Banɔkpɛkpɛ Axɔ̃ɛ 16

Timoteo Adɛ Taplɛnɔ Paulo Nɛ̀ Sila

1Paulo agã edikoeyi nɛ Derbe nɛ̀ Listra, ɛkɛlɛ adɔkpasɛanɛ teli gɛ bezekulu asɛ Timoteo azã, anɔ gɛ yɛelĩ enu Yudadzi nɛ̀ anɔ gɛ ayɛyɛkɛŋã, pɔ yɛakaa edzi Helanɔ. 2Badzya nɛ Listra nɛ̀ Ikonio nɔ baɖɔaɖɔ gbangbã nɛ Timoteo shu. 3Paulo apɛ asɛ tɛ agbana yɛ evunɔ soɔ, ebhui kɛhɔ̃a akɔɛ nɛ Yudanɛ gɛ balɛ kibé ɛlɛ shu so, ɔmɔsɛ balɛ petee enyi asɛ yɛakaa enu Helaeyi. 4Gɛ bazagã afala nɛ ɛmaa mɛɛ, baaɖɔ kibuiɛ gɛ banɔkpɛkpɛ nɛ̀ beshesheɛ aɖɔ nɛ Yerusalem etseɖe alɛ tɛ baabhɛtɛ tɔɖɔ kɛlɛ abha. 5Kliso bakɔ ɔhaa amɔ ohumi nɛ balɛ tɛyɛyɛkɛŋã mɛ kɛlɛ balɛ tɛkaklà mɛ zikpè tɔɖɔ kibe nyia be.

Paulo Bɔlala Gɛaza Nɛ Anyɛ Gɛaza Makedonia Shu

6Paulo nɛ̀ yɛɔbhia alɛ azagã kidzo fala nɛ Frigia nɛ̀ Galatia, pɔ Ɔfɔfuĩa Gbangbã gɛkɔ balɛ kidzo asɛ baɖɔ kibui gbangbã nɛ Asia bɔdɔ̃ mɛ. 7Gɛ bediku Misia bubò nabhaa, bapɛ asɛ etsoku Bitania, pɔ Yesu Ɔfɔfuĩa nɔ ɔgɛkɔ balɛ kidzo ana. 8Kliso bagafala nɛ Misia pɛ bavɛ Troa. 9Nɛ elishi alɛ bebu kɛdɔ̃ akasɛ Paulo nɛ anyɛ teli gɛ alɛ Makedonia gɛ eli kitití pɛ ebisi yɛɔdɔ asɛ, “Tsakɛ ba Makedonia tɛ̀ ɔbɔplɛnɔ ɔlɔ.” 10Gɛ bebu ebui alɛ akasɛ Paulo ebekeɛ, bɔbalɛ tsiɔ ɔlɛ kɛlɛ bɔvɛ Makedonia, bɔyɛkɛ kɛlɛ ɔsɛ Owusoso Akaa yɛekulu bɔlɔ ɔsɛ bɔdɛɖɔ kibui gbangbã ɔkɔ alɛ.

Lidia Yɛ Titsyitsyina Nɛ Filipia

11Denɔ Troa nɔ buku kelĩabhaohu kɛlɛ bɔtsakɛ tĩi vɛ Samotrake, kɛlɛ nɛ kelizaza mɛɛ, bɔshɛ vɛ Neapoli. 12Denɔ ɛkɛlɛ bɔgã kidzo ɔvɛ Filipi gɛenu Romanɛ kesiakpa abha ɔma gbagbla ɔdɛ nɛ Makedonia bɔdɔ̃ mɛ. Kɛlɛ bɔzã ɛkɛlɛ ewui gelee.

13Nɛ Kimoelewui nabhaa, bɔvɛ ɔmaa niedeɛ nɛ kelĩ tieli shu, tɛ bɔdɛ pɛɛ ɔkɔ toli ɔkɔ Owusoso Akaa tikukulu. Bɔzã kesi kɛlɛ bɔkpa kaɖɔ ɖɔtseɖe badzɛ gɛ eshogò nɛ ɛkɛlɛ. 14Balɛ ɔmayɛmɛ tenikpo gɛ azataatɔ̃ nɛ ɔlɔ yɛenu Lidia, anɔ gɛ azadɛ apɔtɛ gɛ layɛkɛ kedzì, pɛ ehoeyi azã yɛahɔɛ pɛ ede Tiatira pɛ enu anɔ gɛ akpɛ kɛtakpu esi akɔ Owusoso Akaa. Apaleteɛ adalɛ yɛ kitúɔ mɛ ɔsɛ tɛ̀ ayɛkɛ Paulo ebui gɛ amana. 15Gɛ bakpɛ bulĩ akɔ yɛ nɛ yɛɔpã mɛ anɛ, ayɛkɛ bɔlɔ akpɛ yɛɔpã mɛ. Aɖɔ asɛ “Onupɛ nɔdɛmɛ ɔsɛ inu anɔ gɛ ayɛkɛ Apalete nabha aŋãa, kɛlɛ nɔba tɛ nɔbɔzã mɛ bɔpã mɛ.” Kɛlɛ ebu ebui mɛ akɔ bɔlɔ.

Bakpɛ Paulo Nɛ̀ Sila Nɛ Ɔɖavũmɛ

16Kiwui tinikpo gɛ bɔvɛ ɛkɛlɛ gɛ bukulu Owusoso Akaa, bɔtsyana adzɛnuvɔɛ dzidzi teli gɛ ɔfɔfuĩa toli ɔzãyɛahɔɛ gɛ azaɖɔ ebui gɛ laba ɛlɛ mɛ kidegba. Amɔ ehoeyi kpekpè akɔ yɛapalete alɛ nɛ yɛ kebisìɛ shu. 17Adzɛnuvɔɛ nɔ atɔnɔ Paulo nɛ̀ bɔlɔ bagɔgɔɔ pɛ akpɛ ozĩ asɛ, “Banyɛ alɛ enu Kititiayɛ Gbagbla yɛaxɔ̃ɛdɛ, gɛ etseɖe wɔnɔ kidzo nɔnɔ abha gɛ baba yɛkɛ wɔnɔ elú ɛkpã.” 18Azã kibui ɛlɛ abha nɛ ewui gelee mɛ̀. Kidegba kɛbadɛ Paulo ulũ kɛlɛ etsyina kɛlɛ etseɖe ɔfɔfuĩa nɔ asɛ, “Nɛ Yesu Kristo kinye mɛɛ, ɛkpɛ ɔsha akɔwɔ ɔsɛ tɛ okoeyi nɛ adzɛnuvɔɛ nɔ mɛ!” Tsiɔ̃ ɔlɛ koɔ, ɔfɔfuĩa nɔ koeyi nɛ adzɛnuvɔɛ nɔ mɛ.

19Kibeɛ gɛ adzɛnuvɔɛ dzidzì alɛ yɛapalete alɛ amɔ asɛ, ɛkɛlɛ gɛ bagã amɔ ehoeyiɛ ozĩɛɛ, bevũ Paulo nɛ̀ Sila avɛnɔ balɛ kedziɛ mɛ tɛ̀ badɛtsyɔa nɛ̀ ɔshaeleteɛ. 20Bagbana balɛ amana bebhukulu namɛ pɛ abaɖɔ asɛ, “Banɔ alɛ enu Yudanɛ kɛlɛ bamana buluhũ nɛ bɔlɔ ɔmamɛ 21baba kasɛ ɔsha tili gɛma ɛlɛ ɔzãkɔ ɔkɔ bɔlɔ Romanɛ tɛ bɔbhɛtɛ ɛlɛ abha.”

22Banɔɛza taplɛnɔ alɛ nɛ kititì lɔlɔ ɛlɛ nɛ Paulo nɛ̀ sila shu, kɛlɛ bebhukuluɔ akɔ ɔsha ɔsɛ bebú bɔdɔ̃ kpɛkpɛ nɛ balɛishu tɛ behuisi alɛ. 23Gɛ behuisi alɛ ɖɔtɔ ɖɔtɔ ebekeɛ, bakpɛ alɛ nɛ ɔɖavũ mɛ, kɛlɛ agɛ ebú balɛ kɛpɔ akpɛ ɔsha akɔ ɔɖavũɔ abha eɖiɖieleteɛ asɛ tɛ belu awɔ̃ nɛ̀ alɛ piapii. 24Gɛ bayɛkɛ ɔshakɔkɔ ɔlɛ ebekèɛ, bakpɛ alɛ nɛ ɔɖavũɔ nɛishitɛbhà kɛlɛ bashɔ balɛ ɛtsɛɖɛ kpɛ isi tili mɛ gɛ bebu izĩ akpɛɛ.

25Nɛ elishi tetiɛ Paulo nɛ̀ Sila bezekulu Owusoso Akaa pɛ baazhã ɛdzɛ akɔɛ, kɛlɛ ɔɖavũmɛ azazã gɔgɔɛ nɔ aza taatɔ̃ nɛ alɛ. 26Nɛ balɛ matì matì mɛɛ, kesiakpa ebeshukù gagalĩi akɔ asɛ ɔɖavuɔ itsuru nɔ tsyɛ bashukù. Odunu ɔlɔ koɔ ɔɖavũɔ budulũɔ petee badalɛ, kɛlɛ aka nyia aka yɛɖahuiɛ boele. 27Ɔɖavũ abha eɖiɖi eleteɛ aba nyɛmɛ, kɛlɛ gɛ amɔ asɛ ɔɖavũ dulũɔ dalɛ liɛ, etso yɛ bɛtɛ asɛ tɛ̀ eyì yɛishu ɔmɔsɛ eɖi asɛ ɔɖuvũazazã ebu tɛtsɛɖɛmɛ ashɛ. 28Pɔ Paulo abakpɛ ozĩ asɛ, “Tɛkpɛ ishu kibì! Bɔlɔ pete lɛ ɛkɛlɛ.

29Ɔɖavũ abha eɖiɖieleteɛ ebisi asɛ bamana efú, kɛlɛ abhɛtɛ zia vɛ edi zhi ekumu pɛ eshuku gbagbà nɛ Paulo nɛ̀ Sila otugbà. 30Kɛlɛ Agbana balɛ eyinɔ pɛ ebisi balɛ asɛ, “Bapalete, kɛlɛ mɛbabhɛtɛ pɛ ɛba mɔ ɛkpã?”

31Bebuiliulũ asɛ, “Yɛkɛ Apalete Yesu abha ɔŋã kɛlɛ ɔbɔ mɔ ɛkpã, wɔ nɛ̀ wɔ bɔpã mɛ anɛ.” 32Kɛlɛ baɖɔ Apalete nɛibuiɛ etseɖe yɛ nɛ̀ banɔ gɔgɔɛ nɔ nɛ̀ yɛ bɔpã mɛ. 33Nɛ elishi ɔɖa tatá ɔlɛ mɛɛ, ɔɖavũ abha eɖiɖi eleteɛ agbanà alɛ avɛnɔ adɛbɔ apɔ̃ɔ akɔ alɛ, kɛlɛ tsiɔ̃ ɔlɛ koɔ bakpɛ bulĩ nɛ ɛtakpu akɔɛ nɛ̀ yɛɔpãmɛanɛ. 34Ɔɖavũ abha eɖiɖieleteɛ agbana balɛ avɛnɔ yɛɔpã mɛ pɛ edidzu ɔkpɔlɔ̃ akɔ alɛ, same mɔmɔ eku yɛmɛ ɔmɔsɛ ayɛkɛ Owusoso Akaa nabha ŋã, yɛ nɛ̀ yɛɔpã mɛ anɛ petee. 35Gɛ keliɛ azaa, behukuluɔ akpɛ banɔ gbagbla asɛsɛ ɔɖavũabha eɖiɖi eleteɛ ɔkɔ asɛ, “Shɛnɛ ahɔɛ nɛ banyɛ alɛ shu.” 36Ɔɖavũ abha eɖiɖi eleteɛ etseɖe Paulo asɛ, “Bebhukuluɔ akɔ ɔsha asɛ bɔshɛnɛ ahɔɛ nɛ wɔ nɛ̀ Sila shu. Otsi alɛ nɔbɔlà ɔshɛ. Nɔgavɛ nɛ ishu yɔyɔ mɛ.”

37Pɔ Paulo etseɖe banɔ gbagbla asɛ, “Behuisi bɔlɔ nɛ kɛtsalɛ mɛ pɛ bakpɛ bɔlɔ nɛ ɔɖavũmɛ, bunu Romanɛ, pɔ begikulu kebhu nɛ̀ bɔlɔ. Kɛlɛ otsi bapɛ asɛ tɛ̀ bashɛnɛ ahɔɛ nɛ bɔlɔ shu nɛ tikpukpũ mɛ dzã? Ao! Nɔkɔ baba ɛkɛlɛ tɛ̀ bebebú bɔlɔ eyinɔ nɛ ɔma mɛ.”

38Banɔ gbagbla avɛ adɛkɔ behukuluɔ tititì, kɛlɛ gɛ belũ asɛ Paulo nɛ̀ Sila enu Romanɛ, kifù dɛ alɛ. 39Babà yɔ balɛ ishumɛ kɛlɛ bagbanà alɛ eyinɔ nɛ ɔɖavũɔ mɛ, pɛ betseɖe balɛ asɛ bekoeyì nɛ ɔma gbagbala mɛ. 40Gɛ Paulo nɛ̀ Sila ekoeyì nɛ ɔɖavũɔ mɛɛ, bavɛ Lidia bɔpã mɛ ɛkɛlɛ badɛtsyɔa nɛ̀ ɔhaa kɛlɛ bakpɛ balɛ kemi. Kɛlɛ bashɛ.

Àwon tá yàn lọ́wọ́lọ́wọ́ báyìí:

Banɔkpɛkpɛ Axɔ̃ɛ 16: nyb

Ìsàmì-sí

Pín

Daako

Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀

Mọ̀ Sí Nípa Nyangbo New Testament

Banɔkpɛkpɛ Axɔ̃ɛ 16

Àwọn Ẹsẹ Bíbélì Tí Ọ̀pọ̀ Èèyàn Mọ
Banɔkpɛkpɛ Axɔ̃ɛ 16

Bíbélì:

Tutrugbu

Èyà: Nyangbo New Testament - nyb