Salmos 20
20
1Rinábidaʼ-nëʼ Xanruʼ uzë́ naguëʼ liʼ cateʼ idxín dza quiʼi sacuʼu.
Dios queëʼ Jacob gácalenëʼ liʼ.
2Rinábidaʼ-nëʼ isö́l-lëʼë le gácalen liʼ le irúaj lataj láʼayi queëʼ.
Lë naʼ irúaj Sión gun ga gacuʼ tsutsu.
3Rinábidaʼ-nëʼ tsöjnenëʼ yúguʼtë le gulúʼu queëʼ,
en siʼ lu nëʼë le buzéguiʼu lahuëʼ.
4Rinábidaʼ-nëʼ gunnëʼ quiuʼ tsca naca le rizë́ ládxuʼu,
en gunëʼ ga gácatë yúguʼtë le rizáʼ ládxuʼu.
5Udzéjatuʼ cateʼ usölë́ʼ liʼ,
en uchísatuʼ le gaca bëʼ rulidztuʼ-nëʼ Dios queë́ruʼ.
Rinábidaʼ-nëʼ Xanruʼ gunnëʼ quiuʼ yúguʼtë le rinábinuʼ Lëʼ.
6Naʼa nözdaʼ rusölë́ʼ Xanruʼ nu nabö́ cazëʼ.
Riyönnëʼ nu naʼ nabö́ëʼ ga niʼ zoëʼ yehuaʼ yubá laʼayi queëʼ.
Isö́l-lëʼë yöl-laʼ huáca idú queëʼ le usölá nu naʼ.
7Nacuáʼ nupa tuʼzxöni ladxiʼ yuguʼ carreta que gudil-la,
ateʼ nacuáʼ bönachi yúbölö tuʼzxöni ladxiʼ yuguʼ böaʼ,
pero rëʼu ruzxöni ládxiʼruʼ Lëʼ Xanruʼ Dios.
8Taʼcuídiʼnëʼ nupa naʼ, en taʼdzöʼë,
pero rëʼu ni zuíruʼ, en zóaruʼ tsutsu.
9Busölá netuʼ, Xan, tuʼ nacuʼ Nu rinná beʼe netuʼ.
Rinábituʼ Liʼ uzë́ naguʼ netuʼ cateʼ ulídzatuʼ Liʼ.
Àwon tá yàn lọ́wọ́lọ́wọ́ báyìí:
Salmos 20: zar
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2009, Wycliffe Bible Translators, Inc. All rights reserved.