MAADOCO 13
13
Wanaadi weichojo emajjotoojo jäcä Jesuuquidiito necammajäätö’jödö
1Yääje mma yaawä Wanaadi weichojo tacanno töweeja’cadaawäiñe Jesuuquidiito nowaanomaadö cönä’döaacä chäwwä:
—Owaanomaanei, eneecä’ma mädä täju adai’jä naadö. Mädä wa’cä iiñataaje nai mädä Wanaadi weichojo amääajä; quee cönä’döaacä.
2Jesuuquidiito cönä’döaacä chäwwä:
—Edä täju mene’maadö tooni’chä äädetö’da na’de töweichacoono de’wäädä. Tameedä tämajjojoomöje na; quee cönä’döaacä Jesuuquidiito.
Anooto wataamedö cu’nädö ene’ju’tojo
3Yaawä Odiiwo ’jödö ña cöntonto, yää Wanaadi weichojo je’taca naichö. Yäätä Jesuuquidiito wataajima’jäcä, töjääcäjeeneiñe töweichawäiñe ñoowanoomadö cöneecamma’joicho, ñanno Peedhodo, Jacoowo mmaja, Juan mmaja, Antedé mmaja. Tönwanno cönä’döa’to:
4—Ñaa wwä ecammajä’cä. ¿Ächännauwä’cä yää nai’che? ¿Ane’cäämö nai’che tameedä mädä mecammaichö weja’do’tojo cu’nädö ene’ju’tojooje?
5Jesuuquidiito cöneccujä’a’to; cönä’döaacä:
—Odhoowoinchadäiñe’da eichäcä, anejja wwä mätäncu’tojooto’no. 6Jooje soto naato’de öwö yeetö joi töwäätä’tancädäiñe, “Äwaanacaanei öwö;” quee töwä’döancädäiñe. Jooje soto nätäncu’täjaato’de chäwwäiñe.
7“Yaawä wänä wäätadö eta’jäcä äwwäiñe, wänä ecaadö mmaja, määcatoncatäi’che. Mädääje yeeja’do’tojo na, wataametoojojöönö mma yeichaame. 8Yaawä sotoocomo newäänä’taato’de, acu’shänääcomo mmaja. Nono wätu’medö na’de aneetaja’cäcäiñene’jödöödä. Ämi mmaja na’dede, watansu’dänä mmaja. Mädoocomo na’de yeetunu waajäntädö mma.
9“Odhoowoinchadäiñe’da eichäcä’de änwanno. Yaawä soto ayu’ato’de äcamma’jonnamo wwäiñe. Töwe’jummato’como taca adhaiju’jä’ato’de. Sootoije aweichöcoomo jo’tädööje acu’shänä wwadäädä adhaadäaato’de, cajiichaanacoomo wwadäädä mmaja. Yää na’de äwwäiñe ya’deddu ecammajo’tojo ñeetadööcomooje. 10Wataamenä owaajodä aashichaato wätunnä nätääcammajä’a’de tameedä sotoocomo wwäiñe. 11Yaawä äcamma’jonnamo wwäiñe ayuutuduucomo wetä adhaadäa’comjäcä awa’deuto’como jäcä mäntö’tamme’jä’täi’che. Täncanoode’da mmaane eichäcä’de. Epíiditu Santo nutuudu woije ecammajä’täcä’de yaawä. Änwannojöönööne adha’deuwaato’de, Epíiditu Santoone. 12Yaawä anejjacoomo soto tacontoncomo nu’aato’de emaajodö wetä. Yuumötoncomo mmaja tönnacontoncomo nu’aato’dede. Mudeeshi tumöötoncomo nichu’de’taato’de, senöötoncomo mmaja, emaadö jona tödööene. 13Tameedä soto aquiiñeme’cato’de sootoije aweichöcoomo jo’tädööje. Yaawä ñäädä yaatameedö jonaane shinchänei nääwanaaca’de.
14“Ñäädä Dañeede, Wanaadi wa’deuwödö ecammanei’jödö, cöneecammajäätöi ñäädä cone’manei tönoiñato jäcä. Ñäädä tönoiñato meneeato’de yaawä yeicho’jönö tawä yaanöngajä. A’de’tänei nichö’tammecö’ñojo. Yaawä Judheea ñancomo nääneje’ña’to’de jöö de’cäi. 15Ñäädä tömmai ye’wono, tömmai chaca omoomöi’che töwä’ta’jäcä, ane’cä’cä ija’cadö wetä. 16Ñäädä audaajä acaano töwoomö wetä mma ennacai’chede. 17Wentumje naato’de yaawä ñanno töwensu’da’como, ñanno tänwasa’como mmaja. 18Wanaadi wwä adha’deutäcä cämöi awä’da määnejeetäiye’de. 19Yää wa’coto wäntunaanö’nä a’que na Wanaadi wwä edä nono tödö’jödö jonnoto’jödöödä; eduuwa naadö jonno mmaja a’que na’dede. 20Yää wäntunaanö’nä Wanaadi aneedennanö’jo’da yeiya’jäcä tameedä soto nataameaato’de. Töwö Wanaadi nedennanö’ja’de tösootoi jäcäinchädäiñe, ñanno tönei’jödö jäcäinchädäiñe.
21“Yaawä edääje äwwäiñe soto wä’döa’jäcä: “Eneetäcä’ma, määdhä ñäädä Äwaanacaanei;” ca’jäcä, “Mäntä nai;” quee jeiñe mma maneecanö’täi’che; 22joojeene yeiya’como äwaanacaaneija’como wätä’tädö, jooje mmaja Wanaadi wa’deuwödö ecammannamooja’como wätä’tädö. Tönwanno ene’ju’tojo nödööaato’de, täneemö mmaja, Wanaadi sotoi jadä’jödöödä encu’täto’comoojato’jödö. 23Odhoowoinchadäiñe’da eichäcä’de änwanno; tameedä äwwäiñe wecammajäätöi dhowaajodä.
Soto nnedö we’tojo
24“Yaawä yää wäntunaanö’nä ’jeje shii nichööjänga’de; nuunä änweijo’da na’dede. 25Shidiichä nä’meaato’de caju ñanno. Tameedä caju ña naadö nätu’mea’de. 26Yaawä Soto nnedö neneeaato’de ca’dutu de’wä yeejödö, jäduuje, tawaanato töjääcä. 27Töwö tamoodedö nanontaato’de yaawä tönei’jödö i’jummaiñe, tameedä yeichö wa’cä edä nono de’wä, caju o’wadö jona tödööene.
28“Etaatäcä eduuwa waju’nä dö’seeno neecammajäätödö. Yaade’jutaadö waajänta’jäcä, yaadetaadö mmaja, odhoowanääcäiñe yaawä wedu amoinche’da yeichö. 29Mädääje mmaja änwanno, yää wecammaichö eneea’jäcä äwwäiñe, chö’tamme’täcä’de Soto nnedö we’tojo amoinche’da yeichö. 30Chäänönge yääje wä’döa äwwäiñe, tameedä mädä neja’dä’a’de canno soto eduuwa naatoodö ä’jajo’dadooto. 31Caju mmaja, nono mmaja, nataamea’de; öwö ya’deddu mmaane ataamejai’cha na.
32“Yaawääne’, yää anooto owaanäcä’da na, chu’nädö owaanäcä’da mmaja. Wanaadi amoodedö caju ñancomo dhowaanäcäiñe’da mmaja. Wanaadi nnedö jadä’jödöödä dhowaanäcä’da na. Yuumö mmaane dhowaanäcä.
33“Yääje yeijäcä odhoowoinchadäiñe’da eichäcä; äädai’chätääcä; Wanaadi wwä adha’deutäcä, odhoowanääcäiñe’da yeijäcä yää cu’nädö. 34Dhanwa aneiñaja töötäämö töweiye naichö naane’. Töötääje tömmai necamma tösootoi wwäiñe; chääwaadäiñe chaadawaajuichomo necamma dea. Mönaatata edai’chänei wwä nedai’chaja. 35Mädääje mmaja änwanno äädai’chäjai maato, odhoowanääcäiñe’da yeijäcä maa edhaajä we’tojo. Cho’momöödawä töwö e’jai ña, yo’tawääne jeiñe mma, wameedi wetöömödaawä jeiñe mma, tööjanaacadä jeiñe mma. 36Äädai’chätääcä, jadheedä ye’a’jäcä wönö’näje mma moojodööjoto’no. 37Mädä äwwäiñe wecammaadö tameedä soto wwäiñe wecamma dea, äädai’chätääcä; quee cönä’döaacä Jesuuquidiito.
Àwon tá yàn lọ́wọ́lọ́wọ́ báyìí:
MAADOCO 13: MCH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014 Reservados todos los derechos
