Matiu 6
6
Jesu I Vari Vatatana Ne Dego Tavisi Qira Basoero Iri Situ
1Jesu igo napu dena, “Vatovato velaka ro qamu zazu ne ze dekoe God, kasi vasadaka ze de in koego basoero ne sauna go mara mia pata qamu zazu ne go. Ṉalu qamu zazune vatovato igogo ne God Tamaqamu ikoego rani ne tiniki voli qamu kaega. 2Iago ṉalu qamu tekene sosovolomo kakia basoe situ kasi pepeu na. Vatovato gogone iato iri zazu ne basoero poqepoqe loborona Pade Lotu mana zuka lavata na komala ne, go basoero ne mara va zakazaka qira iri go. Ma sine ne qamu pata ogoto, basoero nae iri pala bana to voli qira. 3Ṉalu qamu tekene sosovolomo kakia basoe situ, patavolomo vakitaka velaka aro do mara kasi rove na. 4Sosovolomo aro mara pipika do Tamaqamu i mia go osina pataro qamu zazu pipika ne ṉara voli qamu.”
Jesu I Vari Vatatana Ne De Go Pene
(Luka 11.2-4)
5Jesu igo napu dena, “Ṉalu qamu pene, kasi gere qira basoero poqepoqe. Iri degere loborona Pade Lotu mana rikisina zuka lavata ro go iri ara pene va lavata go. Tanego iri soko mara mia basoero ne iri go. Ma sine ne qamu pata ogoto, iri pala bana to voli qira. 6Ṉalu qamu pene go, za koe kova ramu mana kokoqua siporaṉa. Gonae munara pene go Tamaqamu qamuki mia go kaega, mana Tamaqamu i mia go pataro qamu zazu pipika nego, tinara voli qamu.
7Do ṉalu qamu pene, kasi sine na topu sekoro i zaza volomo gere qira basoero iri koego rodoko. Tanego iri nanao God tina gata pene loda ro ria. 8Muniki gere qira vano rodoko. God Tamaqamu i rove bana so pataro qamu nanao go ia, taramuzina qamu ara pene go ramu. 9Iago ṉalu qamu pene muna go dena,
Tamaqemu qo koego rani,
go vitoṉomu aro
mara tabo sivala
de koe basoero.
10Go osina basoero
mara koe loborona
vari miasoka raro.
Pata qo soko timuna
zazu ze go remu pua dena,
mara gere napua so pataro
iri zazu ne ze ria rani.
11Teke qemu me ninidena
pata gege qimu soko go.
12Ono nanao ulene qemu remu
sauna pataro
qimu vasakate go,
gerena remu qemu nanao ule
ne qira ria basoero
iri vasakata qemu go.
13Mana oniki padane
qemu remu pata go i mazala
va soru qemu,
do ono bara ne qemue
dekoe pata sakata rone.
14Pata ogoto sivala, ṉalu qamu nanao ule ne qira basoero iri vasakata qamu, God Tamaqamu ikoego rani ne tina nanao ule ne qamu sauna pataro qamu vasakate go. 15Do ṉalu ramu qamuki nanao ule ne qira kaega pataro iri vasakata qamu go, God Tamaqamu ki mazala kaega tina nanao ule napu ne qamu sauna pataro qamu vasakate go.”
Vari Vatatana Na Dego Qaniqani
16Jesu igo napu dena, “Ṉalu qamu qaniqani kasi mimia maeropo gere qira ria basoero poqepoqe. Iri mimia saqo go mara mia basoero ria iri qaniqani mara vane qira iri go. Ma sine ne qamu pata ogoto, voli qira iri pala bana to. 17Do ṉalu qamu qaniqani go, muna sasaboro, muna lomu mana surisuri go. 18Gonae kaega ka basoe tina rove ramu qamu qaniqani. Mana God Tamaqamu i mia osina pataro qamu zazu pipika ne tina ṉara voli qamu go.”
Jesu I Vari Vatatana Ne Vavagado Na Rani
(Luka 12.33-34)
19Jesu igo napu de, “Muniki soti ze pata vavagado ramu pua dena, tanego kokorosi mana bebega tina mazala vasakate na mana vano sikosiko iri mazala papatena pade ne mana siko vavagado nae go. 20Do muna qoqoṉo ze pata vavagado ramu tepa rani ne, de go i kaega ka kokorosi na, mana ki mazala kaega tina bebega go. Mana tepa rani ne i kaega kaki basoe sikosiko i mazala go papate na pade ikoego pata vavagado ne. 21Puṉumu aro tina ko tarue so dekoe pata vavagado ro aro go.”
Matana Basoe I Gere Pazi Na Tokama
(Luka 11.34-36)
22Jesu igo napu dena, “Matana basoe i gere pazi na tokama. Ṉalu matamu i tatavata velaka go qo mazala mia velakena pataro qo zazu ne ze go loborona too aro. 23Do ṉalu matamu ki velaka kaega, osina tokamamu tina ko rodoko. Iago ṉalu tatavata i koe de qo koe go i rodoko, tina lete rodoko napu to go.”
Vari Vatatana Na Dego Va Mazale Na God
(Luka 16.13; 12.22-31)
24Jesu igo napu dena, “I kaega kaki basoe i mazala osaka ne karua batu. Tina vasasakata ne kakia mana tina mamaligara ne kakia go. Tina mia vamazale kakia mana tina taru vaqoqore kakia go. Iago imakuru qamu tamuna vamazale go God mana pata vavagadona pua dena.
25Iago ma sine qamu, kasi lete nanao vokara ne pata gege mana besi tina va too qamu mana kasi nanao vokara ne poga tamuna vabaribari ne, tanego, too i sivala ne pata gege, mana tokama i sivala ne poga qamu va baribari ne. 26Mia qira pale ro iri koe go zakazaka ne, iriki zazu barue kaega, iriki taruze kaega pade pata gege ria. Do God Tamaqamu i koe rani ne ara va ṉaṉa qira. Ramu qamu rove qamu lete mazala sivala ne qira palero. 27Patavolomo qo lete nanao vokara ne too aro do, i makuri go tono go, era ma too loda napu aqe.
28Kasi poro nanao vokara ne poga. Mia qira bubuiliro iri zaṉana podo go. Iriki zazu kaega mana iriki zazu ne kaega poga ria tanuqira go. 29Do ma sine qamu, patavolomo batu lavata Solomon iva keba ne osina pata malemale velaka ro ia, do iki sivala ne kaega kaki kameka ria bubuiliro dena. 30God iva malemale qira seuseu volomo ro iri podo ego dena, do seuseu ro dena tina ko aqe so desuka mana tarina le, mana basoero ne tarina vana qira qe nako ne. Iago avigo qamu nanao God tiniki vabaribari qamu kaega? Vaogoto ramu iara lete suka so.
31Kasi poro nanao vokara ne, ade tatana pala ze pata gege tatana ge go, mana besi tatana besia mana poga tatana va baribari ne. 32Ria vano rodoko tane iri nanao kusika go patavolomoro dena. God Tamaqamu i koe rani ne i rove bana, qamu soko go ramu osina pataro dena. 33Iago taru kenaqa zaqe puṉu qamu dekoe vari miasoka ia God mana muna zazu ne pataro i soko qamue go. Ṉalu gogo nae God tinara tekene qamu kero ne pataro. 34Kasi nanao vokara ne ava tina doka go bakubaku. Tanego bakubaku mana nogotona musaqara iko rigo ia tanuna.”
Àwon tá yàn lọ́wọ́lọ́wọ́ báyìí:
Matiu 6: VRSNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Varisi, Solomon Islands © Bible Society of the South Pacific, 1994, 2004.
