DEDI 1
1
Rukuna na padikangu pa-nggubulu awangu
1La kawunga, i Ala ba na-pakiringu pa-padika-nya na pa-nggubulu awangu,#La kawunga, i Ala ba na-pakiringu ... na pa-nggubulu awangu; jàka ndia: La kawunga pakiringu-na i Ala pa-padika-nya na pa-nggubulu awangu, jàka ndia La kawunga-na, na-pakiringu i Ala pa-padika-nya na pa-nggubulu awangu. 2na pinu tana ndedi ningu hadana, na pakili kiwarungu-pa. Na tehiku na manggibu nggabuna, na ma-palumburu hàlanya mbutana, na-panggumu-nya kapàta yuru yila, didi-aya na mbihana i Ala na mahiri la pinu wai.#La hilu Imbarani pekumbu-na ka tuna yia na-haleli-ndanya: tàka na Ngahuna i Ala, jàka ndia: dàngu na ngilu welingu lai Ala, jàka ndia: dàngu na ngilu bokulu. 3I Ala natuu liina, “Dediwa harii!” wàna. Nimanya na harii. 4Nahàmu na etina i Ala ba naita-ya nuna. Hàla na-kawàri-ya na harii welingu la kapàtangu, 5na harii, “Lodu” wànanya, tàka na kapàtangu “Rudungu” wànanya. Ba na-làpahu-ka na rudungu, mbaru-nanyaka. Nu, kawunga lodu-yaka.
6-7Tunaka nu natuu liina i Ala, “Dediwa hau hanggurungu ka naberi nduaya na wai, ka napàtu-ya la dàmbu pangia ma-pamaraungu,” wàna. Ka tu-madua-naka. Tuna nu ba na-pandoi-ya paraïna i Ala na hanggurungu na ma-kawàri-ya na wai la wawa hanggurungu welingu la wai na ma-ngiangu la dita hanggurungu. 8Na hanggurungu “awangu,” wànanya. Ba na-làpahu-ka na-rudungu, mbaru-nanyaka. Nu, lodu padua wànanya.
9Tunaka nu natuu liina i Ala, “Màlawa na wai na maninya la lumbu awangu ka na-lulungu la hau pa-ngiangu, ka nawuwa na mamàdu,” wàna. Ka tu-madua-naka. 10Na mamàdu “mamara” wànanya dàngu na wai ma-kahaungu “tehiku” wànanya paraïna i Ala. Dàngu nahàmu na etina i Ala ba naita-ya nu. 11Nahili tuu liina i Ala, “Màlawa na tana ka na-paluhu hàlaha da ma - màtu matumbu, nu da maningu wua daluda dàngu nu da maningu wuada,” wàna. Ka tu-madua-naka. 12Tuna nu na tana hi na-paluhu hàlaha da ma - màtu matumbu. Dàngu nahàmu na etina i Ala ba naita-ya nu. 13Ba na-làpahu-ka na rudungu, mbaru-nanyaka. Nu lodu patailu wànanya.
14-15Tunaka nu natuu liina i Ala, “Màlawa ka ningu maharii la awangu ka naharii-nya na pinu tana, ka kawàri wànya na lodu dàngu na rudungu, dàngu ka tanda wànya na rehi pakiringu-na, na lodu dàngu na ndaungu, dàngu na lodu bokulu anggama,”#na lodu bokulu anggama; jàka ndia: na rehi wandu na rehi urangu. wàna. Ka tu-madua-naka. 16Tuna nuduka i Ala ba nawulu-ha da maharii bokulu da madàmbu-da, na matalodu na manduma-nya la lodu dàngu na wulangu na manduma-nya la rudungu, hinggilu-da nuda nawulu-mbuha da kandunu. 17I Ala natuha nuda da maharii la awangu ka da-hambila-nya na pinu tana, 18ka da-kuaha-ya na lodu dàngu na rudungu, dàngu ka na-kawàri-ya na hambila dàngu na kapàtangu. Dàngu na hàmu na etina i Ala ba naita-ya nu. 19Ba na-làpahu-ka na rudungu, mbaru-nanyaka. Nu, lodu papatu wànanya.
20Tunaka nu i Ala natuu liina, “Màlawa daa la wai ka ningu ma-kanggàdaku ma - màtu dika maluri, dàngu ka ningu ma-hawurungu dangu ma-hawuru-nya na lumbu awangu,” wàna. 21Ka padika-nanjaka i Ala da banda bokulu la tehiku, dàngu mbuu ndàbada da ma-kayidi yadaku da maluri la wai, dàngu mbuu ndàbada da ma - màtu dika ma-hawurungu. Dàngu nahàmu na etina i Ala ba naita-ya nu. 22I Ala na-pakanyuru-nja mbuu ndàbada ba nawua-nja pareta da pa-padikangu da maluri la wai ka daworu bàba ka dapinu-ya na tehiku, dàngu da ma-hawurungu ka da-bonjangu padangu. 23Ba na-làpahu-ka na rudungu, mbaru-nanyaka. Nu lodu palima wànanya.
24Tunaka nu natungu liina i Ala, “Màlawa na tana ka na-paluhu-ha mbuu ndàbada da dika banda la mamara, da mamopu dàngu da ma-matàmba, da ma-bokulu dàngu da makudu,” wàna. Hàla ka tu-madua-naka. 25Tuna nuduka i Ala ba nawulu hàlaya dàngu nahàmu na etina Nyuna ba naita-ya nu.
26Tunaka nu natuu liina i Ala, “Nahu màlawa ka tawulu tau napa na mahama tuna Nyuta dàngu na mahama hadanda Nyuta. Nyudaka napa da ma-kuaha-ha da iyangu, da ma-hawurungu, dàngu mbuu ndàbada da banda hawiangu, da mamopu dàngumbu da ma-matàmba,#da banda hawiangu, da mamopu dàngumbu da ma-matàmba; wàna la pa-haleli weli ndaingu. Tàka la hilu Imbarani-na: da banda mopu dàngu nggubulu-na na pinu tana, wàna. da ma-bokulu màlambu da makudu,” wàna. 27Tuna nuduka i Ala ba na-padikangu tau, dàngu ba nawulu-ha hama-mana na wikina Nyuna. Na-padika-nja mini kawini. 28Hàlaka pa-kanyuru-nanjaka, ba napanii-nja, “Ipaana umbuku padangu-wa ka pekuna da wàla wuami ka dangia-nya na pinu tana nggubulu-na dàngu ka da-kuaha-ya. Nyimi ku-patanggu-nggai pa-tanara-ha da iyangu, da ma-hawurungu, dàngu mbuu ndàbada da banda hawiangu da ma-matàmba. 29Na nduma pangami kuwua-nggainja mbuu ndàbada da ngara matumbu da maningu wua dalungu dàngu da maningu wuangu. 30Tàka na ndumada da ma-hawurungu lupa da banda matàmba hawiangu, kuwua-nja rumba dàngu pingi ai ma-parungu ka dangangu,” wàna. Ka tu-madua-naka. 31I Ala na-panau-ha mbuu ndàbada da pambàda wuluna, kanjupu hàmu-aya na etina Nyuna. Ba na-làpahu-ka na rudungu, mbaru-nanyaka. Nu, lodu panomu wànanya.
Àwon tá yàn lọ́wọ́lọ́wọ́ báyìí:
DEDI 1: KAM
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 1995 Indonesian Bible Society (Lembaga Alkitab Indonesia)