Matius 3
3
Yohanes gato ras nje mo syur ne duno nje
(Mrk. 1:1-8; Luk. 3:1-18; Yoh. 1:19-28)
1Orete Yohanes gato ras nje mo syur ne mu mo pe gato kwe yo kom mo nde mo bur Yudea. Yohanes duno nje mone. 2An ki do, ”Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, nin jammo Yefun Allah et.” 3Yenabi gato gum do Yesaya anato krom sukdu subot Yohanes ré. Yesaya krom do,
”Mo pe gato kwe yo kom mo nde, ye yo saiye do,
’Men fro os gato ndo wa Yefun, men bi Yekwesu ne se!
Men duk os wa An muket se!’ ”
4Yohanes it san gato ye jom kadit unta go. An far an jakuke su suge da det yo. Yohanes bi sugit-i gato an git kamdik-kamdik anato yoi si for rom. 5Ye Yerusalem si yé mo bur Yudea sisu yé mo pe gato karowa Syur Yordan ne sino ma wa syaretwa sukdu gato Yohanes ki ne. 6Yé gato rek sukibit gato án ben ne nai Yohanes sa, Yohanes ras yé ne mo Syur Yordan.
7Ye Farisi si ye Saduki mwa ma mo Yohanes wa Yohanes ras án mo syur, sarewo Yohanes me án ma sa, Yohanes ki do, ”Nin yé gato kidar suk nggi, nin tepsu kwis jan, nin nut do, nin ma wa ji ras nin mo syur, bere ós nin titi fro kadit Yefun Allah bi sukmaskwa mo sukibit gato nin ben ne bado? Sane nde, nin kwet kadit sukibit gato nin ben ne dom et. 8Nin ben suk gato ndo sor, subere ye jam do, sangge, nin kwet kadit sukibit gato nin ben ne it. 9Nin nut do, nin bi amui mo Abraham {anato Yefun Allah iwa nin, sane bere Yefun Allah nai nin kadit sukye, bado? Sane nde. Nin nut sane bere siri re.} Ji ki sare do, Yefun Allah nggiwa ben jok bok ré tepsu Abraham bi dat-i. Sane nin dom tepsu Abraham bi dat-i, bere yo ós nin nde. 10Wo nin ré tepsu kwe gato yo bo ndo nde. Su ré yo, Yefun Allah fro bi mbam wa gwa kwe gato sane wé, Yefun Allah gwa mo i-brot kai. Yefun Allah fro wa syo sukye nai ye gato yo kwet nde, tepsu ye gwa kwe gato yo bo nde ne, orete ye syo bot git wé re. 11Ji anato ras nje mo syur tepsu bi sukjimnut do, ye ne kwet kadit os ibit it. Wo bere Ye yo gato gum kok sye wai kadit ji waii ma bori. Ji gum yo tep wa ji jom An bi sepatu nde. Ji gum wok teker mu bur ware. Ye gato gum kok sye wai kadit ji ne, bere An syogat Yefun Allah Gen bok nggwa mo nin, ben sato An ras nin mo Yefun Allah Gen, tepsu An ras nin mo bot. 12An fro nggwa wa An wat yé gato ben sukndo kadit yé gato ben sukibit, tepsu ye gato ben nggwe wat sugit dor kadit sukkwik. Sugit ne An grem mo pe gato ndo, wo sukkwik ne An syo bot git wé, mo bot gato yo te mo nde.”
Yohanes ras Yefun Yesus mo syur
(Mrk. 1:9-11; Luk. 3:21-22)
13Orete Yefun Yesus ma kadit bur Galilea mu mo Syur Yordan. Mone Yefun Yesus ma ku Yohanes, ete kiwa Yohanes ras An mo syur. 14Sarewo Yohanes duyawa Yefun Yesus. Yohanes ki do, ”Mban! Nan ana ras ji mo syur sa. Wo Nan ma wa ji ras Nan mo syur wa suma ne?”
15Sarewo Yefun Yesus ki do, ”Nan ras Ji sor. Nan ras Ji, we Yefun Allah mit iwa nan ben sane.” Sane Yohanes ras Yefun Yesus mo syur.
16Yohanes ras Yefun Yesus mo syur, orete Yefun Yesus mu nden kadit syur. Yefun Yesus mu nden sa, gu ben sato det, ete An me Yefun Allah Gen is ma su kaim sato ndabu ete tom mo An. 17Orete yé mwa ne jam Yefun Allah ki sukdu kadit gu nim ne sare do, ”Ji dakai bi Gan anare. Ji bi sukjimnut sye kas subot An. Ji mit iwa An ndo nde.”
Àwon tá yàn lọ́wọ́lọ́wọ́ báyìí:
Matius 3: KGR
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2004, 2014
