Kut 11
11
1Omu bunaku obwo, ensi yoona ekaba eine orurimi rumwe n'engamba emwe. 2Mbwenu abantu ku baafurukiire burugwa-izooba, baashanga oruhita omu nsi ya Shinaari, baarutuuramu. 3Haza baagambirana bati: Nimwije tubumbe amatafaari, tugootsye. Batyo baakoresa amatafaari omu mwanya gw'amabaare, na koroto omu mwanya gw'obudongo. 4Bwanyima baagira bati: Nimwije tweyombekyere orurembo ruriho omunaara, eitungu ryagwo rihikye omu iguru; twetungire eiziina, turekye kutaataanira omu nsi yoona.
5Mbwenu Nyakubaho akashuuma, yaija kureeba orurembo n'omunaara ebi abaana b'abantu baayombekire. 6Nyakubaho yaagira ati: Reeba aba bantu n'eihanga rimwe, kandi nibagamba orurimi rumwe. Mbwenu egi n'entandikiro y'ebi baraakore; haza omu bi barikuconya kukora, tihariho kiribarema. 7Mbwenu nimwije tushuumeyo, turabanisemu orurimi rwabo, barekye kwetegyereza ebi barikugambirana. 8Nyakubaho atyo abataataanisiza omu mahanga; barugayo, babuga ensi yoona; barekyera aho okwombeka orwo rurembo. 9Nikyo rwayeteirwe eiziina Babeeli, ngu ahabw'okuba okwo niyo Nyakubaho yaarabanisiizemu orurimi rw'ab'omu nsi yoona, kandi niyo yaabaihire naabataataanisiza omu mahanga, bakabuga ensi yoona.
Oruzaaro rwa Sheemu
10Oru nirwo ruzaaro rwa Sheemu. Sheemu ku yaahikize emyaka igana y'obukuru yaazaara Arifakisaadi, omwegyemure gumazire emyaka ebiri guhwaireho. 11Reero Sheemu ku yaaherize kuzaara Arifakisaadi, yaamara emyaka magana ataano ei yaazaariiremu abandi batabani n'abahara.
12Arifakisaadi ku yaahikize emyaka makumi ashatu n'etaano yaazaara Sheela. 13Bwanyima Arifakisaadi ku yaaherize kuzaara Sheela, yaamara emyaka magana ana n'eshatu ei yaazaariiremu abandi batabani n'abahara.
14Sheela nawe ku yaahikize emyaka makumi ashatu yaazaara Eberi. 15Reero Sheela ku yaaherize kuzaara Eberi, yaamara emyaka magana ana n'eshatu ei yaazaariiremu abandi batabani n'abahara.
16Eberi ku yaahikize emyaka makumi ashatu n'ena yaazaara Pelegi. 17Eberi ku yaaherize kuzaara Pelegi yaamara emyaka magana ana na makumi ashatu ei yaazaariiremu abandi batabani n'abahara.
18Pelegi ku yaahikize emyaka makumi ashatu, yaazaara Reu. 19Pelegi ku yaaherize kuzaara Reu yaamara emyaka magana abiri na mwenda, ei yaazaariiremu abandi batabani n'abahara.
20Reu ku yaahikize emyaka ashatu n'ebiri yaazaara Serugi. 21Kandi Reu ku yaaherize kuzaara Serugi, yaamara emyaka magana abiri na mushanju, ei yaazaariiremu abandi batabani n'abahara.
22Serugi nawe ku yaahikize emyaka makumi ashatu yaazaara Nahori. 23Serugi ku yaaherize kuzaara Nahori yaamara emyaka magana abiri, ei yaazaariiremu abandi batabani n'abahara.
24Nahori ku yaahikize emyaka makumi abiri na mwenda, yaazaara Teera. 25Bwanyima Nahori ku yaaherize kuzaara Teera yaamara emyaka igana na makumi mwenda, ei yaazaariiremu abandi batabani n'abahara.
26Teera nawe ku yaahikize emyaka makumi mushanju, yaazaara Aburahamu, Nahori na Harani.
Oruzaaro rwa Teera
27Mbwenu oru nirwo ruzaaro rwa Teera. Teera akazaara Aburahamu na Nahori na Harani. Harani yaazaara Looti. 28Kwonka Harani akafa Teera ishe atakafiire, yaagwa Uuri ey'Abakaludaaya, ensi ei yaazaariirwemu. 29Reero Aburahamu na Nahori bakashwera abakazi. Muka Aburahamu akaba naayetwa Sarai, na muka Nahori naayetwa Milika, muhara wa Harani, ishe wa Milika na Isika. 30Mbwenu Sarai ogwo akaba engumba, tiyaazaara mwana.
31Teera akatwara omutabani Aburahamu, na Looti mutabani wa Harani, omwijukuru, na Sarai omukaamwana, muk'omutabani Aburahamu, baaruga kumwe Uuri ey'Abakaludaaya kuza omu nsi ya Kanaani. Kwonka ku baahikire Harani, baaba niyo baatuura. 32Ebiro by'amagara ga Teera bikahika emyaka magana abiri n'etaano; Teera ogwo yaafa, yaagwa Harani.
Okwetwa kwa Aburahamu
Àwon tá yàn lọ́wọ́lọ́wọ́ báyìí:
Kut 11: RKK2008
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible with Apocrypha in Runyankore-Rukiga, new revised joint translation © The Bible Society of Uganda, 2008.