Luki 6
6
Zyezu ní cândɛnɛgi kéele
(Mat 12:1-8; Mar 2:23-28)
1 #
Làlw 23:26
Zyezu maa ni forogi syɔ̀ɔ̄lɔ séye ni Zyefubèle cândɛnɛgɛ canʔa ni. A wi pìitamabèle i supiigèle kabagi ní i ge tuugu ni kúru. 2A Farisibèle pèle be pye: «Gee gi lè ki ga yɛlɛ gi kpéʔele cândɛnɛgi ni í, nyàʔá na yele gee bee kpéʔele?»
3 #
1Sam 21:1-6
A Zyezu be yari: «Lǎli ni kateegi da Davidi jáa lè ní wi taʔafɔbèle ní, gee wi da kpéʔele lè yele ga kɔ́ɔ̀ gi wéle sɛ́bɛw ni ì? 4#Lev 24:9 Wi maa sáà jée Kolocɔlɔɔ kpáagi ni búruw be kaan Kolocɔlɔɔ ma lè n wi lìi, níì wàa kaan wi taʔafɔbèle ma, ki si da yɛlɛ syɔɔn í búruw bee lìi í, kapye sáriga-wòlobèle yagana ban í.» 5A wi níì be pye: «Syɔɔn-pya wi nyɛ cândɛnɛgi kàfɔlɔ.»
Kɔwaʔa nanw kéele
(Mat 12:9-14; Mar 3:1-6)
6A cândɛnɛgi cangaa ga níì nan, a Zyezu sáà jée Zyefubèle sérikpaʔa ni ni be tama. Nànwaa si maa pye yaà, a kàliige kɔ́gi waʔa wi na. 7A Mowizi làlwaw sɛ́bɛwelebéle ní Farisibèle i Zyezu kɔ̀rɔsíi kapye wi a syɔɔn pɔʔɔ cândɛnɛgi ni, koro ga pye poro si keelaa taa bi taʔa wi na. 8A wi si be sɔ̀nguri cán, níì kɔwaʔa-nanw pye: «Yiri mi yére syɛ́ɛnbèle nínge ni.» A wi yìri n yére. 9A Zyezu be pye: «Mii a yele yíbe, a gi yɛlɛ lé syɔɔn í kacànna kpéʔele cândɛnɛgi ni láà, ba fwɔɔ kapeele? Ba gi yɛlɛ lé be syɔɔn pɔʔɔ wi pye sìi na láà, koro ga jáa bi wi kálagi?» 10A wi i pe myɛ wéle ni máari, ní náà kɔwaʔa-nanw pye: «Mɔ kɔ́gi sánʔa.» A wi gi pye ànbée, a wi kɔ́gi fala n pɔʔɔ. 11A be fúnyi tɔ̀nɔ n tanʔa be na gbanʔama fwɔɔ n baa sɔ̀lɔ. A be fala ni nyuu ní peyɛɛ ní Zyezu kéeli na jàngó bi gi cán gee poro yɛlɛ bi kpéʔele lè wi na.
Zyezu n pìitunbéle kɛɛ ní siin nyɛ́nɛ n wòlo
(Mat 10:1-4; Mar 3:13-19)
12Lǎli bee ni a Zyezu kári nyanbelegi ma sa Kolocɔlɔɔ nyɛ́ɛri, ní sáà wi nyɛ́ɛri n syɔ́ɔn yaà. 13Lǎli ni nyǐngi tali lè, a wi wi pìitamabèle yeri n baa pèle kɛɛ ní siin nyɛ́nɛ n wòlo be ni, ní i bele bee yiri pìitunbèle. 14Pe maa ni wàa yiri Siimɔn, a Zyezu mɛ́ɛgaa le wi na ni wi yiri Pyɛri, ní Andire wi lè Pyɛri cɔnɔw, ní i bele yiri Zyaki, ní Zyan, ní Filipi, ní Baritelemii, 15ní Matye, ní Toma, ní Zyaki wi lè Alife jáaw, ní Siimɔn be yiri lè Zelɔti#6:15 Amɛɛ gi joo lè Siimɔn Zelɔti, gee bee n jo wee wi wi syɛ́ɛnbèle fǎnʔa dɛ̀ɛmɛ́ ní gbànma ní lè., 16ní Zyudi ní wi lè Zyaki jáaw, n fàra Zyudasi Isikariyɔti na, woro wee wi kɔ́ baa Zyezu le wi nigoobèle kɔ́yɔ ni lè.
Zyezu i syɛ́ɛnmi tama ní i yáabèle poori
(Mat 4:23-25)
17A wi tìgi ní be ní n sáà yére táfàaw tɛ́ɛgaa ni, wi pìitama-nɛʔɛmi maa pye yaà n fàra syɛɛnnɛʔɛmɛ na, pèle maa yìri Zyude tári tɛ́ɛyɛ myɛ ma ní Zyerusalɛmi ní, á bele yìri Tiiri ní Siidɔn tɛ́nɛmi ma, pi lè sólomi lòkpɔʔɔ nyɔ́ɔ na. 18Pe maa pan ba wi syɛ́ɛnri lóʔo, wí wɔ́ɔ yáami láʔa poro na. Bele pe da ni fɔ̀rɔgí màdebèle kɔ́yɔ ni lè, a bele bee i poori. 19A syɛ́ɛnmi myɛ i ŋàʔaná bàā tángi wi na, níì cán bárigaw maa ni yirigi wi ni ni pe myɛ poori.
Zyezu n dùbaw ní wɔʔɔli kéele jo
(Mat 5:1-12)
20A wi nyapiigèle le wi pìitamabèle ni ni wéle níì jo:
«Yele bele ye nyɛ lè foomɔfɔbèle,
yele i nyɛ dùba pìibēle,
níì cán Kolocɔlɔɔ fǎngi i nyɛ yele wóʔo!
21Yele bele na kateegi nyɛ lè tɔ́ɔliw ni,
yele i nyɛ dùba pìibēle,
níì cán yele a kɔ́ ba tín!
Yele bele ye nyaan lè tɔ́ɔliw ni,
yele i nyɛ dùba pìibēle,
níì cán yele a kɔ́ ba ra tɛ́ʔɛ!
22 #
1Pyɛ 4:14
Lǎli ni yele kéeli ga syɛ́ɛnbèle bɛɛn lè a pe i yele nɛnɛ, ní i yele teeri, ní i yele mɛ́ɛgi córo yapeʔe Syɔɔn-pya kéeli na, lǎli bee ni yele i nyɛ dùba pìibēle. 23#2Cán 36:16; Kap 7:52 Yaa fundaanra kpéʔele lǎli bee ni, yáā yóo fundaanri báriga ni. Ye wéle, tɔ̀nɔkpɔɔɔ i nyɛ yele ma nyɛ̀ʔɛni na, níì cán gee bee félege be toolɛɛbèle da wɔ́ɔ ni kpéʔele kanyaajoobèle na.
24Kàjáa yele bele má lɔ́ri nyɛ lè,
wɔʔɔli a ba pye yele na,
níì cán yele n yele yɛɛ̀nyingi taa n kwɔ́ɔ.
25Yele bele ye tín lè tɔ́ɔliw ni,
wɔʔɔli a ba pye yele na,
níì cán kateegi a kɔ́ ba yele jáa!
Yele bele ye tɛ́ʔɛ lè tɔ́ɔliw ni,
wɔʔɔli a ba pye yele na,
níì cán kayaagi a kɔ́ ba pye yele ni,
yele í da nyaan!
26Lǎli ni syɛ́ɛnbèle myɛ ga ni yele mɛ́ɛtaangi yiri lè, wɔʔɔli a ba pye yele na, níì cán gee bee félege be toolɛɛbèle da wɔ́ɔ ni kpéʔele kanyaajoo-fáanabèle ma.
Tàmagi lele ní nigoobèle ní
(Mat 5:38-48; 7:12)
27«Kàjáa yele bele ye lúro mii ma lè, mii a gi joo yele ma: Ye tàmaga le ní yele nigoobèle ní, yáā kacǎngèle kpéʔele bele na bele yele kéeli bɛɛn lè. 28Bele be yele dángi lè, yaa dùba kpéʔele be ma, bele be yele wɔʔɔ lè, yaa Kolocɔlɔɔ nyɛ́ɛri be kéeli na. 29Wàa ga mɔ kpúmɔn bɛ̀ɛ́ngee na, mi ní mi wozangi fíige wi ma. Wàa ga mɔ burogbɔɔgi nɛnɛ n syɔɔ mɔ ma, mɔ a kɔ́ cée wobili na wi ma í. 30Syɔ́ɔnwee wi ga mɔ nyɛ́ɛri lè, mi wi kaan, wàa ga wɔ́ɔ̀ mɔ kɔ́lɔ yarigaa nɛnɛ n syɔɔ mɔ ma, mɔ a ní kɔ́ ra gi caa wi ma í. 31#Mat 7:12 Gee yele caa syɛ́ɛnbèle í da kpéʔele yele ma lè, ye wɔ́ɔ yaa gee bee félege kpéʔele be ma.
32Yele ga tàmaga le ní yele tàannyɛnbèle yagana ní, nyàʔá dùbafeleo yele a taa? Níì cán kapeebyebèle wɔ́ɔ i tàmaga nii ní be tàannyɛnbèle ní. 33Bele be kacǎngèle kpéʔele yele na lè, yele ga ni kacǎngèle kpéʔele poro yagana na, nyàʔá dùbafeleo yele a taa? Koro wonijangi kapeebyebèle wɔ́ɔ̄ kpéʔele. 34Bele yele sɔ̀ngí pe a kɔ́ yele wógi sìndɛʔɛ lúrugo yele ma lè, yele ga ni fwɔ́ɔgèle nii bele bee yagana na, nyàʔá dùbafeleo yele a taa? Kapeebyebèle wɔ́ɔ i fwɔ́ɔgèle nii pe kapeebye-nyɛ́nbèle na, koro ga pye pe kɔ́ poro wógi sìndɛʔɛ lúrugo poro ma. 35Kàjáa ki n yɛlɛ ye tàmaga le ní yele nigoobèle ní, yáā kacàngēle kpéʔele, yáā fwɔ́ɔgèle nii, ye si a kɔ́ yele sɔ̀ngumi taʔa ge sìndɛɛgi taala na í. Níì cán yele a kɔ́ ba tɔ̀nɔkpɔɔɔ taa, wee wi lè Pe Myɛ Nyúngo na si pye woro jàala, níì cán woro wi nyɔɔgi sɔ̀ngumɔ-fùnvɔbèle ní syɛɛnpeebèle na. 36Ki n yɛlɛ ye pye nyinidaabèlē àmɛɛ yele Tóow nyɛ lè nyinidaaɔ.»
Ki ga yɛlɛ waa kútiiw kúunri bele na í
(Mat 7:1-5)
37«Ki ga yɛlɛ yele í da kútiiw kúunri syɔɔn na í, jàngó Kolocɔlɔɔ a wɔ́ɔ kɔ́ kútiiw kúun yele na í, ki ga wɔ́ɔ̀ yɛlɛ yele í da kolomɔ kaangi syɔɔn ma í, jàngó Kolocɔlɔɔ a wɔ́ɔ kɔ́ kolomɔ kaan yele ma í, yaa syɛ́ɛnbèle kùsulugo syoo, koro ga pye Kolocɔlɔɔ a wɔ́ɔ ra yele kùsulugi syoo. 38Yaa kaangi, pe a wɔ́ɔ ra yele kaangi, pe a ba yalegi nyìn, si gi serige, si gi cúngo cúngo, si gi nyaana nyaana, fwɔɔ ki wo, si gi le yele ma cófaabèle ni. Níì cán yalegee ni yele yáriri kíri ni kaangi syɛ́ɛnbèle ma lè, gee bee félege ni yele wóri a ba kíri bi kaan yele ma.»
39 #
Mat 15:14
A wi níì kàseelaa wáa be ma níì jo: «A fúuɔn a gbǎn wi fúunnyɛnnɛ tala lé? Ki ga pye nya, pe myɛ siinw a too weegaa ni ì? 40#Mat 10:24-25; Zyan 13:16; 15:20 Pìitamaɔ ga kpɔ́ʔɔ n sɔ̀lɔ wi tamafɔlɔ na í. Kàjáa pìitamaɔ o pìitamaɔ ga gbàn tamani na n li foro, wi a ba pye àmɛɛ wi tamafɔw nyɛ lè.
41Nyàʔá na mɔ kànyaʔabili wéle mɔ senyɛnw nyápile ni, mɔ si o kàganagbɔɔgi córo, gee gi nyɛ mɔ ma mɔ wóli ni lè í? 42Ba mɛ̀ɛ́ mɔ a mɔ senyɛnw pye: Ni senyɛnnɛ, kànyaʔabili li lè mɔ nyapili ni, tíi mii í li cò bi yirige, bi gi taa kàganagbɔɔgi i nyɛ mɔ tiimaa wóli ni, mɔ si o gee bee córo í? Syɛɛnjóotɛɛyɛ siin joofɔlɔ wi mɔ. Mi kàganagbɔɔgi cò mi yirige mɔ nyapili ni gbɛnʔɛnɛ, koro ga pye kànyaʔabili li nyɛ lè mɔ senyɛnw wólo ni, mɔ a náa sámaga nyaa bi li cò bi yirige.
Tiige i cángi ki yasanri báriga ni
(Mat 7:16-20; 12:33-35)
43«Tiicangaa faala o yasanbeere sangi í, tiipeʔe si wɔ́ɔ o yasanjanra sangi í. 44#Mat 12:33 Níì cán pe i tiige o tiige cángi gi tiimaa yasanri báriga ni. Pe o děsyanʔa coo wúuro tíige ni í, pe wɔ́ɔ o ɛrɛzɛn coo wúufiitiige ni í. 45#Mat 12:35 Syɛɛncaɔn i yacanri yirigi wi lɔjanri ni, dee wi kɔn lè wi fúngi ni, syɛɛnpeeo si wɔ́ɔ i yapeeri yirigi wi lɔbeeri ni, dee wi kɔn lè wi fúngi ni. Níì cán yárigee gi syɔɔn fúngi nyìn lè, gee bee gi yirigi wi nyɔ́ɔgi ni.
Kpáayi siin
(Mat 7:24-27)
46«Nyàʔá na yele mii yiri, ‹Kàfɔw, Kàfɔw,› yele si ga yére mii syɛ́ɛnri ni í? 47Syɔ́ɔnwee wi maa mii ma lè n ba ni mii syɛ́ɛnri lúro ní i gi kpéʔele àmɛɛ mii jo lè, mii a wee bee kánma tɛ̀ɛn yele na. 48Wi i nyɛ àmɛɛ nànwaa nyɛ lè wee wi kpaʔa faan lè. Wéle wi maa ki wéegi túgu wojurugo ní n nan fálaga na, níì kàpɔɔnw le gi na. Lǎli ni cábigi nyìn ni fóo lè, a lǒgi sáà kpáagi círi, ki ga gbàn n gi cúngo í. Níì cán wi maa gi sámaga n faan. 49Kàjáa wee wi ga ni mii syɛ́ɛnri lúro lè, wi si o gi kpéʔele àmɛɛ mii jo lè í, wi i nyɛ àmɛɛ nànwaa nyɛ lè wee wi kpaʔa faan lè támiigi na kàpɔɔn sìnle ni. A lǒgi ga sáà kpáagi círi, a gi fala n too terire, a kpáagi bee tooganma tɔ̀nɔ n pee.»
Àwon tá yàn lọ́wọ́lọ́wọ́ báyìí:
Luki 6: CB10
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kolocɔlɔɔ Syɛ́ɛnri © Bible Society of Côte d'Ivoire, 2008.
