Ŋitic. 14
14
Tolimonokis Paulo ka Baranaba alo Ikonio
1Alo Ikonio, toloto Paulo ka Baranaba lopite ŋolopei sek, tooma esinagoga a Ŋiyudayan. Kirworo ikes a nen alopite a ŋolo abu kitunup Ŋiyudayan ŋulu alalak ka ŋulu pa arae Ŋiyudayan ŋakiro a Yesu. 2Nai apotu Ŋiyudayan ŋulu awounito akinup kiguryakis ka kicocoa daŋ ŋituŋa ŋulu pa arae Ŋiyudayan akitoroniyar ŋikanupak. 3Aŋun, kiboiyoto Ŋikiyakia a nen apaki ŋina aoyan, kirworos ŋakiro ŋuna ke Ekapolon pa ekuryanito. Abu Ekapolon kiteyenu ebe erae ŋuna a kire ŋakiro ŋuna erworosi ikes, aŋuna ainakinia ikes apedor ŋinakitiyaet ŋakujuwuanisya ka ŋaumonokineta. 4Nai atyakatyaka ŋituŋa ŋulu ke etaun; ariito ŋice ka Ŋiyudayan, toriito ŋice ka Ŋikiyakia. 5Totukut nai ŋulu pa arae Ŋiyudayan ka Ŋiyudayan kaapei ka ŋikarikok kec akibuŋa ka akicak Ŋikiyakia a ŋamoru. 6Ani eyenunete Ŋikiyakia ŋakiro ŋun, tosiwa toloto Listra ka Derube, lotaunio ŋulu ka akwap a Likonia ka nakwapin ŋuna erikaunito. 7Tolimonokis ikes Ŋakiro ŋuna Ajokak lotuŋa aina.
Alo Listra ka Derube
8Ayai Listra ekile ŋolo aŋwalito ŋakejen; aŋwalit iŋes ŋinapei anakidounet ka pa arotonokini jik. 9Apupi iŋes Paulo irworo. Kitek Paulo iŋes, ani keanyuwa atemar eyakar anupit akitaŋaleuno, 10tolimu a etoil a ŋolo apolon tema, “Tonyou, towo kitenar!” Tokuraun ekile, torotok. 11Ani iŋolikinete ŋasepico ŋakiro ŋuna abu Paulo kitiya, tocelut a Ŋalikoniae temasi, “Kepotu ŋakujo neni yok esibito ŋituŋa!” 12Tomaikis ikes Baranaba ekiro ŋolo enyaritae Seus, tomaikis Paulo ekiro ŋolo enyaritae Eremes, anerae arae ekerworon ŋolo apolon. 13Yau esacaradoti ŋolo ka akuj a ŋina anyaritae Seus a ŋina ayai akai keŋ kiŋaren etaun, ŋimoŋin ka ŋatur lokekia ŋulu ke etaun, anerae acamito iŋes ka ŋituŋa aarakin amuronot Lokiyakia.
14Ani iirarete Baranaba ka Paulo ŋakiro ŋun, tociliciliyasi ŋilowi kec, toema tooma nasepico a ŋituŋa iworoete ebasi, 15“A ŋikilyok, kaanukiro itiyaata iyes nu? Isua daŋ ikirae ŋituŋa ikwa iyes! Ikiyaunit isua Ŋakiro ŋuna Ajokak neni kus, ikotere kibelekinos anakujo a ŋuna koŋinae neni ka Akuj a ŋina eyari. Iŋes erae Akuj ŋina asubi kidiama ka akwap, anam ka ŋiboorei daadaŋ ŋulu eyakasi tooma kec. 16Ananyameta a ŋuna amunyarosi, abu Akuj tocamak ŋakwapin akitiya ŋuna acamito. 17Tari kikote nen, itoodiunit iŋes jwi jwi akiteyenunet ŋina ka ayakau keŋ aloboro a ŋulu ajokak, a ŋulu itiyae iŋes; ikiinunui iŋes akiru alokidiama ka ŋapakio ŋuna elemeneneere; ikisimuji iŋes iyes ka ikitalakanari iyes.” 18Ani tari kirwor Ŋikiyakia ŋakiro ŋun, pa apatana ikes akiretakin ŋasepico aarakin ikes amuronot.
19Nai aponito nen Ŋiyudayan alo Antiokio ka Ikonio, kicocoiyasi ikes ŋasepico, kitiriwo lowae kec; ido kimasamasata Paulo a ŋamoru, kiriyasi kiŋa etaun etamete atemar kori atwana. 20Nai ani etukokinosi ŋikanupak neni keŋ, tonyou iŋes, toboŋo toloma lotaun. Akoloŋit ŋina atupakini, tonyout iŋes ka Baranaba, toloto Derube.
Toboŋosi Paulo ka Baranaba Antiokio
21Tolimonokis Paulo ka Baranaba Ŋakiro ŋuna Ajokak alo Derube. Ani kedaut aryamun ŋikanupak ŋulu alalak, toboŋosi Antiokio, kitoro Listra ka Ikonio. 22Kitogogoŋo ikes ŋikanupak, kisimukekis arubakin ananupit. Kitatama ikes ŋikanupak ebe, “Itemokino iwon etoro locan ŋulu alalak, eriŋa nyelomara Napukan ka Akuj.” 23Toseut nai Paulo ka Baranaba ŋikatukok a ŋinatukot a Ŋikristo, ŋulu epolokinete ikes. Alotooma ŋakilipeta ka akikany akimuj, apotu Ŋikiyakia kicikakis ikes neni ke Ekapolon, a ŋolo anupito ikes.
24Ani kiryam ikes akwap ŋina a Pisidia, potu neni anyaritae Pampilia. 25A nen, tomora mono Ŋakiro ŋuna Ajokak alotaun a ŋolo anyaritae Periga, toloto nai ŋolo anyaritae Atalia. 26A nen, todoka ikes ameeli, toboŋosi Antiokio, etaun ŋolo ayai Siria, neni ecikakinitae ikes anajokis a ŋina ka Akuj aŋuna ke etic a ŋolo tokona adaut ikes akirikakin.
27Ani edolunete ikes Antiokio, tocunakis ŋikanupak, tolimokis ikes ŋakiro daadaŋ ŋuna abu Akuj kitiya aneni kec ka epite ŋolo abunio Akuj toŋaarya erot ŋolo enupyata ŋituŋa ŋulu nyerae Ŋiyudayan. 28Kiboiyoto ikes apaki ŋina aoyan a nen erukito ka ŋikasyomak.
Àwon tá yàn lọ́wọ́lọ́wọ́ báyìí:
Ŋitic. 14: NIB2008
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ngakarimojong Interconfessional Bible © Bible Society of Uganda, 2008.