MATIUS 3
3
Yohanes Ḇeḇemasasi sren
3:1-12
(Mrk. 1:1-8; Luk. 3:3-9, 15-17; Yoh. 1:19-28)
1Rofyor Yohanes Ḇeḇemasasi Sren ryama ro sup ḇeursḇa Yudea ma ḇyaryas: 2#Mat. 4:17; Mrk. 1:15 “Mkombror, snar Ḇaḇesasoser Boiyas fyanam kwar!” 3#Yes. 40:3 Kaku beri iso Nabi Yesaya ikofen ḇaryar rofyor doḇo:
“Mkaren snonkaku ḇekaru ro sup ḇerursḇa:
‘Mkofasos nyan faro Manseren,
mkofrur nyan ḇeaḇyoḇer faro I.’ ”
4 #
2Raj. 1:8
Yohanes syun syatu ro onta bur, ma ḇeḇoḇek ḇyedi ro aiwan kif, ma roḇean ḇyena kampam ma umbersup. 5Kawasa ḇekain ro Yerusalem, ma Yudea ḇesiper ma ro war Yordan ḇesiper srakam faro i. 6Raimnai skarem sasar sena ma Yohanes ḇyuk masi sren faro si ro war Yordan.
7Ḇape rofyor myam kawasa Farisi ma Saduki sya siḇor sakrama ma sakor masi sren, inja ikofen faro si ḇodoḇo: “Ne ikak ḇeknampu kpu ḇyena mko. Mansei ḇekofen faro mko, insa mkofrarḇur masasor nari ḇerama? 8Inja mkoḇuk bon ḇemnis kuker marandor ḇekaku. 9#Yoh. 8:33 Ma mkokara awer ro mkosnemna mkoḇo: Nkoine kma nkoḇedi Abraham! Yakofen faro mko: Allah ipok kaku fa ifrur romawa faro Abraham ro karui nane! 10#Mat. 7:19Mkanya fyasos kwar ro ai fuarya, ma ai knam ḇeḇuk bon ḇepyumba, nari neḇeroḇen ma sikun na ro for. 11Yaḇuk masi sren faro mko kuker war imnis aḇyair marandor, ḇape ḇera papur aya Ikada Ipoksyadi ro aya ma yasyusḇa fa yaper roi ḇesower wemin ḇyesi. Ikada nari ḇyuk masi sren kuker Rur Ḇesren ma kuker for. 12Badei ḇeras isya kwar ro Ḇramin ḇyesuya. Nari Ifrur sren sayar aḇrui ḇyedi, ma iryur aḇrui ḇyesi ro kron, ḇoi pissya nari ikunsi ro for ḇepok ḇembrerḇa.”
Yohanes ḇyuk masi sren faro Yesus
3:13-17
(Mrk. 1:9-11; Luk. 3:21-22; Yoh. 1:32-34)
13Yesus ryama ker Galilea ḇe Yordan faro Yohanes insa Isma masi sren ro i. 14Ḇape Yohanes kyurpum ḇe I, ḇodoḇo: “Aya iso ḇesmai masi sren ro Aukada, ḇesyaḇo Woḇo rwama faro aya?”
15Inja Yesus kyarem, ma Ikofen faro i: “Iḇye roi ḇeḇesya nane ndarirya mura, insa kuḇeimnis Allah marisen ḇyena kam.” Inja Yohanes isouser I.
16Isma masi sren kwar, Yesus Isasyar fasau bur warya ma ro fafisu ani beri nanki ḇyas ma Myam Rur Allah imnis manjawa dado faro I, 17#Kej. 22:2; Mzm. 2:7; Yes. 42:1; Mat. 12:18, 17:5; Luk. 9:35 ma simnaf mkaren ro boiyas ḇekofen: “Inekada Romawa Yaswar kaku, faro I Ya ḇeḇare.”
Àwon tá yàn lọ́wọ́lọ́wọ́ báyìí:
MATIUS 3: LAIBHW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
