Matius 3
3
Yohanes to simantedok
1Masaei mangkanna, saemi Yohanes to simantedok dio padang alla' illalan lembangna Yudea anna parandukki umpalanda' kadanna Puang Allata'alla nakua: 2Mengkatoba'mokoa' annu madappi'mi kasaeanna kaparentaanna Puang Allata'alla. 3Yohanesmo napatu kadanna nabi Yesaya anna ma'kada nakua:
“Dengan tau dio padang alla' metamba tamba nakua:
‘Patokanni lalan Dewata,
maloloananni lalan la naola.’ ”#3:3 Yes. 40:3
4Inde Yohanesto simantedokke bulu unta napa'bayu anna balulang napa'beke',#3:4 bulu unta napa'bayu anna balulang napa'beke': Pakeanna Yohanes susi sinapake nabi Elia yolona (2Raj. 1:8). Narannuam liupi to Yahudi la sae pole Elia tama lino umpatokaan lalan To dibasei bayu-bayu la ma'pasalama' (Mal. 4:5-6; Mat. 11:14, 17:10-13). bando' sola duro naponande. 5Sasaeammi tau lu dio mai Yerusalem, anna dio mai lembangna Yudea anna angganna tondok dio sikadappi'na Salu Yordan umpellambi'i Yohanes. 6Ummakui asammi kasalaanna anna tedokki dio Salu Yordan.
7Buda duka' to Farisi sola to Saduki#3:7 to Farisi anna to Saduki, dua kombonganna perepi' illalan alukna to Yahudi. sae umpellambi'i annu morai la ditedok. Sapo naitanna Yohanes, ma'kadami lako nakua: “O anggammua to kadake gau',#3:7 to kadake gau': Illalan basa Yunani nakua: peampoanna ula'. musangarikaa la malakoa nasala' ara'na Puang Allata'alla? 8Pakawananni kumua mengkatoba' tongammokoa' ummolai panggauammua'. 9Daua' anna kendek illalan penawammu kumua tae'koa' la napabambanni sangka' Puang Allata'alla annu peampoannakoa' Abraham. Annu kutulasangkoa' sitonganna, inde mai batue la mala napopendadi peampoanna Abraham Puang Allata'alla. 10Tokami wase dio to' kayu la dilellengan kayu tae' kembua mapia anna ditibe tama api. 11Wai kao kutedokangkoa' la tandana kumua mengkatoba'mokoa'. Sapo dengan la sae windingku marru untondon kakuasaangku annu moi angga palopakna la kualaianni, tae'na' la sipato'. Inde taue Penawa Masero sola api la natedokangkoa'. 12Tokami petappi dio limanna la natappian gandum. Angganna gandum malapu' naanna tama talukun, anna tappianna la ditibe tama api tae' la nabela pi'de.”
Puang Yesus natedok Yohanes
Mrk. 1:9-11; Luk. 3:21-22; Yoh. 1:32-34
13Attu iatoo, saemi Puang Yesus dio mai Galilea umpellambi'i Yohanes dio Salu Yordan la natedok. 14Sapo nasandak Yohanes nadapai nakua: “Sitonganna kao la sipato' mutedok. Maakari anna Ikora sae umpellambi'ina' la kutedok?”
15Sapo natimba' Puang Yesus nakua: “Pabeaina' mutedok temo annu la taola ungganna'i angganna pa'kuanna Puang Allata'alla,” Naturu'mi Yohanes pelaunna napolalan natedok.
16Mangkai ditedok, kendekmi dio mai wai Puang Yesus. Ummitami langi' titungka' anna turun Penawanna Puang Allata'alla susi dangan-dangan urrampoii. 17Dirangngi siami kamara yao mai suruga nakua: “lamo te Anakku to kukamaseie anna to umpomasannang penawangku.”
Àwon tá yàn lọ́wọ́lọ́wọ́ báyìí:
Matius 3: MQJ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2011 Indonesian Bible Society (Lembaga Alkitab Indonesia)
