GENESIS 10
10
Rinting horoi kare anak Noah
(1 Kro. 1:5-23)
1Jetoh rinting horoi kare anak Noah, iete Sem, Ham tuntang Yapet. Limbah danum soho ewen mandino anak hatue.
2Kare anak Yapet iete Gomer, Magog, Madai, Yawan, Tubal, Meseh tuntang Tiras. 3Turonan Gomer iete oloh Askenas, Ripat tuntang Togarma. 4Turonan Yawan iete oloh Elisa, Spanyol, Siprus tuntang Rodes. 5Ewen te tato hiang ain kare bangsa je melai hong kare pasisir tasik tuntang hong kare pulau.
Jete uras turonan Yapet. Genep bangsa tuntang suku melai hong lewue kabuat-kabuat, tuntang aton basae kabuat.
6Kare anak Ham iete Kus, Mesir, Libia, Kanaan. 7Turonan Kus iete oloh Seba, Hawila, Sabta, Raema tuntang Sabtakha. Turonan Raema iete oloh Seba tuntang Dedan. 8Kus bara anak hatue arae Nimrod je jadi oloh gancang je solake hong kalunen. 9Hapan pandohop Tuhan tuntang ie jadi oloh pamandop je abas. Awi te oloh hamauh, “Keleh Tuhan manjadian ikau oloh pamandop je abas kilau Nimrod.” 10Solake kerajaan ayue iete Babel, Erekh, tuntang Akad. Katelo-teloe te uras hong Babilonia. 11Bara hete ie haguet akan Asur, palus mampendeng lewu Niniwe, Rehobot-Ir, Kalah, 12tuntang Resen je aton helat Neniwe dengan Kalah. Urase te lewui hai.
13Turonan Mesir iete oloh Lidia, Ananim, Lehabim, Naptohim, 14Patrusim, Kasluhim tuntang Kaptorim. Oloh Kasluhim te tato hiang ain bangsa Pilistin.
15Kare anak Kanaan iete Sidon, je bakas, tuntang Het. 16Kanaan te kea tato hiang ain bangsa Yebusi, Amori, Girgasi, 17-18oloh Hewi, Arki, Sini, Arwadi, Semari tuntang Hamati. Kare suku oloh Kanaan te kasaburan hete-hete, 19sampai saran watas lewun ewen impalombah bara Sidon akan salatan manintu Gerar, sampai tokep Gasa. Tuntang akan hila timor manintu Sodom, Gomora, Adma, tuntang Seboim, sampai tokep Lasa.
20Jete uras turonan Ham. Genep bangsa tuntang suku melai hong lewue kabuat-kabuat tuntang aton basae kabuat.
21Sem, kaka Yapet, iete tato hiang ain bangsa Ibrani. 22Kare anak Sem iete Elam, Asur, Arpaksad, Lud tuntang Aram. 23Turonan Aram iete oloh Us, Hul, Geter tuntang Mas. 24Arpaksad bapa Selah. Tuntang Selah bapa Eber. 25Eber aton anake due hatue; ije arae Peleg, #10:25: Peleg: Huang basa Ibrani aran toh rimae “imbagi-bilah”. awi hong jaman te kare bangsa hong kalunen jari bagi-bagia. Je kaduee arae Yoktan. 26Turonan Yoktan iete oloh Almodad, Selep, Hasar-Mawet tuntang Yerah, 27Hadoram, Usal, Dikla, 28Obal, Abimael, Seba, 29Opir, Hawila tuntang Yobab. Uras ewen te turonan Yoktan. 30Kaleka ewen te sasar lombah bara Mesa akan Separ iete tanah bukit hila timor.
31Jete uras turonan Sem. Genep bangsa tuntang suku melai hong lewue kabuat-kabuat tuntang mahapan basae kabuate.
32Ewen handiai te uras turonan Noah, mije-mije bara bangsae, manumon rinting horoi ewen mije-mije. Ewen te je jadi asal turonan kare bangsa hong kalunen toh limbah danum soho te.
Àwon tá yàn lọ́wọ́lọ́wọ́ báyìí:
GENESIS 10: NIJ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@ LAI 2005