DEDI 7
7
Na iwa
1Ka panii-nanyaka i MIRI lai Nuhu, “Ba kuita-kau didi-maakau nyumu ba haàtu-mu mawànya na pambuha-nggu. Jia ba tuna tamawa la kapalu nyumu dàngu mbuu ndàbana na kuru umamu. 2-3Ngàndiwa pihu mawangu welingu la nimbihu ngara ma-hawurungu dàngu banda hawiangu da mahida, tàka da manda hida ha-mawangu-a welingu la nimbihu-da. Wamanya nuna ka màta welingu la nimbihu ngara banda ningu mamara welingu la molungu dàngu ka peku hilu woru belida la pinu tana. 4Pihu mbu lodu-kiaka ba ku-papuru-nya na urangu nda malàna lundu patu kambulu lodu patu kambulu rudungu, ka da-tàlaru mbuu ndàbada da ngara maluri da pambàda padika-nggu,” wànaya. 5Hàla hi nanunju hàlaha i Nuhu mbuu ndàbada da pa-pareta-na i MIRI lai nyuna.
6600 mbua ndau-naka na lurina i Nuhu ba natàka na iwa obungu la pinu tana. 7Ka tama-danyaka la kapalu i Nuhu dàngu papaha-na, dàngu da anana pa-kariangu papaha-da ba da-pamara wikida welingu la iwa. 8Heu mini heu baina welingu la nimbihu ngara ma-hawurungu dàngu banda hawiangu – da mahida dàngu da manda hida – 9datama la kapalu anguda i Nuhu, pa-jàngapu-nya na pareta-na i Ala. 10Pihu mbua lodu ka tàka-madua-nanyaka na iwa na ma-palumburu-nya na pinu tana.
11Nu ba 600 mbua ndau-naka na lurina i Nuhu, la tànggalu hakambulu pihu wulangu dua, tambuwa hàla-danyaka da matawai la unu tana. Mbuu ndàbada da katonga wai la awangu tabunggahu-danyaka, 12ka puru-nanyaka na ura kawalu patu kambulu lodu patu kambulu rudungu. 13La lodu nunama, i Nuhu dàngu papaha-na datama daa la kapalu pa-kariangu da anada ba dadua haàtu nu, i Hemu, i Yapitu dàngu i Hàmu lupa da papaha-da. 14Datama pa-kariangu ndàba dàngu nimbihu-da da ngara ma-hawurungu dàngu da banda hawiangu, da mamopu da ma-matàmba, da ma-bokulu da makudu. 15Heu mini heu baina welingu la nimbihu-da da ngara dika maluri datama hàla la kapalu kariangu i Nuhu, 16pa-jàngapu-nya na pareta-na i Ala lai nyuna. Ba dalundu ndàbangu-ka patama, bita-nanyaka na pindu kapalu i MIRI.
17Na iwa tungu pangalangu-mananya lundu patu kambulu lodu, na wai toma manjolungu-mana hi lupa peku halindingu-na na kapalu. 18Parukangu-mananya pajangga na wai, ka halindingu-nanyaka na kapalu la pinu wai. 19Na wai pa-nuangu-mananya pajangga, hi lupa na-lumburu-nja da palindi da majangga halawàla. 20Na wai hei pangalangu-mananya lupa natoma pihu metiru ba na-lumburu-nja da palindi jangga. 21-23I MIRI na-pamolu hàlaya na pa-padikangu na maluri la pinu tana yiana: Tau, ma-hawurungu, dàngu banda la kamara na makudu na ma-bokulu. Na manda molungu jia-aya i Nuhu dàngu da anguna da maninja daa la kapalu. 24Na wai nda naera la pa-hurutu lundu 150 loduna.
Àwon tá yàn lọ́wọ́lọ́wọ́ báyìí:
DEDI 7: KAM
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 1995 Indonesian Bible Society (Lembaga Alkitab Indonesia)