KAJADIAN 3
3
Manusia madi'mo nohongo-hongo Tumpu Allah
1 #
Why. 12:9, 20:2 Ulo binatang anu talalo hondo pande, nu lingkudui iwi-iwi' na binatang anu pinotimbalimo nu Tumpu Allah. Ulo aijo' nompokilawa hi boune aijo', “Pa' totu'u na Tumpu Allah nontewa'mo komiu mongkaan bua' nu kau' haha aijo' iwi-iwi' i taman aiya?”
2“Kami timbali mongkaan bua' nu kau' haha aijo' toto sampu'un anu i uno nu taman aiya”, tinaaman nu boune aijo', 3“Panyo bua' nu kau' anu i totonga' nu taman aijo' madi' timbali okaan. Tumpu Allah nontewa' kami mongkaan bua' nu kau' aijo' kabai mau ola mongkanyang; de obau mami kami silakamo.”
4Ulo aijo' nontaami, “Aijo' madi' totu'u; komiu madi' silaka. 5Tumpu Allah nontaloakon sumo aijo' kalana Nu sumbu' de okaan nu belemiu na bua'nyo aijo', tabuka'mo na pikilan miu; komiu timbalimo susumo Tumpu Allah ka' monsumbu'mo apaa na anu ma'ima' ka' apaa na anu ma'idek.”
6Tinoa nu boune aijo' na pu'un nu kau' aijo' taalu' ma'ima' ka' bua'nyo tinoanyo ma'ima' na okaan. Ka' ia binapikinmo mosia na ko ima'nyo de ia timbalimo pande. Kalana aijo tinipunyomo na bua' nu kau' aijo' ka' kinaannyo, ka' suele binee'annyomo na langkai'nyo ka' suele nongkaanmo. 7Noko kaan bua' nu kau' aijo' balomo pikilan nu aha tinabuka', ka' sinumbu'mo nu aha taalu' aha langgo-langgo'. Kalana aijo' butong nu aha kinukubanmo nu aha nu hon nu kau' ara anu sinomotanmo nu aha.
8Mamalom sinaa aijo' aha nohongomo Tumpu Allah i lumajang i uno nu taman, lantas ua-ua'aha naninsulukmo i olot nu to kau-kau' da madi' nutoa nu Tumpu. 9Panyo Tumpu Allah noloboo'imo mo'ane aijo', “Iya na beleyum?”
10Mo'ane aijo' nontaami, “I hongongkumo na Belento i taman, aku nabuhukmo, jadi aku naninsulukmo kalana langgo.”
11“Ihe na nompoto'i hi beleyum tukoonyo beleyum langgo'?” Pinokilawa nu Tumpu Allah. “Pa' kinaanmo nu beleyum na bua' nu kau' anu tine-tinewa'-Kumo, boli okaan na aijo'?”
12Mo'ane aijo' nontaami, “Boune anu bine-binee' mae nu Belento da bau sangalungku na nombee'imo mae bua' nu kau' aijo' hi belengku lantas kinaankumo.”
13 #
2Kor. 11:3, 1Tim. 2:14 Tumpu Allah nompokilawamo hi boune aijo', “Kadaka' binau'mo nu beleyum na aijo'?”
Tinaamannyo, “Aku ingakalanmo nu ulo, sahingga kinaankumo na bua'nyo nu kau' aijo'.”
Tumpu Allah nonabu'akonmo hukuman
14Lapas aijo' Tumpu Allah notataemo hi ulo aijo', “Oko ohukumo kalana nombaumo kasala'an atina'; iwi-iwi' na binatang ola oko na montanggung kutuk aiya: O tampu'uni uuka aiya, oko jumolomo nu kompongum, ka' mongkaan abu' sampe toka sidu-sidutu' i uno nu kantumuu'anum. 15#Why. 12:17 Oko ka' boune aijo' saja' mompaha ka'i-ka'ideki, lee'nyo ka' lee'um saja' mompahabali'. Lee'nyo mohansuni ubakum ka' oko monsa'u pantigan nu aha.”
16Lantas Tumpu notataemo hi boune aijo', “Ku paka posakit na beleyum de beleyum poboamo ka' de beleyum mohampeakonmo. Panyo mau mule' sumo aijo', beleyum daagi' saja' ko kinyonyoa moduhus tiba langkai' nu beleyum, ka' mule' beleyum tionyo tulu-tulutan hi ia.”
17 #
Ibr. 6:8
Lantas Tumpu notataemo hi mo'ane aijo', “Beleyum nohongomo potatae nu bengkele' nu beleyum, lantas nongkaanmo bua' nu kau' anu tinewa'-Kumo boli okaan. Kalana apaa na anu binaumo nu beleyum aijo' sahingga tano' kinutukan-Kumo. Beleyum tionyo mokalaja make-makeke sampe toka sidu-sidutu' i uno nu kantumuu'an nu beleyum, da tano' aiya timbali mohasinakon kaanon anu sukup hi belemiu. 18Tano' mompotumuu'mo kuhat ka' anu ko hii'nyo anu o'oa'ije nu belemiu, ka' anu tumuu' i kuhat timbalimo kaanon miu. 19Sansala ka' malisongu na mokalaja da tano' mohasinakon apa-apaa, sampe beleyum po'ule'mo minsusule' i tano', kalana beleyum tano' na kinompon. Beleyum tano' na binau ka' po'ule' minsusule' i tano'.”
20I Adam nonsanggohimo bengkele'nyo i Hawa, kalana boune aijo' tina nu iwi-iwi' na manusia. 21Lantas kilit nu binatang binaumo nu Tumpu Allah bau pombaju'i i Adam ka' bengkele'nyo, lantas pinopusok-Nyomo hi aha.
I Adam ka' i Hawa i laa'mo nosabat i taman Eden
22 #
Why. 22:14
Tumpu Allah notataemo, “Uuka aiya manusia tinimbalimo susumo Kita ka' nonsumbu'mo anu ma'ima' ka' anu ma'idek. Jadi palalu ahi' otewa' na ia mongkaan bua' nu kau' anu mombee'i kantumuu'an, da ia boli tumuu' sampe toka sidu-sidutu'.” 23Sahingga i laa'mo nu Tumpu Allah na manusia nosabat i taman Eden ka' nompokaumo mongusahakon tano' anu pinolengkatannyo mae aijo'. 24Lapas aijo', i sasu kabete'an nu taman aijo' i ahop nu sabatan pinsoopan, Tumpu Allah nompojoongmo to mala-malaekat, ka' samata na bajak anu ko apunyo anu tumoyo i songko-songko na tampat aijo' monjagai jalan mokiijo' i kau' anu mombee'i kantumuu'an aijo'. Tiba jalan anu sumo aijo' madi' ko samian pe'e na moko ala minsoop ka' mongohani kau' aijo'.
Àwon tá yàn lọ́wọ́lọ́wọ́ báyìí:
KAJADIAN 3: LAILOE
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀