Taruparea̧ Ma̧ȩ 2
2
1Ja̧di dari̧ japamȩrȩ chjö̧na̧i̧ oa pareapadäräa̧ oa goarëremȩde Ütë tjamo̧ judi. Jabechji̧ dabu üdë, a̧dë üdë chjö̧na̧i̧därärë pareapea̧ oa cjiarëremȩde cjiadiädëri̧. 2Ado pio ju̧i̧iä ca̧i̧ta̧ra̧ ichiri cja̧rȩmȩ do chjätä ëte pareape ano̧rëremȩde. Jabechji̧ chjö̧na̧i̧ oa pareapadärärërea̧ oaiä, pareape ano̧rëremȩde. 3Ado ja̧di tara pio jiro do oa, ca̧i̧ta̧ra̧ ichiri cja̧rȩmȩ do chjätä ëte dopea̧mȩ do pio ju̧i̧, jabechji̧ china̧chjari̧ tutimi̧ dari̧ japarëremȩdejȩ. 'Aja̧, cüdë chjö̧na̧i̧ oa pareapadäräa̧ ji̧ cjiadiäa̧quëda, chjö̧na̧i̧ oa pareapadäräa̧ oaiä cjiadiäa̧quëda, järätä chjapami̧ dari̧ cjiadiäpea̧ oa cjiadiäa̧quëda' quëna̧ jo̧rȩtamȩrȩ tutimi̧ dari̧ japarëremȩdejȩ pio jiro domȩ oa, 'do üdë ba chia tjamo̧dida' quëna̧ jo̧rȩtamȩrȩ. 4Aja̧, ja̧di dari̧ ütarë go̧ȩpea̧ oa cjiarëremȩde ma̧ȩ üdë Ütë tjamo̧ judi pearä judirä chjö̧na̧i̧ oa pareaparërea̧ ji̧, judi a̧dë oa, ado dabu oa pareaparërea̧ ji̧.
Edȩ quȩmȩ tjadoräpȩ cjo̧ro̧ tänȩrëremȩdejȩrȩ pumȩ ji̧ri̧ Ütë tjamo̧ judi
Pearä judirä Jeova Ütë judi chjö̧na̧i̧ oa pareape cjiarërea̧ ji̧, a̧dë oa, dabu oa pareape cjiarërea̧ ji̧, 5jabechji̧ chirirä cjo̧ro̧mȩ to decjiarëremȩde. Jurarea̧ to decjiarëremȩde. Ado cärä decjiarëremȩde peaja̧di. Jabechji̧ Jeova Ütë pio judi jabë cjü tänȩdëa̧ oaiä, jabechji̧ buiudë marëremȩde cärä üdë. Jurarea̧ to üdë buiudë marëremȩde. Ado chiri oa ja̧bepamȩ judi, cjäri̧ made, jabë jiro decjiarëremȩde. 6Jabo Ütë tjamo̧ pio judi tänȩa̧ oa dabu ëteri pio judiri cjitëdiärëremȩde ui üdë. Dabu uëräpȩmo̧ cjitëdiärëremȩde jö̧jö̧ape järi̧ chiri nö̧ta oa. 7Ado ja̧dëa ji̧ Jeova Ütë judi dabura̧ pio ju̧ni̧ra̧ chopami̧ dari̧ japarëremȩdejȩ pumȩmi̧ da oa. Ado chopami̧ dari̧ japa ëte pjurarëremȩdejȩ jibëa̧ i̧bu puërä cjo̧ro̧ tänȩpea̧ oa, pumȩpapea̧ oa. Aja̧, pjura̧ pio ju̧i̧iä pumȩpea̧de. Daburëremȩmi̧ dadëri̧ pumȩpea̧de.
8Ja̧dëa ji̧ ja̧di dari̧ japa ëte, Jeova Ütë pio judi tjado oa ponȩrëremȩdejȩ Edȩ quȩmȩräpȩ, dorë cjitëmȩräpȩmo̧ ju̧ri̧. Ado pio jiro tjadorä cjo̧ro̧ tänȩrëremȩdejȩ jënȩ chopea̧ pumȩ pio ju̧i̧. 9Ado ja̧dëa ji̧ to chjö̧na̧i̧ oa daburi pio judiri cjitë tänȩrëremȩdejȩ Jeova judi. Chjacjiamȩri̧ dapea̧ oa, goae tarari̧ jurapea̧ oa cjitë tänȩa̧dejȩ jurarea̧ to chjö̧na̧i̧ oa. Ado tjado tjoräpȩ ju̧ri̧ cji̧därëremȩdejȩ yo̧a̧ri̧ jurarea̧ to oa. Jabechji̧ bucho ana̧ cjo̧ro̧rea̧ yürümȩ to oa cji̧därëremȩdejȩ. Ado pio ju̧i̧ uëri chjai̧dëbo dabaparȩrea̧ to oa cji̧därëremȩdejȩ peaja̧di.
10Ado Edȩ quȩmȩ chiriri pio judiri a̧rȩrëremȩde bearë tjado üdë jö̧jö̧a ma cjiari̧. Ado pio jiro bea üdë tjadoräpȩ ju̧ri̧ cja̧rȩmȩ coëma a̧rȩrërea̧ ji̧, jabechji̧ jadüchiami̧ chjarape järi̧ baärëremȩde. 11Cjarȩmȩ chjara üdë Picho̧ quȩmȩde. Pio jiro bea üdë, cja̧rȩmȩ chjara baämȩ üdë, jabechji̧ chiri nö̧tai̧ oa carupë a̧rȩrëremȩde Avira quȩmȩ chiri nö̧tai̧ oa, oro quȩmȩ chjipararirë chamȩ chiriräpȩmo̧. 12Ado ju̧ri̧pȩ chamȩ oro üdë jabechji̧ a̧dë chjäte chjadëde. Teracabara̧ mirea̧ oa cjiadëde jabo oro chja tjamo̧de. Ado pio jiro chirirä peaja̧di chade ado cja̧rȩmo̧ ta̧dë ba chiarë, oniche quȩmȩ ta̧dërë. Ado ui goaeri̧ pjȩa̧ japarea̧ to üde pio jiro chirirä cjo̧ro̧de peaja̧di, Avira quȩmȩ chiriräpȩ. 13Ado cja̧rȩmo̧ bea baämȩ üdë, chjara baämȩ üdë, jabechji̧ Gijo̧ quȩmȩde. Cu quȩmȩ chiriräpȩmo̧ carupë baärëremȩde. 14Ado cja̧rȩmo̧ bea baämȩ üdë, chjara baämȩ üdë, Tigiri quȩmȩde. Achiria quȩmȩ chiri taruräpȩmo̧ a̧rȩde. Ado cja̧rȩmo̧ bea üdë, chjara baämȩ üdë, jabechji̧ Eupjarate quȩmȩde.
15Ado Jeova Ütë judi pumȩ üi̧ pio ju̧i̧ pareaparërea̧ ji̧, jibëa̧ tjadorä cjo̧ro̧ tänȩrëremȩdejȩ tjado oa ja̧bepapea̧ oa, tjado pio ju̧i̧ chjadëri̧ jidapea̧ oa. 16Ado ma̧ȩ yürümȩrȩ ja̧di ta̧rëri̧ yo̧rëremȩdejȩ üi̧ ju̧i̧iäpȩmo̧:
—Danȩ, tjadoräpȩ cjo̧ro̧mȩ jurarea̧ üde chjö̧na̧i̧rȩ jurapea̧ to maeade —yo̧a̧dejȩ—. 17Jabo danȩ, cja̧rȩmȩrȩ, chjai̧dëbo dabaparȩrea̧ to pio judi china̧chjade. Juradëpea̧de. Mȩnȩ pio jiro jurarea̧ oa jura̧ domȩ ju̧i̧iä, jabechji̧ ja̧boa̧mi̧ dari̧ cjiadiäparenȩ —yo̧mȩrȩ yo̧rëremȩdejȩ Ütë tjamo̧ judi üi̧ pio ju̧i̧iäpȩmo̧.
18Ja̧dëa ji̧ Jeova Ütë judi yo̧rëremȩde üi̧ pio ju̧i̧ chjiari. "Jabechji̧ üi̧ judi jibëa̧ma̧i̧ cjo̧ro̧pea̧ üdë chjadëdëde. Jȩa a̧doyi̧ ji̧ decjiamȩrȩ cjo̧ro̧pea̧ üdë chjadëdëde. Ado pio ju̧i̧iä a̧dopayi̧ pio ji̧ jëdanȩ yürüpareconȩ pio judimi̧ dapayi̧ pio ji̧, ëba cjo̧ro̧payi̧ pio ji̧."
19Ado Jeova Ütë judi chirirä cjo̧ro̧ji̧ri̧ chjö̧na̧i̧ oa pareaparërea̧ ji̧, jabechji̧ dabura̧ chopä ëte pareaparëremȩdejȩrȩ. Ado coë jäji̧ri̧ pio ji̧ri̧, uëräpȩ pjo̧a̧ baäji̧ri̧ pio ji̧ri̧bo dabura̧ chopa ëte pareaparëremȩdejȩrȩ. Ado chjö̧na̧i̧ oa pareapea̧ duri oa, jädärä tänȩ marëremȩdejȩrȩ üi̧ pio ju̧i̧iäpȩ, pio judi chjö̧na̧i̧ oa quȩpapea̧ oa. Jabechji̧ ¿tjana̧ quȩra̧ quȩpapadiji̧ri̧da' quëna̧ jo̧rȩtamȩrȩ jä tänȩrëremȩdejȩrȩ. 20Chirirä cjo̧ro̧ji̧ri̧ pio ji̧ri̧, coë jäji̧ri̧ pio ji̧ri̧, ado uëräpȩ pjo̧a̧ji̧ri̧ pio ji̧ri̧ jä tänȩ marëremȩdejȩrȩ Ada̧ pio ju̧i̧iäpȩ. Ado üi̧ pio judi quȩpea̧mi̧ quȩji̧ri̧pea̧ maeadirȩ ütëborë. Jabo judi quȩpea̧ pio judiro̧ cja̧rȩmȩti̧rȩ, cjäri̧ madirȩ, Ada̧ pio judimi̧ dadë marëreji̧ri̧dirȩ. Pio jȩa a̧doyi̧ pio ji̧ datärea̧ ji̧, jibëa̧ jadü datärea̧ ji̧, cjäri̧ made, ëbarea̧mi̧dë maea oa darëremȩde. 21Ado pio ju̧i̧iä Jeova Ütë judi mo̧a̧ tänȩrëremȩdejȩ pumȩ ju̧i̧ jo̧rȩtarea̧ decjiari̧. Ado ja̧dëa ji̧ mo̧a̧mȩ oa, go̧dü tänȩrëremȩdejȩ jibëa̧ pjatëtu ju oa, cjarȩmȩ oa. Ado pjatëtu ju oa mitëmȩrȩ chjaodëri̧ cara̧dejȩ yabë a̧rȩremȩ oa ado chjereno̧. 22Ado pio ju̧i̧ ja̧ pjatëtu juremȩra̧ pio ju̧ni̧ra̧ jüdüparëremȩdejȩ iei̧ ji̧. Üi̧ pio ju̧i̧iäpȩmo̧ yürüpea̧ oa jüdüparëremȩdejȩ Jeova Ütë judi. Ja̧di tara jüdüpa ëte yürürëremȩdejȩ üi̧ ju̧i̧.
23Ado Ada̧ judi bëdüa̧rä, judi Ütërë pea jüdüpea̧ pio ji̧ daea̧rä, ‘Chia chia, ca̧ jadüni̧ca̧da, ca̧ go̧a̧mi̧ dani̧da, jabechji̧ pio cüdëmi̧ dani̧da’ quëna̧ jo̧rȩtamȩrȩ yo̧rëremȩde jibëa̧ iei̧ pio ji̧ chjiari. ‘Aja̧, ca̧ juremȩra̧ pio ju̧ri̧ra̧ jüdüpea̧ oa cjiani̧ca̧da, ado pio ju̧i̧iä iei̧ yo̧mȩ ma̧ȩ oa yo̧paquiji̧da’ quëna̧ jo̧rȩtamȩrȩ yo̧rëremȩde Ada̧ judi.
24Ado Ütë tjamo̧ judi ja̧di dari̧ japea̧ oaiä, ¿yö̧ta dari̧ cjo̧ro̧täreji̧ri̧dirȩ ëbaji̧ri̧ judiro̧? Yö̧ta dari̧dë, jabechji̧ üi̧ judi jibëa̧ iei̧ pio ji̧ ëba̧rä, jabechji̧ a̧dë baätäremȩdejȩrȩ jibëa̧ ama̧i̧ ji̧ri̧, pio jȩa nö̧riji̧ri̧ pio ji̧ri̧. Aja̧, pio ji̧ri̧ a̧dë baätäremȩdejȩrȩ jibëa̧ iei̧ pio ji̧ nö̧ta ëba cjiapea̧ oa, ji̧mo̧ cjiapea̧ oa. Jabechji̧ üi̧ judi jibëa̧ iei̧ ji̧ ëba̧rä, cjarȩmȩ pumȩmi̧ dari̧ cjiadiädirȩ. Yo̧a̧ri̧ pumȩrërea̧ ji̧, jabechji̧ cja̧rȩmȩ pumȩmi̧ dari̧ cjiadiädirȩ ëba̧ pio ju̧i̧iä.
25Ado judirä, jabechji̧ üi̧ judi jibëa̧ iei̧borë i maearë cjo̧ro̧rëreji̧ri̧dirȩ. Jabo i maearë cjo̧ro̧rërea̧räbo, jabechji̧ idëri̧ cjiadë marëreji̧ri̧dirȩ.
Àwon tá yàn lọ́wọ́lọ́wọ́ báyìí:
Taruparea̧ Ma̧ȩ 2: Pume
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2021 Global Partners, All Rights Reserved