Luka 23
23
Yesũ e mbee wa Vilato, ngavana wa Lomi
(MATHAYO 27.1–2,11–14; MALIKO 15.1–5; YOANA 18.28–38)
1Na ĩkomano yonthe yookĩla, yamũtwaa kwa Vilato. 2#Lk 20.25.Na yambĩlĩlya kũmũvinganĩsya, ĩkyasya, Nĩtũmwonete mũndũ ũũ aiasya, mbaitũ, aimavata kũmũnenga Kaisali koti, akyasya we mwene nĩ Klĩsto, mũsumbi. 3#1 Tim 6.13.Na Vilato amũkũlya, akyasya, Nue mũsumbĩ wa Ayuti? Na amũsũngĩa, amwĩa, Nĩwaneena we. 4Na Vilato amea athembi anene na makomano, Ndiona ũndũ ũtaĩle mũndũnĩ ũũ. 5Ĩndĩ mathetheesya kũneena, makyasya, Ũũ nũnũũthokoan’ya andũ, akĩmanyĩsya Yutia yonthe, kwambĩlĩlya Kalilii kũvika o vaa.
Yesũ e mbee wa Elote
6Na Vilato eew’a ũu, akũlya kana mũndũ ũũ nĩ Mũkalilii. 7#Lk 3.1.Na amanya kana nĩ wa kũla Elote ũsumbĩkĩte, amũtwaĩthya kwa Elote, nũndũ aĩ Yelusaleme matukũ asu.
8 #
Lk 9.9. Na yĩla Elote wamwonie Yesũ, eew’a mũyo mũno: nĩkwĩthĩwa nĩ ĩvinda ĩasa wendie kũmwona, nũndũ nĩwewie ũvoo wake; na endaa kwona kyama kĩkĩkwa nĩwe. 9Na amũkũlya ndeto nyingĩ; ĩndĩ ndaamũsũngĩa ũndũ. 10Na athembi anene na aandĩki maũngama, na makatĩĩa mũno kũmũvinganĩsya. 11Na Elote vamwe na asikalĩ make mamũvũthya na mamũthekeea, na makĩmũvw’ĩka ngũa mbanakavye mamũtũnga kwa Vilato. 12Na mũthenya ũsu Elote na Vilato matuma ndũũ: nũndũ mbee nĩmamenene.
Vilato, Valava, na Yesũ
(MATHAYO 27.15–26; MALIKO 15.6–15; YOANA 18.39—19.16)
13Na Vilato oomban’ya athembi anene, na asumbĩki, vamwe na andũ, 14na amea, Inyw’ĩ nĩmwandetee mũndũ ũũ, ta ũla ũnũkwasya andũ: na sisyai, nĩnamũkũlya mwĩ vo, na ndinona ũndũ ũtaĩle wa mũndũ ũũ maũndũnĩ asu ala mũmũvinganĩsye namo: 15aiee, o na Elote ndanona: nũndũ nĩwamũtũnga kwitũ; na sisyai, vai ũndũ wĩkĩtwe nĩwe ũla ũtuma oawa. 16Kwondũ wa ũu nĩngũmũkũna, na ngĩmũthasya. 17Nũndũ no mũvaka amathaĩsye ũmwe ĩvinda ya mboka. 18Na onthe mookĩlya wasya vamwe, makyasya, Mũvete mũndũ ũũ, noitũthaĩsya Valava: 19nake nĩ ũla wekĩiwe kolokolonĩ nũndũ wa ũng’endu ndũanĩ, na ũndũ wa ũaani. 20Na Vilato aneena nao ĩngĩ, akyenda kũmũthasya Yesũ; 21ĩndĩ mookĩlya mawasya, makyasya, Mwambe, mwambe. 22Nake amatavya ĩngĩ ya katatũ, Nĩkĩ, nĩ ũthũku mwaũ mũndũ ũũ wĩkĩte? Ndinona ũndũ kwake ũtuma oawa: nũndu wa ũu nĩngũmũkũna na ngĩmũthasya. 23Ĩndĩ makatĩĩa ũneena na mawasya manene, makyenda ambwe. Na mawasya moo makĩlya vinya. 24Na Vilato atw’a wĩkwe tondũ mekwenda. 25Na amũthasya ũla wekĩiwe kolokolonĩ nũndũ wa ũng’endu na ũaani, ũla meetisye; ĩndĩ Yesũ anenganwe mamwĩke tondũ mendaa.
Kwambwa kwa Yesũ
(MATHAYO 27.32–44; MALIKO 15.21–32; YOANA 19.17–27)
26 #
Mt 27.32; Mko 15.21. Na mamũtwaĩte, makwata mũndũ ũmwe wetawa Simoni, Mũkulene, wokĩte akyuma ũtee wa ndũa, na mamwilĩĩla ngelan’yo, nĩ kana amĩkue ĩtina wa Yesũ.
27Na avikĩlĩtwe nĩ ĩkomano ĩnene ya andũ, na aka ala mekũnangaa ithũi na kũmũĩĩa. 28Ĩndĩ Yesũ amethyũũĩa amea, Eĩtu ma Yelusaleme, ekai kũndĩĩa nyie, ĩndĩ ĩai kwondũ wenyu ene na syana syenyu. 29#Lk 21.23.Nũndũ sisyai, mĩthenya nĩyũkĩte, yĩla makasya, Nĩ aathime ala ngũngũ, na mavu ala mataasyaa, na nondo itaaongwa. 30#Osea 10.8; Ũvu 6.16; 9.6.Nĩvo ĩndĩ makambĩlĩlya kũtavya iĩma, Tũvalũkĩlei; na tũlĩma, Tũvw’ĩkei. 31#1 Vet 4.17.Nũndũ ethĩwa nĩmekwĩka maũndũ aa mũtĩnĩ mwĩũ, mũtĩnĩ mũmũ kũkekwa ata?
32Na vaĩ angĩ elĩ, andũ athe, matwaĩtwe vamwe nake, moawe.
33Na mavika vandũ vetawa Kĩng’ala, mamwamba vo, vamwe na ala athe, ũmwe ngalĩ ya kw’oko kwa aũme na ũla ũngĩ ngalĩ ya kw’oko kwa aka. 34#Mt 5.44; Isa 53.12; Sav 22.18.Na Yesũ asya, Asa, maekee; nĩkwĩthĩwa matimanya ũndũ mekwĩka. Na maaan’ya ngũa syake, makĩlimana. 35#Sav 22.7.Na andũ maũngeme makĩloela. Na asumbĩki mamũthekeea, makyasya, Nĩwatangĩĩe angĩ; nĩetangĩĩe mwene, ethĩwa ũũ nĩ Klĩsto wa Ngai, ũla, mũnyuve wake. 36#Sav 69.21.Na asikalĩ mamũthekeea o ta ũu, makĩthi vala ũĩ, makĩmũnenga siki, 37makĩmwĩa, Ethĩwa wĩ mũsumbĩ wa Ayuti, ĩtangĩĩe mwene. 38Na vaandĩkĩtwe ũandĩko ĩũlũ wake, atĩĩ, ŨŨ NĨWE MŨSUMBĨ WA AYUTI.
39Na ũmwe wa asu athe ala mambĩtwe vamwe nake amũuma, akyasya, We tuue Klĩsto? Ĩtangĩĩe mwene, naitũ. 40Ĩndĩ ũla ũngĩ asũngĩa, aimũkan’ya, akyasya, Ndũmũkĩa Ngai we, nũndũ wĩ mũsilĩle ũndũ ũmwe nake? 41Naitũ nĩtũsilĩlwe sila wa katĩ; nũndũ nĩtũkũĩvwa kwĩanana na meko maitũ: ĩndĩ mũndũ ũũ ndaaĩka ũndũ ũtaĩle. 42#Mt 16.28.Na amwĩa, Yesũ, wĩndilikana yĩla wĩvika ũsumbĩnĩ waku. 43Yesũ amwĩa, Nĩ w’o nĩngũkwĩa, Ũmũnthĩ ũkeethĩwa vamwe nakwa Ũseonĩ.
Kikw’ũ kya Yesũ
(MATHAYO 27.45–56; MALIKO 15.33–41; YOANA 19.28–30)
44 #
Amo 8.9. Na yu kwaĩ ta syũa yĩkĩũngama, na kwaya kĩvindu nthĩ yonthe kũvika saa kenda, 45#Kuma 36.35; Amo 9.1.kyeni kya syũa kyaaa: na ngũa ya tũtũ ya ĩkalũ yatembũkanĩla katĩ. 46#Sav 31.5; Meko 7.59.Na Yesũ ookĩlya wasya mũnene, na asya, Asa, veva wakwa nĩngũwia mokonĩ maku: na amina kũneena uũ, aumya veva wake. 47Na ũla mũnene wa asikalĩ ĩana oona ũndũ kweekĩka, amũkatha Ngai, akyasya, Nĩ w’o mũndũ ũũ eĩ mũlũngalu. 48Na makomano onthe ala mombanĩte kwĩloela maũndũ asu, yĩla moonie maũndũ ala meekĩka, masyoka makĩkũnanga ithũi syoo. 49#Sav 38.11; 88.8; Lk 8.2.Na onthe ala meesene nake, na aka ala mamũvikĩlĩte kuma Kalilii, maũngeme kũasa, makĩloela maũndũ asu.
Kũthikwa kwa Yesũ
(MATHAYO 27.57–61; MALIKO 15.42–47; YOANA 19.38–42)
50Na ĩndĩ, kwaĩ mũndũ wetawa Yosevu, waĩ wa nzama, nake aĩ mũndũ mũseo na mũlũngalu, 51#Lk 2.25,38.(ndaaĩkĩanĩa namo ũtw’ĩonĩ woo na ũndũnĩ ũla meekie), mũndũ wa Alimathia, ndũa ĩmwe ya Ayuti, ũla weteele ũsumbĩ wa Ngai: 52mũndũ ũsu athi kwa Vilato, na amwĩtya mwĩĩ wa Yesũ. 53Nake awumya nthĩ, na oolingĩla ngũa ya katane, na awia mbũanĩ ĩla yasĩtwe ĩvianĩ, ĩla ĩtaamba kwiwa mũndũ. 54Na mũthenya ũsu waĩ mũthenya wa Ũseũvyo, naw’o mũthenya wa savato wakilĩlye kũvika. 55Na aka, ala maumĩte nake Kalilii, mathi ĩtina, na moona mbũa ĩsu, ũndũ mwĩĩ wake waiĩtwe. 56#Kuma 12.16; 20.10; Ali 23.8.Na masyoka, maseũvya mĩtĩ yĩ mũuke mũseo, na mauta.
Na mathũmũa mũthenya wa savato o ũndũ kwĩaĩtwe.
Àwon tá yàn lọ́wọ́lọ́wọ́ báyìí:
Luka 23: Mbivlia
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
