɛ ma níì jo: «Nyàʔá syɛɛnfeleo wi wee naa? Alí wi i nyuu ní káfalagi, ní lǒgi ní, a di i lúro wi ma.»
Zyezu n nànwaa pɔʔɔ, wee ni màdebēle da pye lè
(Mat 8:28-34; Mar 5:1-20)
26A be kári n sáà nan Zyerasa#8:26 Zyerasa: Pe wɔ́ɔ i tári bee yiri Gadara. ye tári na, ti nyɛ lè Galile lòkpɔɔgi jelige na. 27Lǎli ni Zyezu yiri lè kɔ́rɔw ni n nyɔ̌nni tɛ́ʔɛ tári na, a kěgi bee nànwaa baa wi fàra, màdebēle maa pye wi ni. Nlaa yaà làridɔɔnnɔ ni wi o burogo nii í, wi si wɔ́ɔ o syɔ̀ɔ́n kpaʔa ni í, fwɔɔ kɔ̀ɔnweeyi ni. 28A wi ga Zyezu nyaa, a wi yákpoli wáa gbanʔama, ní sáà too n yɛ́ɛgi cíbele wi taana, ní i gi nyuu ní yákpogbɔɔlɔ ní níì jo: «Nyàʔá gi nyɛ mii ní mɔ níngi ni, Zyezu mɔ wi lè ǹjoʔo ma Kolocɔlɔɔ Jáaw, wi lè Pe Myɛ Nyúngo na? Mii i mɔ nyɛ́ɛri, mɔ a tɔ́ɔ kɔ́ mii wɔʔɔ í.»
29Níì cán Zyezu maa gi joo n gbàn màdew ma n kwɔ́ɔ níì jo wi yiri nǎnw bee ni, màdew maa ni wi yìrigí làrigēle saʔa ni. A syɛ́ɛnbèle i wi pwoo ní nyɔ̀ʔɔdiriye ní, ní i kpɛ̀ʔɛlɛyɛ nii wi na, ní i wi kɔ̀rɔsíi. Kàjáa wi maa ni yapwɔɔri bee myɛ paʔala, màdew si i wi nɛnɛ ni tórogi sìnbirigi ni ni máari. 30A Zyezu wi yíbe níì jo: «Mɛ̀ɛ́ be mɔ yiri?» A wi jo: «Pe i mii yiri Nɛʔɛmɛ.» Níì cán màdebēle saʔa maa jée wi ni. 31A be Zyezu nyɛ́ɛri níì jo wi a tɔ́ɔ kɔ́ gi joo bi gbàn poro ma si jo poro í da syée sa jée weekpɔɔ-cùrugi ni í.
32Gbòyoonɛʔɛrɛ si maa pye yaà tɛ́ɛgi bee ni nyanbelegi na ni líi, a be wi nyɛ́ɛri níì jo wi poro yaʔa poro í sa jée di ni. A wi yére gi ni. 33A màdebèle fala n yiri nǎnw ni n sáà jée gbòyoori ni, a di fàn n tìgi terire nyanbelegi tìgimɛ ni n sáà too lòkpɔɔgi ni, a ti myɛ wáa.
34A gbòyoori nàʔafɔɔlɔ ga gee bee nyaa àmɛɛ gi kpéʔele lè, a be fàn n sáà gi jáari kěgi ni ní kěgi bee taana syɛ̀ɛnnɛ ma. 35A syɛ́ɛnbèle kári sa gi wéle àmɛɛ gi kpéʔele n sɛ́ɛ lè. A pe ga sáà nan Zyezu na, a be nǎnw nyaa, wee ni màdebèle yiri lè, a wi fúngi tɛ́ɛn wi na, a wi burogo le n tɛ́ɛn ni puugu Zyezu taana, a fyáari fala n be cò. 36Bele nyɛ́nɛ na màdebèle syɔ́ɔn pɔʔɔ lè, a poro wi pɔʔɔganmi joo n tɛ̀ɛn syɛ́ɛnbèle na. 37Lǎli bee ni a Zyerasa ye tári tɛ́nɛmɛ syɛɛnnɛ myɛ fala ni Zyezu nyɛ́ɛri níì jo wi yiri poro tɛ́nɛmi ni, níì cán fyáari maa tɔ̀nɔ n be cò gbanʔama. A Zyezu jée kɔ́rɔw ni n lúru ni syée. 38A màdebèle syɔ́ɔn wi nyɛ́ɛri níì jo woro a kòro ní wi ní. Kàjáa a wi wi lúrugo níì wi pye: 39«Lúru maa syée mɔ kpaʔa ma, gee Kolocɔlɔɔ kpéʔele mɔ ma lè, mi sa ra gee bee nyuu.» A wi kári n sa ni gi nyuu ni máari kěgi bee ni, gee Zyezu kpéʔele woro ma lè.
Zyayirusi pìíw ní céwee wi tánga Zyezu búroyi na lè
(Mat 9:18-26; Mar 5:21-43)
40Lǎli ni Zyezu lúru n pan lè, a syɛ́ɛnmi baa wi sámaga n cò, níì cán pe myɛ maa ni wi sige. 41Lǎli bee ni a nànwaa pan Zyezu ma pe i wi yiri Zyayirusi, wi maa pye Zyefubèle sérikpaʔa kafɔwaa. A wi baa kpùmɔnɔ Zyezu taana níì wi nyɛ́ɛri níì jo wi woro pɔʔɔ wí kári ní woro ní woro kpaʔa ma. 42Níì cán pyà nibin wi nyɛ woro ma, pìcaapile, wi n yɛ̀ʔɛlɛ kɛɛ ní siin félege taa, a wi si ní i yaà ni yáa ni caa bi kùu.
A Zyezu ga ni syée, a syɛ́ɛnmi tɔ̀nɔ n wi cɔ̀ɔnri. 43Cewaa si maa pye yaà ní lòwelige ní, a gi yɛ̀ʔɛlɛ kɛɛ ní siin kwɔ́ɔ wi na, [wi maa wi kɔlɔ̀ yáriri myɛ kaan nìngbumɔnbèle ma,] wàa faala si da gbàn n wi pɔʔɔ í. 44A wi i syée syɛ́ɛnmi nínge ni Zyezu kàdoʔo ma n sáà tánga wi búrogi kàgomɔ na. Lǎli bee wonijanna ni a wi sìsyaanw wolo fala n yére. 45A Zyezu jo: «Wìí wi tánga mii na?» Amɛɛ pe myɛ jo lè poro wàa ban í, a Pyɛri [ní wi pínɛnyɛnbèle] jo: «Kàfɔw, syɛ́ɛnmi bi mɔ cɔ̀ɔnri lè nya, poro bi mɔ cínɛ.» 46Kàjáa a Zyezu be pye: «Wàa n tánga mii na, níì cán mii n gi cán bárigawee wi nyɛ lè mii ni, wàa n yiri wi ni.»
47Amɛɛ si céw gi nyaa lè woro ga gbàn n làra í, a wi i cɛ̀lɛ́ ni syée n sáà kpùmɔnɔ wi taana, kéelee na woro tánga wi na lè, ní kánmee na woro pɔʔɔ lè làrinijanna ni, a wi gee bee joo n tɛ̀ɛn wi na syɛ́ɛnbèle myɛ nyɛ́nɛ na. 48A Zyezu wi pye: «Ni pyà, mɔ tágali n mɔ pɔʔɔ. Da syée yɛɛ̀nyinge na.»
49Lǎli ni wi sèʔê pye ni nyuu lè, a syɔɔnwaa yìri sérikpaagi kàfɔlɔ kpaʔa ma n baa jo: «Mɔ piiw n kùu n kwɔ́ɔ. Mɔ a ní kɔ́ ra Tamafɔw fɔ̀rɔgí í.» 50Amɛɛ si Zyezu syɛ́ɛnri bee lóʔo lè, a wi Zyayirusi pye: «Mɔ a kɔ́ fyáa í, tɛ́nɛ mi tága. Mɔ piiw a pɔʔɔ.»
51Lǎli ni wi sáà nan lè kpáagi na, wi ga fɔ̀lɔ syɔɔn faala í jée yaà ní woro ní í, kapye Pyɛri, ní Zyan, ní Zyaki, ní pìcaapili tóo, ní li nɔ́ɔw yagana ban í. 52Syɛ́ɛnbèle myɛ maa ni nyaan ní i sùpiigèle wáa wi kéeli na. A Zyezu be pye: «Ye a ra nyaan í. Wi ga kùu í, a wi ŋúnɔ wii.»
53A be i peyɛɛ nyɛ́nɛ wi na, níì cán pe maa gi cán wi n kùu. 54A wi si wi cò kɔ́gi na níì yákpoli wáa níì jo: «Ni pyà, mi yìri.» 55A wi pǐli lúru n jée wi ni, a wi fala n yìri lǎli bee wonijanna ni. A Zyezu be pye pe wi kaan wi lìi. 56A wi seefɔbèle i káama gi na, kàjáa a wi gi joo n gbàn be ma níì jo, gee gi kpéʔele lè pe a kɔ́ gi joo syɔɔn faala ma í.
Àwon tá yàn lọ́wọ́lọ́wọ́ báyìí:
Luki 8: CB10
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kolocɔlɔɔ Syɛ́ɛnri © Bible Society of Côte d'Ivoire, 2008.
