Jɛnɛsis 11
11
Babilɔn Tawa
1Fɔs fɔs tɛm, na wangren laŋwej ɔlman na di wɔl bin de tɔk, ɛn na bin di sem we dɛn bin de tɔk am. 2As di pipul dɛn de wirɔn ɔlɔbɔt na di ist, dɛn rich na Babilɔn; ɛn dɛn tek de mek dɛn siti ɛn tap de. 3Dɛn tɛl dɛn kɔmpin se, “Una kam! Lɛ wi mek kle blɔk dɛn ɛn bek dɛn mek dɛn go traŋa gud gud wan.” So dɛn mek di kle blɔk ɛn yuz dɛn fɔ bil. Dɛn yuz ta lɛkɛ mɔta fɔ fasin dɛn. 4Dɛn se, “Lɛ wi bil wan big siti we gɛt tawa we go rich ɔpskay, so wi go mek nem fɔ wisɛf ɛn wi nɔ go skata ɔlsay na di wɔl.”
5We di pipul dɛn de bil di tawa, PAPA GƆD kam dɔŋ kam luk wetin dɛn de du. 6I se, “If dɛn pipul ya so we dɛn de tɔk wan laŋwej kin ebul du dis kayn tin, wetin lɛf we dɛn nɔ go ebul du? 7Lɛ wi go dɔŋ go miksɔp dɛn laŋwej so dat dɛn nɔ go ebul fɔ ɔndastand dɛnsɛf.” 8So PAPA GƆD skata dɛn ɔlsay na di wɔl, ɛn dɛn tap fɔ bil di big siti. 9Na dat mek di siti nem Bebɛl,#11:9 Bebɛl Di wɔd Bebɛl pan Ibru min Miksɔp. bikɔs na de PAPA GƆD miksɔp dɛn laŋwej, ɛn na de i skata dɛn go ɔlsay na di wɔl.
Frɔm Shɛm To Ebram
(1 Kronikuls 1:24-27)
10Dɛn wan ya na Shɛm in jɛnareshɔn dɛn. We Shɛm ol wan ɔndrɛd ia, dat na tu ia afta di flɔd, nain i bɔn Apakshad. 11Afta dat, i de fayv ɔndrɛd ia mɔ ɛn bɔn ɔda bɔy ɛn gyal pikin dɛn.
12We Apakshad in ol tati-fayv ia, i bɔn wan bɔypikin we nem Shila. 13Afta dat, i de fo ɔndrɛd ɛn tri ia mɔ ɛn bɔn ɔda bɔy ɛn gyal pikin dɛn.
14We Shila ol tati ia, i bɔn wan bɔypikin we nem Eba. 15Afta dat, i de fo ɔndrɛd ɛn tri ia mɔ ɛn bɔn ɔda bɔy ɛn gyal pikin dɛn.
16We Eba ol tati-fo ia, i bɔn wan bɔypikin we nem Pɛlɛg. 17Afta dat, i de fo ɔndrɛd ɛn tati ia mɔ ɛn bɔn ɔda bɔy ɛn gyal pikin dɛn.
18We Pɛlɛg ol tati ia, i bɔn wan bɔypikin we nem Reu. 19Afta dat, i de tu ɔndrɛd ɛn nayn ia mɔ ɛn bɔn ɔda bɔy ɛn gyal pikin dɛn.
20We Reu ol tati-tu ia, i bɔn wan bɔypikin we nem Sirug. 21Afta dat, i de tu ɔndrɛd ɛn sɛvin ia mɔ ɛn bɔn ɔda bɔy ɛn gyal pikin dɛn.
22We Sirug ol tati ia, i bɔn wan bɔypikin we nem Neɔ. 23Afta dat, i de tu ɔndrɛd ia mɔ ɛn bɔn ɔda bɔy ɛn gyal pikin dɛn.
24We Neɔ ol twɛnti-nayn ia, i bɔn wan bɔypikin we nem Tɛra. 25Afta dat, i de wan ɔndrɛd ɛn nayntin ia mɔ ɛn bɔn ɔda bɔy ɛn gyal pikin dɛn.
26Tɛra bin ol sɛvinti ia we i bɔn Ebram, Neɔ, ɛn Eran.
Tɛra in jɛnareshɔn dɛn
27Dɛn wan ya na Tɛra in jɛnareshɔn dɛn. Tɛra na bin Ebram, Neɔ, ɛn Eran dɛn papa. Eran in na Lɔt in papa, 28bɔt Eran day bifo in papa Tɛra na Ɔ, di siti we i bɔn. 29Ebram ɛn Neɔ dɛn tu bin mared. Ebram in wɛf nem Seray, ɛn Neɔ in yon wɛf nem Milka we na Eran in gyal pikin. Iska na bin Neɔ in ɔda gyal pikin. 30Seray in nɔ bin ebul bɔn pikin.
31Tɛra tek in bɔypikin Ebram, in grampikin Lɔt, we na Eran in bɔypikin, ɛn in dɔtɛnlɔ Seray, Ebram in wɛf, kɔmɔt na Ɔ we de na Babilonia fɔ go na Kenan. Bɔt we dɛn rich na wan ples we nem Eran, dɛn disayd fɔ tap de. 32Tɛra day na Eran we i ol tu ɔndrɛd ɛn fayv ia.
Àwon tá yàn lọ́wọ́lọ́wọ́ báyìí:
Jɛnɛsis 11: KRIO13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Krio Bible © The Bible Society of Sierra Leone, 2013.