Matyo 12
12
Apítə ńté Alěláʼə́sê
(Mag 2.23-28; Luk 6.1-5)
1Nə́ akəmə ndɛd jɨ́d zə̂, Yeso a tə́ ńdaŋə̂ á mə́m əfɔ ngəsáŋə́ Alěláʼsê. Nji nə ńdzáŋ ngaŋə́zoŋə́ndzəm əjí pó chúʼə á mə́ lagtə̂ nə́ məmbəm mə́ ngəsáŋ ńkɔ́lə ághóobə́. 2Pəfalasi pə́ nə ńdzə́ənə anu jɨ ńtíʼ ə́sóŋə á mbô yí ńgə́, “Náŋə! Ngaŋə́zoŋə́ndzəm əzô ə́ tə́ faʼə̂ anu páʼ noŋkə á kě nə́ pí pô alěláʼsê.”
3Yeso a kwěe ághɔ́b ńgə́, “Nə́ kě kə̈ fóŋə anu páʼ nji ə́ nə ńtə́ nə́ ńdzáŋə Debid pópə pɨ pó po nə ńchî nə́ a ghɛd? 4A nə ńkwúnə á ndɛ̂sê ńtwáamə apéenə məkálə́ páʼ pə́ nə ńtə́g nə́ ə́wɨ́ á mbô Əsê pópə pɨ pó po nə ńchî nə́ jî páʼ noŋkə á nə ńkě nə́ ə́lɨ́d nɨd pô, noŋkə á nə ńnɨd ńgə́ mbɔʼ lə́ kɔ́d tsɔʼə ngaŋə́pêsê. 5Kɨ nə kě kə̈ fóŋə á mə́m pənoŋkə pə́ Mosisə ńgə́ á pə́ alěláʼsê lə́ ngaŋə́pêsê pó chî nə́ á mə́m tə́kɔʼndɛ̂sê pó wǔ pənoŋkə pə́ alěláʼə́sê ḿbə́ ńdɔg ńgə́ pó kě anu wǔəə? 6Mäŋ fiʼtə̂ áwɨ́ ńgə́ ŋwunə a chîə aliʼə́ nə́ páʼə a tsɛ nə́ tə́kɔʼndɛ̂sê.” 7Aŋwaʼlə Əsê á sóŋ ńgə́, “Maŋ kɔŋə̂ akóolə́mə́lə́ŋ ńtsɛɛlə̂ afyaʼə́nuə. Mbɔʼ nə́ pěʼ ńjîə anu páʼə atsáb zəənə́ á sóŋ nə́, tə ḿbə́ mbɔʼ nə́ pěʼ ńkě anuə atû mbóʼngaŋ néŋ pô. 8Ńté ńgə́ Mɔ́ Ŋwu lə́ mmaʼmbî pə alěláʼə́sê.”
Ndzaŋ Yeso kə Tsóʼ nə́ Ŋwu páʼ Táʼə Apô yə kə Kwû nə́
(Mag 3.1-6; Luk 6.6-11)
9Yeso a fɛ́lə aliʼ wɨ́d wə̂ ńgɛnə̂ á ndɛ̂sê Pəjusə, 10ŋwu tsə̌ páʼ táʼə apô yə á nə ńkwû nə́ a nə ńchî ə́wə́. Ndzaŋə ándó pó nə ńtə́ nə́ ńnáŋ ndúmə á mə́ wam nə́ Yeso lə́ ńtíʼ ḿbítə yí ńgə́, “Noŋkə á pí ńgə́ mbɔʼ pə́ tsóʼə ŋwunə alěláʼsê?”
11A sóŋə á mbô pó ńgə́, “Mbɔʼ ŋwu wɨ yitsə̌ a túg mbéŋ ndzɛd əjǐ ə́ yǒ ńgwǔəə á mə́mə apɛ́lə alěláʼə́sê, a kě zə́ələ́ á mə́mə apɛ́d yə wɨ́ fóg? 12Ńgɛd ə́lɛ́ nə́ ŋwu páʼ a lánə nə́ ńchígə́ səglə̂ ńtsɛ mbéŋ ndzɛlə? Lə́ələ́ pə́ ńgə́ noŋkə əwɛ́nə á nɨd ńgə́ á koʼnə̂ á mə́ ghɛd nə́ əshîʼnə Alěláʼsê.”
13A tíʼ ə́sóŋə á mbô ŋwu wə̂ ńgə́, “Shǐəə apô azô.” A shǐəə á zə́ələ́, á féŋtə ńtíʼ ńchîə ándó yətsə́ apô. 14Lə́ Pəfalasi pó fɛ́lə á apeŋ ńtíʼə ńtyáŋə mənaŋ ndzaŋ mbɔʼ pó jwítə yə́.
Ngaŋəfaʼ páʼ Əsê a Tsɔ́ʼ nə́
15Ndzaŋ Yeso a nə ńdzóʼ nə́ anu zɨ́d zɨ lə́, ńtíʼ ńdǒ yə́ aliʼ yi wə́. Mboŋ pɨ zoŋə̂ yə́, a tíʼ ńtsóʼ məghɔ mɔ́b tsɔʼə mətsəmə. 16Ńkwantə̂ ághɔ́b ńgə́ kɔ pó fiʼtə̂ ŋwu páʼ yə́ a pə́ nə́ wə́ələ́. 17Zəənə́ á nə ńdwɛ́nkə lə́ anu páʼ Əsê a nə́ ńtsáb nə́ ńdaŋə̂ á mbô ntûsê Izaya ńgə́,
18“Lɛ̌ ngaŋə afaʼə mə páʼ maŋ tsɔ́ʼ nə́,
yi páʼ maŋ kɔŋ nə́, ntə́əmə mə kə́ ńkɔŋtə̂ ńté yə́;
Maŋ yǒ néŋə ajwiə mə á mbɨ yə́,
A yǒ ghɛd Pətəjǐsê pó jî nchwádkə Əsê.
19A yǒ kë fyaʼnə̂ pó ŋwu kɨ̈ ətsáb ngye əjǐ ə́ kɔ́ʼə atǐ pô;
ŋwu tsə̌ ä láʼ kě ngye əjǐ alaŋə́ zóʼ pô.
20A yǒ kě akəkaʼ páʼ a zəŋnə̂ nə́ pə́ʼ pô,
kɨ nkyaʼ páʼ ə́ tə́ nə́ ḿbə́gnə, a yǒ kě pə́gtə pô,
tə a láʼ ńgɛd mənu mə́ koʼnə̂ nə́ mə́ kwá mbî ntsəmə.
21Ŋwu ntsəmə a yǒ néŋə akwaŋə ají nə́ yí tə́ pyáabə.”
Yeso pó Əfo Pɛ̌sê
(Mag 3.20-30; Luk 11.14-23)
22Pó tíʼ ńtə́ ńgyǐəə nə́ ŋwu tsə̌ páʼ pɛ̌sê pə́ nə ńchî nə́ á mbɨ yí tə a kě əliʼ pɛ́lə ńdzə́ənə pô ńkě kə́ ḿbɛ́lə ńtséebə pô, Yeso a tsóʼə yə́, a tíʼ ńtsáb ńkə́ ńjɨ́ əliʼə́. 23Anu jɨ́d zəənə́ á nə ńkɨʼnə̂ á ŋwu ntsəm páʼ a nə ńchî nə́ aliʼ yi wə́, pó tíʼə ḿbítə ńgə́, “Təmbɔʼ lɛ̌ pə́ mɔ́ Debid wə̂?”
24Ndzaŋ pəfalasi pə́ nə ńdzóʼ nə́ anu zɨ́d zɨ lə́, ńtíʼ ə́sóŋ ńgə́, “A lɔgə̂ lə́ mətɨ mə́ Bɛlzebɔb páʼ a pə́ nə́ əfo pɛ̌sê lə́ ńkəmə̂ pɛ̌sê ə́wə́.”
25Yeso a jîə akwaŋə azɔ́b tsɔʼə atsəm ńtíʼ ə́sóŋə á mbô pô ńgə́, “Aláʼə atsəm páʼ á ghabtə̂ nə́ mbɨ əjǐ akwɛlə akwɛlə ḿbóʼnə tətɨ pó, á kě yǐ chî nga pɛ̌ tə ghə́ á měe pô, aláʼə atsəm kɨ ndɛ̂ ntsəm páʼ ə́ ghabnə̂ nə́ mbɨ əjǐ ə́ kě yǐ kə́ tɨ́ pô. 26Mbɔʼ satanə a kəmə̂ yitsə̌ Satan, lə́ələ́ pə́ ńgə́ a ghabnə̂ mbɨ əjǐə á ngǎ yə́. Təmbɔʼ nəfɔ jí nə́ pə̂ ńtɨ́ lə́ ə́lɛ́? 27Mbɔʼ maŋ kəmə̂ pɛ̌sê lə́ nə́ mətɨ mə́ Bɛlzebɔb tə ḿbə́ əzɨ́ ngaŋə́zoŋə́ndzəm pó kəmə̂ lə́ nə́ mətɨ mə́ ə́wə́? Á pə́ ńgə́ pó yǒ tíʼ pə́ lə́ ngaŋə́sáʼə́məsáʼ əzə́ənə́. 28Lə́, mbɔʼ maŋ kəmə̂ pɛ̌sê lə́ nə́ Ajwǐəsê, tə ḿbə́ anuə nəfoonə Əsê á pɛ́dtə ńgyǐəə á mbô pəənə́.”
29“Kɨ mbɔʼ ŋwunə a kwúnə á ndɛ̂ atyǎntə ŋwu ńtwám əpú ndɛ̂ pí lə́ ə́lɛ́, tə ńdéʼtə a peg ńgwaamə̂ ŋwu yi ńtyantə̂ nə́ wə̂ ńkwúlə yí záʼ ḿbɔŋə̂ twá əpú ndɛ̂ píə.”
30Ŋwu páʼ a kě nə́ pəg yí chî pô, lə́ ngaŋ kəpeenə́ mə, ŋwu páʼ pəg yí kě nə́ ńnɔd ńkyeetə̂ pô, a shamkə̂ lə́ shamkə̂ nə́. 31Lə́ maŋ sóŋə áwɨ́ ńgə́, mə zɔ nə́ Əsê pópə təpɔŋ pɨ pə́ ghɛd nə́, pə́ yǒ ləgnə̂, lə́ mə zɔ nə́ Ajwǐəsê, pə́ yǒ kě á wɨ́d wə̂ təpɔŋ ləgnə̂ pô. 32Ŋwu ntsəm páʼ ä tsáb nə́ təpɔŋ ńté Mɔ́ Ŋwu, pə́ yǒ ləgnə̂ təpɔŋ əyǐə, lə́ ŋwu ntsəm páʼ ä tsáb nə́ təpɔŋ ńté Ajwǐəsê pə́ yǒ kě təpɔŋ əyǐ ləgnə̂ pô, nə́ ndɛd zɨ kɨ nə́ ndɛd ə́ yǒ nə́ pɔŋə̂ yǐəə.
Atǐ pópə Mənta Míə
(Luk 6.43-45)
33Tsoŋkə̂ atǐə á pɔŋə̂, mənta mí mə́ yǐ kə́ pɔŋə̂, kɨ gho tsoŋkə̂ atǐə á pə́gə, mənta mí mə́ yǐ kə́ pə́gə, ńté ńgə́ pə́ jîə atǐə atsəm lə́ nə́ mənta míə. 34Ngwud mənó mə́ təpɔŋ! mbɔʼ pɨ ngaŋə́ghɛlə təpɔŋ nə́ sóŋ lə́ akə̂ anu tə á pɔŋə̂? Ńté ńgə́ atséebə ntsoolə á fɛ́lə lə́ á mə́m mənu páʼ mə́ lwɛ́nkə nə́ á ntə́əmə. 35Ŋwu yi əshîʼnə ä yǐəə nə́ mənu mimə əshîʼnə páʼ á pěʼ nə́ ńdɔʼkə̂ á mə́m ntɨ́ əyí yi əshîʼnə, ŋwu təpɔŋ á kə̈ ńgyǐəə nə́ mənu mimə́ təpɔŋ páʼ a pěʼ nə́ ńdɔʼkə̂ á mə́m ntɨ́ əyí yi təpɔŋ. 36Lə́ maŋ pə̂ ə́fiʼtə̂ áwɨ́ ńgə́, á yǒ pə́ alě asáʼə́məsáʼ lə́, ŋwu ntsəmə a sóŋə anu páʼ á nə ńgɛd nə́ yə́ a tsáb ətsáb kətaŋ ətsəm páʼ a nə ḿbɛ́d nə́ tə ńtséebə. 37Lə́ələ́ á pə́ ńgə́, pə́ yǒ lɔg ətsáb əpô ə́sáʼ əsáʼ əghô wə́, á mə́ jɨ́ nə́ ńgə́ kɨ gho lɛ ńdaŋ əsáʼ kɨ ńgwǔəə.
Akyeʼə́nuə Jona
38Pəfalasi pətsə́ pópə ngaŋə́zéʼkə pənoŋkə ə́sóŋ nə́ yí ńgə́, “Ndzéʼkə, pəg loonə̂ á mə́ jɨ́ nə́ akyeʼə́nuə á mbô gho.”
39Yeso a kwěe ńgə́, “Pɨ pə́ ngoʼ pɨ páʼ pó myaʼ nə́ Əsê ńkə́ ńgɛlə̂ təpɔŋ pó pítə akyeʼə́nuə á mbô maŋ!” Lə́ pə́ kě yətsə̌ yǐ fɛ̂ pô tə ńdéʼtə akyeʼə́nuə ntûsê Jona. 40Tsɔʼə ándó Jona a nə ńchî nə́ á nəpəm mɛ́ əshû əlěmbî teelə́ nə́ mətúʼ mɛ́n teelə́ lə́, lə́ ndzaŋə ándó Mɔ́ Ŋwunə a yǒ nə́ kə́ chî əlě mbî teelə́ nə́ mətúʼ mɛ́n teelə́ á ntɛ́n əsê. 41Pɨ pə́ Ninibe pó yǒ lǒo á əsê alěsáʼə́məsáʼə ghɛd pɨ pə́ ngoʼ pɨ pó wǔ əsáʼə, ńté ńgə́ pó nə ńkwúblə məntɨ́ mɔ́b ə́fɛ́lə á mə́m təpɔŋ əghɔb ńdzoŋə̂ anǔəsê páʼ Jona a nə̈ ə́sóŋ nə́, əghâ nə́ ŋwunə a chîə aliʼə́ nə́ páʼ a tsɛ nə́ Jona. 42Mɛ̂fo Shɛba a lǒo júmnə alěsáʼə́məsáʼ ə́ ghɛd pɨ pə́ ngoʼ pɨ pó wǔ əsáʼ, ńté ńgə́ a nə ə́fɛ́lə á ndwegtə mbî ńgyǐəə á mə́ jwə́ʼtə nə́ ajíənuə Solomunə, nə́ əghâ nə́, ŋwunə a tsɛ nə́ Solomunə a chîə aliʼə́ nə́.
43“Təmbɔʼ ajwiə təpɔŋə a fɛ́lə á mbɨ ŋwu, á ghɛnə̂ á mə́m kɔŋ yi njǔbtə̈ ńnáŋə aliʼə́ á mə́ chî nə́ ə́wə́, ḿbə́ ńchîə zɨ́d zɨ́ pô,” 44á tíʼ ə́sóŋ nə́ mbɨ əjǐ ńgə́, “Maŋ yǐ pɨ pəənə̂ á ndɛ̂ maŋ nə fɛ́d nə́ ə́wə́.” Mbɔʼ a yǐ ńtég ndɛ̂ yi wɨ́ ŋwunə a chî wɨ́ chî, pə́ zəgə̂ ájɨ́d ə́ ŋwaʼə̂, ńkə́ ńtyáŋtə əliʼ əshîʼnə. 45A tíʼ ḿbɨ ńgɛn ńdɔg pətsə́ əjwi təpɔŋ pɛ́n asaambɛ̂ páʼ pó túg nə́ təpɔŋ ńtsɛɛlə̂ yí, pó po yǐ ńkwúnə á ndɛ̂ yi wɨ́ ńtíʼ ńchî ə́wə́. Nchîmbî ŋwu wə̂ ə́ yǐ ńtə́ ńdwegtə̂ ḿbə́g tə ńtsɛ ndzaŋ ə́ nə ḿbeg nə́ ńchîə. Lə́ ndzaŋ á yǒ nə́ chîə á mbô pɨ pə́ təpɔŋ pə́ ngoʼ pəənə́.
Mǎpə Yeso pópə Pəlim Píə
(Mag 3.31-35; Luk 8.19-21)
46Ndzaŋə ándó Yeso a nə ńtə́ nə ḿbɛ́lə ńtséebə nə́ ŋwuməsɔŋ lə́, Mǎ əyǐ pópə pɔ́pə́mɛ́ pí pi pə́ mbyâŋnə pə́ tə́əmə apeŋ ńtə́ ńdoonə̂ á mə́ tsáb nə́ nə́ yə́. 47Ŋwu tsə̌ a sóŋ nə́ yí ńgə́, “Mǎ əgho pópə pɔ́pə́mɛ́ po pi pə́ mbyâŋnə pó tə́əmə apeŋ ńtə́ ńdoonə̂ á mə́ tsáb nə́ á mbô gho.”
48Yeso á kwěe yí ńgə́, “Mǎ mə lə́ əwə, pɔ́pə́mɛ́ mə pi pə́ mbyâŋnə pə́ kə́ ḿbə́ mbə̂kə̂?” 49Yeso a tíʼ ə́shiʼ ngaŋə́zoŋə́ndzəm əjí ə́sóŋ ńgə́, “Lɛ̌ Mǎ mə pópə pɔ́pə́mɛ́ mə pi pə́ mbyâŋnə. 50Ńté ńgə́ ŋwu ntsəm páʼ a faʼ nə́ anu Tǎ mə a nəpóolə a lɔ nə́, lə́ ndimə́ mə yi mbyâŋnə, ńkə́ ḿbə́ yi məngyě, ńkə́ ḿbə́ mǎ mə.”
Àwon tá yàn lọ́wọ́lọ́wọ́ báyìí:
Matyo 12: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
