Luka 1
1
1Mũtĩe Theofilo: Antũ baingĩ nĩbandĩkĩte nteto jiĩgiĩ maũntũ marĩa mekarĩkĩte gũkũ gwetũ. 2Bandĩkire ta bũrĩa twameguire kumania na barĩa bamonire kuuma rĩrĩa mambĩrĩrie gwĩkarĩka, na barĩa bamaunjagia. 3Na nĩũntũ nĩntuĩrĩtie maũntũ monde wega, nĩmbonete kũrĩ wega nkwandĩkĩre mo na njĩra nkinyanĩru. 4Ndĩkwandĩkĩra nĩkenda ũmenya ũũma bwa maũntũ monde marĩa ũrutanĩtwe.
Kũmenyithanua kũjiarwa kwa Johana Mũbatithania
5Ĩndĩ ĩrĩa Herode aarĩ mũnene#1.5 mũnene Nĩ kuuga mũtongoria wa gũntũ kũnene. wa Judea, nĩ kwarĩ na mũthĩnjĩri Ngai wetagwa Zakaria. Zakaria aarĩ wa gĩkundi kĩa athĩnjĩri Ngai kĩa Abija, na nĩ aarĩ na mũka wetagwa Elizabethi, ũrĩa waumĩte rũrĩjoni rwa Arũni. 6Bo baĩrĩ nĩ baarĩ bagĩru mbere ya Ngai na nĩbaathĩkagĩra mathani na mawatho monde ma Mwathani batĩkũbĩtia. 7Bataarĩ mwana, nĩũntũ Elizabethi arĩ ndaata, na nĩ baarĩ bagũkũra mũno.
8Ntukũ ĩmwe Zakaria aarĩ Hekarũni#1.8 Hekarũni Kĩrombero kĩrĩa kĩnene kĩa Ayahudi kĩrĩa kĩrĩ Jerusalemu. akĩruta wĩra wa ũthĩnjĩri Ngai, nĩũntũ rĩarĩ rĩita rĩa gĩkundi kĩae kũruta wĩra kũu Hekarũni. 9Ta bũrĩa kwarĩ mũtugo wa ũthĩnjĩri Ngai, Zakaria akĩthuurwa na kuura gũtonya Hekarũni ya Mwathani kũĩthia ubani. 10Kagiita kau ubani yaĩthagua kĩrĩndĩ#1.10 kĩrĩndĩ Antũ baingĩ bethĩranĩte antũ amwe. gĩa antũ nĩ kĩarombaga kĩrĩ nau nja. 11Na rĩ, mũraika wa Mwathani akiumĩĩra Zakaria, akĩrũngama mwena wa ũrĩo wa kĩgongwanani#1.11 kĩgongwanani antũ arĩa kũrutagĩrwa kĩgongwana. kĩrĩa kĩaĩthagĩrua ubani. 12Rĩrĩa Zakaria amwonire akĩmaka, na akĩgwatwa nĩ ũkĩri. 13Ĩndĩ mũraika akĩmwĩra, “Tiga kwĩgua ũkĩri, Zakaria, nĩũntũ maromba maku nĩ meguĩtwe nĩ Ngai, na mũka waku agakũjiarĩra mwana wa kaĩjĩ, nagwe ũkamũtuĩra riĩtwa Johana. 14Kũjiarwa kwae gũgakũretera gĩkeno kĩnene, na antũ baingĩ bagakeneera kũjiarwa kwae. 15Akethĩrwa arĩ muntũ mũtĩĩku methoni ma Mwathani. Atĩkanyua ndibei kana anyua gintũ gĩnkĩrĩkithia ta ncobi, na kuuma kũjiarwa kwae akethĩrwa arĩ mwĩjũre nĩ Roho Mũtheru#1.15 Roho Mũtheru Etĩkia bangĩ nĩ baugaga Mwoyo Mũkembu.. 16Ningĩ nĩ agatũma antũ baingĩ ba Isiraeli bacokeere Mwathani Ngai wao. 17Akaathi arĩ mbere ya Mwathani arĩ na roho na inya ta ĩrĩa yaarĩ na kĩroria Elija, nĩkenda areta wĩgujano gatagatĩ ka ajiari na aana bao, na agarũre barĩa baganu bambĩrie kũthingataga mĩthiĩre ĩrĩa mĩagĩru, na akabangabanga antũ nĩkenda beteera Mwathani.”
18Zakaria akĩũria mũraika, “Nkamenya nteto ino irĩ o atĩa? Ndĩ mũkũrũ, na mũka wakwa no mũkũrũ.”
19Mũraika akĩmũcokeria akĩmwĩra, “Nĩ ni Gaburieli na nĩni ntũmagwa nĩ Ngai. Ntũmĩtwe mbĩja kwaria nagwe na nkũretera nteto ĩno mbega. 20Ĩndĩ nĩũntũ ũkũrega gwĩtĩkia bũrĩa ndakwĩra, ũrĩtuĩka buubu; ũtĩgũcoka kwaria nkinya rĩrĩa nteto ino igatuĩkĩka kagiita kajio gakinya.”
21Kagiita kau konde antũ nĩbeterete Zakaria, na nĩbarigaraga nĩ atĩa atĩnda kũu Hekarũni. 22Rĩrĩa aumire ataũmbire kũbarĩria. Kĩu nĩkĩo gĩatũmire bamenya atĩ nĩ onete kĩoneki arĩ kũu Hekarũni. Atacokire kwaria kaĩrĩ; atũmagĩra jiĩko jia njara kubeera bũrĩa gwekarĩka.
23Na rĩrĩa kagiita kae ga kũruta wĩra kathirire akĩĩnũka kwae mũjiĩ. 24Ntukũ ikũthiranga mũka wae Elizabethi akĩgĩa nda, na agĩkara atĩkuuma nyomba mĩeri ĩtano, akiugaga atĩrĩ, 25“Rĩu Mwathani nĩ arambĩguĩrĩre kĩao, ampereria nthoni irĩa ndararĩ najio mbere ya antũ.”
Kũmenyithanua Jesũ akajiarwa
26Mwerini wa ĩthandatũ kuuma Elizabethi akũgĩa nda, mũraika Gaburieli nĩ atũmirwe nĩ Ngai ntũũra yetagwa Nazarethi, kũu Galili. 27Atũmĩrwe kĩrĩ mwarĩ wetagwa Maria, ũrĩa ataarĩ aranamama na muntũ mũrũme. Maria aarĩ mũcoore#1.27 mũcoore Maria nĩ aũrĩtue nĩ Josefu atuĩke mũka wae, na eetĩkĩra. wa muntũ mũrũme wetagwa Josefu, ũrĩa warĩ wa rũrĩjo rwa Daudi. 28Mũraika agũkinya kĩrĩ Maria nĩ amwĩrire, “Muga mwarĩ mwendeereku. Mwathani arĩ amwe nagwe!” #1.28 Mandĩko mangĩ ma tene nĩmongagĩĩra: “Kũtharimwa nĩgwe gatagatĩni ga aka!”
29Maria agĩtangĩka mũno nĩ jiugo iu, akĩũragia bũrĩa rũkethi rũu rwonanagia. 30Ĩndĩ mũraika akĩmwĩra, “Tiga kũmaka Maria. Ũrĩ mwendeere nĩ Ngai. 31Atĩrĩ, nĩ ũkũgĩa nda na ũjiare mwana wa kaĩjĩ, na ũkamũtuĩra riĩtwa Jesũ.” 32“Agatuĩka muntũ mũnene, na agetagwa Mwana wa Ũrĩa ũrĩ Ĩgũrũ Mũno; na Mwathani Ngai akamũtua mũnene o ta bũrĩa aatuĩte Daudi, ĩthe wae wa tene, 33akaatha njiarwa jia Jakubu tene na tene; na ũnene bwae bũtĩkathira.”
34Maria akĩũria mũraika, “Ũntũ bũbũ bũnkĩũmbĩka atĩa na niũ ntanamama na muntũ mũrũme o na ũrĩkũ?”
35Mũraika akĩmũcokeria, “Ũkejĩĩrwa nĩ Roho Mũtheru, na inya ya Ũrĩa ũrĩ Ĩgũrũ Mũno ĩkũguĩkĩre; na kwogu mwana ũrĩa ũkajiarwa agetwa mũtheru, Mwana wa Ngai.
36Na atĩrĩ, Elizabethi, muntũ mũka wa mbarĩ yenu o nawe arĩ na nda ya mwana wa kaĩjĩ, anarĩ mũkũrũ, tiga ũgu etagwa ndaata, na ũũ nĩu mweri wa ĩthandatũ arĩ na nda. 37Nĩkwĩthĩrwa gũtĩ bu bũremaga Ngai.”
38Maria akĩmũcokeria, “Niũ ndĩ ntungata ya Mwathani. Nĩgwĩkare kĩrĩ ni o ũgu wauga.” Mũraika akĩmũtiga akĩthiĩra.
Maria kũriũngĩra Elizabethi
39Ntukũ nyingĩ itĩthirĩte Maria nĩ aũkĩĩre akĩthi ajiũĩte kũu ndĩ yaarĩ ya irĩma ya Judea, ntũũra ya Juda. 40Akĩthũngĩra nyomba ya Zakaria, agĩkeethia Elizabethi. 41Na rĩrĩa Elizabethi eegwire nkethi jia Maria, kaana kau kaarĩ nda yae gakĩthakathaka; nawe Elizabethi akĩgwatwa nĩ Roho Mũtheru, 42akĩugĩĩria, “Ũrĩ mũtharime nkũrũki ya aka bonde, na mwana ũu ũkagĩa nawe nĩ mũtharime. 43Nĩka bũrĩ ũntũ bũnene atĩa gina wa Mwathani wakwa ejĩte kũndiũngĩra! 44Nĩ tontũ rĩrĩa mbĩguire mũgambo wa nkethi jiaku kaana karĩa karĩ nda yakwa nĩkathakathakire nĩ gĩkeno. 45Ũrĩ mũtharime, nĩũntũ nĩwetĩkirie atĩ ntũmĩri ya Mwathani ĩkaingĩka.”
Rwĩmbo rwa Maria rwa ũkumĩo
46Nawe Maria akiuga,
“Nkoro yakwa nĩgũkumia Mwathani,
47na mwoyo wakwa nĩũkenete nĩũntũ bwa Ngai Mwonokia wakwa;
48nĩntũ nĩ aririkanĩte kwĩnyiyia gwa ntungata yae ya mwarĩ,
Nĩkwĩthĩrwa rĩu njiarwa jionde ikambĩtaga mũtharime;
49nĩũntũ bwa maũntũ manene marĩa Ngai Mwene Inya andũthĩte,
na riĩtwa rĩae nĩ rĩtheru.
50Kĩao kĩae nĩ gĩkinyagĩra barĩa bamũtĩĩte,
kuuma njiarwa nkinya njiarwa.
51Nĩ onanĩtie inya ya njara yae,
na akaragania barĩa barĩ nkoro jia mwĩtio.
52Nĩ arutĩte athani itĩni jiao,
Na akaneneyia barĩa batĩ ĩgweta.
53Nĩ atongetie nkĩa na into mbega
Na akengata itonga bitĩ gĩntũ.
54Nĩ atethetie ntungata yae Isiraeli,
aririkana kũmwĩguĩra kĩao,
55Ta bũrĩa augire akaingĩria bethe betu,
Aburahamu na njiarwa jiae tene na tene.”
56Maria agĩĩkara kwa Elizabethi ta mĩeri ĩthatũ, agĩcoka akĩnũka mujiĩ kwae.
Kũjiarwa kwa Johana Mũbatithania
57Kagiita ka Elizabethi ga kũgĩa mwana nĩgakinyire, na akĩgĩa na mwana wa kaĩjĩ. 58Nabo antũũra na antũ ba mbarĩ yao bakwĩgua bũrĩa Mwathani amwĩguĩrĩte kĩao bagĩkenanĩĩra amwe nawe.
59Ntukũ ya inyanya bakĩja gũtana kaĩjĩ kau; na bakendaga gũgatuĩra riĩtwa bagete Zakaria, ta ĩthe wa ko. 60Ĩndĩ gina wa mwana akiuga, “Arĩ! Mwana arĩtwa Johana.”
61Nabo bakĩmwĩra, “Gũtĩ muntũ wa mbarĩ yenu wĩtagwa ũgu!” 62Bakĩarĩria ĩthe wa kaana na jiĩko bakĩmũũria bũrĩa ankĩenda mwana eetwa.
63Zakaria akĩonanĩria areterwe kabaũ ga kwandĩkĩra, akĩandĩka, “Riĩtwa rĩako nĩ Johana.” Antũ bakĩrigara mũno. 64O rĩo Zakaria akĩrugũka, akĩambĩria kwaria, agĩkumagia Ngai. 65Antũũra bao bonde bakĩgwatwa nĩ ũkĩri, na maũntũ mama monde magĩtambua na mĩario kunde ndĩ ya irĩma ya Judea. 66Antũ bonde barĩa begujaga maũntũ mau nĩbameciragia mũno bakĩũragia, “Ĩ nĩka mwana ũũ agatuĩka ũ?” Nĩ tontũ inya ya Mwathani yaarĩ amwe nawe.
Ũroria bwa Zakaria
67Zakaria, ĩthe wa kaana, nĩ ejũrirwe nĩ Roho Mũtheru na akĩroria akiugaga,
68“Mwathani Ngai wa Isiraeli arokumua,
nĩ tontũ nĩ arejire gũtethia antũ bae na kũbakũũra,
69nĩ atũete mwonokia ũrĩ inya,
kuuma kĩrĩ rũjiaro rwa Daudi, ntungata yae,
70ta bũrĩa aaririe gũkũrũkĩĩra tũnyua
twa iroria jiae nderu,
71atĩ agatwonokia kuuma kĩrĩ anthũ betũ
na kuuma kĩrĩ barĩa batũthũĩre.
72Nĩ augire atĩ akeguĩra bethe betũ kĩao,
na aririkane kĩrĩkanĩro kĩae kĩtheru,
73Nĩ ethiĩtĩrie ĩthe wetũ Aburahamu,
Atĩ agatũingĩria kĩrĩko
74kwonokua kuuma kĩrĩ anthũ betũ,
nĩkenda tũmũtungatagĩre tũtĩ na ũkĩri,
75tũrĩ antũ batheru na tũrĩ bagĩru mbere yae,
ũtũroni bwetũ bunde.
76Nagwe, kaana gaka, ũgetagwa kĩroria kĩa Ngai Ũrĩa ũrĩ Ĩgũrũ Mũno;
Nĩ tontũ ũkathi ũrĩ mbere ya Mwathani kũmũthondekera njĩra;
77Ũkamenyithie antũ bae atĩ bakonokua,
na njĩra ya kũrekerwa meyia mao,
78Ngai wetũ arĩ kĩao kĩnene mũno;
Agatũma twarĩrwe nĩ werũ bwa wonokio bumĩte ĩgũrũ,
79bwarĩre antũ bonde barĩa batũũrĩte ntumani na ũgwatini bwa gĩkuũ,
bũterekerie njĩrani ya ũkiri.”
80Nawe mwana ũu agĩkũra na akĩgĩa na inya kĩroho. Agĩtũũra rwanda nkinya ntukũ ĩrĩa eonithanirie kĩrĩ antũ ba Isiraeli.
Àwon tá yàn lọ́wọ́lọ́wọ́ báyìí:
Luka 1: LUKA
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
God's word open for all
©Bible Society of Kenya, 2021
