MATIU 3
3
Chɔn‑na chia a ka, Chisɔsi ya ɔ
(Maki 1:1-8; Duku 3:1-18; Chɔn 1:19-28)
1Tima che‑a wan, mbɛ Chɔn, min mbe yii chɛ mɔɛ n kunɛ ɔ, Yataa chia a, a na‑a fuinɛ ma, Chudia chɛnyɛ ɔ. Mbɛ a bun‑da Yataa 'a bai sa‑a mɔɛ n tena. 2A ɔ, “Wo wo kan kɔ sɔ wo 'a ko yama n na, wo ni wo ya a mun Yataa ma. A mu min na, Yataa 'a mansaya ɔ yian tima, ɛ gbɛ mmɔ ma chenɛ da a wan.” 3Chɔn chɛ ni, Yataa 'a gbonka chɛ mɔɛ Aisaya na‑a bai sa a si min ma. Aisaya na‑a a fɔ wan, a ɔ,
“Mɔɛ yen ko gbonka chɛ‑a fuinɛ ma, a ɔ,
mɔɛ n ni tan Yataa tena.
A ɔ, an ni an fandi n dɔ bɛn Mansa Yataa ya ɔ, yɔ an mbe chia ɔ bɛn buɛ min dɔ an 'na mansa n ya ɔ.”
4Chɔn ma chiien ni koa min na, a nyanden ni soe#3:4 An soe chɛ tɔ ni nyɔkɔmɛ. ti an na. A bu tɛ chiien ni soe gboo an na, a 'a daun fenɛ sin ni kondonɛ an na, a basan kumin tuu a. 5Mɔɛ n na‑a wan a tena, a ka Chuusaɛn duu ɔ, ni Chudia chɛnyɛ tɔɛ n dɔ, a basan Chɔdan yii 'a sanɛ a. 6An dɔn‑da an 'na ko yama n ma, fanka ɔ den. Mbɛ Chɔn‑na yii chɛ an kunɛ ɔ, Yataa chia a, Chɔdan yii ɔ.
7Chɔn‑na a ɔ yen, mbɛ Chu mɔ kuun chɛ nu, an ni miin chee Fayisii#3:7 Fayisii n ni mɔ kuunɛ n fan na, Chu mɔɛ n tɛ ɔ, miin ni Mosisi 'a sawa n bia gbau gbau, a basan an ta sawa n na. nu, a basan chɛ n na, miin ni Sadusii#3:7 Sadusii n ni mɔ kuunɛ n fan na, Chu mɔɛ n tɛ ɔ. An sɛsɛ ni mɔɛ n fan na, miin ni mɔ gbu n tɛ ɔ Yataa a. a, an na‑a a tena. An dɔ, a ni yii chɛ an kunɛ ɔ, Yataa chia a. Chɛɛ a ɔ, “Wo yauaen ba chɛ nu, yɔ ka. Wo ee che wo nun‑da Yataa 'a mɔnɛ ma, min mbe wo ko a. 8Wo chɛ chɛ wai n ni a ɔ yian, mbɛ wo‑a wo kan kɔ sɔ wo 'a ko yama n na. 9Wo ma wo yii na chii kafai be koe a, mbɛ Ebeami cheeya mu wo a. A ni ma wo yii ma, mbɛ Yataa ɛ kun fan a ni sen chɛ n ya, a ni Ebeami cheeya n nyan an dɔ. 10Ni kɔnɛ ma gbɔ chɛndɛ be ni, mɔɛ ɛ a tɛ wan a suu ma, mbɛ a‑a a minda. Wo gbɛɛ wo maen fan mu yɔ kɔnɛ nu. Yataa 'a yende a saen fan mu wo dɔ n tɛ koe a wo suu ma, wo wɛn mbe ee ko chɛndɛ ma‑a. 11N fan, n mbe yii an chɛ wo kunɛ ɔ, min mbe a ɔ yian, mbɛ wo‑a wo kan kɔ sɔ wo 'a ko yama n na. Chɛɛ mɔ dɔndɔ ɛ na tena n gbaa, a benden mu n ma kaka. N gbu sin mbe ee che a 'a kɔɔwa wɛɛ bia koe a. A tana, ɛ Yataa Nyina a na‑a wan ma koe a wo fɛ, wo wɛn mbe wo kan kɔ sɔ‑a wo 'a ko yama n na. Chɛɛ wo wɛn mbe ee wo kan kɔ sɔ‑a wo 'a ko yama n na, ɛ wo a ta‑a wan ta ɔ. 12Ɛ mɔ gbu gbɛɛ gbɛmbo‑a wan. Ɛ mɔ gbu chɛndɛ n bɔ‑a wan a yama n ya a, yɔ sɛnɛ sa mɔɛ ɛ fenɛ ɔ fɛ buɛ min dɔ, a pofe bɔ koe a a chɛndɛ ya a. Ɛ a pofe a dɛ‑a wan, mbɛ a‑a a chɛndɛ si tena ɔ bɛn. Ɛ mɔ yama n tɔɔya‑a wan kuɔ fɔ ta ɔ, yɔ mɔɛ ɛ a fonɛ minda buɛ min dɔ ta a.”
Chɔn‑na yii chɛ Chisɔsi kunɛ ɔ, Yataa chia a
(Maki 1:9-11; Duku 3:21-22)
13A tima chɛ a, Chisɔsi bɔ‑a wan Kadidi chɛnyɛ ɔ, mbɛ a ta‑a Chɔdan yii da a, min mbe a ma, Chɔn ni yii chɛ a kunɛ ɔ, Yataa chia a. 14Chɛɛ Chɔn toen ni kɛn a ni a ma, Chisɔsi yiima ni mun, a ɔ, “I ma chɛ ma n na. A ma bɛnden mu, i wan ni yii chɛ n kunɛ ɔ, Yataa chia a. I wan mbe ee na to n tena, n ni yii chɛ i kunɛ ɔ, Yataa chia a.”
15Chɛɛ Chisɔsi ɔ, “I ma n kɔɔsa bia. A ma yɔ n‑na a fɔ buɛ min dɔ i ye a ma koe a. Ni mɔ‑a a ma buɛ chɛ ɔ, mɔ ɛ ma‑a ka Yataa faa ma koe an ma‑a.” Mbɛ Chɔn dɔn‑da.
16A‑a yii chɛ kɛn dechee Chisɔsi kunɛ ɔ, Yataa chia a, Chisɔsi bɔ‑a wan yii ɔ. Mbɛ a yen ko, banda da a ka‑a a ya a a, mbɛ a‑a Yataa Nyina yen, ɛ yii‑a yɔ bugbɔɛ, mbɛ a si‑a a ma. 17Mbɛ a yen ko, kuiɛ a min‑da a ka banda bu ɔ, a ɔ, “N 'na denɛ an nɛ, a ko a di n ye kaka. N faa chimaen mu a ko a chɛndɛ chɛ.”
Àwon tá yàn lọ́wọ́lọ́wọ́ báyìí:
MATIU 3: KONONT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
New Testament in Kono © The Bible Society of Sierra Leone, 2006.
