DUKU 24
24
Chisɔsi‑a a kɔɔ sɔ, a ka saya ɔ
(Matiu 28:1-10; Maki 16:1-8; Chɔn 20:1-10)
1Suin tee chɛ ben‑da, mbɛ Tɛnɛ kan kɔ dɔɛ sau sau ma, musu chɛ n ta‑a wan kamba ma. An ta‑a tu kunyɛ a diama chɛ a an boo ɔ, an na‑a min dɔ bɛn ka. 2Chɛɛ an‑na a tan fan, senɛ chɛ, an na‑a kamba gbu da a tɔn ka min na, a chenchendenɛ ɛ, a ka a da a. 3Mbɛ an don‑da a bu ɔ. Chɛɛ an nii ma Mansa Chisɔsi su tan ni to nɔ. 4Mbɛ an na fii‑a, a si koe chɛ ma. An to‑a chɛ an dɔ, mbɛ a yen ko, mɔ kaima fea bɔ‑a an ya a, an mbe sɔ ɔ an baima, an ma chiienɛ ɛ koa manden ba ɔ. 5Musu chɛ n chian‑da wan kaka, mbɛ an‑na an kunɛ a bun duu ma. Mbɛ kamin chɛ n dɔ, “Wo ma na wo ya a kan‑da kamba ɔ chɛndɛ ba a. 6A ee nɛ. Yataa‑a a kɔɔ sɔ a ka saya ɔ. Wo wo yii na chii bai chɛ a, a‑a min fɔ wo ye, a ni tima min na Kadidi chɛnyɛ ɔ. 7A ɔ, mbɛ an mbe a wan Mɔ Gbu 'a Denɛ bia‑a wan, a ɔ, an ni a be ko yama ma mɔɛ n ma. A ɔ, an mbe yɛ‑a wan to, a ɔ, an ni a gbangban kɔn gbengbandenɛ ma. A ɔ, chɛɛ tee fea a sawan bɔɛ ma, a ɔ, ɛ a kɔɔ sɔ‑a wan a ka saya ɔ, a ni yɛ to fɔɛ ɔ.”
8Mbɛ a 'a bai chɛ puin‑da musu chɛ n yii ma. 9Mbɛ an ka‑a kamba chɛ ma, an yɛ‑a duu ɔ. An si‑a wan ko ɔ ko ma min ma‑a, mbɛ an‑na a ɔ yian Chisɔsi fɛ den tan kun ma dɔndɔɛ chɛ n na miin to‑a, a basan a fɛ mɔɛ tɔɛ n gbɛɛ a. 10Musu chɛ n fan nii nɛ, miin‑na bai chɛ ɔ yian Chisɔsi 'a sɔ mɔɛ n na. Mɛi min na‑a ka Makadaa, ni Chowana, ni Mɛi dɔndɔɛ Chimisi de, a basan musu dɔ gbɛɛ n na. 11Chɛɛ Chisɔsi 'a sɔ mɔɛ chɛ nu, an nii ma dan ni a a, musu chɛ n‑na min dɔ yian an na. A ni an yii ma, mbɛ musu chɛ n na‑a wooya bai an dɔ yian ka an na. 12Chɛɛ Pita‑a a kɔɔ sɔ wan, mbɛ a ta‑a bui a kamba chɛ ma. A che‑a kɛn, a‑a a ma bun fan kamba chɛ da a, chɛɛ a‑a kasanche chɛ an yen dechee, a ma fen dɔ mende kan kɔ kan yen ni to. Mbɛ a yɛ‑a duu ɔ, a kɔndɔ fiienɛ a, a si koe chɛ ma min ma‑a ka.
Chisɔsi bɔ‑a mɔ fea n ya a, Emayɔsi chia ma
(Maki 16:12-13)
13Yatina, a tee dɔndɔ gbe chɛ a, Chisɔsi fɛ mɔ fea n ni wan ta tena konko dɔndɔ ɔ, min tɔ ni Emayɔsi. Emayɔsi chɛ an tɛ ɛ Chuusaɛn na, ɛ ma wan yɔ mai wɔnfea. 14An ni wan ta tena chia ɔ bɔɛ chɛ‑a, a si koe chɛ n gbɛɛ ma, miin ma‑a ka. 15An to‑a chia ɔ bɔɛ chɛ an na dɔndɔ a, mbɛ Chisɔsi wandi gbu gbɛn‑da an baima gbɛdɛn, mbɛ an bɛ bun‑da ta‑a an na. 16An gbu na‑a a yen fan, chɛɛ an nii ma a ɔ sɔn ni, mbɛ an nɛ. 17Mbɛ Chisɔsi ɔ, “N bɔ nu, wo e ka ta tena fen chia ɔ bɔɛ ɔ?”
Mbɛ an sɔ‑a gbɛ, an ya kɔɔɛ maenɛ digbi digbi. 18An dɔndɔ min tɔ ni Kiyopasi, a ɔ, “Mɔna, i dɔndɔ gbe chɛ, sonda mu i wan na dechee Chuusaɛn, min ma a ɔ sɔn koe miin ben‑da nɔ tee fea chɛ ɔ.”
19Mbɛ Chisɔsi ɔ, “Wuo, fen ko chɛ‑a a ɔ?”
Mbɛ an dɔ, “An‑na koe miin sɛ Chisɔsi ma, min ka‑a Nasaɛti duu ɔ. Kamin chɛ, Yataa 'a gbonka chɛ mɔɛ ni a a. A na‑a kamaya ko wa miin ma, a basan bai n na, a ni miin fɔ, an na‑a a ɔ yian fan, mbɛ Yataa ni wan a kɔ. Mɔɛ n gbɛɛ danden fan ni a a, mbɛ Yataa 'a gbasaya ni wan a ɔ. 20Mmɔ 'a mansa chɛ nu, mɔɛ chɛ n ko a, miin ni mmɔ tɛ ɔ Yataa a, an bɛ mmɔ kun ti n na, an ta‑a wan a a, Kɔfana Padeti chen kɔɔ. An toen ni a ni kaa a tɛ a faa koe ma. Mbɛ an‑na a gbangban fan kɔn gbengbandenɛ ma, mbɛ a fa‑a. 21Chɛɛ a ni wan nn 'na yiinachii ɔ, mbɛ an ni na tena mmɔ 'a Isɔɛɛ chɛnyɛ kun ka koe a. Chɛɛ chɛ gbɛɛ ɔ, tee sawan bɔɛ an nɛ bi, kɛn an‑na a fa. 22A sin to, nn bɛ ni musu miin dɔ n na, an‑na nn kɔndɔ fii wan. An ta‑a wan Chisɔsi kamba ma sayi chɛ ma, 23chɛɛ an ma a su yen ni kamba gbu ɔ. An sin yɛ‑a wan, mbɛ an‑na a ɔ yian to nn na, mbɛ an‑na maeka dɔ n yen fan nɔ. An dɔ, maeka chɛ n dɔ, mbɛ Chisɔsi‑a a kɔɔ sɔ, a yɛ‑a fɔɛ ɔ. 24Nn bɔɛ dɔ n bɛɛ, an ta‑a wan kamba gbu ma to, mbɛ an bɛɛ‑a a ɔ yen, yɔ musu chɛ n na‑a a ɔ yian buɛ min dɔ nn na. Chɛɛ an bɛɛ ma a wandi gbu yen ni nɔ.”
25Mbɛ Chisɔsi ɔ, “Wo wooen ba mu. Fen mu, wo ee fua dan‑da koe chɛ n na, Yataa 'a gbonka chɛ mɔɛ chɛ n‑na miin fɔ wo ye? 26A ma biaen fan ni kunka mansa ko a, a ni mɔnɛ ɔ bia. Chɛ an ni ma, Yataa e na to a kɔɔ sɔ‑a saya ɔ, a ni a sɛmbɛn banda bu ɔ.” 27Mbɛ a‑a a ɔ yian an na, koe miin nyɛnden ni a si a ma Yataa 'a gboo gbɛɛ ɔ. A‑a a kuu sɔ chɛ an ma, Mosisi‑a miin nyɛn, a ta Yataa 'a gbonka chɛ mɔɛ n gbɛɛ‑a miin nyɛn.
28Mbɛ an gbɛn‑da konko chɛ baima, an ni ta tena ka min dɔ. Chisɔsi‑a a ma wan, yɔ a toen ni a ni ben an konko chɛ ma. 29Chɛɛ an‑na a ɔ bia wan, an dɔ, “Mmɔ chi nɛ. Tee bea‑a gbɛ, a sin pimbi ɛ gbɛ bun koe an dɔ.” Mbɛ an bɛ ta‑a an na chenɛ a chi koe a. 30Mbɛ an bɛ si‑a an na daun chɛ tena, mbɛ Chisɔsi‑a biidi ya, a‑a Yataa wai bɔ a ko a, mbɛ a‑a a tɛ kai, mbɛ a‑a a du an ma. 31A ya kɔɔɛ a, mbɛ an‑na a ɔ gbɛ gbadan mbɛ Chisɔsi an nɛ. Chɛɛ a tuin‑da wan an tɛ ɔ. 32Mbɛ an bun‑da a fɔ‑a an nyɔn ye, an dɔ, “Chɛ an‑na a ma, mɔ bu ɔ ni di ka, mmɔ bɛ ni na tena tima min na chia ɔ bɔ chɛ‑a chia a, a yɛ to, tima min na a ni Yataa 'a gboo chɛ fasai tena mɔ tena.”
33Mbɛ a ya kɔɔɛ a, an‑na an kɔɔ sɔ, mbɛ an yɛ‑a Chuusaɛn duu ɔ. An na‑a Chisɔsi fɛ den tan kun ma dɔndɔɛ chɛ n tan fan, an na sɔndenɛ ɛ kaina dɔndɔ, an bɛ Chisɔsi fɛ mɔɛ dɔ n na, 34an mbe a fɔ‑a, an dɔ, “Mansa Chisɔsi‑a a kɔɔ sɔ, tea tea a. A bɔ‑a wan Saimɔn ya a.”
35Mbɛ kamin fea chɛ nu, miin ka‑a ka Emayɔsi, an‑na ko ɔ ko ɔ yian, min chɛ‑a a ɔ an tɛ an bɛ Chisɔsi a, Emayɔsi chia ma. Mbɛ an‑na a ɔ yian fan to, an fandi gbu na‑a Chisɔsi ma gbɛ buɛ min dɔ, a‑a biidi du kɛn an ma, tima min na an ni daun chɛ tena.
Chisɔsi‑a a wandi yian a fɛ denɛ n na
(Matiu 28:16-20; Maki 16:14-18; Chɔn 20:19-23; Chisɔsi 'a Sɔ Mɔɛ Nu 1:6-8)
36An to‑a bai chɛ an dɔ yian‑da, mbɛ Chisɔsi wandi gbu bɔ‑a an ya a, ɛ sɔ ɔ an tɛtɛ ma. Mbɛ a ɔ, “Yataa ni faachima be wo ma.”
37Chɛɛ an ma samba‑a wan, mbɛ an chian‑da a ɔ benden ba a, a mu min na, a ni wan an yii ma, mbɛ fuɛ an bɔ‑a ka an ya a. 38Chɛɛ a ɔ, “Wo ma chian n ma. A yɛ to, wo yiima ma tankan tankan a si n ma. 39Wo n boo n ma fɛn bɛ, wo ni n chenɛ n ma fɛn. Wo e a ɔ yen‑da wan, mbɛ n fandi gbu an nɛ. Wo tu n na, wo ni a ɔ yen, mbɛ n gboo ɛ wan, a basan n kuu n na. Chɛ an mbe a ɔ yian‑da wo a, mbɛ n fan gbu an nɛ, fuɛ ma chɛ a. A mu min na, fuɛ gboo ee, n mbe ee baa a kuu n ni ma.”
40A ban‑da kɛn chɛ fɔ‑a, mbɛ a‑a a boo n yian an na, a basan a chenɛ n na. 41An nii ma dan nin bɛ a a, ni Chisɔsi an ni ka koɔ tena an tena. A mu min na, buɔdia ni koo wɛ an dɔ, an sin da ɔ gbaaen fa ni to. Chɛ an fɛ ni, a‑a an dɔ tisa, a ɔ, “Fen kɔ fen mbe wan nɛ wo boo ɔ, a daun koe a?” 42Mbɛ an‑na nyɛ mindaenɛ tɛn dɔndɔ be a ma, 43mbɛ a‑a a bia, a‑a a daun an gbɛɛ ya kɔɔ.
44Mbɛ a ɔ, “Tima min na mmɔ bɛ ni, n na‑a a fɔ wan wo ye, mbɛ koe miin gbɛɛ nyɛndenɛ ɛ a si n ma, mbɛ an gbɛɛ ɛ bɔ‑a wan a a. Mbɛ ko ɔ ko sawa chɛ ɔ, Yataa‑a min be Mosisi ma, an bɛ Yataa 'a gbonka chɛ mɔɛ tɔɛ n na, a basan Yataa tando si gboo a, an gbɛɛ ɛ bɔ‑a wan a a.”
45A‑a a ma wan, an‑na Yataa 'a gboo ɔ gbɛ chɛndɛ chɛ. 46Mbɛ a ɔ, “Chɛ an nyɛnden mu Yataa 'a gboo ɔ. Mbɛ n fan, kunka mansa, mbɛ n mbe tɔɔya ɔ bia‑a pɛn, mbɛ n‑na n kɔɔ sɔ gbɛ a ka saya ɔ, tee fea a sawan bɔɛ ma. 47Yataa 'a gboo‑a a fɔ wan to, mbɛ a 'a sakana bai chɛ ɛ che‑a wan mɔɛ n ma dunya chɛ gbɛɛ ɔ n tɔɛ ɔ. Mbɛ mɔɛ n ni an kan kɔ sɔ an 'na ko yama n na, min mbe a ma, Yataa ni a boo bɔ an 'na ko yama n dɔ. A ɔ, an ni sakana bai chɛ ɔ yian Chuusaɛn duu pɛn dɔ. 48Wo wandi gbu‑a koe chɛ n gbɛɛ ɔ yen. Wo an dɔ yian mɔ ɔ mɔ a. 49Mbɛ a yen ko, n mbe a a yii‑a wan wo tena, Fa Yataa na‑a wo too ɔ dia‑a min na. Chɛɛ wo ma ka nɛ Chuusaɛn aan wo ni gbasaya ma sɔn, min mbe ka‑a banda bu ɔ.”
Yataa‑a Chisɔsi ya, a sɛ banda bu ɔ
(Maki 16:19-20; Chisɔsi 'a Sɔ Mɔɛ Nu 1:9-11)
50Mbɛ Chisɔsi‑a a fɛ denɛ n ya wan, mbɛ a bɔ‑a an na Chuusaɛn duu bu ɔ, a ta‑a an na Bɛtani tanda ɔ. A‑a a boo dɛn an kun ma, mbɛ a‑a an dua. 51A to‑a an dua an na, mbɛ a bɔ‑a an tɛ ɔ, mbɛ Yataa‑a a ya a sɛ‑a a a banda bu ɔ. 52Chisɔsi fɛ den chɛ n‑na an kumbai gbangban fan, mbɛ an‑na a fai, mbɛ an yɛ‑a Chuusaɛn buɔdia wa ɔ. 53An ni wan Yataa 'a kata ɔ, an mbe tando be‑a Yataa ma tima ɔ tima ko a.
Àwon tá yàn lọ́wọ́lọ́wọ́ báyìí:
DUKU 24: KONONT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
New Testament in Kono © The Bible Society of Sierra Leone, 2006.
